1 फिरी यहोवा मूसे सेइं ज़ोवं, 2 "इस्राएली लोकन ऐह हुक्म शुना कि, ‘मेरी च़ढ़तल, मीं खुशबू देनी बाली मेरी हबनेरे रूपे मां मेरी रोट्टी, तुस लोक मेरे लेई ठीक वक्ते पुड़ च़ाढ़नेरे लेई याद रेखथ।’ 3 ते तू तैन सेइं ज़ो: ज़ैन-ज़ैन तुसेईं यहोवारे लेई च़ाढ़नू भोल्हु, तैन इने; मतलब, रोज़ होमबेलरे लेई एक्‍की-एक्‍की सालेरां दूई बगैर नुक्से गबड़ां च़ाढ़ना। 4 अक गबड़ू झ़ेझ़ां ते अक ड्लोझ़रे वक्ते च़ाढ़नू; 5 ते गबड़े सेइं साथी च़ेवरोवं हिस्सो हीन पीड़ोरे तेले सेइं सन्नोरे एपारो दशोवं हिस्सो अट्टेरी अन्न* बलि च़ाढ़नी। 6 ऐह रोज़ेरी होमबलि भोल्ही, ज़ैन सीनै पहाड़े पुड़ यहोवा कां खुश केरनेबालू खुशबूदार हबन केरनेरे लेई रख्खू जेवरूए। 7 तैसेरे पीनेरी च़ढ़तल हर एक्‍की गबड़े सेइं साथी च़ेवरोवं हीन भोए; मादिरारो ऐह पीनेरी च़ढ़तल यहोवारे लेई पवित्र ठारी मां देनी। 8 ते होरू गबड़ू झ़ेझ़ेरे होमबेलरू ज़ेरू ड्लवझ़ी च़ाढ़नू; अन्नबलि ते पीनेरी च़ढ़तली समेत यहोवा कां खुश केरनेबाली खुशबू देने बालू हबन च़ाढ़नू।

9 "फिरी आरामेरे दिहाड़े दूई बगैर नुक्से गबड़ां एक्‍की सालेरां, ते अन्नबलि देनेरे लेई तेले सेइं सन्नोरे एपा दूई दशोवं हिस्सो मैदो पीनेरी च़ढ़तली समेत च़ाढ़नो। 10 रोज़ेरी होमबलि ते तैसेरे पीनेरी च़ढ़तलरे अलावा हर एक्‍की थैकरी दिहाड़ी एहे होमबलि भोल्ही।

11 "फिरी अपने महीनां केरे शुरू मां हर महीने यहोवारे लेई होमबलि च़ाढ़नी; मतलब दूई बछ़ड़ां ते अक हुड़, ते एक्‍की-एक्‍की सालेरां बगैर नुक्से सत गबड़ां; 12 ते हर बछ़ड़े सेइं साथी तेले सेइं सन्नोरो एपारो ट्लाई दशोवं अंश मैदो, ते तैस एक्‍की हुड़े सेइं साथी तेले सेइं सन्नोरे एपारो दूई दशोवं अंश मैदो; 13 ते हर गबड़े सेइं साथी तेले सेइं सन्नोरो एपारो अक दशोवं अंश मैदो, ते सभे अन्नबलि केरतां च़ाढ़नो, तै खुश केरनेबाली खुशबू देनेरे लेई होमबलि ते यहोवारे लेई हबन भोल्हु। 14 ते तैन सेइं साथी ऐह पीनेरी च़ढ़तल भोल्ही; मतलब बछ़ड़े सेइं साथी अध्धो हीन, ते हुड़े सेइं साथी ट्लाई हीन, ते गबड़े सेइं साथी च़ेवरोवं हीन दाछ़रो रस दित्तो गाए, सालेरे सेब्भी महीन्न मां हर महीने एहे होमबलि भोल्ही। 15 ते अक थाव्वो पापबलि केरतां यहोवारे लेई च़ाढ़ो गाए; ऐह रोज़ेरी होमबलि ते तैसेरे पीनेरी च़ढ़तलरे अलावा च़ाढ़ो गाए।

16 "फिरी पेइले महीनेरे च़ेवधोवं दिहाड़े यहोवारू फ़सहेरू तिहार मनावं गाए। 17 ते तैस्से महीनेरे परहनोवं दिहाड़े भी तिहार मनाव गाए; सत दिहाड़न तगर अखमीरी रोट्टी खाइ गाए। 18 पेइले दिहाड़े पवित्र सभा भोए; ते तैस दिहैड़ी कोई भी कम न कियूं गालू; 19 तैस मां तुस यहोवारे लेई हबन, मतलब होमबलि च़ाढ़नी ते दूई बछ़ड़ां ते अक हुड़, ते एक्‍की-एक्‍की सालेरां सत गबड़ां, इन सब बगैर नुक्से लोड़तन; 20 ते तैन केरी अन्नबलि तेले सेइं सन्नोरे अट्टेरी भोल्ही; बछ़ड़े सेइं साथी एपारो ट्लाई दशोवं अंश ते हुड़े सेइं साथी एपारो दूई दशोवं अंश मैदो भोल्हो। 21 ते सत्ते गबड़न मरां हर एक्‍की गबड़े सेइं साथी एपारो अक दशोवं अंश च़ाढ़नो। 22 ते अक थाव्वो भी पापबलि केरतां च़ाढ़नो, ज़ैस सेइं तुश्शे लेई प्रायश्चित केरतां दित्तू गालू। 23 झ़ेझ़री होमबलि ज़ै रोज़ेरी होमबलि ठहरोरीए, तैसेरे अलावा इना च़ैढ़थ। 24 एस्से तरीके सेइं तुस तैन सत्ते दिहाड़न मां हबनेरी रोट्टी च़ैढ़थ, ज़ै यहोवारे लेई खुश केरनेबाली खुशबूअरे लेई भोल्ही, ऐह रोज़ेरी होमबलि ते तैसेरे पीनेरे च़ढ़तलरे अलावा च़ाढ़ी गाली। 25 ते तिहारेरे सत्तोवं दिहाड़े भी तुश्शी पवित्र सभा भोल्ही; ते तैस दिहाड़े मेहनतरू कोई भी कम न कियूं गाए।

26 "फिरी पेइली फसलरे दिहाड़न मां, ज़ैखन तुस अपने कटनेरे तिहारे मां यहोवारे लेई नव्वीं अन्नबलि च़ाढ़ेले, फिरी भी तुश्शी पवित्र सभा भोल्ही; ते तेइस भी मेहनतरू कोई कम न कियूं गाए। 27 ते यहोवारे लेई खुश केरनेबाली खुशबूअरे लेई अक होमबलि च़ाढ़नी; मतलब दूई बछ़ड़ां ते अक हुड़, ते एक्‍की-एक्‍की सालेरां सत गबड़ां; 28 ते तैन केरी अन्नबलि तेले सेइं सन्नोरे अट्टेरी भोल्ही, मतलब, बछ़ड़े सेइं साथी एपारो ट्लाई दशोवं अंश, ते हुड़े सेइं साथी एपारो दूई दशोवं अंश, 29 ते सत्ते गबड़न मरां एक्‍की-एक्‍की गबड़े सेइं साथी एपारो दशोवं अंश मैदो च़ाढ़नो। 30 ते अक थाव्वो भी च़ाढ़नो, ज़ै तुश्शे लेई प्रायश्चित केरनेरे लेई भोल्हो। 31 एना सब बगैर नुक्से लोड़तन; ते ऐह रोज़ेरी होमबलि ते तैसेरी अन्नबलि ते पीनेरे च़ढ़तलरे अलावा ऐह भी च़ाढ़नी।"