1 हे बेसमझ़ गलातियारे लोकव, केने तुस टरे लाए? तुश्शे त मना तुश्शे सामने यीशु मसीह क्रूसे पुड़ च़ाढ़ो! 2 अवं तुसन सिर्फ ई सवाल पुछ़नो चाताईं, कि तुसेईं पवित्र आत्मा कुन कानून मन्ने सेइं हासिल कियो? बिलकुल भी नईं, तुसेईं खुशखबरी शुनी ते तैस पुड़ विश्वास की ते पवित्र आत्मा हासिल की। 3 कुन तुस एरे बेसमझ़थ, कि पवित्र आत्मारे रीति पुड़ शुरू केरतथ ते जिसमेरे रीति पुड़ खतम केरेले? 4 कुन तुसेईं सब दुख बेफैइदो झ़ैल्‍ले? अवं उमीद केरताईं बेफैइदो नईं। 5 एल्हेरेलेइ ज़ै तुसन पवित्र आत्मारू दान बड़ू जादे देते ते चमत्कार केरते, कुन तै कानून मन्नेरे वजाई सेइं एन केरते या तुसेईं खुशखबरी शुनी ते तैस पुड़ विश्वास कियो?

6 हुनी अब्राहमेरे बारे मां सोचा, "अब्राहमे परमेशरे पुड़ विश्वास कियो ते तै तैसेरेलेइ धार्मिकता गनो जेव।" 7 एल्हेरेलेइ तुसन एन ज़ान्नेरी ज़रूरते कि ज़ैना अब्राहमेरो ज़ेरो परमेशरे पुड़ विश्वास केरनेबालेन तैन्ना हकीकति मां तैसेरे बच्‍चेन। 8 पवित्रशास्त्रे मां बड़ू पेइलू इन लिखेरूए, कि परमेशर गैर कौमन विश्वासे सेइं धर्मी बनालो, पेइले अब्राहमे ई खुशखबरी शुनाई, "कि तेरे ज़िरिये सेब्भी कौमन बरकत मैल्हेली।" 9 ते ज़ैना अब्राहमेरो ज़ेरो परमेशरे पुड़ विश्वास केरतन, परमेशर तैन सेब्भन बरकत देते ज़ैना मसीह पुड़ विश्वास केरतन ज़ेन्च़रे तैनी अब्राहमे बरकत दित्ती।

10 एल्हेरेलेइ ज़ैना लोक सोचतन कि तैना मूसेरो कानून मेनतां धर्मी बनाए गाले, तैन पुड़ परमेशरेरी लानते, किजोकि मूसेरे कानूने मां लिखेरूए, "कि ज़ै कोई कानूने मां लिखोरे सब कानूनेरे मुताबिक न च़ले, तैस पुड़ परमेशरेरी लानते।" 11 ई गल साफे, कि मूसेरे कानून सेइं परमेशरे कां कोई मैन्हु धर्मी न भोए, "किजोकि ज़ै मैन्हु परमेशरे पुड़ विश्वास केरते, परमेशर तैस धर्मी ठहराते ते तैस हमेशारी ज़िन्दगी मैलतीए।" 12 पन मूसेरे कानूनेरो विश्वासे सेइं कोई वासतो नईं; पन "ज़ै तैन मन्नेलो, तै तैन मन्ने सेइं ज़ींतो रालो।" 13 मसीहे ज़ै इश्शे लेई लानती बनो, तैने अस कीमत देइतां कानूनेरे लानती करां छुटाए किजोकि पवित्रशास्त्रे मां लिखेरूए, "ज़ै कोई क्रूसे पुड़ टंगो गालो तै लानतीए।" 14 मसीहे एन एल्हेरेलेइ कियूं, कि गैर कौमां तैसेरे ज़िरिये तैना सैरी बरकतां हासिल केरन, ज़ैन केरो वाधो परमेशरे अब्राहमे सेइं कियोरो थियो, ते मसीह पुड़ विश्वास केरने सेइं अस पवित्र आत्मा हासिल केरम, ज़ेसेरो वाधो तैने कियोरोए।

15 हे ढ्लाव ते बेइनव, अवं आम ज़िन्दगरी मिसाल देने लगोरोईं, ज़ैखन दूई मैन्हु केरो करार ज़ै पक्‍को भोते, त न कोई तैस टालते ते न तैस मां किछ बद्धाते। 16 ते सारे वाधे परमेशरे अब्राहमे ते तैसेरे खानदाने दित्ते; पवित्रशास्त्र इन न ज़ोए, "कि वंशां," कि बड़ां केरे बारे मां ज़ोवं, पन एक्‍की मैन्हेरे बारे मां ज़ोवं, "कि तेरू वंश इने, ते तै मसीहे।" 17 मेरे ज़ोनेरो मतलब ईए, परमेशरे अब्राहमे सेइं करार केरनेरां बाद 430 सालन पत्ती मूसे कानून दित्तो (ताके तैस करारे पक्‍को केरे), पन अस न ज़ोई बटन कि परमेशरेरो करार ट्लुटो, तैए करार पक्‍कोए, तैए तैस पूरो केरेलो। 18 किजोकि परमेशर असन अपनि बरकत एल्हेरेलेइ न दे कि अस मूसेरे कानूनेरे मुताबिक च़लतम, पन तै एल्हेरेलेइ देते कि तैनी वाधो कियोरोए, परमेशरे अपने अनुग्रहे सेइं अब्राहमे बरकत दित्ती, किजोकि तैनी पेइलो वाधो कियोरो थियो।

19 तैखन, फिरी कानूनेरो कुन मकसद थियो? तै त पापां केरे वजाई सेइं बादे मां दित्तो, ताके तैसेरे वंश मसीहेरे एजने तगर राए, ज़ैस सेइं वाधो कियोरो थियो, परमेशरे स्वर्गदूतां केरे ज़िरिये मूसे कानून दित्तो, ज़ै परमेशर ते लोकां केरि बिचवाई केरनेबालो थियो। 20 परमेशरे एप्पू अब्राहमे सेइं वाधो कियो। एल्हेरेलेइ हुनी बिचवाई केरनेबालेरी कोई ज़रूरत नईं।

21 कुन कानून परमेशरेरे वाधां केरे खलाफे? नईं, कधी नईं! किजोकि अगर एरो कानून दित्तो गाथो ज़ै हमेशारी ज़िन्दगी देइ बटेथो, त सच़्च़े धार्मिकता कानून मन्ने सेइं भोथी। 22 पन पवित्रशास्त्र ज़ोते दुनियारे सब लोक पापेरे अधीन आन, ताके तै वाधो ज़ेसेरी बुनीयाद यीशु मसीह पुड़ विश्वास केरनोए, तैस पुड़ विश्वास केरनेबालां केरे लेई पूरो भोए। 23 पन इस करां पेइले कि लोक मसीह पुड़ विश्वास केरन, मसीहेरे एजने करां पेइले अस यहूदी कैदे मां थिये कानून इश्शी रखवाली केरतो थियो। ते तैस विश्वासे एजने तगर ज़ै बांदो भोनेबालो थियो, अस तैसेरे बन्धने मां रहम। 24 एल्हेरेलेइ कानून मसीह तगर पुज़ानेरे लेई असन बत हिरानेबालो ते सम्भालने बालो भोव, कि अस यीशु मसीह पुड़ विश्वासे केरने सेइं परमेशरेरे सामने धर्मी भोम। 25 पन ज़ैखन मसीह अव ते असेईं विश्वास कियो, त असन ज़रूरत न पेई, कि कानून बत हिराए ते मद्दत केरे। 26 किजोकि तुस सब विश्वास केरने सेइं ज़ै मसीह यीशु पुड़े, परमेशरेरे बच्‍चेथ। 27 ते तुसन मरां ज़ेत्रेइं मसीह मां अक भोनेरे लेई बपतिस्मो नियो, तुसेईं मसीहेरी नव्वीं ज़िन्दगी तेन्च़रे लाई ज़ेन्च़रे लिगड़ां लातन। 28 हुनी मसीह मां कोई फर्क नईं, चाए कोई यहूदीए या गैर यहूदीए, गुलामे या आज़ाद। कोई फर्क नईं मड़दे या कुआन्शे, अस यीशु मसीह मां सब बराबर आम। 29 किजोकि तुस मसीह सेइं साथी अक आथ, त अब्राहमेरे बच्‍चेथ, ते परमेशरेरे वाधेरे मुताबिक बरकतां केरे बारस भी आथ।