1 यीशु यरीहो नगरे मांमेइं निस्तां च़लोरे थियो। 2 तैड़ी अक मैन्हु थियो, ज़ेसेरू नवं जक्‍कई थियूं, तै धड़त घिन्ने बालां केरो अफसर थियो, तै बड़ो अमीर थियो। 3 तैस यीशु हेरनेरो चाऊ थियो, पन तैसेरू कद छोटू थियूं, तांए तै हछे मैन्हन मरां लेई न थियो बटतो। 4 एल्हेरेलेइ तै देवड़तां अगर जेव ते फैगेरे बुट्टे उबरो गुस्सो किजोकि ज़ैखन यीशु एज्जे त तै तैस रोड़ेच़ारे लेही सके। 5 ज़ैखन यीशु तैस ठैरी पुज़ो त तैनी उबरू तेकतां ज़ोवं, "जक्‍कई लूशी उन्ढो ओस, किजोकि अज़ मीं तेरे घरे ट्लाहन च़ारेई एजनूए।" 6 जक्‍कई तैखने उन्ढो ओस्सो ते यीशु बेड़ि खुशी सेइं अपने घरे नियो।

7 एन हेरतां सब लोक शकैइत केरतां ज़ोने लाए, "कि यीशु त एक्‍की पैपी मैन्हेरो मेहमान बनोरोए।"

8 जक्‍कई रोट्टी खांते बारे खड़ो भोइतां प्रभु सेइं ज़ोने लगो, "हे प्रभु यीशु तक अवं अपनि अध्धी जेइदात कंगालन देताईं, अगर केन्चेरू किछ खेवरू भोल्हु त तैस च़ेवरे हिस्से वापस देइलो।" 9 तैखन यीशुए तैस सेइं ज़ोवं, "अज़ इस घरे मां मुक्ति एवरीए, एल्हेरेलेइ इन भी पूर्वज अब्राहमेरू अक मट्ठूए। 10 किजोकि मैन्हेरू मट्ठू यानी अवं होरि लोकन हमेशारी सज़ाही करां मुक्ति देने एवरोईं।"

11 ज़ैखन लोक यीशुएरी गल्‍लां शुन्ने लग्गोरो थिये त तैनी तैन अक मिसाल देइतां ज़ोवं, किजोकि तैना यरूशलेम नगरेरे नेड़े पुज़ोरे थिये ते लोकां केरो खियाल थियो परमेशरेरू राज़ लूशी एजनू आहे। 12 तैनी तैन ज़ोवं, "अक बड़ो अमीर मैन्हु होरि मुल्खे मां च़लो, ताके तैस मुल्खेरो मेंत्रेरो ओदो घिन्तां वापस एज्जे। 13 तैनी अपने सेवादारन मरां दश ज़न्हे कुजाए, ते तैन दश मोहरां देइतां ज़ोवं, ‘मेरे वापस एजने तगर इस पेइंसे सेइं कारोबार केरथ।’ 14 पन तैस ठैरी लोक तैस सेइं नफरत केरते थिये, तैनेईं किछ लोक भेज़तां तैस जो बिस्तार भेज़ो, कि अस न चाम ऐह मैन्हु असन पुड़ राज़ केरे।"

15 "ज़ैखन तै हुकूमतरो ओदो हासिल केरतां वापस अव त तैनी अपने सेवादारे जो समाद भेज़ो। ज़ैना तैनी कारोबारेरे लेई पेइंसे दित्तोरे थिये ताके सेब्भी केरो पतो केरे कि केनि केत्रू कियोरूए। 16 पेइले मैन्हे एइतां ज़ोवं, ‘हे मालिक मीं तेरी दश मोहरन सेइं दश होरि कमैई।’ 17 तैनी तैस सेइं ज़ोवं, ‘तीं दश मोहरन सेइं ईमानदैरी सेइं कम कियूं गा तीं दश नगरन पुड़ अधिकार दित्तो गाते।’ 18 दूइयोवं मैन्हे एइतां ज़ोवं, ‘हे मालिक मीं तेरी पंच़ मोहरन सेइं पंच़ होरि कमैई।’ 19 तैनी तैस सेइं भी ज़ोवं, ‘तीं भी पंच़ नगरन पुड़ अधिकार दित्तो गाते।’ 20 तैखन एक्‍की मैन्हे एइतां ज़ोवं, ‘हे मालिक इना रेइ तेरी मोहरां मीं एन रूमाले मां बेन्धतां रख्खोरी थी।’ 21 किजोकि तू सखत मैन्हु आस ते अवं तीं करां डरतो थियो। किजोकि तू तै चीज़ ज़ै तीं न भोए रख्खोरी तू तैस भी नेतस ते ज़ैन न भोए बेवरू तू तैन भी लुनतस। 22 तैनी तैस सेइं ज़ोवं, ‘हे दुष्ट नौकरा अवं तेरी गल्‍लेईं सेइं तींए मुर्ज़म बनाताई। ज़द तीं पतो थियो, कि अवं बड़ो सखत मैन्हु आईं, ते ज़ै चीज़ मीं नईं रख्खोरी अवं तैस भी सल्हतां ते ज़ैन नईं बेवरू अवं तैन भी लुनतां। 23 फिरी तीं मेरे रुपेइये केन्ची कां किजो नईं रखोरे ताके अवं वापस एइतां तैस करां सूते समेत उसुल केरेथो?’ 24 तैखन तैनी तैन सेइं ज़ोवं, ‘ज़ैन तैड़ी खड़खड़े थिये एस करां एन मोहरां एन्हतां उस देथ ज़ैस कां दश मोहरन।’ 25 तैना ज़ोने लगे, ‘हे मालिक एस कां पेइली दश मोहरन!’ 26 तैनी तैन जुवाब दित्तो, ‘अवं तुसन सेइं ज़ोताईं कि, ज़ैस कां परमेशरेरी मर्ज़ी समझ़नेरी खुवैइश आहे, तैस परमेशर जादे समझ़ देलो। पन ज़ैस कां परमेशरेरी मर्ज़ी समझ़नेरी खुवैइश नईं, तैस करां, थोड़ी ज़ेरि समझ़ ज़ै तैस कांए, तै भी नी गाली।’ 27 पन मेरे इन दुश्मन ज़ैन मीं न थिये सुखाते कि, ऐह असन पुड़ राज़ केरे एन इरां आनां ते मेरे सामने एन मैरी छ़ड्डा।"

28 एना गल्‍लां ज़ोइतां यीशु अपने चेलन सेइं साथी अग्रोवं जेव कि यरूशलेम नगरे मां गाए।

29 ज़ैखन तैना ज़ैतूनेरे पहाड़े बैतफगे ते बैतनिय्याह मां पुज़्ज़े त यीशुए दूई चेले एन ज़ोइतां अग्रोवं भेज़े, 30 "तुस सामने उस ड्लाव्वें मां गाथ ते तैड़ी तुसन अक गधेरो बच्‍चो बन्धोरो मैलनोए। ज़ैस पुड़ अज़ तगर कोई नईं च़ढ़ोरो तैस खोलतां इड़ी मीं कां आनां। 31 ते अगर तुसन कोई पुछ़े, कि तुस एस किजो लगोरेथ खोलने त तुस ज़ोइयथ, कि प्रभुए एसेरी ज़रूरते।"

32 अग्रोवं गानेबाले चेलेईं तैन्ने कियूं ज़ैन यीशुए ज़ोवरू थियूं। 33 ज़ैखन तैना गधेरो बच्‍चे खोलने लग्गोरो थिये त तैसेरो मालिक तैन पुछ़ने लगो, "तुस एस बच्‍चे किजो लगोरेथ खोलने?" 34 तैनेईं जुवाब दित्तो, "प्रभुए एसेरी ज़रूरते।" 35 तैनेईं तै बच्‍चो खोलतां यीशु कां आनो, ते यीशुए तैस पुड़ अपना लिगड़ां छ़ेडतां तैस पुड़ च़ेढ़तां च़लो जेव। 36 ज़ैखन तैना च़लोरे थिये त लोकेईं अपना लिगड़ां बत्ती मां बिछ़ां। 37 ज़ैखन तैना यरूशलेम नगरे नेड़े पुज़्ज़े त ज़ैट्ठां बत ज़ैतून पहाड़े पुड़ेरां उन्ढी गातीए तैड़ी सारे चेलेईं एना चमत्कार हेरतां ते खुशी भोइतां परमेशरेरी तारीफ़ केरने लगे कि,

38 "धने तै राज़ो ज़ै परमेशरे नव्वें सेइं एइते!

ते सुर्गे मां महिमा ते अम्बरे मां शान्ति भोए।"

39 तैन मैन्हन मां किछ फरीसी लोक भी थिये। तैना यीशु सेइं ज़ोने लगे, "हे गुरू अपने चेलन ज़ो कि च़ुप केरन।" 40 यीशुए तैन जुवाब दित्तो, "अवं तुसन ज़ोताईं, अगर एना लोक च़ुप केरन त इना घोड़ ज़ोरे सेइं परमेशरेरी तारीफ़ केरेले।"

41 यरूशलेम नगरे मां पुज़तां यीशु यरूशलेम नगरेरो हाल हेरतां तैस लेरां छुटी। 42 ते ज़ोने लगो, "अगर तुस सिर्फ इस दिहैड़रे बारे मां ज़ानते भोथे, ज़ै तुसन शैन्तरे पासे नेती! पन ई गल हुना तुश्शे एछ़्छ़न करां छ़पोरीए। 43 तीं तैना दिहाड़े हेरने पेनेन ज़ेइस तेरे दुश्मन तेरे च़ेवरे पासन मोरच़ो बेन्धतां ते तीं घेरो देले, ते हर पासेरां तीं पुड़ हमलो केरेले। 44 तुश्शे दुश्मन तुसन नाश केरेले, ते सैरी लोकन मारेले, ते तीं पुड़ घोड़े पुड़ घोड़ बाकी न रालो। किजोकि ज़ेइस परमेशर तुसन बच़ानेरे लेई एवरो थियो तुसेईं न पिशानो।"

45 तैखन तै मन्दरे मां जेव ते तैड़ी तैने बुपारी ते गाक बेइरोवं कढने शुरू किये। 46 तैनी तैन सेइं ज़ोवं, "पवित्रशास्त्रे मां लिखेरूए ‘मेरू मन्दर प्राथनारू घर भोल्हु,’ पन तुसेईं त डैकू केरो अड्डो बनेइतां रखोरोए।"

47 ते तै तैस पवित्र दिहैड़ी मन्दरे मां शिक्षा देतो थियो, पन प्रधान याजक ते शास्त्री लोक यीशु मारनेरी कोशिश मां लग्गोरो थिये। 48 पन तैन एन केरनेरो मौको न थियो मैलतो, किजोकि सारे लोक यीशुएरी गल्‍लां शुन्नेरे लेई च़ेवरे पासन बिश्शोरे रहते थिये।