लेवी लोकां केरू नगर
1 फिरी यहोवा मोआबेरे अराबा मां, यरीहो करां यरदन दरियारे बन्ने पुड़ मूसे सेइं ज़ोवं, 2 "इस्राएली लोकन हुक्म दे, कि तुस अपने-अपने हिस्सेरी ज़मीनी मरां लेवी केरे रानेरे लेई नगर देइयथ; ते नगरां केरे च़ेवरे पासन च़ारनेरी ठारां भी तैन देइयथ। 3 नगर त तैन केरे रानेरे लेई, ते चरागा तैन केरे गोरू ते गब्बां, ते सब जानबरां केरे लेई भोल्ही। 4 ते नगरां केरि चरागा, ज़ैना तुस लेवी लोकन देले, तै एक्की-एक्की नगरेरी दिवारी करां च़ेवरे पासन अक-अक हज़ार हथ्थेरी भोल्ही। 5 ते नगरे करां बेइर पूर्व, दक्षिण, पश्चिम, ते उत्तरेरे पासे, दूई-दूई हज़ार हथ इस तरीके सेइं नापनू दूई-दूई हज़ार हथ इस तरीके सेइं नापनू कि नगरेरे मझ़मेइं भोल्ही; लेवी केरे एक्की-एक्की नगरेरी एत्री ज़मीन भोल्ही। 6 ते ज़ैन नगर तुस लेवी लोकन देले तैन मरां शा छ़पनेरां नगरां भोन, ज़ैना तुसेईं खून केरनेबालेरे छ़पनेरे लेई ठहरानां भोल्हां, ते तैन मरां 42 नगरां भी देनां। 7 ज़ेत्रां नगरां तुस लेवी लोकन देले तैना सब 48 भोन, ते तैन सेइं चरागा देनी। 8 ते ज़ैना नगरां तुस इस्राएली लोकां केरि अपनि ज़मीनी मरां देइयथ, तैना ज़ैन केरां बड़ां नगरां भोन तैन करां जादे, ते ज़ैन केरे थोड़े नगर भोन तैन केरां थोड़ू नेइतां देनू; सब अपने-अपने नगरन मरां लेवी लोकन अपने-अपने हिस्सेरे मुताबिक देन।"
खून केरनेबालां केरे लेई छ़पनेरी ठार
9 फिर यहोवाए मूसे सेइं ज़ोवं, 10 "इस्राएली लोकन सेइं ज़ो: ज़ैखन तुस यरदन पार भोइतां कनान मुल्खे मां पुज़थ, 11 त एरे नगर मां ठहरन ज़ैना तुश्शे लेई छ़पनेरू नगर भोन, कि ज़ै कोई कोन्ची गेलती सेइं मैरतां खूनी भोए तै तैड़ी नश्शे। 12 तैना नगरां तुश्शे लेई बदलो नेने करां छ़पनेरे कम्मे मां एज्जन, कि ज़ांतगर खून केरनेबालो न्यायेरे लेई मेण्डलरे सामने खड़ो न भोए तांतगर मारो न गाए। 13 ते छ़पनेरां ज़ैना नगरां तुस देले तैना शा भोन। 14 ट्लाई नगरां त यरदनेरां इस पार, ते ट्लाई कनान मुल्खे मां देनां; छ़पनेरां नगरां एत्रां भोन। 15 इना शाइये नगरां इस्राएली केरे तरफां तैन केरे दरमियाने मां रानेबाले परदेशी केरे लेई छ़पनेरी जगाह भोन, कि ज़ै कोई कोन्ची गेलती सेइं मारे तै तैड़ी जो नश्शे।
16 "पन अगर कोई कोन्ची लोंहेरे हथियार सेइं एन्च़रां बाहे कि तै मेरि गाए, त तै खूनी ठहरेलो; ते तै खूनी ज़रूर मारो गालो। 17 ते अगर कोई एरहो घोड़ हथ्थे मां नेइतां, ज़ैस सेइं कोई मेरि सकते, कोन्ची मारे, त तै भी खूनी ठहरेलो; ते तै खूनी ज़रूर मारो गालो। 18 या कोई हथ्थे मां एरी लकड़ी नेइतां, ज़ैस सेइं कोई मेरि सकते, कोन्ची बाहे त तै मेरि गाए, त तै भी खूनी ठहरे; ते तै खूनी ज़रूर मारो गालो। 19 खूनेरो बदलो नेनो बाले एप्पु तैस खून केरनेबाले मारे; ज़ैखन भी तै मैल्हे तैखने तै तैस मैरी छ़डे। 20 ते अगर कोई कोन्ची बैरे सेइं ढ्लैक दे, या तैस मारनेरे लेई तैस पुड़ एन्च़रे किछ शारे ते तै मेरि गाए, 21 या दुश्मनी सेइं तैस अपने हथ सेइं एन्च़रे बाहे कि मेरि गाए, ते ज़ैनी मारोरो भोए तै ज़रूर मारो गालो; तै खूनी ठहरेलो; खूनेरो बदलो नेनेबाले ज़ैखन भी तै खूनी मैल्हे तैखने तैस मारे।
22 "पन अगर कोई कोन्ची बगैर सोचे, ते बगैर दुश्मनी ढ्लैक दे, या तैस पुड़ किछ शारे, 23 या एरहो कोई घोड़ नेइतां, ज़ैस सेइं कोई मेरि सकते, होरि कोन्ची बगैर लेइतां तैस पुड़ शारे, ते तै मेरि गाए, पन तै न तैसेरो दुश्मन भोए, ते न तैसेरो नुकसान चाने बालो भोए; 24 ते मेण्डलरे मारनेबाले ते खूनेरो बदलो नेने बालेरे दरमियान इन नियमां केरे मुताबिक न्याय केरथ; 25 ते मण्डली तैस खून केरनेबाले खूनेरो बदलो नेनेरे हथ्थे मरां बच़ेइतां तैस छ़पनेरे नगरे मां वापस केरथ ज़ैड़ी तै पेइलो नश्शोरो थियो, ते ज़ांतगर पवित्र तेले सेइं अभिषेक कियोरो महायाजक मेरि न गाए तांतगर तै तैड़ी राए। 26 पन अगर तै खूनी तैस छ़पनेरे ठारारे सरहद्दी मरां ज़ैस मां तै नश्शोरो भोए बेइर निस्तां होरि कोन्ची ठैरी गाए, 27 ते खूनेरो बदलो नेनेबालो तैस छ़पनेरे नगरेरे सरहद्दी करां बेइर मारे, त तै खून केरनेरो दोषी न ठहरे। 28 किजोकि खूनी महायाजकेरी मौती तगर छ़पनेरे नगरे मां राहोरो लोड़ते; ते महायाजकेरे मरनेरां बाद अपनि ठारी जो वापस एज्जी सकेलो।
29 "तुश्शी पीढ़ी-पीढ़ी मां तुश्शे सब रानेरी ठारन मां न्याय केरनेरी ई विधि भोल्ही। 30 ते ज़ै कोई कोन्ची मैन्हु मारे तै गवाहां केरे ज़ोनेरे मुताबिक मारो गालो, पन एक्की गवाहेरे गवाही सेइं मारो न गालो 31 ते ज़ै खूनी मौतरे सज़ाहरे काबल भोए तैस मौतरी सज़ारे बदले मां जुर्मानो न नियो गालो; तै ज़रूर मारो गालो। 32 ते ज़ै कोई कोन्ची छ़पनेरे ठारी मांजो नश्शोरो भोए तैसेरेलेइ भी इस मतलबे सेइं जुर्मानो न नेनो, कि तै याजकेरे मरने करां पेइलो फिरी अपने मुल्खे मां रानेरे लेई वापस एज्जे। 33 एल्हेरेलेइ ज़ैस मुल्खे मां तुस राले तैस तुस अशुद्ध न केरथ; खूने सेइं त मुल्ख अशुद्ध भोते, ते ज़ैस मुल्खे मां ज़ैखन खून कियो गाए त तैखन सिर्फ खून केरनेबालेरे खूने सेइं तैस मुल्खेरो प्रायश्चित भोइ सकते। 34 ज़ैस मुल्खे मां तुस राले तैस मां अवं रालो, तैस अशुद्ध न केरथ; अवं यहोवा त इस्राएली लोकन मां रहताईं।"