नबूकदनेस्सर राज़ेरी तुहीन
28 एन सब किछ नबूकदनेस्सर राज़े पुड़ बितू। 29 बारहे महीने बीतनेरां बाद ज़ैखन तै बाबेलेरे मेहलेरे छती पुड़ हंठने फिरने लगोरो थियो, तैखन तै ज़ोने लगो, 30 "कुन इन बड़ू बाबेल नईं, ज़ै मीं अपने बलबूते पुड़ ते एपनी शेक्ति सेइं शाही मेहल भोनेरे लेई ते अपने शान-ओ-शोकतरे लेई बसाव?" 31 ऐह गल राज़ेरे ज़बाना हेजू निसोरी भी न थी, कि अम्बरेरां आवाज़ आई, "हे नबूकदनेस्सर राज़ा तेरे बारे मां ऐह हुक्म निसोरोए, कि राज़ तेरे हथ्थेरां छुटोरूए, 32 ते तू मैन्हन मरां कढो गालो, ते जंगली जानबरन सेइं साथी रालो; ते दांतां केरो ज़ेरो घास खालो ते सत साल तीं पुड़ एरे बीतेले, ज़ांतगर तू न समझ़ेलो कि परमप्रधान परमेशरे मैन्हन पुड़ हुकूमत केरते, ते तै ज़ैस चाते तैस्से देते।" 33 तैस्से वक्त इन वचन नबूकदनेस्सर राज़ेरे बारे मां पूरू भोवं। तै मैन्हन मरां कढो जेव ते दांतां केरो ज़ेरो घास खाने लगो, ते अम्बरेरी ट्लेली सेइं तै सिज़ने लगो, एड़ी तगर कि तैसेरे बाल उकाबेरे फंघां केरे ज़ेरे लम्मे ते नोहो च़ुड़ोलू केरे पंजां केरे ज़ेरे लम्मे भोइ जे।
नबूकदनेस्सर राज़ो परमेशरेरी तारीफ़ केरते
34 तैन सत सालां केरे बीतने पुड़ मीं नबूकदनेस्सर राज़े सुर्गेरे पासे नज़र दित्ती, ते मेरी अक्ल फिरी ज़ेरि तां तेरही भोइ जेई; तैखन मीं परमप्रधान परमेशरेरी तारीफ़ की, ज़ै हमेशा ज़ींतोए तैसेरी तारीफ़ ते महिमा एन ज़ोइतां केरने लगो:
तैसेरी हुकूमत हमेशा तगरे
ते तैसेरू राज़ पीढ़ी-पीढ़ी तगर कायम रहते।
35 ज़मीनरे सब रानेबाले किछ भी नईं,
ते परमेशर सुर्गेरी सेना, ते धेरतरे रानेबालां केरे मझ़ाटे
अपने मेर्ज़रे मुताबिक कम केरते;
ते तैस कोई भी रोकतां ज़ोईं न सखे, "तीं एन कुन कियोरूए?"
36 तैस वक्त मेरी अक्ल फिरी ज़ेरि थी तेरही भोइ जेई, ते मेरे हुकूमतरी शान-ओ-शोकत फिरी बहाल भोइ जेई, ते मेरू ताज फिरी मीं मैल्हू, ते मेरे मंत्री ते मेरे प्रधान मीं सेइं मुलाकात केरने लगे, ते अवं दुबारो तखते पुड़ बिशालो, ते मेरी इज़्ज़त पेइले करां जादे भोइ जेई। 37 ते हुनी अवं नबूकदनेस्सर सुर्गेरे राज़े परमेशरेरी बडीयाई केरताईं, ते तैसेरी तारीफ़ ते महिमा केरताईं, किजोकि तैसेरां सब कम्मां सच़्च़ां, ते तैसेरो फैसलो धर्मेरो भोते, ते ज़ैना लोक घमण्डे सेइं च़लतन, तैन तै उन्ढे केरि सकते।