लूका 20

यीशुएरे अधिकारे पुड़ सवाल

1 एक्‍की दिहाड़े ज़ैखन यीशु मन्दरे मां शिक्षा लगोरो थियो देने, ते तैन खुशखबरी लगोरो थियो शुनाने त प्रधान याजक ते शास्त्री ते यहूदी बुज़ुर्ग यीशु कां पुज़्ज़े। 2 ते तैना ज़ोने लगे, "तू एन सैरी गल्‍लां केसेरे अधिकारे सेइं केरतस या तीं ऐह अधिकारे केनि दित्तोरोए?" 3 यीशु तैन जुवाब दित्तो, "अवं भी तुसन अक गल पुछ़ताई, मीं ज़ोथ। 4 यूहन्नारो बपतिस्मो सुर्गेरे तरफां थियो या मैन्हु केरे तरफां थियो?" 5 तैना एप्पू मांमेइं बेंस केरने लगे, "कि अगर अस ज़ोम, ‘सुर्गेरे तरफां थियो,’ त तै पुछ़ेलो कि, ‘फिरी तुसेईं याकीन की नईं कियेरू?’ 6 पन अगर अस ज़ोम कि, ‘मैन्हु केरे तरफां थियो,’ त लोकेईं असन घोड़ेईं देनिन, किजोकि तैना यूहन्ना नबी मन्ते थिये।" 7 एल्हेरेलेइ तैनेईं जुवाब दित्तो, "कि अस न ज़ानम कि केसेरी तरफां थियो।" 8 यीशु तैन सेइं ज़ोवं, "त अवं भी तुसन सेइं न ज़ोईं कि एना कम्मां केसेरे अधिकारे सेइं केरताईं।"

दुष्ट ज़मीनदारां केरि मिसाल

9 फिरी यीशु तैन लोकन अक मिसाल देइतां ज़ोने लगो, "एक्‍की मैन्हे दाछ़री बाग लाई ते तै ठेकेदारन ठेके पुड़ देइतां एप्पू खरे च़िरे कोस्कोई दूर मुल्खे च़लो जेव। 10 ज़ेइस दाछ़ पकनेरो मौसम अव त तैनी अपनो हिस्सो नेनेरे लेई अक नौकर बागी मां भेज़ो। पन तैनेईं तै खूब कुट्टो ते खाली वापस भेज़ो। 11 ते फिरी तैनी अक होरो नौकर भेज़ो, पन तैनेईं तैसेरी भी बेइज़ती की, ते तै भी झ़ुस कुट केरतां खाली वापस भेज़ो। 12 फिरी तैनी अक ट्लेइयोवं होरो नौकर भेज़ो, पन तैनेईं तैसेरी भी बेइज़ती की ते ज़खमी केरतां कढो। 13 तैखन बागरे मालिके ज़ोवं, ‘अवं अपनु ट्लारू मट्ठू भेज़ताईं शैइद तैना तैसेरो लिहाज़ केरेले।’ 14 पन ज़ैखन ठेकेदारेइं तै लाव त एप्पू मांमेइं मुशोरो केरने लगे, ऐह मालिके, एज्जा एस्से मारम ताके जेइदात इश्शी भोइ गाए। 15 तैनेईं तैन मट्ठू बागी मरां बेइर शैरी छ़ड्डू, ते मारू तुस सोचा कि फिरी बागरे मालिके तैन सेइं कुन केरेलो। 16 ते मालिक एइतां तैन मैरी छ़डेलो ते बाग होरि केरे हवाले केरेलो।" तैनेईं एन शुन्तां ज़ोवं, "परमेशर न केरे एरू न भोए।" 17 तैनी तैन केरे पासे तेकतां ज़ोवं, "फिरी इन कुने ज़ैन पवित्रशास्त्रे मां लिखेरूए कि,

‘ज़ै घोड़ मिस्त्रेईं रद्दी कियो,

तैए घोड़ कूनेरो घोड़ भोल्हो।’

18 ज़ै मैन्हु इस घोड़े पुड़ बिछ़ड़ेलो त तैसेरे टुक्ड़े-टुक्ड़े भोइ गाले, ते ज़ैस उन्ढो ऐह घोड़ बिछ़ड़ेलो तैस ऐह पीतां छ़डेलो।"

महाराज़े जो धड़त देनी

19 शास्त्री लोकेईं ते प्रधान याजकेईं यीशु ट्लानेरी कोशिश की। किजोकि तैना बुझ़ी जेवरो थिये, कि तैनी ऐह मिसाल एन केरे बारे मां शुनेवरी थी, पन तैना लोकन करां डरते थिये। 20 तैना लोक यीशुए ट्लानेरो मौको तोपने लगोरेथ थिये, तैनेईं विश्वासी लोकां केरे रूपे मां जासूस भेज़े ताके तैसेरी कोई गल ट्लेइ सखन ते फिरी राज़ेरे अधिकारे मां देइ देन। 21 तैनेईं यीशु पुछ़ू, "हे गुरू अस ज़ानतम कि तू सच़्च़ो आस ते सच़्च़ेरी शिक्षा देतस, ते केन्चेरी तरफदारी न केरस बल्के सच़्च़े सेइं परमेशरेरी बत्तरी शिक्षा देतस। 22 कुन असन महाराज़े जो धड़त देनी जाइज़े कि नईं?" 23 यीशुए तैन केरि च़लाकी बुझ़तां तैन जो ज़ोवं। 24 "मीं अक दीनार हिराथ ते एस पुड़ केसेरी शकल ते केसेरू नंव्वे?" तैनेईं ज़ोवं, "महाराज़ेरी।" 25 यीशु तैन सेइं ज़ोवं, "ज़ैन महाराज़ेरू तैन महाराज़े जो देथ, ते ज़ैन परमेशरेरू आहे, तैन परमेशरे जो देथ।" 26 ते तैना लोकां केरे सामने तैसेरी कोई गल न ट्लेइ सखे बल्के तैसेरे जुवाबे सेइं तैना हैरान भोइतां च़ुप रेइजे।

मुड़दन मरां ज़ींतू भोनू ते ड्लाह

27 फिरी सदूकी ज़ैन ज़ोते थिये कि मुवोरे ज़ींते न भोन ते फिरी किछ यीशु कां एइतां पुछ़ने लगे। 28 "हे गुरू असन जो मूसेरो हुक्मे कि अगर केन्चेरो ढ्ला अपनि कुआन्शारे भोंते संते ओईट्ल मेरि गाए त तैसेरो ढ्ला तैस कुआन्शी सेइं ड्लाह बनाए, ताके तै अपने ढ्लाएरे लेई औलाद पैदा केरे। 29 सत ढ्ला थिये पेइले ड्लाह बनाव ते ओईट्ले मेरि जेव। 30 फिरी होरे तैस सेइं ड्लाह बनाव। 31 फिरी तैल्‍ला पत्ती ट्लेइयोवं तै कुआन्श रख्खी फिरी एन्च़रे सेइं सत्ते ज़नेईं ड्लाह बनाव, पन सब बेऔलाद मेरि जे। 32 ते आखर्कार तै कुआन्श भी मेरि जेई। 33 ते ज़ींते भोने पुड़ तै केसेरी कुआन्श भोल्ही? किजोकि तै सत्ते ढ्लां केरि कुआन्श बनोरी थी।" 34 यीशुए तैन सेइं ज़ोवं, "इस दुनियारे लोकन मां त ड्लाह बनानेरो दस्तूरे। 35 पन ज़ैना लोक एजने बैली दुनियारे काबल भोल्हे, ते ज़ैना मुड़दन मरां ज़ींते भोल्हे तैना ड्लाह न बनाले। 36 तैना मरेले भी नन्ना एल्हेरेलेइ की तैना स्वर्गदूतां केरे ज़ेरे भोल्हे ते तैन जो ज़ींते भोनेरां ते परमेशरेरां मट्ठां ज़ोले। 37 ते ज़ैड़ी तगर मुड़दां केरो ज़ींते भोनेरी गल्‍ले, ज़ेन्च़रे मूसा नेबेरे ज़लते झ़ैल्‍लोवेरे बारे मां, तेन्च़रे इशारो कियो किजोकि तै परमेशर अब्राहमेरो परमेशर, इसहाकेरो परमेशर ते याकूबेरो परमेशर ज़ोइतां फुकारतो थियो। 38 पन परमेशर मुड़दां केरो नईं बल्के ज़ींतां केरो परमेशरे। किजोकि तैसेरे नेड़े सब ज़ींतेन।" 39 शास्त्री लोकन मरां किछेईं जुवाब दित्तो, "हे गुरू तीं त बड़ू रोड़ू ज़ोवं।" 40 फिरी तैन मरां केन्ची हिम्मत न अई, कि एस होरू किछ पुछ़न।

मसीह केसेरू मट्ठू आहे

41 फिरी यीशुए तैन सेइं ज़ोवं, "फिरी मसीह जो दाऊदेरू मट्ठू केन्च़रे सेइं ज़ोतन? 42 किजोकि दाऊद त एप्पू भजना केरे किताबी मां ज़ोते,

परमेशरे मेरे प्रभु सेइं ज़ोवं,

मेरे देइने पासे बिश।

43 कि ज़ांतगर अवं तेरे दुश्मन तेरे पव्वन हैठ न बिशैली।

44 दाऊद त तैस जो प्रभु ज़ोते, फिरी तैन तैसेरू मट्ठू केन्च़रे भोवं?"

शास्त्री लोकन करां खबरदार राथ

45 ज़ैखन सब लोक शुनी राहोरे थिये त यीशुए अपने चेलन सेइं ज़ोवं, 46 "शास्त्री लोकन करां हुशार रेइयथ तैना लम्मे-लम्मे कुरते लांने पसंद केरतन, ते होरू एन चातन कि लोक बज़ारन मां तैन जो नमस्कार ज़ोन, ते तैना प्राथना घरे मां उच्‍ची कुर्सी तोपतन ते धामन मां बड़े खास बन्नू चातन। 47 तैना विधवां कुआन्शां केरां घरां लुटतन ते लोकन हिरानेरे लेई बड़ी लम्मी प्राथना केरतन। तैन हछ्छी सज़ाह मैल्हनी।"