1 अवं पौलुस ई चिट्ठी लिखने लगोरोईं। अवं परमेशरेरो दास ते यीशु मसीहेरो प्रेरित आईं। अवं परमेशरेरे च़ुनोरे लोकां केरे विश्वासे मज़बूत केरनेरे लेई ते तैन केरि मद्दत केरनेरे लेई च़ुनोरोईं, कि तैना यीशु मसीहेरी सच़्च़ी शिक्षा ज़ानन ताके तैना एरी ज़िन्दगी ज़ीन ज़ैस सेइं परमेशर खुश भोए। 2 तैसेरो नितीजो ई भोए कि तैना परमेशरे सेइं हमेशा रानेरी उमीद रखन, परमेशर ज़ै कधे झूठ न ज़ोए, तैने दुनिया बनाने करां पेइलो वाधो कियोरो थियो, कि तैसेरे लोक हमेशारे लेई ज़ीयेले। 3 ते हुनी परमेशरे ठीक वक्ते पुड़ ई खुशखबरी असन पुड़ बांदी की ज़ै अस सेब्भन प्रचार केरतम। इश्शे मुक्ति देनेबाले परमेशरे ई ज़िमेवारी मीं दित्तोरीए ते तैसेरेलेइ इन कम केरनेरे लेई मीं हुक्म दित्तोरोए।

4 अवं ई चिट्ठी तीतुसे जो लिखने लगोरोईं। तू मेरे मट्ठेरो ज़ेरो आस, किजोकि ज़ेन्च़रे अवं विश्वास केरताईं तेन्च़रे तू भी विश्वास केरतस। अवं प्राथना केरताईं इश्शो बाजी परमेशर ते इश्शो मुक्ति देनेबालो प्रभु यीशु मसीह तीं अनुग्रह त कने शान्ति देतो राए।

5 मीं तू एल्हेरेलेइ क्रेते टैपू मां शारोरो थियो, ताके तू तैड़ी इश्शू कम पूरू केरस, ते होरि नगरन मां बुज़ुर्ग च़ुन ज़ेन्च़रे तीं केरनेरो हुक्म दित्तोरो थियो। 6 लीडर बेइलज़ाम लोड़े ते अपने कुआन्शी सेइं वफादार लोड़े, ज़ैन केरे बच्‍चे विश्वासी भोन ते बुरो बर्ताव केरनेबाले न भोन ते तैना अपने अम्मा बाजी केरो हुक्म मन्नेबाले भोन। 7 किजोकि रखवालो परमेशरेरो भण्डारी भोने वजाई सेइं बेइलज़ाम लोड़े, न अपनि च़लानेबालो, न क्रोध केरनेबालो, न शराबी, न लड़ाको, ते न पेइंसां केरो लालच़ी लोड़े। 8 पन मेहमानां केरि आदर केरनेबालो, होरि केरि भलियाई केरनेबालो, अपने आपे पुड़ कैबू केरनेबालो, धरमात्मा, पवित्र ते अपने इच्छान कैबू केरनेबालो लोड़े। 9 ते तै यीशु मसीहेरे तैस सन्देशे पुड़ ज़ै भरोसेरे काबले मज़बूती सेइं विश्वास केरनेबालो लोड़े, ज़ै असेईं तैस शिखालोरोए। ताके तै होरन सही शिक्षाई मन्नेरे लेई होसलो देइ बटे ते ज़ैना गलत भोन तैन सुधैरी बटे।

10 अवं इन एल्हेरेलेइ ज़ोताईं, किजोकि बड़े लोक सही शिक्षारी खलाफ केरेले, ज़ैना बेकार गल्‍लां शिखालतन ते होरन धोखो देतन। इन खास केरतां किछ यहूदी केरे लेई सच़ आहे ज़ैना विश्वासी बनोरेन (इना तैना लोकन ज़ैना चातन कि सारे मसीही लोक यहूदी केरे कानूने मनन, खास केरतां खतनेरे कानूने)। 11 एन लोकन शिखालनेरी अज़ाज़त न दे, किजोकि ज़ैखन तैना इन गल्‍लन शिखालतन, ज़ैना तैनेईं शिखैलोरी लोड़न, त तै सारे टब्बरां केरे विश्वासे बरबाद केरतन। तैना इन एल्हेरेलेइ केरतन कि पेइंसो कुमेईं बटन। 12 अक मैन्हु क्रेते टैपू पुड़ रानेबालोए ज़ैस जो तैना अक्लमन्द ज़ोतन तैने ज़ोवरूए, "क्रेतेरे लोक हमेशा झूठे, जंगली जानबरां केरो ज़ेरो बर्ताव केरनेबाले, तैना आलसी ते हमेशा जादे खानेबाले भोतन।" 13 इन गल्‍लां क्रेतेरे लोकां केरे बारे मां सच़ आन। एल्हेरेलेइ तैन खबरदार केर, कि तैना यीशु मसीहेरी शिक्षाई पुड़ विश्वास केरन। 14 ते यहूदी केरि बनेवरी कहैनी ते ज़ैना लोक सच़्च़े करां दूर भोवरेन तैन केरे हुक्म शुन्ने बंद केरा। 15 ज़ैन लोकां केरे मने मां पापी खियाल नईं तैन केरे लेई रीतरे मुताबिक सब किछ शुद्धे। पन तैन लोकां केरे लेई ज़ैना बुरेन ते यीशु मसीह पुड़ विश्वास न केरन तैन केरे लेई किछ भी शुद्ध नईं ज़ैन तैना केरतन। 16 तैना झूठे उस्ताद ज़ोतन कि अस परमेशरे ज़ानतम, पन तैन केरां कम्मां साफ तरीके सेइं हिरातन कि तैना तैस न ज़ानन, किजोकि परमेशर तैन सेइं नफरत केरते ते तैना हुक्म न मन्नेबालेन, ते किछ भी रोड़ू केरनेरे काबल नईं।