1 ज़ैस वक्ते यहोवाए सीनै पहाड़े पुड़ मूसे सेइं गल्‍लां की, तैस वक्ते हारून ते मूसेरी खानदानी ई थी। 2 हारूनेरां मट्ठां केरां नंव्वां इना आन: तैसेरू बड्डू मट्ठू नादाब, ते फिरी अबीहू, एलीआजर, ते ईतामार। 3 हारूनेरां मट्ठां ज़ैना अभिषेक कियोरे याजक थिये, ते तैना याजकेरू कम केरनेरे लेई च़ुनोरे थिये, तैन केरां नंव्वां इना आन: 4 नादाब ते अबीहू, ज़ैस मौके सीनैरे सुनसान ठैरी मां यहोवारे सामने तै अग घिन्तां जे ज़ेसेरे बारे मां यहोवा मनाह कियोरू थियूं, तैखने तैना यहोवारे सामने मेरि जेवरे थिये, ते तैन कोई औलाद न थी, ते एलीआजर ते ईतामार अपने बाजी हारूने सेइं साथी याजकेरू कम केरते राए।

5 फिरी यहोवाए मूसे सेइं ज़ोवं, 6 "लेवी गोट्लेरे लोकन नेड़े एन्हतां हारून याजकेरे सामने खड़े केर, कि तैना सेवाई मां तैसेरी मद्दत केरन। 7 ज़ैन किछ तैसेरी तरफां ते सारे मेण्डलरे तरफां तैन दित्तू गाए, तैना मिलापे बाले तेम्बु कां तैसेरी हेरगेश केरन, एन्च़रे सेइं तैना मिलापे बाले तेम्बु कां सेवा केरन। 8 तैना मिलापे बाले तेम्बेरे सारे सामानेरी ते इस्राएली लोकां केरि सौंफोरी चीज़ां केरि रोड़ेच़ारे हेरगेश केरन, एन्च़रे सेइं तैना मिलापे बाले तेम्बेरी सेवा केरन। 9 ते तू लेवी लोकन हारून ते तैसेरे मट्ठन सौंफी दे, किजोकि तैना इस्राएली लोकां केरी तरफां पूरे तरीके सेइं अर्पण कियोरे भोन। 10 हारून ते तैसेरे मट्ठन याजकां केरे पेदवी पुड़ ठहरा, ते तैना अपनो याजक पद सम्भालन, ते अगर कोई परदेशी पवित्र ठारारे नेड़े एज्जे त तै मारो गालो।"

11 फिरी यहोवाए मूसे सेइं ज़ोवं, 12 "शुन इस्राएली केरां सब ज़ेठां मट्ठां केरे बदले, अवं इस्राएली लोकन मरां लेवी लोकन नेताईं, एल्हेरेलेइ लेवी लोक मेरे भोल्हे। 13 सब ज़ेठां मट्ठां मेरां आन, किजोकि ज़ेइस मीं मिस्र मुल्खे मां सब ज़ेठां मट्ठां मारोरां थियां, तेइस मीं कुन मैन्हु कुन जानबर, इस्राएली केरां सब ज़ेठां मट्ठां अपने लेई पवित्र ठहरावरां थियां, एल्हेरेलेइ तैना मेरां भोन, अवं यहोवा आईं।"

14 फिरी यहोवाए सीनैरे सुनसान ठैरी मां मूसे सेइं ज़ोवं, 15 "लेवी लोकन मरां ज़ेत्रे नर एक्‍की महीनेरे या तैस करां जादे उमरारे भोन, तैन केरे सियाना केरे घरानेरे ते कुलां केरे मुताबिक गन।" 16 ऐह हुक्म मैलतां मूसे यहोवारे ज़ोनेरे मुताबिक तैना गने। 17 लेवेरे मट्ठां केरां नंव्वां इना आन, गेर्शोन, कहात, ते मरारी। 18 ते गेर्शोनेरां मट्ठां ज़ैन सेइं तैसेरे कुल च़ले, तैन केरां नंव्वां इना आन, लिब्नी ते शिमी। 19 कहातेरां मट्ठां ज़ैन सेइं तैसेरे कुल च़ले, तैन केरां नंव्वां इना आन, अम्राम, यिसहार, हेब्रोन, ते उज्जीएल। 20 ते मरारेरां मट्ठां ज़ैन सेइं तैसेरे कुल च़ले, तैन केरां नंव्वां इना आन, महली ते मूशी, एना लेवी लोकां केरे कुल ते तैन केरे सियाना केरे घरानेरे मुताबिक आन।

21 गेर्शोने सेइं लिब्नी ते शिमी लोकां केरे कुल च़ले, गेर्शोनी लोकां केरे कुल एना आन। 22 एन मरां ज़ेत्रे बच्‍चां केरि उमर अक महीनो या तैस करां जादे थी, तैन सेब्भी केरि गिनती 7500 थी। 23 गेर्शोनेरे कुलां केरे लोक पश्चिमेरे पासे अपने डेरे लान। 24 ते गेर्शोनी लोकां केरो पूर्वज ते घरानेरो प्रधान लाएलेरू मट्ठू एल्यासाप भोल्हु। 25 ते मिलापे बाले तेम्बेरी ज़ैना चीज़ां गेर्शोनी लोकन सौंफी गान, तैना इना आन, निवास ते तेम्बु ते तैसेरो ढकनेरो पड़दो ते मिलापे बाले तेम्बेरे दारेरो पड़दो। 26 ते ज़ै अंगन निवास ते वेदी कां च़ेवरे पासने, तैसेरे पड़दे, ते तैसेरे दारेरो पड़दो, ते तैना सब रेस्सी ज़ैना तैस मां कम्मे एइतिन।

27 कहाती लोकां केरे कुल इना आन: कहाते सेइं अम्रामी लोक, यिसहारी लोक, हेब्रोनी लोक ते उज्जीएली लोकां केरे कुल च़ले। 28 एन मरां ज़ेत्रे मट्ठां केरि उमर अक महीनो या तैस करां जादे थी, तैन सेब्भी केरि गिनती केरतां 8600 थी, पवित्र ठारारी हेर गेशारे ज़िमेवार तैन्ना लोक थिये। 29 कहाती कुलां केरे लोक मिलापे बाले तेम्बेरे दक्षिणेरे पासे अपने डेरे लान। 30 कहाती लोकां केरे पूर्वजेरे घरानेरो प्रधान उज्जीएलेरू मट्ठू एलीसापान भोए। 31 ते ज़ैना चीज़ां तैन सौंफी गान, तैना सन्दूख, मेज़, दीवट, वेदी, ते पवित्र ठारारू तैन सामान ज़ैन सेवाई मां कम केरनेरे कम्मे एइते, ते पड़दो ते पवित्र ठारारे कम्मे मां एजनेबालू सारू सामान भोल्हु। 32 ते लेवी लोकां केरे प्रधानां केरो प्रधान हारून याजकेरू मट्ठू एलीआजर भोल्हो, ते ज़ैना लोक पवित्र ठारारी सौंफोरी चीज़न सम्भालन तैन पुड़ तैए प्रधान भोल्हो।

33 फिरी मरारी पूर्वजे सेइं महली ते मूशी लोकां केरे कुल च़ले, मरारी एरे कुल एना आन। 34 एन मरां ज़ेत्रे लोकां केरि उमर अक महीनो या तैस करां जादे थी, तैन सेब्भी केरि गिनती केरतां 6200 थी। 35 ते मरारी पूर्वजेरे कुलेरे घरानेरो प्रधान अबीहैलेरू मट्ठू सूरीएल भोल्हु, एना लोक मिलापे बाले तेम्बेरे उतरेरे पासे अपने डेरे लान। 36 ते तैना चीज़ां मरारी खानदानेरे लोकन सौंफी गान, ते तैना तैन केरि हेरगेश केरन, तैना पवित्र ठारारे तखते, लरां, खम्भे, कुर्सी ते सारू सामान; चाहे ज़ैन किछ तैन केरे लानेरे कम्मे एज्जे। 37 ते च़ेवरे पासां केरे अंगनेरे खम्भे, ते तैन केरि कुर्सी, खुन्डे ते डोरी।

38 ते ज़ैन मिलापे बाले तेम्बु कां सामने, पूर्वेरे पासे ज़ैट्ठां दिहाड़ो निस्ते, अपने डेरे लान, तैना मूसे ते हारून ते तैसेरे मट्ठां केरे डेरे भोल्हे, ते पवित्र ठारारी हेरगेश इस्राएली केरे बदले तैन्ना केरन, ते ज़ै कोई होरो तैस कां नेड़े गालो तै मारो गालो। 39 यहोवारे इस हुक्मेरे मुताबिक एक्‍की महीनेरे या तैस करां जादे उमरारे लेवी मट्ठां मूसे ते हारूने तैन केरे कुलां केरे मुताबिक गने, तैना सब बाई हज़ार थिये।

40 फिरी यहोवाए मूसे सेइं ज़ोवं, "इस्राएली लोकां केरे ज़ेठे मट्ठां केरि उमर अक महीनो या तैस करां जादे भोए, तैन सेब्भी केरू नवं घिन्तां गिनती केर। 41 ते मेरे लेई इस्राएली केरे सब ज़ेठां मट्ठां केरे बदले लेवी लोकन ते इस्राएली केरे जानबरां केरे ज़ेठां केरे बदले लेवी लोकां केरे जानबरन ने, अवं यहोवा आईं।" 42 यहोवारे इस हुक्मेरे मुताबिक मूसे सब इस्राएली ज़ेठां केरि गिनती की। 43 ते सब ज़ेठे नर ज़ैन केरि उमर अक महीनो या तैस करां जादे थी, तैन सेब्भी केरि गिनती 22273 थी।

44 ते तैखन यहोवाए मूसे सेइं ज़ोवं, 45 "इस्राएली लोकां केरे सब ज़ेठां केरे बदले लेवी लोकन ते तैन केरे जानबरां केरे बदले लेवी लोकां केरे जानबरन ने; अवं यहोवा आईं। 46 इस्राएली लोकां केरे सब ज़ेठे मट्ठन मरां ज़ैना 273 गिनती मरां ज़ैना लेवी लोकन करां जादे भोन, तैन केरे छुटानेरे लेई, 47 पवित्र ठारारे शेकेलेरे हिसाबे सेइं हर एक्‍की मड़देरे लेई पंच़ शेकेल ने; मतलब 20 गेरा केरो शेकेल भोए। 48 ते ज़ै रुपेइयो जादे ज़ेठां केरे छुटानेरो रुपेइयो भोल्हो, ते हारूने त तैसेरे मट्ठन देइयथ।" 49 ते ज़ैना इस्राएली ज़ेठां मट्ठां लेवी लोकां केरे ज़िरिये छुटेवरन करां जादे थियां, तैन करां मूसे छुटानेरो रुपेइयो नियो। 50 ते 1365 शेकेल रुपेइये पवित्र ठारारे शेकेलेरे हिसाबे सेइं मैल्हे। 51 ते यहोवारे हुक्मेरे मुताबिक मूसे छुटेवरां केरे रुपेइये हारून ते तैसेरे मट्ठन दित्ते।