1 फिरी यहोवा मूसे ते हारूने सेइं ज़ोवं, 2 "यहोवारे दित्तोरे कानूनेरे हुक्मेरी ई ज़रूरते; तू इस्राएली लोकन सेइं इन ज़ो, कि मीं कां अक लाल बगैर नुक्से बछ़ड़ी आन, ज़ैस मां कोई नुक्स न भोए, ते ज़ैस पुड़ कधी जुऊं न भोए रखोरू। 3 तैखन तैस एलीआजर याजके कां देथ, किजोकि तै तैस डेरन करां बेइर ने, ते कोई तैस एलीआजर याजकेरे सामने बलिदान केरे; 4 तैखन एलीआजर याजक अपने एंगलोई सेइं थोड़ो ज़ेरो खून नेइतां मिलापे बाले तेम्बेरे सामने सत फेरेईं छ़िड़के। 5 तैखन कोई तैस बेछ़ड़री खाड़ी, मास, ते खून, ते गोबरे समेत तैसेरे सामने फुक्‍के; 6 ते याजक गैइड़ेरी लकड़ी, अक जूफा ते अक लाल रंगेरो कपड़ो ज़ैस अग्गी मां बछ़ड़ी फुकोती भोए तैस मां छ़डे। 7 तैसेरां बाद याजक अपना लिगड़ां धोए, ते निहान दे, एसेरां बाद तै डेरन मां त एज्जे, पन ड्लवझ़ी तगर तै अशुद्ध रालो। 8 ते ज़ै मैन्हु तैस फुकेलो, तै भी पैनी सेइं अपना लिगड़ां धोए, ते निहान दे, ते ड्लवझ़ी तगर तै अशुद्ध रालो। 9 फिरी कोई शुद्ध मैन्हु तैस बेछ़ड़री मांज़न अकोट्ठी केरतां डेरे केरे बेइर कोन्ची शुच्‍ची ठारी पुड़ रख्खे; फिरी तै मांज़न इस्राएली लोकां केरी मेण्डलरे लेई अशुद्धताई करां छुटानेरे लेई रख्खी गाए, तै त पापबलिए। 10 ते ज़ै मैन्हु तैस बेछ़ड़री मांज़न अकोट्ठी केरतां अपना लिगड़ां धोए, ड्लवझ़ी तगर तै अशुद्ध रालो। ते तै इस्राएली लोकां केरे लेई, ते तैन मां रानेबाले परदेशी केरे लेई भी अक हमेशारी विधि राहेली।

11 "ज़ै कोन्ची मैन्हेरी लाशी सेइं हुरेलो, तै सत दिहाड़न तगर अशुद्ध रालो; 12 एरहो मैन्हु ट्लेइयोवं दिहाड़े पाप छुटेइतां अपनो आप साफ केरे, त तै सत्तोवं दिहाड़े शुद्ध भोल्हो; पन अगर तै मैन्हु ट्लेइयोवं दिहाड़े पाप छुटेइतां अपनो आप साफ न केरे, त तै सत्तोवं दिहाड़े भी शुद्ध न भोल्हो। 13 अगर कोई कोन्ची मैन्हेरी लाशी सेइं हुरतां पाप छुटेइतां अपनो आप शुद्ध न केरे, तै यहोवारे मिलापे बाले तेम्बेरी ठारारी अशुद्ध केरनेबालो भोल्हो, ते तै मैन्हु इस्राएली लोकन मरां नाश कियो गालो; किजोकि अशुद्धताई करां छुटाने बालू पानी तैस पुड़ छ़िड़कोरू नईं, एस्से वजाई सेइं तै अशुद्ध रालो, तैसेरी अशुद्धता तैस मां बनोरी राहेली।

14 "अगर कोई मैन्हु डेरे मां मेरि गाए, त कानून ईहीए, कि ज़ेत्रे तैस डेरे मां भोन या तैस मां गान, तैना सब सत दिहाड़न तगर अशुद्ध राले। 15 ते हर अक खुल्‍लू भांड ज़ैस पुड़ कोई ढकन न भोए, तैन भी अशुद्ध रालू। 16 ते ज़ै कोई खुल्‍ले मैइदाने मां तलवारी सेइं मारोरे, या कोन्ची मुड़दे सेइं या कोन्ची मैन्हेरी हेड्डी सेइं, या कोन्ची कब्री सेइं हुरे, त तै सत दिहाड़न तगर अशुद्ध रालो। 17 अशुद्ध मैन्हेरे लेई फुकोरी पापबेलरी किछ मांज़न नेइतां भांडे मां छ़ेडतां तैस मां नागेरू पानी छ़डू गाए; 18 तैखन कोई शुद्ध मैन्हु जूफा नेइतां तैस पैनी मां डोबतां पानी तैस डेरे पुड़ ते ज़ेत्रां भांडां ते मैन्हु तैस मां भोन, तैन पुड़ छ़िड़के, ते हेड्डरे, या मर्रोरे, या मर्रोरे जिसमे या कोन्ची कब्री सेइं हुरने बाले पुड़ छ़िड़के; 19 तै शुद्ध मैन्हु ट्लेइयोवं दिहाड़े ते सत्तोवं दिहाड़े तैस अशुद्ध मैन्हु पुड़ छ़िड़के, ते सत्तोवं दिहाड़े तैस करां पाप छुटेइतां तैस साफ केरे, तैखन तै अपना लिगड़ां धोइतां निहान देइतां ड्लवझ़ी जो तै शुद्ध भोल्हो।

20 "ज़ै कोई अशुद्ध भोइतां अपनो पाप छुटेइतां अपनो आप साफ न केरे, तै मैन्हु यहोवारी पवित्र ठारारो अशुद्ध केरनेबालो भोल्हो, एस्से वजाई सेइं तै मेण्डली मरां नाश कियो गालो; अशुद्धताई करां छुटाने बालू पानी तैस पुड़ छ़िड़कू गाए, एस्से वजाई सेइं तै अशुद्ध रालो। 21 ते ऐह तैन केरे लेई हमेशारी विधि भोल्ही, ज़ै अशुद्धताई करां छुटाने बालू पानी छ़िड़के तै अपना लिगड़ां धोए, ते ज़ै मैन्हु अशुद्धताई करां छुटानेबाले पैनी सेइं हुरे, तै भी ड्लवझ़ी तगर अशुद्ध रालो। 22 ते ज़ैस कोन्ची चीज़ी सेइं तै मैन्हु हुरे, तै भी अशुद्ध भोल्ही, ते ज़ै मैन्हु तैस चीज़ी सेइं हुरे तै भी ड्लवझ़ी तगर अशुद्ध भोल्ही।"