57 ज़ैखन तैना बत्तां च़लोरे थिये, त केन्चे तैस सेइं ज़ोवं, "तू ज़ैड़ी-ज़ैड़ी भी गालो, अवं तीं पत्ती च़लेलो।" 58 यीशुए तैस सेइं ज़ोवं, "लौई केरि कुढां ते अम्बरेरे च़ुड़ोलू केरे आल्हे भोतन, पन मैन्हेरे मट्ठे यानी मीं कां कोई ठार नईं ज़ैड़ी अवं झ़ुल्‍ली सेखी।" 59 फिरी यीशु एक्‍की होरि जो ज़ोवं, "मीं पत्ती च़ल," पन तैनी मैन्हे ज़ोवं, "हे प्रभु मीं घरे गानेरी अज़ाज़त दे, मेरे बाजेरे मरनेरां बाद अवं तैस देबतां एज्जेलो ते फिरी तीं पत्ती च़लेलो।" 60 यीशुए तैस जो ज़ोवं, "ज़ैना लोक आत्मिक तरीके सेइं मर्रेन तैन अपने मैन्हु मरने बलगने दे, पन तू गा ते परमेशरेरे राज़्ज़ेरे बारे मां लोकन मां प्रचार केर।" 61 एक्‍के होरे भी ज़ोवं, "हे प्रभु अवं तीं पत्ती च़लेलो, पन पेइले मीं भेज़ कि अवं अपने घरेबालन ज़ोईं।" 62 यीशुए तैस सेइं ज़ोवं, "ज़ै कोई हल्‍ली पुड़ हथ रेखतां पत्रोवं फिरतां तकते, तै परमेशरेरे राज़्ज़ेरे काबल नईं।"