2 Tesalonik 3

Djaalaka étɛp’es

1 Deenek, bɔn-nyɛɛg, djaalaka étɛp’es, etɛɛ náá, mɛkpa ɛ Ghɛŋ needjala kaab kɔ mɛl, ye neebela duu, dáa yii nadhaa pɛ daa len ɛ. 2 Tin, baadjaalaka Zɛɛb étɛp nyɛ neepɛk bis é mɛmbɔ mɛ bɛmbee ɛ bot, bot ɛ ɛbiyo. Etɛɛ náá, ye tok bot djas di edum ɛ koŋ nɛ Zɛɛb.

3 Tin, Ghɛŋ ɛ́ sosoob. Nyɛ waadjɛ bin ghwyil, nyɛ waabaal bin sok bhwoob Mbee mot. 4 Bis ɛpemyaal nɛ lyem wat é mis mɛ Ghɛŋ kɔ ɛsu ɛ len náá, bi ɛpesa sa bis nalɛɛ bin ɛ, deenek, bi ɛ́ waatetɔ́ nɛ ɛsa yɛ.

5 Beta náá, Ghɛŋ djɛɛd ebhum elyem bin tɔ kwyɛl ɛ Zɛɛb nɛ tɔ ɛmaad ɛ lyem dáa Klisto.

Sa mɛsa dáa Pɔl mot-lwoma

6 Bɔn-nyɛɛg, bis ɛpewaab nɛ nen nɛ din ɛ Ghɛŋ’enaka Yezu Klisto náá, bi di ɛtsetaɛpe nɛ bɛtsak-bel ɛ ekeletyɛ, bot ɛ́ di ààkɛ tɔ mɛlyo mɛ bis nagoola bin ɛ. 7 Bi nɛ gu biyɔ bɛmet dáa bi di egoka nɛ ɛdu mɛfulu mes ɛ. Etɛɛ náá, bis nabɛ ɛ́ ààdi bɛtsak-bel ɛ bot é ghɛŋ bis nadi pɛ yebɔ ɛ. 8 Bis nabɛ ɛ́ ààwaab mot sa dek. Deenek, bis nadi ezuk tɔ ɛsa mɛsa mwos nɛ pum, ye nakoozodi náá mɛnyel eezetsak bis, ekaab náá, bis ɛzɛkɛdi ɛbɛp étɛp’en. 9 Ye tok náá, bis nasa deenek ɛ́, etɛɛ náá, bis nabɛ ɛ́ ààgoka nɛ ɛbela ɛkɛɛ ɛ len. Tin, bis nasa deenek ɛ́ etɛɛ náá, bis needi ndem bi di egoka nɛ ɛbaŋa ɛ. 10 Deenek, é ghɛŋ bis nadi pɛ daa len ɛ, bis naalɛɛ bin náá: «Mot di ààkwyɛl ɛsa mɛsa ɔ, nyɛ ààgoka nɛ ɛdɛ edee.»

11 É di’enek, bis ɛpegwak náá, bɛdhiiti bot pak’en moo ɛ́ bɛtsak-bel, bɛ ààkwyɛl ɛsa mɛsa, tin mɛsa mɔɔ ɛ́ ɛwa nuub tɔ etɛp bɛsɔ bɔɔ. 12 Nɛ mbi bot binɔk, bis ɛpedul bɛ mɛlɔ, bis ɛpelɛɛ nɛ nɔɔ nɛ din ɛ Ghɛŋ Yezu Klisto náá, bɛ goka ɛ́ nɛ ɛsa mɛsa mɛlu djas, étɛp bɛ neebela sa dek.

13 Yɛ kabɛ biyɔ bɔn-nyɛɛg ɔɔ, nàkatka ɛsesa enɛm esa. 14 Yɛ bɛ náá, mot ààpalooba nɛ mɛtiŋ mɛ bis di ekwyal tɔ mɛkana mak ɔɔ, ye goka ɛ́ náá, bi lyaal nyɛ nɛ bot djas. É di’enek, sa bi ààbaadi sama nɛ nɛ, étɛp nyɛ neebela sen. 15 Tin, sa bi àànɔɔ nyɛ dáa mot mɛbhuka men, djɛka nyɛ mɛlyo dáa mɔn-nyɛɛg’en.

Esɛɛa mɛtel nɛ Mɛswosel

16 Beta náá Ghɛŋ, mot di ɛsuk ɛ egwyem ɔ, nyɛ ɛmet gheedjedjɛ bin egwyem é mɛwala djas. Beta náá, Ghɛŋ di sama nɛ biyɔ djas.

17 Yɛ ɛ́ mam, mɛ ɛmet ɛ kwyal mɛkpa mɛ mɛswosel mak nɛ mbɔ’am met. Yɛ ɛ́ deenek ɛ́, mɛ dyeebaduu djin tɔ bɛmɛkana mam. Yak ɛ́ ekwyala bam. 18 Beta náá, enɛm nɛ embɛɛ Ghɛŋ’enaka Yezu Klisto di nɛ biyɔ djas.