1 तैन दिहैड़न मां रोम मुल्खेरे महाराज़े औगुस्तुसे एलान कियूं कि, रोमी हुकूमतरे सारे मुल्खां केरे लोकां केरि गिनती की गाए। 2 ऐह पेइली मैन्हु केरि गिनती थी, ज़ै सीरिया इलाकेरे गवर्नर क्विरिनियुसेरे वक्ते मां भोइ। 3 ते सारे लोक, मैन्हु केरि गिनतरे लेई नवं लिखाने अपने-अपने पूर्वजां केरे नगरे जो च़ले जे। 4 यूसुफ भी गलील इलाकेरे नगर नासरते मरां यहूदिया इलाके मां दाऊदेरे नगर बैतलहम मांजो च़लो, किजोकि तै दाऊद राज़ेरे खानदाने मरां थियो। 5 ताके तैड़ी मरियमी सेइं साथी ज़ैस सेइं तैसेरी कुड़माइ भोवरी थी ते तै दोज़ींती थी नवं लिखाए। 6 तैन केरे तैड़ी रेइतां तैसारे गल्हे बिशनेरो वक्त अव। 7 ते तैस पेइलू मट्ठू भोवं ते तैसां तैन फैल्हड़ी मां पलेटतां खुरली मां रख्खू किजोकि तैन धर्मशाली मां कोन्च ठार न थी मैल्होरी।

8 किछ पुहाल राती एक्‍की ड्लबड़े मां गब्बां केरो पेरहो केरते थिये। 9 ते परमेशरेरो स्वर्गदूत तैन कां बांदो भोव ते परमेशरेरी महिमारी लौ तैन केरे च़ेवरे पासन बलने लगी ते तैना बड़े डेरि जे। 10 तैखन स्वर्गदूते तैन जो ज़ोवं, "डरा नन्ना, किजोकि अवं तुसन अक बड़ी खुशखबरी शुनाने एवरोईं, ज़ै खुशी सैरी लोकां केरे लेई भोल्ही। 11 अज़ बैतलहमे मां ज़ैन दाऊद राज़ेरू नगर थियूं, तुश्शे लेई अक मुक्ति देनेबालो ज़र्मोरोए यानी यीशु मसीह प्रभु। 12 तैसेरो तुश्शे लेई ऐह निशान भोल्हो कि तुसन अक मट्ठू फैल्हड़ी मां पलैट्टेरू गाल्हरे बेइर खुरली मां मैल्हेलू।" 13 ते अकदम तैस स्वर्गदूते सेइं होरे भी स्वर्गदूत बांदे भोए ते तैना परमेशरेरी तारीफ़ केरने लगे ते एन ज़ोने लगे,

14 "सुर्गे मां परमेशरेरी महिमा भोए,

ते ज़मीनी पुड़ तैन मैन्हन शान्ति मैल्हे, ज़ैन पुड़ परमेशर खुशे।"

15 ज़ैखन स्वर्गदूत पुहालां केरे सामने वापस सुर्गे मांजो च़ले जे। पुहाल एप्पू मांमेइं ज़ोने लगे, "एज्जा अस बैतलहम नगरे मां गाम ज़ै बिस्तार प्रभुए असन दित्तोरोए तैस हेरम।" 16 एल्हेरेलेइ तैना लूशी तैट्ठां च़ले जे ते तैड़ी पुज़्ज़े ते सच़्च़े तैड़ी मरियम, यूसुफ ते निकड़ो बच्‍चो फैल्हड़ी मां पिलैट्टोरो गोरू केरि गाल्हरे बेइर खुरली मां मैल्हो। 17 ते पुहाल एन हेरतां ज़ै गल तैन एस बच्‍चेरे बारे मां ज़ोवरी थी सेब्भन सेइं ज़ोने लगे। 18 पुहालां केरि गल्‍लां शुन्तां सारे लोक हैरान रेइजे। 19 पन मरियम सैरी गल्‍लां अपने दिले मां रेखतां सोचने लगी। 20 ते पुहालन ज़ेन्च़रे तैनी स्वर्गदूते ज़ोवरू थियूं, तैनेईं अपनि एछ़्छ़ेईं तैन सब किछ लेहितां परमेशरेरी तारीफ़ केरते वापस घरजो च़ले जे।

21 अठोवं दिहाड़े ज़ेइस तैसेरो खतनो केरनेरो वक्त अव त तैसेरू नवं यीशु रख्खू। एन तैन नवं आहे, ज़ैन स्वर्गदूते मरियमरे दोज़ींतीए भोने करां पेइले रखेरू थियूं।

22 ज़ैखन मूसेरे कानूनेरे मुताबिक तैसेरे शुच्‍चे भोनेरे दिहाड़े पूरे भोए, त यूसुफे ते मरियमा यीशु यरूशलेम नगरे मांजो नियो ताके तैस प्रभुए कां अर्पण केरन। 23 ज़ेन्च़रे प्रभुएरे कानूने मां लिखेरूए, "सारां पेइलां मट्ठां परमेशरे लेई पवित्र भोल्हां।" 24 ज़ेन्च़रे प्रभुएरे कानूने मां लिखेरूए कि, "अक जोड़ी गुघू केरि या कबूतरेरे दूई बच्‍चे बलिदानेरे लेई आन।"

25 तैस वक्ते यरूशलेम नगरे मां अक मैन्हु थियो, तैसेरू नवं शमौन थियूं, तै बड़ो धर्मी ते भक्त मैन्हु थियो, तै मसीह बलगने लेवरो थियो, कि तै एज्जेलो ते इस्राएली लोकन शान्ति देलो, ते तैस पुड़ पवित्र आत्मा थियो। 26 पवित्र आत्मा तैस पुड़ बांदू कियूं, कि ज़ांतगर तू प्रभुएरे मसीह न लाहेलो तांतगर न मरेलो। 27 तैस दिहाड़े शमौन पवित्र आत्मा च़लाव, तै आत्मिक शेक्ति सेइं मन्दरे मां अव तैखन यीशु भी तैसेरे अम्मा बाजेईं अन्तर आनोरो थियो, कि तैसेरेलेइ मूसेरे कानूनेरे मुताबिक कमाम। 28 त शमौने बच्‍चो कुम्मे मां ट्लातो ते परमेशरेरी तारीफ़ केरने लगो।

29 "हे प्रभु तीं ज़ै अपनो वाधो कियोरोए

अपने दासे आनन्दे सेइं मरने दे।

30 किजोकि मीं अपने एछ़्छ़ेईं सेइं मुक्ति देनेबालो लाव, ज़ै तीं सैरी लोकां केरे लेई भेज़ोरोए।

31 ज़ै तीं सैरी कौमां केरे सामने तियार कियोरोए।

32 तै, परमेशर गैर कौमन पुड़ बांदो केरनेरे लेई लौ आहे,

ते इस्राएली लोकां केरे लेई अक बड़ी महिमा भोए।"

33 यीशुएरे अम्मा बाजी शमौनेरी एना गल्‍लां शुन्तां हक्‍के-बक्‍के भोए। 34 तैखन शमौने तैन बरकत दित्ती, ते तैसेरी अम्मा मरियमी सेइं ज़ोवं, "हेरा, इन मट्ठू एल्हेरेलेइ ठहरावरू, कि इस्राएले मां बड़े लोकां केरे लेई नाश भोनेरी ते मुक्ति मैल्हनेरी वजा भोए, तै परमेशरेरी तरफां अक निशान आहे पन बड़े लोक तैसेरे खलाफ भोल्हे। 35 ताके बड़े दिलां केरे खियाल खुल्‍ली गान ते तीं बड़ो दुख भोनोए ज़ेन्च़रे तलवार कटतीए।" 36 तैड़ी अक कुआन्श थी ज़ै नबिन थी, तैसारू नवं हन्नाह थियूं, अशेरेरे खानदाने मरां अक मैन्हु ज़ेसेरू नवं फनूएल थियूं, हन्नाह तैसेरी कुई थी तै बड़ी बुढी थी तै अपने ड्लाहेरां बाद सत साल अपने मुन्शे सेइं साथी राहोरी थी। 37 तै विधवा थी तैसारी उमर 84 साल थी तै मन्दरे मरां न थी गाती ते रात दिहैड़ी प्राथना ते कने बरतां रखती ते परमेशरेरी आराधना केरती रहती थी। 38 तैखन तै भी तैड़ी एइतां परमेशरेरू शुक्र केरने लगी ते बच्‍चेरे बारे मां तैन सेब्भन सेइं गल्‍लां लाई केरने, ज़ैना बलगने लोरे थिये कि परमेशरे यरूशलेम नगरेरे लोकन छुटानेरे लेई मसीह भेज़नोए।

39 ज़ैखन मरियम ते यूसुफे मूसेरे कानूनेरे मुताबिक यीशुएरो खतनो कियो, त तैना गलील इलाके मरां अपने नगर नासरते मांजो जे। 40 तैन मट्ठू बेडोतू जेवं ते अक्लमन्द भोतू जेवं किजोकि परमेशरेरो तैस पुड़ बड़ो अनुग्रह थियो।

41 यीशुएरे अम्मा बाजी हर साल फ़सह तिहारेरी दिहाड़ी बनाने यरूशलेम नगरे मां गाते थिये। 42 ज़ैखन यीशु 12 सालां केरो भोव त तैना रीतरे मुताबिक यरूशलेम नगरे मां जे। 43 ज़ैखन तिहार बीतू त यीशुएरे अम्मा बाजी वापस घरजो आए त यीशु यरूशलेम नगरे मां रेइ जेव ते तैसेरे अम्मा बाजी कोई पतो न थियो। 44 तैनेईं बुझ़ू कि यीशु होरि मैन्हन सेइं साथी अग्रोवं जेवरोए, तैना अपने रिश्तेदारन ते ज़ान पिशानी बालन मां तोपने लगे। 45 ज़ैखन तैन यीशु न मैल्हो त तैना वापस तोपते-तोपते यरूशलेम नगरे मां पुज़्ज़े। 46 ट्लेइयोवं दिहाड़े तैन यीशु मन्दरेरे अंगने मां बुज़ुर्ग लोकन सेइं गलबात केरतो ते तैन सेइं सवाल जुवाब केरतो मैल्हो। 47 ज़ैना लोक तैसेरी गल्‍लां शुन्ने लगोरे थिये तैना यीशुएरी गल्‍लां शुन्तां हैरान रेइजे। 48 ज़ैखन तैसेरे हाज बव्वेईं यीशु लाव त तैना हैरान रेइजे ते ज़ोने लगे, "मट्ठां तीं असन सेइं एन कुन कमाव? तेरे हाज बव तीं तोपते-तोपते परेशान भोइ जे।" 49 यीशु तैन सेइं ज़ोवं तुस मीं किजो तोपने लग्गोरो थिये? "तुसन पतो नईं कि मीं अपने बाजेरे घरे मां रानू ज़रूरी थियूं?" 50 पन तैन तैना गल्‍लां केरि समझ़ न आई कि, एन केरो कुन मतलब आहे। 51 तैखन तै अपने अम्मा बाजी सेइं साथी नासरत नगरे मां अव ते अपने अम्मा बाजी कां राव ते मरियमा एना सैरी गल्‍लां अपने दिले मां रेखी।

52 यीशु अक्ली मां भी ते कदे मां भी बेडोतो जेव ते परमेशरेरी ते इन्सानेरी कृपाई मां बद्धतो जेव।