1 Yɛ ɛ́ mam «Paa», mɛ kwyal mɛkana mak ɛ́ nɛ Ghayus mɔn-nyaagam mɛ di ekwyɛl nɛ tsɛɛtsɛ ɔ.

2 Mɔn-nyaagam mɛ di ekwyɛl ɔ, mɛ kwyɛl ɛ́ náá, mɛsa djas wɔ di esa ɛ, ye loo. Da wɔ ɛ́ baadi nɛ nyel ɛnyɔɛpe, dáa wɔ di ghiŋ tɔ Sisim ɛ. 3 Tin, mɛ naadyeebamyaala é ghɛŋ bɔn-nyoog natuula, baŋa mɛ dáa wɔ di sosoob tɔ etsɛɛtsɛ ɛ, nɛ dáa wɔ di ekɛ tɔ etsɛɛtsɛ ɛ. 4 Ye tok nɛ dhiiti sonok di edjɛ mɛ mɛmyaala dhaa é sok mɛ di egwak náá, bɔn bam* ɛpekɛ ɛnyɔɛpe tɔ etsɛɛtsɛ ɛ.

5 Mɔn-nyaagam mɛ di ekwyɛl ɔ, esosoob bɔ ɛpenyen tɔ etɛp djas ee wɔ di esa nɛ bɔn-nyoog ɛ, ye nakoozodi náá, bɛ ɛ́ bɛdjoŋ. 6 Bɛ naalɛɛ kwyɛl wɔ di nɛ yɛ nɛ nɔɔ ɛ, é mis mɛ zɛɛga mendjaala mena. Iyeee, kwyeea bɛ, étɛp bɛ neegoola mɛdjoŋ mɔɔ, dáa ye di egoka nɛ ɛsael tɔ ɛkwosak ɛ Zɛɛb ɛ. 7 Tin, bɛ naatɔ́ kɛsa mɛsa ɛ Klisto, bɔɔ ààmyaal sa wat nɛ bot ɛ di ààdum koŋ nɛ Zɛɛb ɔ. 8 Ye goka ɛ́ náá, mena kwyeeka mbi binɔk bot, etɛɛ náá, mena nɛ bɛnɔɔ needi lɔɔg wat tɔ ɛsa mɛsa mɛ ɛgoola etsɛɛtsɛ.

9 Mɛ kwyal ba mɔɔ pes mɛkana mak ɛ́, étɛp zɛɛga mendjaala men. Tin, Dhyotɛɛlɛf mot di esuu ɛdjɛɛd etɛp djas ɔ, nyɛ ààkwyɛl ɛgwak sa mɛ di elɛɛ ɛ. 10 Étɛp tak ɛ di náá, é sok mɛ aazyɛ ɛ, mɛ waalɛɛ embee etɛp djas ee nyɛ di esa ɛ. Nyɛy mot di elɛɛ elɛŋ etsal nɛ embee etɛp kɔ elo bina ɔ. Nyɛ ààpasik tin, nyɛ nɛ byen náá, bɔn-nyɛɛg bot ɛ di ezyɛ mɛdjoŋ ɔ, sulal pɛ daa lɛ. Nyɛ nɛ lu bɛdhiiti bɔn-nyɛɛg bina náá, bɛ nàmyaal náá, bot ɛ di ezyɛ mɛdjoŋ ɔ sulal pɛ yɔbɔ. Tin, nyɛ nɛ lu bɛ, nyɛ nɛ sɔ bɛ tɔ zɛɛga mendjaala.

11 Deenek, mɔn-nyaagam mɛ di ekwyɛl ɔ, nàbaŋa sa di àànyɔ ɛ, baŋa sa di náá, yɛ ɛ́ ɛnyɔɛpe ɛ. Tin, mot di esa enɛm esa ɔ, nyɛ ɛ́ mɔn ɛ Zɛɛb. Mot di esa embee mɛsa ɔ, nyɛ ààgu Zɛɛb.

12 Yɛ kabɛ Dhemetulus ɔɔ, bot djas ɛpelɛɛ enɛm esa ee nyɛ di esa ɛ, nɛ etsɛɛtsɛ ee di tɔ lɛ ɛpelyaal náá, yɛ ɛ́ tsɛɛtsɛ. Bisɔ pe ɛpebaalɛɛ enɛm esa bɛ, tin, wɔ nɛ gu náá, sa bis di elɛɛ ɛ, yɛ ɛ́ tsɛɛtsɛ.

13 Mɛ aabaadi ɛ́ nɛ bɛtɛ nɛ etɛp ɛlɛɛ wɔ, tin, mɛ ààkwyɛl náá, mɛ kwyal yɛ nɛ kwos nɛ mɛdii mɛ tak. 14 Mɛ ɛ́ nɛ ɛbwaalel náá, mena waaboma tɔ mɛlu mak. É di’enek, menabɛl bɛbá ɛ́ waamɔ.

15 Beta náá, egwyem di nɛ nɔ. Bɛsɔ bɔ eeswos wɔ. Swosa bɔɔ bɛsɔ bina, sa wɔ ààdjisa mot ngɔt.