1 तैल्‍ला पत्ती, यीशु यहूदी लोकां केरे लीडरन सेइं मिसालन मां गल्‍लां केरने लगो, "एक्सां, एक्‍की मैन्हे दाछ़री बाग लाई, ते बागरे च़ेवरे पासन बाड़ दित्तो, त दाछ़रो रस कढनेरे लेई कुण्ड बनावं, ते तैनी तैस बागरी रखवाली केरनेरे लेई अक उच्‍ची कूड़ी बनाई। तैल्‍ला पत्ती, तै मैन्हु तैस बागरो ठेको किछ ज़मीनदारन देइतां होरि मुल्खे जो च़लो जेव। 2 ज़ैखन फल्‍लेरो मौसम अव, त तैनी ज़मीनदारन कां अक नौकर भेज़ो कि ज़मीनदारन करां दाछ़रे बागरे फल्‍ला केरो अपनो हिस्सो आने। 3 पन ज़ैखन तै नौकर बागी मां पुज़्ज़ो, त तैन किसानेईं तै ट्लेइतां मड्डो त खाली हथ्थेइं वापस भेज़ो। 4 ज़ैखन बागरे मालिके शुनू कि तैनेईं एन कुन कियूं, त तैनी होरो अक नौकर फिरी भेज़ो। पन तैनेईं तैसेरो भी दोग बन्नो ते तैसेरी बेज़ती केरतां भेज़ी दित्तो। 5 फिरी तैनी मालिके होरो अक नौकर तैन कां भेज़ो। तैनेईं तै भी मैरी छ़डो। तैखन तैनी होरे जादे नौकर भेज़े। तैन मरां तैनेईं किछ मड्डे, ते किछ मारे। 6 तैस मालिके कां अक्‍के रेवरो थियो, ज़ैन तैसेरू ट्लारू मट्ठू थियूं। आखरी मां, तैनी तै भी तैन कां एन सोचतां भेज़ू कि तैना मेरे मट्ठेरी इज़्ज़त केरले। 7 पन ज़ैखन मालिकेरू मट्ठू तैन कां अव, त तैन किसानेईं एप्पू मांमेइं ज़ोवं, ‘ऐह त एस बागरो बारस आहे। एज्जा, अस एस भी मैरी छ़डम, तैखन एसेरी जेइदात इश्शी भोनी।’ 8 एल्हेरेलेइ, तैनेईं तै ट्लेइतां मैरी छ़डो, ते बागरे बेइर शैरी छ़डो।" 9 तैखन यीशुए तैन मैन्हन पुछ़ू, "हुनी बागरो मालिक तैन ज़मीनदारन सेइं कुन केरेलो? अवं ज़ोताईं कि तैनी कुन केरनू, तै एइतां तैन किसानां केरो नाश केरेलो, ते बागरो ठेको होरि केन्ची ज़मीनदारन देलो!"*12:9 एस मिसाली मां, बागरो मालिक परमेशर आए, त बुरे किसान यहूदी लोक त कने तैन केरे लीडर आन, त फल्‍लेरो मतलब परमेशरेरी गल्‍लन पुड़ च़लनेबाली ज़िन्दगी, त मालिकेरे नौकर तैना आन, ज़ैना परमेशरेरे गल्‍लां ज़ोनेबालेन, त मालिकेरू मट्ठू, यीशु मसीह आहे। त तै मालिक तैन ज़मीनदारन सज़ा देते, मतलब कि परमेशर यहूदी लोकन सज़ा देलो। त होरे किसान गैर-यहूदी लोक आन।

10 "कुन तुसेईं पवित्रशास्त्रे मां मसीहेरे बारे मां ई गल नईं पढ़ोरी? तैस मां लिखेरूए कि,

‘ज़ै घोड़ राज़-मिस्त्रेईं निकम्मो ठहरेवरो थियो,

तै मकानेरो खास घोड़ बेनि जेव।

11 एन प्रभु परमेशरेरी तरफां एन्च़रां भोव,

ते कने इश्शी नज़री मां ऐह हैरान भोनेरी गल आहे!’"

12 ज़ैखन यहूदी लोकां केरे लीडरेईं एन शुनू, त तैनेईं सेमझ़ी छ़ड्डू कि यीशुए ई मिसाल इश्शे खलाफ ज़ोवरी। एल्हेरेलेइ, तैना सेरकोए। त तैनेईं यीशु कैद केरनो चाव। पन तैना लोकन केरां डरे, एल्हेरेलेइ तैस छ़ेडतां च़ेलि जे।

13 तैल्‍ला पत्ती, यहूदी लोकां केरे लीडरेईं यीशु कां किछ फरीसी*12:13 फरीसी लोक सोचते थिये कि रोम-मुल्खेरे बड्डे राज़े जो चुंगी देनी गलत आए। लोक त कने हेरोदेस राज़ेरे लोक*12:13 हेरोदेस राज़ेरे लोक सोचते थिये कि रोम-मुल्खेरे बड्डे राज़े जो चुंगी देनी ठीक आए। भेज़े, ताके तैना यीशुए अपनि गल्‍लन मां फसान। 14 तैनेईं यीशु कां एइतां तैस सेइं ज़ोवं, "हे गुरू, अस ज़ानतम कि तू सच़्च़ो आस, त केन्चेरी परवाह न केरस, किजोकि तू सारे मैन्हन बराबर समझ़तस, त तू परमेशरेरी गल्‍लां लोकन सच़्च़ाई सेइं शुनातस। एल्हेरेलेइ असन ज़ो, कुन रोम-मुल्खेरे महाराज़े जो चुंगी देनी जाइज़ आहे कि नईं? 15 अस देम या न देम?" यीशुए तैन केरू पाखंड ज़ैनतां तैन सेइं ज़ोवं, "मीं किजो अज़मातथ? अक सिक्‍को (दीनार) मीं कां आनां कि अवं तैस हेरी।" 16 तैनेईं आनो, तैखन यीशुए तैन पुछ़ू, "इस सिक्‍के पुड़ केसेरी शकल त केसेरू नवं आहे?" तैनेईं जुवाब दित्तो, "महाराज़ेरू आहे।" 17 यीशुए तैन सेइं ज़ोवं, "ज़ैन महाराज़ेरू आहे तैन बड्डे राज़े देथ, ते ज़ैन परमेशरेरू आहे तैन परमेशरे देथ।" ज़ैखन फरीसी लोकेईं ते कने हेरोदेस राज़ेरे लोकेईं एन शुनू, त तैखन तैना बड़े हैरान भोए।

18 तैल्‍ला पत्ती, सदूकी लोक यीशु कां आहे। तैना ज़ोतन मुड़दे ज़ींते न भोन। त तैनेईं यीशु पुछ़ू, 19 "हे गुरू, बड़े पेइले मूसे असन जो कानूने मां लिखोरू थियूं कि अगर कोई मैन्हु बेऔलाद मेरि गाए त तैसेरी कुआन्श रेइ गाए, त तैसेरो ढ्ला तैसेरी लैड़ी सेइं ड्लाह बनाए, त अपने ढ्लाएरे लेई औलाद पैदा केरे, ताके तैसेरी खानदानी राए। 20 सत ढ्ला थिये। पेइलो ढ्ला ड्लाह बनेइतां बेऔलाद मेरि जेव। 21 तैखन दूइयोवं ढ्लाए तैस कुआन्शी सेइं ड्लाह बनाव। तै भी बेऔलाद मेरि जेव। तेन्च़रां ट्लेइयोवं ढ्लाए भी कियूं। 22 त सते ढ्लाएईं तैस कुआन्शी सेइं एक्‍केरे पत्ती एक्‍के ड्लाह कियो, पन औलाद न भोइ। सैरन पत्ती तै कुआन्श भी मेरि जेई। 23 एल्हेरेलेइ, परमेशर लोक मुड़दन मरां ज़ींते केरनेरे पत्ती, यानी ज़ैखन लोक ज़ींते भोल्हे, त तैखन तै कुआन्श तैन सत्तन मरां केसेरी लाड़ी भोल्ही? किजोकि तै इड़ी धेरती पुड़ सत्तां केरि लाड़ी भोवरी थी।"

24 यीशुए तैन सेइं ज़ोवं, "तुश्शी सोच केत्री गलते! कुन तुसन पतो किजो? किजोकि तुस पवित्रशास्त्रे मां लिखोरी गल्‍लन त कने परमेशरेरी शक्ति न ज़ानथ! 25 तुसेईं ज़ै कहानी ज़ोई, तैस मां तै कुआन्श तैन सत्तन मरां केन्चेरी लाड़ी नईं भोनी, किजोकि ज़ैखन लोक मुड़दन मरां ज़ींते भोल्हे, त तैखन कोई केन्ची सेइं ड्लाह न बनालो, पन तैना सुर्गे मां परमेशरेरे स्वर्गदूतां केरे ज़ेरे भोल्हे, ज़ैना ड्लाह न बनान। 26 मुड़दां केरे ज़ींतो भोनेरे बारे मां, कुन तुसेईं मूसेरी किताबी मां एन नईं पढ़ोरू ज़ैखन मूसे बलतू झ़ैल्‍ल लाव, तैखन (यानी अब्राहम, इसहाक त याकूब मरनेरे बड़े सालना पत्ती) परमेशरे मूसा सेइं ज़ोवं, ‘अवं अब्राहमेरो परमेशर, ते इसहाकेरो परमेशर, ते याकूबेरो परमेशर आईं?’ 27 परमेशर मुड़दां केरो परमेशर नईं, पन ज़ींतां केरो परमेशर आहे*12:27 किजोकि ज़ैना इस धेरती पुड़ मेरि गातन, तैना परमेशरे सेइं साथी ज़ींते भोइ गानेन! एस सेइं एन साबत भोते कि परमेशर लोकन मुड़दन मरां ज़ींतो केरेलो।, एल्हेरेलेइ तुश्शी सोच बिलकुल गलत आहे।"

28 तैखन शास्त्री लोकन मरां एक्‍की मैन्हे एजतां यीशु ते सदूकी लोकां केरि गलबात शुनी। तैस पतो च़लो कि यीशुए तैन्न ठीक जुवाब दित्तो, ते तैनी यीशु कां एइतां तैस पुछ़ू, "परमेशरेरे सारे हुक्मन मरां बड़ो खास हुक्म को आहे?" 29 यीशुए तैस जुवाब दित्तो, "सारे हुक्मन मरां बड़ो खास हुक्म ई आहे, ज़ेन्च़रां परमेशरेरी किताबी मां लिखेरूए कि, ‘हे इस्राएलेरे लोकव शुना, प्रभु इश्शो परमेशर, अक्‍के प्रभु आहे, 30 एल्हेरेलेइ प्रभु अपने परमेशरे सेइं तुस अपने सारे मने सेइं, त अपनि सैरी जानी सेइं, त अपनि सैरी अक्ली सेइं, त अपनि सैरी ताकती सेइं प्यार केरा।’ ए बड़ो खास हुक्म आहे। 31 तैसेरो ज़ेरो दूइयोवं बड़ो खास हुक्म ई भी आए कि, ‘तू अपने पड़ोसन*12:31 पड़ोसी सेइं: मतलब कि होरे सारे मैन्हन सेइं प्यार केरनोए। सेइं अपने बराबर प्यार केर।’ एन दूई हुक्मन करां होरो कोई भी बड्डो हुक्म नईं।"

32 तैखन शास्त्री मैन्हु यीशु सेइं ज़ोवं, "हे गुरू, तीं बड़ू ठीक ज़ोवं! त तीं सच़ ज़ोवं कि परमेशर अक्‍के आहे, ते तैसेरे अलावा होरो कोई नईं। 33 त असेईं परमेशरे सेइं अपने सारे दिले सेइं, ते अपनि सैरी जानी सेइं, ते अपनि सैरी अक्ली सेइं, त अपनि सैरी ताकती सेइं प्यार कियोरो लोड़े। ते कने असेईं अपने पड़ोसन सेइं अपने बराबर प्यार कियोरो लोड़े। जानबरां केरू बलिदान केरनू या होरि चीज़ां केरि च़ढ़तल च़ाढ़ने करां भी बेद्धतां, एना दूईये हुक्मन मन्ने परमेशरेरे लेई बड़े खास आन!" 34 ज़ैखन यीशुए हेरू कि तैनी अक्ली सेइं जुवाब दित्तो, त तैनी तैस सेइं ज़ोवं, "तू परमेशरेरे राज़्ज़े मां दाखल भोने करां दूर नईं।" ते तैल्‍ला पत्ती, केन्ची यीशु किछ पुछ़नेरी हिम्मत न भोइ।

35 मन्दरे मां शिक्षा देते बार यीशुए लोकन अक सवाल पुछ़ो, "शास्त्री किजो ज़ोतन कि ज़ै मसीह आहे, तै दाऊद-राज़ेरी औलादी मरां भोल्हो? 36 बड़े पेइले दाऊद राज़े एप्पू पवित्र आत्मारे शक्ति सेइं एन्च़रां ज़ोवरू थियूं कि, प्रभु परमेशरे मेरे प्रभु मसीहे सेइं ज़ोवं, ‘तू मेरे देइने पासे बिश, ज़ांतगर कि अवं तेरे दुश्मन बिलकुल न हारेईं।’ 37 दाऊद राज़े त एप्पू मसीहेरे बारे मां एन ज़ोवं कि ‘तै मेरो प्रभु आहे,’ फिरी मसीह तैसेरू मट्ठू केन्च़रां भोइ सकते?" त मैन्हु केरि भीड़ यीशुएरी गल्‍लां खुशी सेइं शुन्ती थी।

38 यीशुए शिक्षा देते बार लोकन सेइं ज़ोवं, "शास्त्री लोकन करां खबरदार राथ, ज़ैना लम्मे-लम्मे चोले लेइतां हन्ठनू चातन, ताके लोक समझ़न कि तैना बड़े धर्मी आन, त तैना चातन कि बज़ारन मां लोक असन बड़ी इज़्ज़ती सेइं नमस्कार केरन। 39 त कने प्राथना घरन मां बड़े खास मैन्हु केरे लेई रख्खोरी कुर्सी पुड़ बिशनू चातन, त धामन मां भी गेइतां बड़े खास मैन्हु केरे लेई रख्खोरी कुर्सी पुड़ बिशनू चातन। 40 तैना विधवां केरे घरन लुटतन त कने होरि मैन्हन हिरानेरे लेई लेम्मी-लेम्मी प्राथना केरतन, ताके लोक समझ़न कि तैना बड़े धर्मी आन। परमेशर तैन्न बड़ी जादे सज़ाह देलो!"

41 लोकन शिक्षा देनेरे पत्ती, यीशु मन्दरेरे दान-पेटरे सामने बिशतां एन तकने लग्गोरो थियो कि, लोक दान-पेट्टी मां केन्च़रां पेइंसे छ़डतन। बड़े मैन्हेईं, ज़ैना अमीर थिये, तैड़ी एइतां तैस मां बड़े पेइंसे छ़डने लग्गोरे थिये। 42 तैखन अक गरीब विधवां एइतां दूई सिक्‍के छ़ड्डे, ज़ैन केरि कीमत बड़ी घट थी। 43 ज़ैखन यीशुए तैन हेरू, तैनी अपने चेले एप्पू कां कुजेइतां तैन सेइं ज़ोवं, "अवं तुसन सेइं सच़ ज़ोताईं कि मन्दरेरे दान-पेटी मां पेइंसे छ़डने बालन मरां, एस गरीब विधवां तैन सारे मैन्हन करां जादे छ़ड्डोरेन। 44 किजोकि तैन सैरेईं अपने जादे पेंइसन मरां थोड़े ज़ेरे छ़ड्डे, पन ऐह विधवा त बड़ी गरीबी आहे, फिरी भी तैसां सब किछ ज़ैन तैस कां थियूं छ़ेड्डी दित्तू, यानी अपनि ज़रूरतरे लेई रखोरे पेइंसे भी छ़ेड्डी दित्ते!"