1 थोड़े च़िरेरां बाद एरू भोवं यीशु अपने तैन 12 चेलेन सेइं साथी नगर-नगर ते ड्लाव्वें-ड्लाव्वें हंठतो ते प्रचार केरतो राव, ते परमेशरेरे राज़्ज़ेरी खुशखबरी शुनातो राव। 2 किछ कुआन्शां भी तैन सेइं साथी थी, ज़ैन मरां भूतां केरो सैयो कढोरो थियो। ते ज़ैन केरि बिमैरी दूर भोवरी थी, तैना केरां नंव्वां इना आन, मरियम ज़ै मगदलीन ड्लंव्वेरी रानेबाली थी, ज़ैस पुड़ां सत भूतां केरो सैयो कढोरो थियो, 3 हेरोदेस राज़ेरे भण्ड़ारी खोजेरी कुआन्श योअन्ना ते सूसन्नाह ते होरि भी काई कुआन्शां थी ज़ैना अपनि जेइदात देइतां यीशु ते तैसेरे चेलां केरि सेवा केरती थी।

4 फिरी ज़ैखन बड़े लोक तैस कां अकोट्ठे भोए, ज़ैस मां नगरां-नगरां केरे लोक तैस कां एइते थिये। यीशुए तैन मिसाल देइतां ज़ोवं। 5 "एक्सां अक बीज़ बेनेबालो बीज़ बेने जो जेव। बीज़ बेते बार किछ बीज़ बत्तेरे ड्लेखी बिछ़ड़ू ते अम्बरेरे च़ुड़ोलेईं एइतां तैन बीज़ च़ुनू। 6 ते किछ बीज़ घोड़न बाली ज़मीनी पुड़ बिछ़ड़ू, ते लग्गू पन जल्दी शुक्‍की जेव, एल्हेरेलेइ कि तैस पानी न मैल्हू। 7 किछ बीज़ कंटां केरे झ़ैल्‍लन मां बिछ़ड़ू। ज़ैखन तैड़ी बूटो लगो, त कंटां केरे झ़ैल्‍लेईं भी बेडोइतां तै बूटो दबेइ छ़डो। 8 ते किछ बीज़ रोड़ी ज़मीनी मां बिछ़ड़ू, ते लगू ते शौव गुणा फल लगो," एन शुनेइतां तैनी तैन सेइं उच्‍ची आवाज़ी मां ज़ोवं, "ज़ै कोई समझ़नू चाते, तै ध्याने सेइं शुने ते समझ़े।"

9 तैसेरे चेलेईं तैस पुछ़ू, "एस मिसालरो कुन मतलबे?" 10 यीशुए तैन ज़ोवं, "तुसन परमेशरेरे राज़्ज़ेरे भेदां केरि समझ़ दित्तोरीए, पन अवं होरि लोकन मिसाल देइतां ज़ोताईं,

‘तैन तैना बार-बार शुनेले, पन मेरी गल न समझ़ेले।’

11 "एस मिसालरो ई मतलबे, कि बीज़ परमेशरेरू वचने। 12 ज़ैना मैन्हु परमेशरेरी गल्‍लां शुन्तन, तैन मरां किछ लोक तैस बत्तेरे ज़ेरे आन, ज़ैड़ी बीज़ बिछ़ड़ते। तैना त परमेशरेरी गल्‍लां शुन्तन, पन शैतान अकदम एइतां तैन मैन्हु केरे दिले मरां तैन वचन घिन्नी गाते, कि एरू न भोए कि तैना विश्वास केरन ते तैन मुक्ति मैल्हे। 13 ते घोड़न बाले ज़मीनी मां बेवरू बीज़ तैने, ज़ैना वचन शुन्तां खुशी सेइं मनतन पन ज़ील न छ़डने सेइं तैना थोड़े च़िरे तगर विश्वास रखतन ते अज़मैइशरे मौके मुड़ी गातन। 14 ते ज़ैन झ़ैल्‍लन मां बीज़ झ़ड़ू तैना इना आन, ज़ैना वचन शुन्तन, पन अग्रोवं च़ेलतां फिक्र ते दौलत ते ज़िन्दगरो एशो-अशरती मां फेसी गातन ते तैन केरो फल न पक्‍के। 15 पन रोड़ी ज़मीनी पुड़ेरूए बीज़ तैन्न, ज़ैना वचन शुन्तन ते अमल भी केरतन, ते रोड़ेच़ारे दिले मां बसातन ते सबरी सेइं फल भी लगते।

16 "कोई दीयो बैलतां केन्ची भांडे हैठ ओड़कतां न रख्खे, ते न खट्टी हैठ रख्खे बल्के उच्‍ची ठैरी रखतन ताके दीयो अन्तर एजनेबालन लौ दे। 17 किजोकि कोई एरी चीज़ छ़पोरी नईं, ज़ै बांदी नईं भोनी, ते कोई भेद छ़पोरो न रालो, पन सारो भेद बांदो भोल्हो। 18 बस्सा हुशार राथ, कि तुस केन्च़रे शुन्तथ? ज़ैस कां परमेशरेरी मर्ज़ी समझ़नेरी इच्छा आए, तैस परमेशर जादे समझ़ देलो। पन ज़ैस कां परमेशरेरी मर्ज़ी समझ़नेरी इच्छा नईं, तैस केरां थोड़ी ज़ेरि समझ़, ज़ै तैस कां आहे, तै भी नी गाली।"

19 फिरी तैसेरी अम्मा ते तैसेरे ढ्ला तैस कां आए, पन हछे मैन्हु केरि वजाई सेइं तैस कां न पुज़ी सके। 20 ते यीशुए पतो दित्तो, "तेरी अम्मा ते तेरे ढ्ला बेइर खड़े आन ते तैना तीं सेइं गल केरनि चातन।" 21 यीशुए तैन जुवाब दित्तो, "मेरी अम्मा ते मेरे ढ्ला इना आन ज़ैना परमेशरेरू वचन शुन्तन ते तैस पुड़ अमल भी केरतन।"

22 फिरी एक्‍की दिहाड़े एरू भोवं, कि यीशुए अपने चेलन सेइं ज़ोवं, "एज्जा, समुन्दरे पार गाम ते तैना किश्ती मां च़ेढ़तां समुन्दरे पार च़ले जे।" 23 पन ज़ैखन किश्ती च़लोरी थी, त यीशुए झ़ुल्‍ली जेव ते समुन्दरे पुड़ बड़ो तूफान अव, ते किश्ती पैनी सेइं भेरोने लग्गी, ते तैन खतरो भोइ जेव। 24 चेलेईं तै बींझ़ेइतां तैस सेइं ज़ोवं, "हे गुरू, असां मेरि गातम यीशु खड़े उठो ते हवाई जो ते पैनी जो ज़ोवं, रुकी गाथ ते तूफान रुकी जेव।" 25 यीशुए अपने चेलन सेइं ज़ोवं, "तुश्शो विश्वास कोरहां जेव?" तैना डेरि जे ते हैरान भोइतां एप्पू मांमेइं ज़ोने लगे, "ऐह कौने! ऐह हवाई त पैनी भी हुक्म देते ते तैना एसेरो हुक्म मनतन।"

26 फिरी तैना गिरासेनी इलाके मां पुज़्ज़े, ज़ै गलील समुन्दरे सामने पारे। 27 ज़ैखन तै बन्ने पुड़ ओस्सो, त तैस नगरेरो अक मैन्हु मैल्हो ज़ैस पुड़ भूतां केरो सायो थियो, ते तै बड़े दिहाड़े केरो देंतो न लिगड़ां लातो ते न घरे रहतो थियो, बल्के कब्रन मां रहतो थियो। 28 तैनी मैन्हे यीशु लाव ते चिन्डां लगो मारने, ते तैसेरे सामने झुकतां ज़ोरे सेइं ज़ोने लगो, "हे यीशु परमप्रधान परमेशरेरा मट्ठां! तीं मीं सेइं कुन कम्मे? अवं तीं कां मिन्नत केरताईं मीं दुख न दे।" 29 किजोकि यीशु तैस भूते तैस मैन्हु मरां निसनेरो हुक्म देने लगोरो थियो, एल्हेरेलेइ तै बड़े बुरे तरीके सेइं ट्लेइतां रखोरो थियो, ते लोक तैस कैबू केरनेरे लेई अग्री भी रस्सन ते शंगलन सेइं बेन्धतां रखते थिये, ते तै तैन भी ट्लोड़तो थियो, ते भूत तैस मैन्हु जंगले मां नेतू थियूं। 30 यीशुए तैस पुछ़ू, "तेरू कुन नवं आहे?" तैनी ज़ोवं "मेरू नवं फौज आहे," किजोकि तैस मां बड़ां भूतां थियां। 31 ते तैनेईं तैस कां मिन्नत की, "असन अथाह कुण्डे मां गानेरो हुक्म न दे।" 32 तैड़ी पहैड़ी पुड़ अक सूरां केरो बड़ो घान थियो, ते तैनेईं तैस कां मिन्नत की, "असन एन मां गाने दे ते यीशुए गाने दित्तां।" 33 ते तैना भूतां तैस मैन्हु मरां निस्तां तैन सूरन मां च़ेलि जेआं, ते सूरां केरो सारो घान उतरैई उन्ढे छालां मैरतां समुन्दरे मां डुबतां मेरि जेव।

34 सूरां केरे च़ारने बाले एन हेरतां नेश्शी जे, ते नगरे मां ते ड्लाव्वन मां एस गल्‍लरी खबर शुनाई। 35 लोक तै तमाशो हेरने आए, ते यीशु कां ज़ैस मैन्हु मरां भूतां केरि फौजरो सैयो निस्सोरो थियो, तैनी लिगड़ां लां ते होशी मां एइतां यीशु कां बिशोरो लाव ते डेरि जे। 36 ज़ैनेईं तैना गल्‍लां पेइले लेवरी थी, तैनेईं ज़ोवं, इस मैन्हु पुड़ भूतां केरो सैयो थियो ते ऐह केन्च़रे बेज़्झ़ोव। 37 ते गिरासेनियों इलाके मां च़ेवरे पासां केरे लोक यीशु कां मिन्नत केरने लग्गे, कि इट्ठां च़लो गा, किजोकि तैना बड़े डर्रे थिये, ते यीशु किश्ती मां बिशतां वापस च़लो जेव। 38 पन ज़ैस मैन्हु मरां भूतां निस्सोरां थियां तै यीशु कां मिन्नत केरतां ज़ोने लगो, मीं एप्पू सेइं साथी रख पन यीशुए तै भेज़ो ते ज़ोवं। 39 "अपने घरे च़लो गा ते लोकन सेइं ज़ो, कि प्रभु परमेशरे तीं पुड़ दया केरतां तेरे लेई केत्रू बड्डू कम कियोरूए। तैखन तै च़लो जेव ते सारे नगरे मां एस गल्‍लारो प्रचार केरने लगो, कि यीशुए मेरे लेई केत्रू बड्डू कम कियोरूए।"

40 ज़ैखन यीशु वापस एज्जी राहोरो थियो, ते लोक बड़े खुशी सेइं तैस सेइं मिले, किजोकि तैना सब तैस बलगते थिये। 41 ते हेरा याईर नव्वेंरो अक मैन्हु ज़ै प्राथना घरेरो अक प्रधान थियो, यीशु कां अव ते तैसेरे पव्वन पुड़ पेइतां मिन्नत केरने लगो, "तू मेरे घरे च़ल।" 42 किजोकि तैसेरी अक्‍के कुई ज़ै 12 सालां केरि थी, तै मरनेबाली थी। ते ज़ैखन यीशु च़लोरो थियो, त लोक तैस उन्ढे बिछ़ड़ते थिये। 43 ते अक कुआन्श भी थी, ज़ैस 12 सालां केरि खून च़लनेरी बिमारी थी। ते तैसां अपनो सारो ज़िन्दगरो पेइंसो हकीमन कां अल्‍लाज़ेरे लेई खर्च़ कियोरो थियो, ते तै केन्चेरे हथ्थे ठीक न भोइ। 44 तै कुआन्श यीशु पुतोरां एइतां तैसेरे चोगे सेइं हुरी, त अकदम तैसेरी खून च़लनेरी बिमारी बेज़्झ़ोईं। 45 यीशुए ज़ोवं, "मेरे लिगड़े सेइं केनि हथ लाव?" ज़ैखन सब लोक इन्कार केरने लगे, त पतरसे ते तैसेरे सैथेईं ज़ोवं, "ए गुरू, लोक तीं ढ्लन्च़ने ते तीं उन्ढे बिछ़ड़ने लगोरोस।" 46 पन यीशु ज़ोवं, "केन्चे मीं सेइं हथ लेवरोए किजोकि मीं पतो लगो कि मीं मरां शक्ति निसोरिए।" 47 तैखन तैस कुआन्शां हेरू, कि अवं छ़ेप्पी न बेटि, त तै डरती-डरती सामने अई ते यीशुएरे पव्वन पुड़ बिछ़ड़तां सैरी लोकां केरे सामने ज़ोने लगी, मीं तीं सेइं हथ लेवरोए, ते ज़ेरो मीं हथ लेवरोए अवं अकदम बेज़्झ़ोरी। 48 यीशुए तैस कुआन्शी ज़ोवं, "हे कुइये, तेरे विश्वासे तू बझ़ाई ते खुशी सेइं च़ली गा।" 49 यीशु एन हेजू ज़ोतो थियो, त प्राथना घरेरे प्रधानेरे तैट्ठां केन्चे मैन्हे एइतां ज़ोवं, "तेरी कुई मेरि जेवरिए, हुनी गुरू तकलीफ न दे।" 50 पन यीशु एन शुन्तां जुवाब दित्तो, "न डर। सिर्फ मीं पुड़ विश्वास रख कुई बेंच़ी गानीए।" 51 ज़ैखन तै तैस घरे मां जेव, त तैनी पतरस यूहन्ना ते याकूब ते कुइयरे हाज बव्वेरे अलावा होरो कोई अन्तर एजने न दित्तो। 52 सब लोक तैस कुइयरे लेई लेरां देंते थिये, पन यीशुए ज़ोवं, "लेरां न देथ, ऐह कुई मूओरी नईं बल्के झ़़ुलोरोए।" 53 लोक एन शुन्तां हसने लगे, किजोकि तैना ज़ानते थिये कुई मेरि जेवरिए। 54 पन यीशुए तैस कुइयरो हथ ट्लाव ते ज़ोवं, "कुइये खड़ी उठ!" 55 ते तैसारे प्राण वापस आए ते तै लूशी खड़ी भोइ, ते यीशुए तैन ज़ोवं, एस कुइये किछ खाने जो देथ। 56 तैस कुइयरे हाज बव हैरान रेइजे, पन तैनी तैन सेइं समझ़ेइतां ज़ोवं, ज़ैन किछ इड़ी भोवं एन केन्ची सेइं न ज़ोइयथ।