1 ते इन गल्‍लां केरे बाद प्रभुए 70 होरे चेले ठहराए, कि तै ज़ैस-ज़ैस नगरे ते ठैरी तैनी एप्पू गानेरे बारे मां सोचोरू थियूं, तैड़ी दूई-दूई मैन्हु एप्पू अग्री भेज़े। 2 ते तैनी तैन सेइं ज़ोवं, "पकोरी फसलरे ज़ेरे बड़े लोक तियार आन ज़ैना परमेशरेरे वचने पुड़ विश्वास केरनू चातन, पन कम केरनेबाले थोड़े आन ज़ैना तैन परमेशरे राज़्ज़ेरे बारे मां ज़ोन। एल्हेरेलेइ तुस फसलरे मालिके कां प्राथना केरा कि तै जादे कम केरनेबाले भेज़े, कि तैना लोकन परमेशरेरे राज़्ज़ेरे बारे मां ज़ोन।" 3 गाथ, अवं तुसन भैड्डां केरे ज़ेरे गिद्दन मां भेज़ताईं। 4 एप्पू सेइं साथी न बेटवे, न झोलो, न बूट नेइयथ, ते न बत्तां केन्ची जो नमस्कार ज़ोइयथ। 5 ज़ेसेरे घरे मां गाथ त पेइले ज़ोथ कि, "इस घरे मां शान्ति भोए।" 6 अगर तैड़ी एरे लोक ज़ैना परमेशरेरी शान्ति चातन तैड़ी रहते भोल्हो, त तुश्शी शान्ति तैस पुड़ राली, नईं त तुश्शी शान्ति तुसन पुड़ एज्जेली। 7 तैस्से घरे मां राथ, ते ज़ैन किछ तैन करां मैल्हे, तैन्ने खाथ-पीथ किजोकि मज़दूर अपनि मज़दूरारो हकदार भोते, घरे-घरे न गेइयथ। 8 ते ज़ैस नगरे मां गाथ, ते तैट्ठेरे लोक तुसन अपने घरे मां नेन, त ज़ैन किछ तुश्शे सामने रख्खू गाए तैन्ने खाथ। 9 तैट्ठेरे बिमारन बज़्झ़ाथ, ते तैन सेइं ज़ोथ, "परमेशरेरू राज़ नेड़े एवरूए।" 10 पन ज़ैस नगरे मां गाथ, ते तैट्ठेरे लोक तुसन कबूल न केरन, त तैट्ठेरे बज़ारन मां गेइतां ज़ोथ। 11 "कि तुश्शे नगरेरी धूड़ भी इश्शे पव्वन सेइं ज़ै लगोरीए अस तुश्शे सामने ठुड़कतम ते फिरी भी बुझ़ा कि परमेशरेरू राज़ तुश्शे नेड़े पुज़ोरूए।" 12 अवं तुसन सेइं सच़ ज़ोताईं, तैस दिहाड़े तैस नगरेरी हालत सदोम नगरेरी हालत झ़ैल्‍लनेरे काबल भोल्ही।

13 "हे खुराजीन! तीं पुड़ अफ़सोस! हे बैतसैदा तीं पुड़ अफ़सोस! कि एना चमत्कार मीं तुसन इड़ी हिराए अगर मीं एना कम्मां सूर ते सैदा मां हरेवरां भोथां, त तैन लोकेईं केइसेरे देंते टाट पलेटतां ते दोग्गे पुड़ मांज़न छ़ेडतां पापन करां मन फिरावरो भोथो। 14 पन फिरी भी न्यायेरे दिहाड़े तुश्शो हाल सूर ते सैदारे हाले करां जादे बुरो भोल्हो। 15 ते हे कफरनहूम नगरेरे लोकव, कुन तुस सोचतथ कि सुर्गे मां तुश्शी आदर भोनीए! ई तुस त नरके गाले ज़ैड़ी पैपी लोकन सज़ाह मैल्हेली! 16 ज़ै तुश्शी शुन्ते, तै मेरी शुन्ते ज़ै तुसन घटिया समझ़ते तै मीं घटिया समझ़ते, ते ज़ै मीं घटिया समझ़ते ते मेरे भेज़ने बाले घटिया समझ़ते।"

17 तैना 70 चेले खुशी सेइं वापस आए, ते ज़ोने लगे, "हे प्रभु तेरे नंव्वे सेइं भूतां भी इश्शो हुक्म मनतन।" 18 तैनी तैन सेइं ज़ोवं, "मीं शैतान एन्च़रे बिछ़ड़तो लाव ज़ेन्च़रे च़ड़क अम्बरेरां पेचे। 19 हेरा, मीं तुसन सप्पन ते बिच़्च़न ढ्लन्च़नेरो, ते दुश्मनेरी (शैतानेरी) सैरी शेक्ति पुड़ अधिकारे दित्तोरोए, ते केन्ची चीज़ी सेइं तुसन नुकसान न भोल्हो। 20 फिरी भी तुस इस गल्‍ली सेइं खुशी न भोइयथ कि भूतां तुश्शो हुक्म मनतन, पन इस गल्‍ली सेइं खुश भोइयथ कि तुश्शू नवं सुर्गे मां लिखेरूए।"

21 तैखन यीशु पवित्र आत्मा सेइं मघन भोवं, ते ज़ोने लगो, "हे बाजी, सुर्गेरे त धेरतरे प्रभु, अवं तेरू शुक्र केरताईं, कि तीं इना गल्‍लां, अक्लमन्द ते समझ़दारन करां छ़ुपेइतां रेखी, ते बच्‍चन पुड़ बैंदी की, हाँ, हे बाजी, किजोकि तेरी खुशी एस्से मां थी। 22 सैरी चीज़ां मेरे बाजेरी तरफां मेरे सुपुर्द कियोरिन, कोई होरो मट्ठे न ज़ांने, सिर्फ बाजी ज़ानते; कोई बाजी न ज़ांने सिर्फ मट्ठू ज़ानते, या तै मैन्हु बाजी ज़ानते ज़ैस पुड़ मट्ठू बांदो केरने चाए।"

23 तैखन तैनी अपने चेलां केरे पासे फिरो अकैल्‍ले मां ज़ोवं, "धन आन तैना एछ़्छ़ी ज़ैना एना गल्‍लां हेरचन ज़ैना गल्‍लां तुस लहतथ, 24 किजोकि अवं तुसन सेइं ज़ोतां, कि बड़े नेबी ते राज़ां केरि खुवैइश थी, कि एना गल्‍लां हेरन, ज़ैना तुसेईं लेही, पन न लेही सके, ते एना गल्‍लां शुन्न ज़ैना तुस शुन्तथ पन न शुनी बेटि।"

25 एक्सां यीशु लोकन शिक्षा देने लेवरो थियो, ते हेरा, अक शास्त्री खड़ो भोव, ते इन ज़ोइतां तैस अज़माने लगो, "हे गुरू, हमेशारी ज़िन्दगी हासिल केरनेरे लेई अवं कुन केरि?" 26 तैनी तैस जुवाब दित्तो, "मूसेरे कानूने मां कुन लिखेरूए? तू केन्च़रे समझ़तस?" 27 तैनी जुवाब दित्तो, "तू प्रभु अपने परमेशरे सेइं अपने सारे दिले, सैरी जानी सेइं, ते अपनि सैरी ताकती सेइं ते अपनि सैरी अक्ल सेइं प्यार रख, ते अपने पड़ोसी सेइं अपने बराबर प्यार केर।" 28 तैनी तैस सेइं ज़ोवं, "तीं ठीक जुवाब दित्तो एन्ने केर, फिरी तीं हमेशारी ज़िन्दगी मैल्हेली।" 29 पन तैनी अपनो आप धर्मी ठहरानेरे लेई यीशु पुछ़ू, "फिरी मेरो पड़ोसी कौने?" 30 यीशुए तैस मिसाल देइतां जुवाब दित्तो, "अक मैन्हु यरूशलेम नगरेरां यरीहो नगरे जो च़लोरो थियो, ते डैकेइं तैस पुड़ हमलो कियो, ते ज़ैन किछ तैस कां थियूं नेव। ते तैसेरां लिगड़ां खोल्‍लां, ते मारो कुट्टो ते ज़खमी केरतां अधमरो बनेइतां तैड़ी ज़ेरे छ़डतां च़ले जे। 31 ते एरू भोवं कि, अक याजक तैस बत्तां च़लोरो थियो, तैनी तै लव ते थरकतो तैसेरी मद्दत केरने बगैर ड्लखमेइं निस्सो। 32 एन्च़रे अक मन्दरे मां कम केरनेबालो लेवी भी निस्सो, ते तैस लेइतां तै भी ड्लखमेइं निस्सो। 33 फिरी अक सामरी मुसाफर भी तैस बत्तां निस्सो, ते तैस लेहितां तैस बड़ो तरस अव। 34 ते तै तैस कां जेव, ते तैसेरे ज़खमन तेल मल्‍लो ते दाछ़रो रस लाव, ते तैसेरे ज़खमन पट्टी बन्धी ते अपने गधे पुड़ च़ेढ़तां एक्‍की धर्मशाली मां तैसेरी सेवा की। 35 होरसां तैनी दूई दीनार केढतां धर्मशालरे मालिके कां दित्ते, ते ज़ोवं, ‘एसेरी हेरगेश केरां अगर जादे लग्गेले त अवं वापस एइतां देलो।’ 36 तेरे समझ़ी मां एन ट्लेइन मरां कौन तैसेरो पड़ोसीए ज़ै डैकेइं ट्लातोरो थियो?" 37 तैनी जुवाब दित्तो, "ज़ैनी तैस पुड़ दया की।" यीशुए तैस सेइं ज़ोवं, "गा, तू भी एरू केर।"

38 फिरी ज़ैखन यीशु त कने तैसेरे चेले गेइ राहोरे थियो, त तैना एक्‍की ड्लाव्वें मां जे, ते मार्था नव्वेंरी एक्‍की कुआन्शां यीशु अपने घरे नियो। 39 ते मरियम नव्वेंरी तैसेरी अक बेइन थी, तै यीशुएरे पव्वन कां बिशतां तैसेरी गल्‍लां शुन्ती थी। 40 पन मार्था किछ खास चीज़ बनेइ राहोरी थी, ते यीशु कां आई ते ज़ोने लगी, "हे प्रभु तुसन ज़रां भी खियाल नईं कि, मेरी बेइनां अवं कम केरनेरे लेई अवं अकैल्‍ली छ़डोरी? ते एस ज़ोथ, तै मेरी मद्दत केरे।" 41 प्रभुए तैस जुवाब दित्तो, "मार्था, हे मार्था, तू बेड़ि गल्‍लां केरे फिक्र केरतिस, 42 पन अक गल ज़रूरीए, मरियमा तै रोड़ो हिस्सो च़ुनोरोए, ज़ै तैस करां कोई न नेइ सके।"