1 एक्‍की फेरे यीशु त तैसेरे चेले आरामेरे दिहाड़े ऊडारन मांमेइं एक्‍की बत्तां च़लोरे थिये, ते तैसेरे चेले शिल्‍लां हथेइं सेइं प्रोड़तां खाने लग्गे। 2 एन लेहितां किछ फरीसी लोकेईं तैन सेइं ज़ोवं, "तुस एन कम किजो लोरेथ केरने, ज़ैन आरामेरे दिहाड़े केरनू जाइज़ नईं?" 3 यीशुए तैन जुवाब दित्तो, "कुन तुसेईं पवित्रशास्त्रे मां कधे नईं पढ़ेरू कि ज़ेइस इश्शो पूर्वज दाऊद राज़ो त तैसेरे साथी ढ्लुखोरे थिये त तैनेईं कुन कियेरू थियूं? 4 तैनेईं केन्च़रे परमेशरेरे घरे मां गेइतां च़ैढ़ोरी रोट्टी खेवरी थी, ते अपने सैथन भी दित्तोरी थी। तैना रोट्टी खैनी सिर्फ याजकां केरे लेई जाइज़ थी।" 5 फिरी तैने तैन सेइं ज़ोवं, "मैन्हेरू मट्ठू, यानी अवं आरामेरे दिहाड़ेरो भी प्रभु आईं।"

6 एक्‍की बार यीशु प्राथना घरे मां गेइतां उपदेश शुनेई राहोरो थियो, ते तेइस भी आरामेरी दिहाड़ी थी तैड़ी अक मैन्हु थियो, ज़ेसेरो देइनो हथ शुक्‍कोरो थियो। 7 शास्त्री त फरीसी लोक यीशुएरी ताकी मां थिये कि अगर यीशु आरामेरे दिहाड़े केन्ची बझ़ालो त असन इलज़ाम लानेरो मौको मैलनोए। 8 पन यीशु तैन केरे बारे मां सेमझ़ी जेव, यीशुए तैस शुक्‍कोरे हथ्थेबाले मैन्हु सेइं ज़ोवं, "मझ़ाटे खड़े भो।" तै खड़ो भोव। 9 तैखन यीशुए तैन सेइं ज़ोवं, "अवं तुसन पुछ़तां कि आरामेरे दिहाड़े भलियाई केरनि रोड़ीए या बुराई केरनि रोड़ीए, मैन्हेरी जान बच़ानी या मारनी?" 10 ते तैनी च़ेवरे पासना तैन केरां तक्‍कू ते तैस मैन्हु जो ज़ोवं, "अपनो हथ हिरा।" तैनी मैन्हे अपनो हथ अग्रोवं कियो। त अकदम तैसेरो हथ बेज़्झ़ोव। 11 पन याजकन त फरीसन बड़ी सरक अई तैना एप्पू मांमेइं बेंस केरने लग्गे, कि असां यीशुए सेइं कुन केरम?

12 तेइस एरू भोवं कि यीशु प्राथना केरनेरे लेई एक्‍की पहाड़े पुड़ च़ढ़ो, ते सैरी राती परमेशरे कां प्राथना केरतो राव। 13 ज़ैखन ट्लेकड़ोने लगू त तैनी अपने चेले एप्पू कां कुजाए ते तैन मरां 12 प्रेरित च़ुने। 14 अक शमौन ज़ैस जो पतरस भी ज़ोते थिये तैसेरो ढ्ला अन्द्रियास, याकूब, यूहन्ना, फिलिप्पुस, बरतुल्मै, 15 मत्ती, थोमा, हलफईरू मट्ठू याकूब, ते शमौन ज़ैस जो जेलोतेस ज़ोतन। 16 ते याकूबेरू मट्ठू यहूदा ते यहूदा इस्करियोती ज़ै तैसेरो ट्लुवांने बालो बनो।

17 तैखन यीशु तैन सेइं साथी चौरस ठैरी मां खड़ो भोव, ते तैसेरे चेले भी तैड़ी अकोट्ठे भोए ते सारे यहूदिया ते यरूशलेम नगरन त कने सूर ते सैदारे आसे पासेरे लोक समुन्दरेरे बन्नेरे बड़े लोक ज़ैना तैड़ी थिये। 18 एन लोक यीशु करां ज्ञान शुन्ने ते अपनि-अपनि बिमैरी तैस कां बझ़ाने एवरे थिये, ते ज़ैन लोकन पुड़ भूतां केरे सैये सेइं दुखे मां थिये तैना भी बेज़्झ़ोइ जे। 19 सब लोक तैस सेइं हथ लांनेरी कोशिश केरते थिये किजोकि तैस मां शक्ति थी ज़ैस सेइं तैना बेझ़ोते थिये।

20 तैखन यीशु अपने चेलां केरे तकने लगो ते ज़ोने लगो,

"परमेशर तुसन बरकत देलो ज़ैना नम्रथ,

किजोकि सुर्गेरू राज़ तुश्शू आहे।

21 परमेशर तुसन बरकत देलो ज़ैना ढ्लुखोरेथ,

किजोकि तुस रज़नेथ,

परमेशर तुसन बरकत देलो ज़ैना अज़ लेरां देतथ,

किजोकि तुसेईं हसनुए।"

22 "परमेशर तुसन बरकत देलो,

ज़ैखन मैन्हेरे मट्ठे, यानी मेरे चेलो भोनेरे वजाई सेइं लोक तुश्शी तुहीन केरन,

ते तुसन भाईच़ारे करां कनारे छ़डेले,

ते तुसन बेइज़त केरेले,

ते तुश्शू नवं केट्टी छ़डेले।"

23 "तैस दिहाड़े खुशी भोइतां उछ़ड़थ, किजोकि हेरा तुश्शे लेई सुर्गे मां बड़ू इनामे। तैन केरे दादे-पड़दादे नेबन सेइं भी एरो ज़ेरो बर्ताव केरते थिये।"

24 "पन अफ़सोस! तुसन पुड़ ज़ैना दौलतमन्दथ,

किजोकि तुसन सब किछ मैलेरूए।

25 अफ़सोस! तुसन पुड़, ज़ैन तुस चाते थिये, तुसन तैन मैल्हू,

किजोकि तुस नियन्ने भोल्हे,

अफ़सोस! तुसन पुड़ ज़ैना अज़ हसतथ

किजोकि तुस शोग केरेले ते लेरां देले।

26 पन अफ़सोस! तुसन पुड़ ज़ैखन लोक तुसन जो भलू ज़ोन,

किजोकि तुश्शे दादे-पड़दादेईं भी झूठे नेबन सेइं एरो बर्ताव कियोरो थियो।"

27 "अवं तुसन शुन्नेबालन सेइं ज़ोताईं कि अपने दुश्मन सेइं प्यार केरा। ज़ैना तुसन सेइं बैर रखतन तैन केरू भलू केरा। 28 ज़ैना तुसन जो बुरू ज़ोतन तुस तैन केरे लेई बरकत मग्गा, ज़ैन तुसन बेइज़त केरन तुस तैन केरे लेई प्राथना केरा। 29 अगर कोई तुश्शे एक्‍की खैखोड़ी पुड़ थप्पड़ बाहे त होरो पासो भी तैसेरे पासे रखा, ते अगर कोई तुश्शू कोट नेते त कमीज़ भी तैस देथ। 30 ज़ै कोई तीं करां किछ मग्गे त तैस देथ अगर कोई तेरो सबाब नेते ते तैस करां वापस न मग्गा। 31 ते ज़ेन्च़रे तुस चातथ कि लोक तुसन सेइं केरन तेन्च़रे तुस भी तैन सेइं तेरहु केरा। 32 अगर तुस तैन्ने सेइं प्यार केरथ ज़ैना तुसन सेइं प्यार केरतन त तुश्शू कुन एवसाने? किजोकि पापी लोक भी अपने प्यार केरनेबालन सेइं प्यार केरतन। 33 अगर तुस तैन केरू भलू केरतथ ज़ैना तुश्शू भलू केरतन त तुश्शू कुन एवसाने? किजोकि पापी लोक भी अपने प्यार केरनेबालन सेइं प्यार केरतन। 34 अगर तुस तैन्ने ओधार देतथ ज़ैन करां तुसन वापस भी मैल्हनेरी उमीदे, त परमेशर तुश्शी बडीयाई किजो केरे? किजोकि बुरे लोक भी अपने प्यार केरनेबालन पेइंसे देतन ताके तैन करां वापस मैल्हन। 35 पन तुस अपने दुश्मन्न सेइं प्यार केरा ते तैन केरू भलू केरा, ओधार देइयथ पन तैन करां वापस मैल्हनेरी उमीद न रेखथ, एल्हेरो सुर्गे मां तुश्शे लेई अक बड़ो फले, किजोकि तुस परमप्रधान परमेशरेरे बच्‍चे भोल्हे, किजोकि तै परमेशर न मन्ने बालन पुड़ ते ज़ालमन पुड़ भी दया केरते। 36 ज़ेरो दया दिल तुश्शो बाजी तेरहे दया दिल तुस भी भोथ।"

37 "दोष न लाथ, तुसन पुड़ भी दोष न लव गालो, निन्दा न केरा, तुश्शी भी निन्दा न की गाली, तुस होरन माफ़ केरेले त तुसन भी माफ़ कियूं गालू। 38 तुस होरि किछ देले त तुसन भी किछ दित्तू गालू तुश्शू बरकतरू भांड ज़ेन्च़रे अन्नेरी हाटी हिलेइतां देइतां तैन भी तेन्च़रे ज़ैस हैटी सेइं तुस होरि केरे लेई मिनतथ तैस्से सेइं तुश्शे लेई भी मिनेले।"

39 यीशुए तैन अक मिसाल शुनाई, "कुन कानो होरि काने बत हेरेई सकते? तैना त दूईये गढे मां बिछ़ड़ेले? 40 चेलो अपने गुरू करां बड्डो न भोए पन हर एक्‍की गल्‍ली मां ज़ैखन सब शिखेलो त अपने गुरेरो ज़ेरो भोल्हो। 41 तू अपने ढ्लाएरी एछ़्छ़ी मां कूड़ो किजो तकतस, पन तेरी एछ़्छ़ी मां त नग आहे, ते तैसेरो तू खियाल भी न केरस? 42 तू अपने ढ्लाए केन्च़रे ज़ोई सकतस कि, ‘तेरी एछ़्छ़ी मरां कूड़ो केढी?’ हे पाखंडी पेइले अपनि एछ़्छ़ी मरां नग कढ फिरी अपने ढ्लाएरी एछ़्छ़ी मरां कूड़ो केढी सकतस।"

43 "किजोकि केन्ची भी रोड़े बुट्टे बुरो फल न लग्गे ते न केन्ची बुरे बुट्टे रोड़ो फल लग्गे। 44 हर बुट अपने फले सेइं पिशैनोते। किजोकि न झ़ैल्‍लन सेइं फैगू लग्गन ते न झ़ैल्‍लन सेइं दाछ़ लगे। 45 रोड़ो मैन्हु अपने दिलेरे रोड़े खज़ाने मरां रोड़ी चीज़ां कढ़ते ते बुरो मैन्हु अपने दिलेरे बुरे खज़ाने मरां बुरी चीज़ां कढ़ते किजोकि ज़ैन दिले मां भरोरू भोते तैन्ने ज़बानी पुड़ एइते।"

46 "ज़ैखन तुस मेरे ज़ोने पुड़ अमल न केरथ त मींजो, ‘हे प्रभु, हे प्रभु,’ किजो ज़ोतथ? 47 ज़ै मीं कां एइते ते मेरी गल्‍लां शुन्तां तैन पुड़ अमल केरते त अवं तुसन सेइं ज़ोताईं कि तै केसेरो ज़ेरो भोल्हो? 48 तै तैस मैन्हेरो ज़ेरोए ज़ैनी अपनु घर डुग्घी खाइ केढतां पेक्‍की ठैरी घर बनावं ज़ैखन हड़ाई आई त तैस घरे किछ न भोवं, किजोकि तैसेरी मुनीयाद पेक्‍की ठैरी थी। 49 पन ज़ै मेरी गल्‍लां शुन्तां तैन पुड़ अमल न केरे त तै तैस मैन्हेरो ज़ेरोए, ज़ैनी अपनु घर रेती पुड़ बनाव ते ज़ैखन हड़ाई अई त तैन घर डुल्‍ली जेवं ते तबाह भोइ जेवं।"