गिनती 17

हारूनेरी सोटरे मुन्करे

1 तैखन यहोवा मूसे सेइं ज़ोवं, 2 "इस्राएली लोकन सेइं गल्‍लां केरतां तैन केरे सियाना केरे घरां केरे मुताबिक तैन केरे सेब्भी प्रधान्न कां अक-अक सोटी ने; ते तैन बारहे सोटन पुड़ एक्‍की-एक्‍की पुड़ एक्‍की-एक्‍की घरेरे पूर्वज मड़देरू नवं लिख, 3 ते लेवी केरी सोटी पुड़ हारूनेरू नवं लिख। किजोकि इस्राएली केरे सियाना केरे घरानेरी अक-अक प्रधान मड़देरी अक-अक सोटी भोल्ही। 4 ते तैन सोटन मिलापे बाले तेम्बु मां करारेरे सन्दूखे✝17:4 करारेरे सन्दूखे निर्ग. 25:22;26:33-34. अग्गर, ज़ैड़ी अवं तुसन सेइं मिलताईं, रेखी छ़ड। 5 ते ज़ैस मड़दे अवं च़ुनेलो, तैसेरी सोटी गुड्डी निसेली; ते इस्राएली ज़ैना तुसन पुड़ बुड़बड़ाते रहतन, तैन बुड़बुड़ानु अवं एप्पु पुड़ेरां दूर केरेलो।" 6 ते मूसे इस्राएली लोकन सेइं ऐह गल ज़ोई, ते तैन केरे सेब्भी प्रधानेईं अपने लेई अपने-अपने घरानेरे मुताबिक अक-अक सोटी तैस दित्ती, तैना बारहे सोटी भोइ; ते तैन मां हारूनेरी भी सोटी थी। 7 तैना सोटी मूसे करारेरे सन्दूखेरे सामने तेम्बु मां यहोवारे सामने रेखी छ़ेडी। 8 होरसां मूसा करारेरे सन्दूखे कां मिलापे बाले तेम्बु मां जेव, ते कुन हेरते; कि हारूनेरी सोटी ज़ै लेवी केरे घरानेरे लेई थी, तैस गुड्डी लेगोरिन, ते फूड़ू भी फुलोरन, ते बदाम भी लगोरेन। 9 तैखन मूसे तैना सब सोटी यहोवारे सामनेरां केढतां इस्राएली लोकन कां घिन्तां जेव; ते तैनेईं अपनि-अपनि सोटी पिशैनतां नी। 10 फिरी यहोवाए मूसे सेइं ज़ोवं, "हारूनेरी सोटी करारेरे सन्दूखे कां रख, कि ऐह तैन खलाफत केरनेबालां केरे लेई अक निशान बेनतां राए, कि तू तैन केरू बुड़बुड़ानु ज़ैन मेरे खलाफ भोतू रहते, अग्रोवं जो रोकी सकस, एरू न भोए कि तैना मेरि गान।" 11 ते मूसे यहोवारे हुक्मेरे मुताबिके कियूं।

12 तैखन इस्राएली लोक मूसे सेइं ज़ोने लगे, हेर, "इश्शे प्राण निसने बालेन, असां बरबाद भोइ जे, असां सब बरबाद भोइ जेवरेम। 13 ज़ै कोई यहोवारे मिलापे बाले तेम्बु कां नेड़े गाते, तै मारो गाते। त कुन असां सब मेरि गामेले?"