1 एक्सां इस्राएली लोक तैन केरि सेखतरे वजाई सेइं शिकायत केरने लगे ते यहोवारे शुन्ते बुरू ज़ोने लगे; तैखन यहोवाए तैन शुनू, त तैसेरो क्रोध तैन पुड़ भेड़की जेव, ते यहोवारी अग तैन केरे दरमियाने मां बलने लगी, ते डेरन एक्‍की पासेरां भस्म केरने लगी। 2 तैखन इस्राएली लोक मूसे कां एइतां चिन्डां मारने लगे; ते मूसे यहोवा कां प्राथना की, तैखन तै अग हिश्शी जेई। 3 ते तैस ठारारू नवं तबेरा* पेवं, किजोकि यहोवारी तरफां अग तैन केरे दरमियाने मां बलने लगोरी थी।

4 फिरी ज़ै मिली-जुली भीड़ तैन सेइं साथी थी, तैना सुवादे बाली रोट्टी खानेरू लालच़ केरने लगे; तैखन फिरी इस्राएली लोक लेरां देने ते ज़ोने लगे, "असन मास खाने जो कौन देलो? 5 असन तैना मेछ़ली याद एइतिन, ज़ैना अस लोक मिस्रे मां मुफ्त खाते थिये, ते तेन्च़रे तैना कैकड़ी, ते हिन्दाना, ते गन्दने, गंढे, ते थूम भी; 6 पन हुनी इश्शो दिल डेरि जेवरोए, ते इड़ी इस मन्ना छ़ेडतां होरू किछ न लेइहोए।" 7 मन्नो त धानेइयरो ज़ेरो थियो, पन तैसेरो रंग रूप मोती केरो ज़ेरो थियो। 8 लोक डेरां केरे इरां उरां गेइतां मन्नो च़ुनते थिये, ते तैस हिड्लाटे मां पीहते थिये, या उखले मां खनते थिये, ते फिरी पतीले मां उबालते थिये, ते फिरी तैसेरे फुलके पकाते थिये, फिरी तैसेरो सुवाद तेले मां बनोरी लुच्‍ची केरो ज़ेरो भोतो थियो। 9 ते राती डेरन मां ओश पेती थी, ते तैखन तैस सेइं साथी मन्नो भी साथी बिछ़ड़तो थियो। 10 ते मूसे सेब्भी घराना केरे मैन्हु अपने-अपने डेरेरे दारे पुड़ लेरां देते शुने; ते मूसे भी तैन केरू बुड़बुड़ानु बुरू लग्गू, तैखन यहोवारो क्रोध तैन पुड़ भड़को। 11 ते तैखन मूसे यहोवा सेइं ज़ोवं, "तीं अपने दासे पुड़ ई मुसीबत किजो आनी? ते कुन वजाए कि मीं तेरी नज़री मां अनुग्रह किजो न मैल्हो, कि तीं एन लोकां केरो भार मीं पुड़ छ़डोरोए? 12 कुन एना सारे लोक मेरे कोखी मां पेवरे थिये? या कुन मीएं तैना पैदा कियोरे थिये, ज़ै तू मीं सेइं ज़ोतस, कि ज़ेन्च़रे बाजी दुद्ध पीते बच्‍चे कुम्मे मां छ़ुइतां च़लाते, तेन्च़रे अवं तैन लोकन अपने कुम्मे मां छ़ुइतां तैस मुल्खे मां पुज़ेइलो, ज़ै मुल्ख मीं तैन देनेरी कसम तैन केरे दादे-पड़दादन सेइं खेवरी थी? 13 मीं एत्रू मास कोड़ि मैल्हे, कि अवं एत्रे लोकन देईं? एना त एन ज़ोइतां मीं कां लेरां लगोरेन देने, कि तू असन मास खाने जो दे। 14 अवं अकैल्‍लो एन सेब्भी लोकां केरो भारो छ़ुई न सेखी, किजोकि ऐह मेरे लेई बड़ो भारीए। 15 ते अगर तीं मीं सेइं एहे बर्ताव केरनोए, त मीं पुड़ तेरो एत्रो अनुग्रह भोए कि तू मेरे प्राण अकदम ने, ज़ैस सेइं कि मीं अपनि बुरी हालत न हेरनी पे।"

16 यहोवाए मूसे सेइं ज़ोवं, "इस्राएली लोकन मरां 70 बुज़ुर्ग अकोट्ठे केर, ज़ैन तू ज़ानतस कि तैना लोकां केरे सियाने ते प्रधान आन, ते तैन मिलापे बाले तेम्बु कां आन, कि तैना तीं सेइं साथी खड़े भोन। 17 तैखन अवं ओस्तां तीं सेइं गल्‍लां केरेलो, ते ज़ै परमेशरेरी आत्मा तीं पुड़ आहे, तैस मरां किछ केढतां अवं तैन मां छ़डेलो, ते तैना इन लोकां केरो भार तीं सेइं साथी छ़ुवाले, ते तीं अकैल्‍ले न छ़ूनो पे। 18 ते लोकन सेइं ज़ो, ‘कालां जो अपनो आप पवित्र केरा, तैखन तुसन मास खाने जो मैल्हनूए, किजोकि तुस यहोवारे शुन्ते एन ज़ोइतां लेरां देते थिये, कि असन मास खाने जो कौन देलो? असां मिस्र मुल्खे मां रोड़े थिये, एल्हेरेलेइ यहोवा तुसन मास खाने जो देलो, ते तुस खाएले। 19 फिरी तुस अक दिहाड़ी या दूई, या पंच़ या 10, या 20 दिहाड़े नईं, 20 पन पूरे महीने खांते राले, ज़ांतगर तैन तुश्शे नक्‍केरां बत्तां न निस्से, ते तुसन तैसेरी च़िढ़ न भोए, किजोकि तुसेईं लोकेईं यहोवा ज़ै तुश्शे मझ़ाटे खड़ोए, घटिया समझ़ोरोए, ते तैसेरे सामने एन ज़ोइतां लेरां लगे देने, कि असां मिस्र मुल्खे मरां किजो निस्तां आए?’"

21 फिरी मूसे जुवाब दित्तो "ज़ैन लोकां केरे मझ़ाटे अवं आईं, तैन मां शा लख त सिपाही आन; ते तीं ज़ोवरूए कि अवं तैन एत्रू मास देलो, कि तैना पूरे महीने खांते राले! 22 कुन तैना सब भैड्डां-छ़ेल्‍ली बेछ़ी-दांत तैन केरे लेई मारे गान, कि तैन मास मैल्हे? कुन तैन केरे लेई समुन्दरेरी सैरी मेछ़ली अकोट्ठी की गान, कि तैन मास मैल्हे?"

23 यहोवाए मूसे जुवाब दित्तो, "कुन मेरो हथ छोट्टो भोवरोए? हुनी तू हेरेलो कि मेरू वचन ज़ैन मीं तीं सेइं ज़ोवरू थियूं, तैन पूरू भोते कि नन्ना।" 24 तैखन मूसो बेइर गेइतां प्राजारे लोकन यहोवारी गल्‍लां शुनेई छ़ेडी, ते तैन केरे बुज़ुर्ग लोकन मरां 70 मैन्हु अकोट्ठे केरतां मिलापे बाले तेम्बु कां च़ेवरे पासन खड़े किये। 25 तैखन यहोवा बिदलारी मरां ओस्सो ते तैनी मूसे सेइं गल्‍लां की, ते ज़ै आत्मा तैस मां थी, तैस मरां किछ केढतां तैन 70 बुज़ुर्ग लोकन मां छ़डी, ते ज़ैखन तै आत्मा तैन मां अई, तैखन तैना नबूवत केरने लगे, पन फिरी बादे मां न की। 26 पन दूई मैन्हु डेरन मां राहोरे थिये, ज़ैन मरां एकेरू नवं एलदाद, ते होरेरू नवं मेदाद थियूं तैन मां भी आत्मा अई, एना भी तैन्ने मरां थिये, ज़ैन केरां नंव्वां लिखां जेवरां थियां, पन तेम्बु कां न थिये जेवरे, पन तैना डेरन मां नबूवत केरने लगे। 27 तैखन केन्चे जुवाने देवड़तां मूसे इस गल्‍लरे बारे मां ज़ोवं, कि एलदाद, ते मेदाद, डेरन मां नबूवत केरने लगोरेन। 28 तैखन नूनेरू मट्ठू यहोशू, ज़ै च़ुनोरे बहादरन मरां थियो तै बचपनेरो देते मूसेरी सेवा केरतो थियो, तैनी मूसे सेइं ज़ोवं, "हे मेरे मालिक मूसा, तैन्न रोक।" 29 पन मूसे ज़ोवं, "कुन तू मेरी वजाई सेइं ज़लतस? भलू भोथू कि यहोवारे प्राजारे सारे लोक नबी भोथे, ते यहोवा अपनि आत्मा तैन सेब्भन मां छ़डेथो!" 30 तैखन फिरी मूसो इस्राएली बुज़ुर्गन सेइं साथी डेरे मां च़लो जेव।

31 तैखन यहोवारी तरफां अक बड़ी आँधी अई, ते तैना समुन्दरेरे पासेरां बटेरां उडरतां डेरन मां ते तैन केरे च़ेवरे पासन एत्री एई कि एक्‍की दिहाड़ेरी बत्ती तगर कोई दूई हथ उच्‍चे पुड़ उडरने लगे। 32 लोकेईं उठतां तैस सैरी दिहैड़ी ते सैरी राती, ते होरसां भी सैरी दिहैड़ी बटेरां ट्लाते राए, ते ज़ैनी घटे करां घट जम्हां कियोरे थिये, तैनी दश होमेर जम्हां कियोरे थिये, ते तैना डेरन मां च़ेवरे पासन शुकानेरे लेई खिलैरतां छ़ेडी। 33 मास हेजू तैना मसां खेइ राहोरे थिये, त हेजू तैनेईं खेवरू भी न थियूं, त यहोवारो क्रोध तैन पुड़ भड़को, त तैनी तैना बेड़ि बुरी हालती सेइं मारे। 34 त तैस ठारारू नवं किब्रोतहत्तावा* पेवं, किजोकि ज़ैन लोकेईं मास खानेरी खुवैइश कियोरी थी, तैना तैड़ी दब्बे जे। 35 फिरी इस्राएली लोक किब्रोतहत्तावा मरां अग्रोवं निस्तां हसेरोत नव्वेंरी ठारी पुड़ पुज़्ज़े, ते तैड़ी राए।