1 एन हेरतां कि यहोवा इस्राएली लोकन बरकते दुवानी, बिलाम पेइलेरो ज़ेरो शगुन हेरनेरे लेई यहोवा कां न जेव, पन अपनु तुत्तर सुनसान ठैरारे पासे कियूं। 2 ते बिलामे एछ़्छ़ी उब्री की, ते इस्राएली लोक अपने गोट्ले-गोट्लेरे मुताबिक बस्सोरे लाहे, ते परमेशरेरी आत्मा तैस पुड़ उतरी। 3 तैखन तैनी अपनि डुग्घी गल शुरू की, ते ज़ोने लगो,

"बोरेरे मट्ठे बिलामेरी ऐह वाणी आहे,

ज़ैस मैन्हेरी एछ़्छ़ी साफ च़ारे हेरतिन, तैसेरी ई वाणी आहे,

4 परमेशरेरे वचना केरो शुन्ने बालो,

ज़ै झुकतां बिशोरो ते ज़ैनी खुल्‍ली एछ़्छ़ेईं सेइं सर्वशक्तिमान परमेशरेरू दर्शन लाहेरूए,

तैसेरी ऐह वाणी आए,

5 हे याकूब, तेरे डेरे,

ते हे इस्राएल, तेरो तेम्बु केत्रो रोड़ोए।

6 तैना त वैदी केरे ज़ेरे,

ते दरियाएरे बन्ने बागां केरे ज़ेरे एरे फैलोरेन,

ज़ेन्च़रे कि यहोवारे लेवरे अगर बुट,

ते पैनेरे नेड़ेरे गैइड़।

7 ते तैन केरे घड़न मरां पानी बेइरोवं निसेलू,

ते तैसेरू बीज़ पैनी बाले उडारन मां पेलू,

ते तैसेरो राज़ो अगाग मुल्खेरे राज़े करां भी महान भोल्हो,

ते तैसेरू राज़ बद्धतू गालू।

8 तैस मिस्र मुल्खे मरां परमेशरे केढतां एन्ही राहोरोए,

तैस त जंगली दांतेरी ज़ेरी ताकते,

कौमां कौमरे लोक ज़ैना तैसेरे दुश्मन्न, तैन तै खेइ गालो,

ते तैन केरी हेड्डी केरे टुक्ड़े-टुक्ड़े केरतां खालो,

ते अपने तीरन सेइं तैन छ़िन्देलो।

9 तै शिकार केरनेरे लेई छ़ेपतां बिशोरोए,

तै मारनेबाले शेर या शेरनरो ज़ेरो लेटोरोए; हुनी तैस सेइं कौन छ़ेड़े?

ज़ै कोई तीं आशिर्वाद दे, तैस बरकत मैल्हे,

ते ज़ै कोई तीं लानत दे तै भी लानती भोए।"

10 तैखन बालाके बिलामे पुड़ बड़ो क्रोध अव; ते तैनी हथ्थे पुड़ हथ मैरतां बिलामे सेइं ज़ोवं, "मीं तू अपने दुश्मन लानत देनेरे लेई कुजेवरो थियो, पन तीं तैन ट्लाई बार बरकते बरकत दित्तोरीए। 11 एल्हेरेलेइ तू हुनी एपनी ठारी पुड़ जो नश; मीं त सोचोरू थियूं कि अवं तेरी बड़ी आदर केरेलो, पन हुनी यहोवाए तू आदर हासिल केरने करां रोकतां रखोरोस।" 12 बिलामे बालाके सेइं ज़ोवं, "ज़ैना दूत तीं मीं कां भेज़ोरे थिये, कुन मीं तैन सेइं भी न थियूं ज़ोवरू, 13 कि चाहे बालाक अपने घरे सोन्ने चैंदी सेइं भेरतां भी मीं किना दे, तांभी यहोवारो हुक्म ट्लोड़तां अवं अपने मने सेइं न त भलू केरी सकताईं, ते न बुरू, ज़ैन किछ यहोवा ज़ोलो, तैन्ने अवं ज़ोलो?

14 "हुनी शुन, अवं अपने लोकन कांजो वापस च़लो गाताईं, पन अवं पेइले तीं खबरदार केरताईं कि एजने बाले दिहाड़न मां तैना लोक तेरे लोकन सेइं कुन-कुन केरेले।"

15 फिरी बिलाम अपनि गल शुरू केरतां ज़ोने लगो;

"बोरेरे मट्ठे बिलामेरू एन ज़ोनू आहे,

कि ज़ैस मैन्हेरी एछ़्छ़ी बन्द थी तैसेरू एन ज़ोनू आहे,

16 परमेशरेरे वचना केरो शुन्ने बालो,

ते परमप्रधान परमेशरेरे ज्ञानेरो ज़ान्ने बालो,

ज़ैस सर्वशक्तिमान परमेशरेरू दर्शन लेइहोते,

तैस कां झुकतां खुल्‍ली एछ़्छ़ी सेइं हेरतां ज़ोने बालेरू एन ज़ोनूए:

17 अवं तैस हेरेलो त सही, पन हुन्ना नन्ना,

अवं तैस लाहेलो सही, पन नेड़ेरां नन्ना,

याकूबे मरां अक तारो निसेलो,

ते इस्राएले मरां अक राज़दण्ड निसेलो;

ज़ै मोआबेरी सरहद* चूर-चूर केरेलो,

ते सेब्भी शेतेरे मट्ठां* केरो नाश केरेलो।

18 तैखन एदोम ते सेईर भी ज़ैना तैसेरे दुश्मन्न,

दूईये तैसेरे हथ्थे मां पेले,

ते इस्राएल ज़ीत हासिल केरतो गालो।

19 ते याकूबे मरां अक प्रधान एज्जेलो, ज़ै अधिकार रखेलो,

ते नगरे मरां बच़ोरे लोकां केरो भी सत्यानाश केरेलो।"

20 फिरी तैनी अमालेकी लोकन पुड़ नज़र देइतां अपनि गल शुरू की, ते ज़ोने लगो,

"अमालेकी गैर कौमन मां बड्डो त आहे,

पन आखर तैसेरो नितीजो तुबाही आहे।"

21 फिरी तैनी केनी लोकां केरे पासे तेकतां अपनि गल शुरू की, ते ज़ोने लगो,

"तेरी रानेरी ठार मज़बूत त आहे,

ते तेरो आल्हो चट्टानी पुड़े;

22 तांभी केन उज़ड़ी गालो,

ते आखरी मां अश्शूर तीं गुलाम बनेइतां घिन्नी गालो।"

23 फिरी तैनी अपनि गल शुरू की,

ते ज़ोने लगो,

"अफ़सोस, ज़ैखन परमेशर एन केरेलो, तैखन कौन ज़ींतो बच़ेलो।

24 तांभी कित्ती लोकन कां ज़िहाज़न बाले एइतां अश्शूरे ते एबेरे भी दुख देले;

ते आखरी तैसेरो भी नाश भोइ गालो।"

25 तैखन बिलाम च़लो जेव, ते एपनी ठारी पुड़ जो वापस अव; ते बालाके भी अपनि बत ट्लाती।