1 बाबेल मुल्खेरे राज़े बेलशस्सरेरे राज़ केरनेरे पेइले साले मां, दानिय्येले पलंघे पुड़ अक सुपनु लाव। तैखन तैनी तैन सुपनु लिखू, ते गल्‍लां केरो सारांश भी बियान कियो। 2 दानिय्येले एन ज़ोवं, "मीं राती इन सुपनु लाव, कि भूमध्य-सागरे पुड़ च़ेवरे पासन आँधी च़लने लगी। 3 तैखन समुन्दरे मरां च़ेवर बड्डे-बड्डे हैवान निस्से, ते एक्‍की होरि करां अलग-अलग थिये। 4 पेइलो जानबर शेरेरो ज़ेरो थियो, ते तैसेरां फंघां उकाबेरां ज़ेरां थियां, ते मेरे सामने तैसेरां फंघां उन्ढां कियां ते तै ज़मीनी पुड़ खड़ो केरतां, मैन्हेरो ज़ेरो दूई पव्वन पुड़ खड़ो कियो जेव, ते तैस मैन्हेरो दिल दित्तो जेव। 5 फिरी मीं अक होरो हैवान लाव, ज़ै इछ़ेरो ज़ेरो थियो, ते तै एक्‍की पासे पुड़ खड़ो थियो, ते तैसेरे एशी मां दंतां केरे मझ़ाटे ट्लाई देल्‍लोड़ी थी; ते लोक तैस सेइं ज़ोई राहोरे थिये, ‘उठतां ज़ेत्रू लोकां केरू ज़ेत्रू मास खानू चातस त खा।’ 6 एसेरां बाद मीं नज़र दित्ती ते हेरू कि चीतेरो ज़ेरो अक होरो हैवाने ज़ेसेरे पिठी पुड़ च़ुड़ोलू केरां ज़ेरां च़ेवर फंघन; ते तैस हैवानेरी च़ेवर क्रोड़ी थी; ते तैस राज़ केरनेरो अधिकार दित्तो जेव। 7 फिरी एसेरां बाद मीं सुपने मां लाव, कि अक होरो च़ेवरोवं हैवाने ज़ै बड़ो बड्डो ते डराने बालो ते बड़ो सामर्थीए; ते तैसेरे बड्डे-बड्डे लोंहेरे दंत आन; तै सब किछ खाते ते च़ूर-च़ूर केरतां छ़डते, ते ज़ैन बेंच़ी गाते, तैस पांवेइं सेइं ढ्लेंच़तां छ़डते, ते तै तैन ट्लेइने करां अलगे; कने तैस दश शिंगां आन। 8 अवं तैन शिंगन बड़े ध्याने सेइं तकने लोगोरो थियो त कुन हेरताईं कि तैन केरे मझ़ाटे अक होरू निकड़ू शिंग निस्सु, ते तैसेरी ताकती सेइं ट्लाई शिंगां उखड़ी जेआं; फिरी मीं एन हेरू कि तैस शिंगे मां मैन्हेरी ज़ेरि एछ़्छ़ी, ते तैसेरू आशी बेड्डी-बेड्डी गल्‍लां ज़ोते।"

9 "मीं हेरते-हेरते आखरी मां कुन हेरू, कि तखत रख्खे जे, ते कोई बड़ो पुरानो बुज़ुर्ग तैस पुड़ बिश्शो; तैसेरां लिगड़ां हिंवेरां ज़ेरां सुफेद छ़ित्तां थियां, ते तैसेरे दोग्गेरे बाल खालिस उन्नरा ज़ेरे थिये, तैसेरो तखत अग्गरो ज़ेरो ते तैसेरे पेइहे भेखोरी अग्गरे ज़ेरे लेइहोते थिये। 10 तैस बुज़ूर्गेरे सामनेरां अग्गरो दरिया बगतो थियो; फिरी हज़ारां केरि तैधाती मां लोक* तैसेरी सेवा केरि राहोरे थिये। ते लखेइं लोक तैसेरे सामने हाज़र थिये; फिरी न्यायी भी बिश्शी जे, ते किताबां खोल्‍ली जेई।✝ 11 तैस वक्त मीं निकड़ू शिंग बेड़ि-बेड़ि गल्‍लां केरतू शुनू, ते हेरते-हेरते आखरी मां मीं कुन लावं कि तै हैवान मारो जेव, ते तैसेरो शरीर तैस भेखोरी अग्गी मां भस्म केरतां छ़डो। 12 ते बच़ोरे ट्लाई हैवाना केरो अधिकार थुसोड़ो जेव, पन किछ च़िरे तगर तैना ज़ींते राने दित्ते। 13 मीं राती सुपने मां लावं, ते हेरू, मैन्हेरे मट्ठेरो ज़ेरो कोई अम्बरेरां बिदलारी सेइं साथी एज्जी राहोरो थियो, ते तै तैस बुज़ुर्गे कां पुज़्ज़ो, ते तैनेईं तै नेड़े आनो। 14 तैखन तैस एरू राज़, आदर ते हुकूमत दित्ती जेई, कि मुल्खे-मुल्खेरे लोक ते कौमां-कौमां केरे लोक ते अलग-अलग भाषा केरनेबाले लोक तैसेरे अधीन भोन; तैसेरी हुकूमत हमेशा तगर अटल भोल्ही, ते तैसेरू राज़ कधी भी खतम न भोए।

15 "अवं दानिय्येल अपने दिले मां बड़ो परेशान भोइ जेव, ते ज़ैन किछ मीं लाहेरू थियूं तैसेरी वजाई सेइं अवं डेरि जेव। 16 तैखन ज़ैना लोक तैड़ी तखते कां खड़े थिये, तैन मरां मीं एक्‍की कां गेइतां एन सैरी गल्‍लां केरे बारे मां भेद पुछ़ो, ते तैनी एन ज़ोइतां मीं तैन गल्‍लां केरो मतलब शुनाव, 17 ‘तैन च़ेवर हैवाना केरो मतलब च़ेवर रियासतां आन, ज़ैना इस धेरती पुड़ उभरेली। 18 पन परमप्रधान परमेशरेरे लोक राज़ केरेले ते जुगे-जुगे तैसेरे अधिकारी बनोरे राले।’

19 "तैखन मेरे मने मां ऐह इच्छा भोइ कि च़ेवरोवं हैवानेरो भी भेद ज़ैनी, ज़ै तैन ट्लेइने करां अलग ते डराने बालो थियो ज़ेसेरे दंत लोंहेरे ते नौ पितलरे थिये; तै सब किछ खातो थियो, ते च़कराच़ूर केरतो थियो, ते बच़ोरेन पव्वन हैठ ढ्लेंच़तां छ़डतो थियो। 20 फिरी तैसेरे दश शिंगां केरो भेद, ते ज़ैस नंव्वे शिंगे निस्तां ट्लाई शिंगां बुछ़ोड़ां जेआं, मतलब ज़ैस शिंगेरी एछ़्छ़ी ते बेड़ि-बेड़ि गल्‍लां ज़ोनू बालू आशी ते सब शिंगन करां डराने बालू थियूं, तैसेरो भेद ज़ान्नेरी भी इच्छा मीं भोइ।

21 "ते मीं लाहेरू थियूं कि तैन शिंग पवित्र लोकन सेइं लड़ाई केरतां तैस वक्ते तगर तैन हारांतू भी रावं। 22 ज़ांतगर तै पुरानो बुज़ुर्ग न अव, ते परमप्रधान परमेशरे पवित्र लोक न्यायी न ठहरे, ते तैन पवित्र लोकन राज़ हासिल न भोवं।

23 "तैनी ज़ोवं, तैस च़ेवरोवं हैवानेरो मतलब, अक च़ेवरोवं हुकूमते, ज़ै सैरी धेरती पुड़ सेभी हुकूमतन करां अलग भोल्ही, ते सैरी धेरती नाश केरेली, ते ढ्लेन्च़तां च़ूर-च़ूर केरेली। 24 ते तैन दश शिंगां केरो मतलब ईए, कि तैस हुकूमती मरां दश राज़े खड़े भोल्हे, ते तैसेरां बाद तैन पेइलन करां अलग अक होरो राज़ो खड़ो भोल्हो, ज़ै तैन ट्लेइ राज़न बिछ़ोड़ेलो। 25 ते तै परमप्रधान परमेशरेरे खलाफ गल्‍लां केरेलो, ते तैसेरे पवित्र लोकन पीहतां छ़डेलो, ते मौके ते कानूने बदलनेरी उमीद केरेलो, बल्के सड़े ट्लाई सालन तगर तैना सब तैसेरे कब्ज़े मां छ़डे गाले। 26 पन, तैखन सुर्गेरे आदालती मां न्यायी बिश्शेले, ते तैसेरी हुकूमत थुसोड़तां नाश की गाली; एड़ी तगर कि तैसेरो खातमों भोइ गालो। 27 तैखन राज़ ते हुकूमत ते धेरती पुड़ हुकूमतरी आदर, परमप्रधान परमेशरेरे लोकन मतलब तैसेरे पवित्र लोकन दित्ती गाली, तैसेरू राज़ हमेशारू राज़े, ते तैसेरे सब राज़ केरनेबाले तैसेरे अधीन भोल्हे ते तैसेरो हुक्म मन्नेले।

28 "एस सुपनेरू बियान मीं हुनी केरि छ़डोरूए, पन मीं दानिय्येले अपने मने मां बड़ी घबराट राई, ते अवं हैरान-परेशान भोइ जेव; ते ऐह गल मीं अपने मने मां रखी।"