विश्वास ते कम
14 हे मेरे ढ्लाव ते बेइनव, अगर कोई ज़ोए कि मीं यीशु मसीह पुड़ विश्वासे, पन होरि केरे लेई रोड़ां कम्मां न केरतो भोए, त तैस सेइं कुन फैइदो? कुन एरो विश्वास तैस मुक्ति देइ बटते? 15 अगर कोई विश्वासी ढ्ला या बेइन भोए ज़ैन लिगड़ा केरि ज़रूरत भोए, ते तैन रोज़ खाने जो न भोए। 16 ते तुसन मरां कोई तैन सेइं ज़ोए, "खुशी सेइं गाथ परमेशर तुसन बरकत दे," तुस गर्म राथ, ते रज़्ज़ा; पन ज़ैना चीज़ां जानरे लेई ज़रूरिन तैना तैन न दे, त कुन फैइदो? 17 तेन्च़रे विश्वास भी, अगर रोड़े कम्मन सेइं न भोए, त अपने स्भावे मां मर्रोए।
18 बल्के कोई ज़ोई बटते कि, "तीं विश्वासे, ते अवं रोड़ां कम्मां केरताईं।" पन अवं ज़ोताईं तू अपनो विश्वास मीं रोड़ां कम्मां केरे बगैर हिरा, ते अवं अपनो विश्वास रोड़े कम्मन सेइं तीं हिरालो। 19 तीं विश्वासे कि अक्के परमेशरे, तू रोड़ू केरतस, भूतां भी विश्वास केरतन, ते थरकतन। 20 पन हे निकम्मे मैन्हु तू इन न ज़ानस, कि रोड़े कम्मन बगैर विश्वास मर्रोए। 21 ज़ैखन इश्शे पूर्वज अब्राहमे अपनु मट्ठू इसहाक बलिदान केरनेरे ठैरी पुड़ च़ाढ़ू, त कुन तै कम्मन सेइं धर्मी न भोव? 22 तीं हेरू कि विश्वासे तैसेरे कम्मन सेइं साथी अस्सर कियोरोए, ते कम्मन सेइं विश्वास सिद्ध भोव। 23 ते पवित्रशास्त्रेरू इन वचन पूरू भोव, "कि अब्राहमे परमेशरे पुड़ विश्वास कियो, ते तै तैसेरेलेइ धार्मिकता गनो जेव," ते तै परमेशरेरो दोस्त भोव। 24 ते तुसेईं हेरू कि मैन्हु सिर्फ विश्वासे सेइं नईं, बल्के कम्मन सेइं भी धर्मी भोते। 25 तेन्च़रे राहाब वेश्यां भी ज़ैखन तैसां जासूसी केरनेबाले मैन्हु अपने घरे मां रख्खे, ते होरि बत्तां वापस भेज़े, त कुन कम्मन सेइं धर्मी न भोइ? 26 ते ज़ेन्च़रे जान आत्मा बगैर मर्रीए, तेन्च़रे विश्वास भी रोड़े कम्मन बगैर मर्रोए।