Isaías 29

यरूशलेम नगरे पुड़ अफ़सोस

1 अफ़सोस, अरीएल, अरीएल,*29:1 अरीएल, यरूशलेमेरे लेई इस नंव्वेरो इस्तेमाल कियो जेवरोए, इसेरो मतलब वेदी आहे। तीं पुड़ अफ़सोस ज़ैस मां दाऊद राज़ो डेरन मां राव, साले पुड़ साल च़लतो राए ते तुस तिहार*29:1 तिहार खास धार्मिक तियार ज़ैस मनानेरे लेई लोक हर साल यरूशलेम नगरे मां एइते थिये। मनाते राथ। 2 फिर भी अवं अरीएले मुसीबती मां छ़डेलो, ते तैस नगरे मां लेरां देनी ते मातम भोल्हो; ते तै सारी नगरी बलिदानेरे खूने सेइं भेरोरी वेदरी अग्गरी ज़ेरि भोल्ही। 3 अवं च़ेवरे पासना तेरे खलाफ डेरे लेइतां भोल्हो; ते अवं तीं च़ेवरे पासना घेरो देइलो, ते मोरच़ो बेन्धतां तीं क़िलो बनेइतां घेरो देइलो। 4 तैखन तू पस्त भोइ गालो, ते धूड़ी पुड़ेरां ज़ोलो, ते तेरी गल ज़मीनी पुड़ां बल्हे-बल्हे शुनोली; तेरी आवाज़ धेरती पुड़ भूतेरी ज़ेरि भोल्ही, ते तू धूड़ी पुड़ां बल्हे-बल्हे ज़ोलो।

5 पन तेरे बखले दुश्मन बेशुमार रेतरे बराबर भोल्हे, ते तैन ज़ालम लोकां केरि भीड़ भूंसेरी ज़ेरि उज़ाड़ी गाली। 6 सेना केरो यहोवा यरूशलेमे बच़ानेरे लेई अचानक अम्बर गुड़ेइतां, ज़मीनी हिलातो, ते बड़ी आवाज़ केरतो, आँधी तूफान च़लातो, ते नाश केरनेबाली अग भड़कालो ते तैस कां एज्जेलो। 7 तैखन तैना सैरी कौमां केरे सेना सेइं ज़ैना अरीएले सेइं जंग केरेली, ज़ैना तैस पुड़ ते तैसेरे क़िले पुड़ हमलो केरेले ते तैस तंग केरेले, तैना एक्‍की रातरे सुपनेरे ज़ेरे भोइ गाले। 8 ज़ेन्च़रे अक नियन्नो मैन्हु सुपने मां रोट्टी खेइ राहोरोए; पन ज़ैखन तै बींझ़ते त तैसेरू पेट खाली भोते, या ज़ेन्च़रे अक ट्लिशोरो मैन्हु हेरते कि तै सुपने मां पानी पी राहोरोए; पन ज़ैखन तै बींझ़ते त तैसेरी ट्लिश तेरही रहतीए, एरहो हाल तैन सैरी कौमां केरे सेनां केरो भोल्हो ज़ैना सिय्योन पहाड़े सेइं जंग केरेली।

खबरदारी शुन्तां भी अनशुनी केरनी

9 रुकां ते हैरान भोथ! एश केरा ते काने भोइ गाथ! तैना नशे मां त आन, पन दाछ़रे रस्से सेइं नईं, तैना ढ्लैकां त खातन पन शराबी सेइं नईं। 10 यहोवा तुसां भारी निड्ली मां छ़डोरेथ तैनी तुश्शी एछ़्छ़ी यानी नबी बन्द कियोरेन; तैनी तुश्शे दोग्गे पुड़ यानी दर्शन हेरने बालन पुड़ पड़दो छ़डोरोए।✝29:10 रोम. 11:8. 11 एल्हेरेलेइ सारे दर्शन तुश्शे लेई पलैटोरी ते मोहर लेइतां बन्द कियोरी किताबरी गल्‍लां केरि ज़ेरि आन, ज़ैस कोई पढ़ोरे लिखोरे मैन्हु इन ज़ोइतां दे, "इस पढ़," ते तै ज़ोए, "अवं न पेढ़ी सेखी किजोकि ई मोहर लेइतां बन्द कियोरीए।"✝29:11 प्रका. 5:1-3. 12 तैखन तैए किताबी एक्‍की अन पढ़े दित्ती गाए, "कि एस पढ़।" ते तै ज़ोए, "कि अवं अन पढ़ आईं।"

13 प्रभु ज़ोते, "एना लोक ज़ैना ज़बाना सेइं मेरी आदर केरते नेड़े एइतन पन अपनो मन मीं करां दूर रखतन, ते ज़ैना सिर्फ मैन्हु केरो हुक्म शुन्तां मेरो डर मनतन,✝29:13 मत. 15:8-9;मरक. 7:6-7. 14 एल्हेरेलेइ शुन, अवं इन सेइं साथी अद्भुत ते हैरान केरनेबालू कम केरेलो; तैखन इन केरे अक्लमन्दा केरि अक्ल नाश भोल्ही, ते समझ़दारां केरि समझ़ च़ली गाली।"✝29:14 1 कुरि. 1:19.

एजने बाले वक्तेरी उमीद

15 अफ़सोस तैन पुड़, ज़ैना अपनो इरादो यहोवा करां बड़ी भारी कोशिश केरतन, तैना अपनु कम आंधरे मां केरतन ते सोचतन, "असन कौन लहते? असन कौन ज़ानते?" 16 तुश्शी केरही उलटी समझ़े! कुन कुम्हार मित्तरे बराबर गनो गालो? कुन बनेवरी चीज़ अपने बनाने बालेरे बारे मां ज़ोए, "अवं तैनी नईं बनेवरी," या बनोरी चीज़ ज़ोए, "तैस कोई समझ़ नईं?"✝29:16 रोम. 9:20-21.

17 थोड़ू च़िरेरे बाद लबानोनेरू जंगल फल लगते-लगते फलदार बाग बनेलू, ते फलदार बाग जंगल बेनि गाली। 18 तैस मौके टोंवने किताबरी गल्‍लां शुनेले, ते काने ज़ैन किछ न लेइहोए, तैना लाने लगे।✝29:18 मत. 11:5;प्रेरित. 26:18. 19 हलीम लोक यहोवारे वजाई सेइं खुशी भोल्हे, ते गरीब लोक इस्राएलेरे पवित्र परमेशरेरी वजाई सेइं मघन भोल्हे। 20 किजोकि ज़ालम फिरी न राले ते मज़ाक बनाने बालां केरो अन्त भोल्हो, ते ज़ैना अनर्थ केरनेबालां केरे लेई बींझ़े रहतन, 21 ज़ैना मैन्हु गल्‍लन मां फसातन, ते ज़ैना सभाई मां उलझातन तैन केरे लेई फंदो लातन, ते न्याय बेकार गल्‍लां केरे ज़िरिये, तैना सब मिटी गाते।

22 एल्हेरेलेइ यहोवा ज़ैनी अब्राहमे छुटकारो दित्तोरोए, तै याकूबेरे घरानेरे बारे मां एन ज़ोते, "याकूब फिरी शरमिन्दा न भोल्हो, ते न तैसेरे तुत्तरेरो रंग बेदलोलो। 23 किजोकि ज़ैखन तैसेरे खानदानेरे लोक मेरू कम लाहेले, ज़ैन अवं तैन मां केरेलो, तैखन तैना मेरे नंव्वे जो पवित्र ज़ोले, तैना याकूबेरे पवित्र परमेशर, पवित्र मन्नेले, ते इस्राएलेरे परमेशरेरो डर मन्नेले। 24 तैस मौके ज़ैन केरे मन टेपलोरे थिये तैन अक्ल मैल्हेली, ते ज़ैना बुड़बुड़ातन तैना शिक्षा हासिल केरेले।"