गिनती 16

कोरह, दातान ते अबीरामेरी बगावत

1 कोरह ज़ैन लेवेरू पड़पोट्लड़ू, ते कहातेरू पोट्लड़ू, ते यिसहारू मट्ठू थियूं, तैन एलीआबेरू मट्ठू दातान ते अबीराम ते पेलेतेरू मट्ठू ओन, 2 इन ट्लेइयेइं रूबेनी लोकन सेइं मिलतां मेण्डलरे 250 प्रधान ते सभारे प्रधान ज़ैना मुशूर मैन्हु थिये, तैना साथी नीए; 3 ते तैना मूसे ते हारूनेरे खलाफ खड़े भोए, ते तैन सेइं ज़ोने लगे, "तुसेईं बड़ू किछ कियूं, हुनी बस केरा; हुनी सैरी मेण्डली मरां सब मैन्हु पवित्रन, ते यहोवा तैन सेइं साथी रहते; एल्हेरेलेइ तुस यहोवारी मेण्डली मां उच्‍चे दर्जे पुड़ किजो बिशोरेथ?" 4 एन शुन्तां मूसो तुत्तरेरे भारे तल्‍ले मां झुको; 5 फिरी तैनी कोरह, ते सैरी मेण्डली सेइं ज़ोवं, "झ़ेझ़ां यहोवा हेरेलो कि तैसेरो कौने, ते पवित्र कौने, ते तैस एप्पु कां नेड़े कुजालो, ज़ैस तै एप्पु च़ुनेलो, तैस्से तै एप्पु कां भी कुजालो। 6 एल्हेरेलेइ, हे कोरह, तुस सैरी मेण्डली समेत एन केरा, मतलब अपने-अपने धूप बालनेरू धूपदान ठीक केरा; 7 ते कालां तैस मां अग लेइतां यहोवारे सामने धूप देइयथ, तैखन ज़ैस यहोवा च़ुनेलो, तैए पवित्र भोल्हो, हे लेवी लोकव, तुस बेड़ि-बेड़ि गल्‍लां केरतथ, हुनी बस केरा।" 8 फिरी मूसे कोरह सेइं ज़ोवं, "हे लेवी लोकव, शुना, 9 कुन तुस तै निकड़ी गल बुझ़तथ, कि इस्राएलेरे परमेशरे तुस इस्राएलेरी मेण्डली मरां अलग केरतां अपने मिलापे बाले तेम्बेरी सेवा केरने, ते मेण्डलरे सामने खड़े भोइतां तैसेरी भी सेवा केरनेरे लेई अपने नेड़े कुजेवरेथ? 10 ते तू ते तेरे सब लेवी ढ्ला एप्पु कां नेड़े कुजेवरेन? ते फिर भी तुस याजक पदेरी तलाशी मां आथ? 11 ते एस्से वजाई सेइं तीं अपनि सारी मण्डली यहोवारे खलाफ अकोट्ठी कियोरीए, हारून कौने कि तुस तैसेरे खलाफ शिकायत केरतथ?"

12 फिरी मूसे एलीआबेरे मट्ठे दातान ते अबीरामे जो समाद भेज़ो, पन तैनेईं ज़ोवं, "अस तीं कां न एजमेले। 13 कुन ऐह निकड़ी गल्‍ले, कि तीं असां तैस मुल्खे मरां ज़ैस मां दुद्ध ते मैछ़ेरी गड्डां बेगचन, एल्हेरेलेइ केढतां आनोरेम कि जंगले मां मैरी छ़डस, फिरी कुन तू असन पुड़ प्रधान बेनतां अधिकार च़लातस? 14 फिरी तीं असां एरे मुल्खे मां ज़ैड़ी दुद्ध ते मैछ़ेरी गड्डां बेगचन न पुज़ाए, ते न असां ऊडारां ते दाछ़री बागां केरे मालिक बनाए, कुन तू एन लोकां केरि एछ़्छ़न मां धूड़ छ़डेलो*16:14 एछ़्छ़न मां धूड़ छ़डेलो मतलब धोखो देनो? असां त न एज्जम।"

15 तैखन मूसे बड़ी भारी सरक आई, ते तैनी यहोवाए सेइं ज़ोवं, "एन लोकां केरि च़ढ़तलरे पासे नज़र न केर। मीं त एन करां अक गधो भी नईं नीयोरो, ते न तैन मरां केन्चेरो कोई नुकसान कियोरोए।" 16 तैखन मूसे कोरह सेइं ज़ोवं, "कालां तू अपनि सारी मेण्डली साथी एन्हतां हारूने सेइं यहोवारे सामने हज़ार भोइयां; 17 ते तुस सब अपनो-अपनो धूपदान एन्हतां तैस मां धूप देइयथ, फिरी अपनो-अपनो धूप बैलतां ज़ैना 250 भोल्हे, यहोवा कां सामने गेइयथ, खास केरतां तू ते हारून अपनो-अपनो धूपदान नेइतां गेइयथ।" 18 एल्हेरेलेइ तैनेईं अपनो-अपनो धूपदान नेइतां ते तैन मां अग छ़ेडतां धूप छ़डो, ते मूसे ते हारूने सेइं साथी मिलापे बाले तेम्बेरे दारे पुड़ खड़े भोए। 19 ते कोरह सारी मण्डली तैन केरे खलाफ मिलापे बाले तेम्बेरे दारे पुड़ अकोट्ठी की। तैखन यहोवारो तेज मेण्डली लेइहोव।

20 तैखन यहोवाए मूसे ते हारूने सेइं ज़ोवं, 21 "एस मेण्डली मरां अलग भोइ गाथ, कि अवं एन्न एक्‍की पले मां भस्म केरि।" 22 तैखन तैना तुत्तरेरे भारे उन्ढे लिकतां ज़ोने लगे, "हे परमेशर, हे सब प्राणी केरे आत्मारे परमेशर, कुन एक्‍की मैन्हेरे पापेरी वजाई सेइं तेरो क्रोध सैरी मेण्डली पुड़ भोल्हो?" 23 तैखन यहोवाए मूसे सेइं ज़ोवं, 24 "मेण्डलरे लोकन सेइं ज़ो, कि कोरह, दातान, ते अबीरामेरे तेम्बेरे आसे पासेरां दूर भोइयथ।"

25 तैखन मूसो खड़ो उठतां दातान, ते अबीरामे कां जेव, ते इस्राएली लोकां केरे बुज़ुर्ग लोक तैस पत्ती-पत्ती जे। 26 ते तैनी मेण्डलरे लोकन सेइं ज़ोवं, "तुस तैन दुष्टी मैन्हु केरे डेरे करां दूर भोइयथ, ते तैन केरि कोन्ची चीज़ी सेइं न हुरथ, कोन्च एरू न भोए कि तुस तैन केरे सेब्भी पापन मां फेसतां मेरि मिटी गाथ।" 27 एन शुन्तां लोक कोरह, दातान ते अबीरामेरे तेम्बु केरे आसे पासेरां दूर भोइ जे, पन दातान, ते अबीराम निस्तां एपनी कौन्शन ते मट्ठन कुइयन सने अपने डेरेरे दारे पुड़ खड़े भोइ जे। 28 तैखन मूसे ज़ोवं, "एस सेइं तुसन पतो लग्गेलो कि यहोवाए अवं भेज़ोरोईं, कि एन सब कम केरि, किजोकि मीं एपनी मेर्ज़ी सेइं किछ नईं कियोरू। 29 अगर तैन मैन्हु केरि मौत सेब्भी मैन्हु केरे ज़ेरि भोए, ते तैन केरि सज़ाह सेब्भी मैन्हु केरि ज़ेरि भोए, तैखन सेमझ़थ कि अवं यहोवारो भेज़ोरो नईं। 30 पन अगर यहोवा अपनि आजीब शक्ति बांदी केरे, ते ज़मीन अपनु आशी खोलतां तैन ते तैन केरू सब किछ निगली गाए, ते तैना ज़ींते दम्में अधलोके मां पुज़्ज़ी गान, त तुस समझ़ा कि एन मैन्हेइं यहोवारी तुहीन कियोरीए।"

31 तै एना सब गल्‍लां हेजू ज़ोई राहोरो थियो त ज़मीन तैन केरे पव्वन हेठोरां फेटी जेई; 32 ते ज़मीनां अपनु आशी खोल्‍लू, ते तैना ते तैन केरे सारे घरेरू सामान, ते कोरह पत्ती च़लनेबाले सब मैन्हु ते तैन केरि सब जाईदात भी निगली छ़डी। 33 ते तैना ते तैन केरू सब घरबार ज़ींते अधलोके मां पुज़्ज़ी जे, ते ज़मीनां तैना ढेक्‍की छ़डे, ते तैना मेण्डलरे लोकन मरां गाईब भोइ जे। 34 ते ज़ेत्रे इस्राएली लोक तैन केरे च़ेवरे पासन थिये, तैना तैन केरि चिन्डां शुन्तां एन ज़ोइतां नश्शे, "एरू न भोए कि ज़मीन असन भी निगली न गाए!" 35 तैखन यहोवा करां अग निस्सी, ते तैसा तैना 250 धूप च़ाढ़ने बाले भस्म केरि छ़डे।

धूपदान

36 तैखन यहोवाए मूसे सेइं ज़ोवं, 37 "हारून याजकेरे मट्ठे एलीआजरे सेइं ज़ो, कि तैना धूपदानन अग्गी मरां सेल्हतां आन, ते अगरां इरां उरां ठुड़क, किजोकि तैना पवित्र आन। 38 ज़ैनेईं पाप केरतां अपने प्राणां केरो नुकसान कियोरोए, तैन केरे धूपदानां केरे पत्तरे झ़ुसतां बनाए गान, ज़ैस सेइं तै वेदी मढ़नेरे कम्मे मां एज्जी गाए, किजोकि तैनेईं यहोवारे सामने रखोरे थी, एस सेइं तैना पवित्रन, एस्से वजाई सेइं तै इस्राएली लोकां केरे लेई अक निशान बनोरो रालो।" 39 एल्हेरेलेइ एलीआजर याजके तैन पितलरे धूपदानां ज़ैन मां तैन फुकोरे मैन्हेइं धूप च़ाढ़ोरो थियो, नेइतां तैन केरे पत्तरे झ़ुसतां वेदी मढ़नेरे लेई बनावाए, 40 कि इस्राएली लोकन ऐह गल याद राए कि कोई होरो ज़ै हारूनेरे खानदानेरो न भोए, यहोवारे सामने धूप च़ाढ़नेरे लेई नेड़े न गाए, एरू न भोए कि तै भी कोरह ते तैसेरे मेण्डलरे लोकां केरो ज़ेरो नाश भोइ गाए, ज़ेन्च़रे कि यहोवाए मूसेरे ज़िरिये तैस हुक्म दित्तोरो थियो।

हारूनेरे ज़िरिये लोकां केरि हिफाज़त

41 दूइयोवं दिहाड़े सारे इस्राएली लोकां केरि मण्डली एन ज़ोइतां मूसे ते हारूनेरे खलाफ कुड़कुड़ाने लगे, "यहोवारे लोक तीं मारोरेन।" 42 ते ज़ैखन मेण्डलरे लोक मूसे ते हारूनेरे खलाफ अकोट्ठे भोने लगोरे थिये, तैखन तैनेईं मिलापे बाले तेम्बेरे पासे नज़र दित्ती, ते लावं, कि तै बिदलारां छ़ुपेई छ़डोरोए, ते यहोवारी महिमा लेइहोने लगोरीए। 43 तैखन मूसो ते हारून मिलापे बाले तेम्बु कां सामने आए, 44 तैखन यहोवाए मूसा ते हारूने सेइं ज़ोवं, 45 "तुस तैस मेण्डलरे लोकन मरां दूर भोथ, कि अवं एन एक्‍की पले मां भस्म केरतां छ़ेडी।" ते तैखन तैना तुत्तरेरे भारे तल्‍ले मां झुकी जे। 46 ते मूसे हारूने सेइं ज़ोवं, "धूपदाने नेइतां तैस मां वेदी पुड़ेरां अग छ़ेडतां तैस मां धूप छ़ड, ते मेण्डलरे लोकन कां जल्दी सेइं गेइतां तैन केरे लेई प्रायश्चित केर; किजोकि यहोवारो क्रोध तैन पुड़ बड़ो भड़कोरोए, ते महामारी फैलने लगोरीए।" 47 मूसेरे हुक्मेरे मुताबिक हारूने धूप बालनेरू धूपदान नेइतां मेण्डली मां दौड़तो जेव, ते तैनी हेरू कि लोकन मां महामारी फैलने लगोरीए, तैनी धूप बैलतां लोकां केरे लेई प्रायश्चित कियूं। 48 ते तै मुड़दां केरे ते ज़ींतां केरे मझ़ाटे खड़ो भोव; तैखन महामारी रुकी जेई। 49 ते ज़ैना कोरह सेइं साथी हिस्सेदार बेनतां मेरि जेवरे थिये, तैन केरे अलावा ज़ैना लोक इस महामैरी सेइं मेरि जेवरे थिये, 14700 मैन्हु थिये। 50 तैखन हारून मिलापे बाले तेम्बेरे दारे पुड़ मूसे कां वापस जेव, तैखन महामारी रुकी जेई।