1 अवं पौलुस ई चिट्ठी लिखने लगोरोईं। सिलवानुस ते तीमुथियुस भी मीं सेइं साथी आन। थिस्सलुनीकि नगरेरे कलीसियारे विश्वासी लोकन, ज़ैना बाजी परमेशर ते प्रभु यीशु मसीह मां आन, 2 अस प्राथना केरतम कि इश्शे बाजी परमेशर ते प्रभु यीशु मसीह तुसन अनुग्रह ते शान्ति दे।

3 हे ढ्लाव ते बेइनव, तुश्शे बारे मां असेईं हर वक्त परमेशरेरू शुक्र कियेरू लोड़े, ते इन इश्शे लेई ठीक भी आए। एल्हेरेलेइ कि तुश्शो यीशु मसीह पुड़ विश्वास बड़ो बद्धतो गाते, त कने तुश्शो एक्‍की होरि सेइं प्यार केरनो भी बड़ो बद्धने लगोरोए। 4 ई वजाए, कि अस एप्पू परमेशरेरे कलीसियान मां, तुश्शे बारे मां घमण्ड केरतम, चाए तुसन पुड़ मुसीबत या दुख भी एज्जन, फिरी भी तुस सबरी सेइं झ़ैलतथ, ते तुस यीशु मसीह पुड़ विश्वास केरते रहतथ। 5 परमेशर अपनो न्याय हिरानेरे लेई ई स्ताव इस्तेमाल केरेलो, कि तुस परमेशरेरे राज़्ज़ेरे काबल भोथ, ज़ेसेरे लेई तुस दुख भी झ़ैलतथ। 6 परमेशरे हमेशा ठीक तरीके सेइं न्याये केरते, कि ज़ैना तुसन दुख देतन, तैन बदले मां दुख दे। 7 तुस ज़ैना दुख झ़ैलतथ, परमेशर तुसन आराम देलो ते असन भी। इन तेइस भोल्हु ज़ेइस प्रभु यीशु अपने शेक्तिबाले स्वर्गदूतन सेइं साथी बेलति अग्गरे लप्पी सेइं साथी सुर्गेरां एज्जेलो। 8 ते ज़ैना लोक परमेशरे न पिशानन त कने इश्शे प्रभु यीशुएरे खुशखेबरी न मन्न, तैन तै सज़ाह देलो। 9 तैना प्रभुए करां हमेशारे लेई अलग भोल्हे, ते तैसेरे महान शेक्तरे हिस्सेदार न भोल्हे। तै तैन हमेशारी सज़ाह देइतां नाश केरेलो। 10 इना गल्‍लां तेइस भोल्ही ज़ेइस यीशु अपने लोकन करां आदर हासिल केरनेरे लेई वापस एज्जेलो, ते ज़ैना लोक तैस पुड़ विश्वास केरतन तैना हैरान भोल्हे। तुस भी तैन्ने लोकन मरां भोल्हे, किजोकि ज़ै सन्देश असेईं तैसेरे बारे मां तुसन शुनव तुसेईं तैस पुड़ विश्वास कियो। 11 एल्हेरेलेइ अस लगातार तुश्शे लेई प्राथना भी केरतम, कि परमेशर तुसन इस काबल बनाए, ज़ेरि ज़िन्दगी ज़ींनेरे लेई तुस कुजेवरेथ तेन्च़रे तुस ज़ीथ। ते तै तुसन अपने शेक्ति सेइं इस काबल बनालो कि तुस ज़ैना रोड़ू केरथ ते ज़ैन तुस केरनू चाथ, ते ज़ैन कम तुस अपने विश्वासे सेइं केरतथ पूरू केरथ। 12 एन्च़रे इश्शे प्रभु यीशु मसीहेरे नंव्वेरी तुश्शे ज़िरिये बडीयाई भोल्ही। ते तैसेरे ज़िरिये तुसन आदर मैल्हेली। इन सब किछ इश्शे परमेशर त कने प्रभु यीशु मसीहेरे अनुग्रहे सेइं भोल्हु।