मलाकी 3

एजनेबालो सन्देश देनेबालो

1 सेना केरो यहोवा जुवाब देते, "हेरा, अवं अक अपनो दूत भेज़ताईं, तै मीं अग्री-अग्री बत तियार केरेलो, ते प्रभु ज़ैस तुसां तोपतथ, तै अचानक अपने भवने मां एज्जेलो; हाँ करारेरो तै दूत, ज़ैस तुसां सुखातथ, शुना, तै एज्जी राहोरोए, सेना केरो यहोवा एन ज़ोते।"✝3:1 मत. 11:3,10;मरक. 1:2;लूक. 1:17,76;7:19,27;यूह. 3:28. 2 पन तैसेरे एजनेरे दिहाड़े कौन झ़ेल्‍ली सकेलो? ते ज़ैखन तै लेइहोए, तैखन कौन खड़ो रेई सकेलो? किजोकि तै सुनारेरी अग ते धोबेरी साबनरो ज़ेरोए।✝3:2 प्रका. 6:17.

3 तै चाँदी तपाने ते शुद्ध केरनेबालो बनेलो, ते लेवी लोकन शुद्ध केरेलो ते तैन्न सोन्नेरो ज़ेरो शुद्ध केरेलो, तैखन तैना यहोवारी च़ढ़तल धार्मिकताई सेइं च़ाढ़ेले।✝3:3 1 पत. 1:7. 4 तैखन यहूदा ते यरूशलेमेरी च़ढ़तल यहोवा एरी पसंद एज्जेली ज़ेरि पेइले दिहाड़न मां ते पुराने ज़माने मां एइती थी।

5 "तैखन अवं आदालत केरनेरे लेई तुश्शे नेड़े एज्जेलो; ते टूनो केरनेबालन, व्यभिचार केरनेबालन ते झूठी कसम खाने बालां केरे खलाफ, ते तैन केरे खलाफ भी ज़ैना मज़दूरां केरि मज़दूरी न देन ते विधवा कौन्शन ते अनाथ बच्‍चन पुड़ ज़ुलम केरतन ते परदेशी लोकां केरो न्याय बिगाड़तन, ते मेरो डर न मन्न, अवं तैन सेभी केरे खलाफ अकदम गवाही देइलो," सेना केरो यहोवा एन ज़ोते।✝3:5 याक. 5:4.

6 "अवं यहोवा बेदलोई न; एल्हेरेलेइ हे याकूबेरे खानदान तुसां नाश नईं भोवरे। 7 तुसां अपने पड़दादां केरे वक्ते करां मेरी विधन करां दूर भोते एवरेथ, ते तैना विधि न मेन्नी। तुसां मेरे पासे फिरा, तैखन अवं तुश्शे पासे फिरेलो," सेना केरो यहोवा एन ज़ोते; पन तुस पुछ़तथ, "अस कोस गल्‍ली मां फिरम?"✝3:7 याक. 4:8;इब्रा. 10:30,31.

परमेशरे न लुट्टा

8 अवं पुछ़ताई, कुन मैन्हु परमेशरे धोखो देइ सखते? हेरा, तुसां मीं धोखो देतथ, ते फिर भी पुछ़तथ, कि असेईं कोस गल्‍ली मां तू लुटोरोस? दशोवं हिस्से ते च़ाढ़नेरी च़ढ़तलन मां। 9 एल्हेरेलेइ तुसन पुड़ भारी श्राप पेवरोए, किजोकि तुसां मीं लुटतथ, बल्के सारी कौम एन्च़रे केरतीए। 10 सारो दशोवं हिस्सो भण्डारे मां आनां कि मेरे भवने मां खानेरी चीज़ां भोन। ते सेना केरो यहोवा एन ज़ोते, कि एरू कम केरतां मीं परखा कि अवं तुश्शे लेई अम्बरेरी दैरी खोलतां तुसन पुड़ बड़े बरकतां केरि झ़ड़ी केरताईं कि नईं। 11 अवं तुश्शे लेई नाश केरनेबाले एन्च़रे सज़ाह देइलो, कि तै तुश्शी ज़मीनरी फसल नाश न केरेलो, ते तुश्शी दाछ़री बागां केरे फल कच़्च़े न झ़ड़ेले, सेना केरो यहोवा एन ज़ोते।

12 तैखन सैरी कौमां तुसन जो धन ज़ोली, किजोकि तुश्शो मुल्ख खुशहाल भोल्हो, सेना केरो यहोवा एन ज़ोते।

लोकां केरि सखत शिकायत

13 यहोवा एन ज़ोते, "तुसेईं मेरे खलाफ सखत गल्‍लां ज़ोवरिन। फिरी भी तुसां पुछ़तथ, ‘असेईं तेरे खलाफ कुन ज़ोवरूए?’ 14 तुसेईं ज़ोवरूए ‘परमेशरेरी सेवा केरनी फुज़ूले। असेईं ज़ैन तैसेरे ज़ोवरां कम्मां पूरां कियोरन ते सेना केरे यहोवारे डरके मारे मातमेरां लिगड़ां लेइतां च़लोरेम, इस सेइं कुन फैइदो भोव? 15 हुन्ना करां असां अभिमानी लोकन जो धन ज़ोतम; किजोकि बुरे लोक त कामयाब भोइ जेवरेन, बल्के तैना परमेशरेरो इंतज़ार केरने पुड़ भी बेच़ी जेवरेन।’"

याद केरनेरी किताब

16 तैखन यहोवारो डर मन्ने बालेईं एप्पु मांमेइं गल्‍लां की, ते यहोवा तैन केरि गल्‍लां ध्यान देइतां शुनतो थियो, ते ज़ैना लोक यहोवारो डर मन्ते थिये, तैन केरे यादरे लेई तैसेरे सामने अक किताब लिखी गाती थी। 17 सेना केरो यहोवा एन ज़ोते, "ज़ै दिहाड़ी मीं ठहरेवरीए, तैस दिहाड़े तैना लोक मेरे खास लोक भोल्हे, ते अवं तैन पुड़ एत्री महरबानी केरेलो, ज़ेरि कोई अपने सेवा केरनेबाले मट्ठे पुड़ केरते। 18 तैखन तुसां धेर्मी ते दुष्टेरो फर्क मतलब ज़ै यहोवारी सेवा केरते, ते ज़ै तैसेरी सेवा न केरे, तैन दूईयां केरो फर्क पिशैनी सकेले।