1 Ba bɔɔ mɛkpa kɔ ɛsu ɛ epata ee zesɛɛgaa étɛp bot ɛ zedum koŋ nɛ Zɛɛb pɛ ghaada Yeluzalɛm ɔ. Bi goka ɛ́ nɛ ɛdu ɛnyɔɛpe mɛtiŋ mɛ tak wat mɛ nadjɛ nɛ ezɛɛga mendjaala mɛ kyee dik Ghalasi ɛ. 2 Eyenga djas, mot nɛ mot pɛ ndjaŋ'ɛ goka ɛ́ nɛ ɛdis ba bim epata, goka nɛ dáa nyɛ di ebela ɛ. Da nyɛ ɛ́ kwom, étɛp nyɛ needi ààbwood dwoo ɛzyɛ ɛ lam étɛp ɛsa yɛ. 3 É ghɛŋ mɛ aakum ɛ, mɛ waalwom bot ɛ bi nazesɛ́ɛ pɛ ghaada Yeluzalɛm ɔ, étɛp bɛ neekɛkyeed epata ee bi nazesɛɛg ɛ, nɛ bɛmɛkana mɛ mɛ aadjɛ bɛ ɛ. 4 Yɛ bɛ náá, ye goka ɛ́ mam pe tɔ́ ɔɔ, bis nɛ bɛnɔɔ ɛ́ kwaatɔ́.

5 Mɛ aazyɛ pɛ daa len ɛ́, bhii mɛ aadhaa pɛ kyee dik Masedwan ɛ, etɛɛ náá, mɛ aadhaŋ ɛ́ penek. 6 Mɛ ɛ́ nɛ ghwyil ɛdi ba mɛlu pɛ yebɔ, nɛghu mɛ ɛ́ nɛ ghwyil ɛkwyɛɛg tu mbu bɛbhi penek. É di'enek, bi ɛ́ nɛ ghwyil ɛkwyee mɛ é ɛgoola mɛdjoŋ mam, pɛ kyee mɛ di ekwyɛl ɛtɔ́ ɛ. 7 Mɛ ààpakwyɛl náá, mɛ zyɛ pɛ yebɔ tyee goŋ swak. Tin, Ghɛŋ ɛ kwyɛl ɔɔ, ɛkwosak ɛ lam ɛ́ náá, mɛ kwyɛɛg bɛtɛ nɛ mɛlu pɛ yebɔ.

8 Deenek, mɛ ɛpekwyɛl ɛdi tɔ ghaada Efɛɛz kɛkum dwoo ɛbyoŋ ɛ Patekɔt. 9 Etɛɛ náá, yɛ ɛ́ tɛtɛ ɛwala zedjɛaa mɛ ɛ, étɛp ɛsa boo mɛsa ɛ Zɛɛb, ye nakoozodi náá, bot ɛ mɛbhuka ɛpebu.

10 Timote ɛ kum pɛ yebɔ ɔɔ, beka nyɛ ɛnyɔɛpe étɛp, nyɛ neemyaala. Etɛɛ náá, nyɛ ɛ́ mot-mɛsa ɛ Ghɛŋ dáa mam. 11 Sa mot ààbee nyɛ é mis toto. Tin, kwyeeka nyɛ étɛp nyɛ neegoola mɛdjoŋ mɛ tɔ egwyem, nyɛ neebula pɛ kyee mɛ di'aak. Etɛɛ náá, bis nɛ bɛdhiiti bɔn-nyɛɛg ɛpebwood nyɛ.

12 Yɛ kabɛ mɔn-nyɛɛg'ena Apolɔs ɔɔ, mɛ nɛ dyeebadjɛ nyɛ mɛghaaz étɛp ɛtɔ́ pɛ yebɔ, bɛ nɛ bɛdhiiti bɔn-nyɛɛg. Nenak, nyɛ dinaa ààpakwyɛl ɛzyɛ pɛ yebɔ. Nyɛ aazyɛ ɛ́, dwoo nyɛ aabela ghwyil ɛ.

13 Dika ndjem, dika ghiŋ tɔ ɛdum ɛ koŋ nɛ Zɛɛb, dika nɛ mɛghaaz, dika nɛ ghwyil. 14 Saka etɛp djas nɛ lyem kwyɛl.

15 Biyɔ bɔn-nyɛɛg, bi nɛ gu Stefanas nɛ bot ɛ mɛbyel mɛ. Bi nɛ baagu náá, pɛ kyee dik Akayi, bɛ nabɛ ɛ́ bot ɛ mɛkɛn ɛdum ɛ koŋ nɛ Zɛɛb. Deenek, bɛ naawa lyem tɔ mɛsa mɛ bot ɛ zedum koŋ nɛ Zɛɛb ɔ. Tin, mɛ ɛpewaab nɛ nen náá, 16 bi looba nɛ mbi binɔk bot, dɔɔ nɛ bot djas di ewa lyem ɛlyelɛpe tɔ ɛsa mɛsa mɛ Zɛɛb sama nɛ nɔɔ ɛ.

17 Mɛ ɛpemyaala nɛ ɛtuula ɛ Stefanas, nɛ Fɔɔtunatus dɔɔ nɛ Akayikus. Bɛ naadis mɛ piid'en mɛ nadi nɛ yɛ ɛ. 18 Guka dáa bi di enɔɔ mbi binɔk bot ɛ, etɛɛ náá, bɛ naadjɛ mɛ mɛghaaz dáa bɛ nasa nɛ nen ɛ.

19 Ezɛɛga mendjaala mɛ kyee dik Azi djas eeswos bin. Deenek, Akilas bɛ nɛ Pilisil, zɛnɔɔ bot ɛ zɛɛga mendjaala di esɛɛga pɛ tɔ ndjaŋ'ɔɔ ɔ, bɛ eeswos bin ɛbuɛpe tɔ ɛgwakel mena dika nɛ yɛ nɛ Ghɛŋ ɛ. 20 Bɔn-nyɛɛg bin, bot ɛ di wak ɔɔ, bɛ eeswos biyɔ djas.

Swoselka pak'en nɛ mɛbeedela dáa bɔn-nyɛɛg tɔ ɛdum ɛ koŋ nɛ Zɛɛb di esa ɛ.

21 Mam Pɔl, mɛ eeswos bin. Yɛ ɛ́ mam mɛ ɛmet ɛ kwyal mɛkpa mɛ mɛswosel mak nɛ mbɔ'am met.

22 Mot di ààkwyɛl Ghɛŋ ɔ, beta náá, nyɛ bela mbee baka!

Maalana ta! Ghɛŋ'es dha!

23 Beta náá, enɛm nɛ embɛɛ ɛ Ghɛŋ Yezu di nɛ nen.

24 Mɛ nɛ kwyɛl biyɔ djas, tɔ ɛgwakel mena dika nɛ yɛ nɛ Yezu Klisto ɛ.