1 Bot goka ɛ́ nɛ ɛbee bis ɛ́, dáa bot ɛ mɛsa ɛ Klisto. Bis ɛ́ endɔmbɛ ee nazenɛɛgaa, étɛp ɛgoola etsɛɛtsɛ e Zɛɛb nadi syela ɛ. 2 Zuka nɛ sa di ewaabaa nɛ ndɔmbɛ ɛ́ náá, nyɛ di sosoob. 3 Yɛ kabɛ mam ɔɔ, ye nakoozodi náá, biyɔ ɛ́ di epɛ́ɛ mɛ, nɛghu mɛ pɛ́ɛaa ɛ́ sok bhwoob bɛtetɛp, lyem'am ààbem ba nɛ dhiiti sonok. Yɛ ɛ́ tsɛɛtsɛ náá, mɛ tok nɛ ghwyil ɛpɛ́ɛ nyel'am mam ɛmet. 4 Deenek, mɛ ààbem ba nɛ dhiiti sonok. Tin, yɛ ààkwyɛl ɛlɛɛ náá, mɛ ààpasa dhiiti mbee sonok di nɛ ghwyil ɛdjɛ mɛ ndjɛ ɛ. Yɛ ɛ́ Ghɛŋ ɛ di tetɛp'am. 5 Dum nɛ tɛp tak ɛ, ye di náá, sa bi ààpɛ́ɛ mot ɛsok nɛ ɛwala ɛ Ghɛŋ nɛ ɛkum. Tin, gwaalka Ghɛŋ pookotuula, etɛɛ náá, nyɛ aazɛwyisal tɔ gwyɛ etɛp djas nadi tɔ ghooghom ɛ, nyɛ aazɛlyaal embee esiiza ee di tɔ ebhum elyem e bot ɛ. É di'enek, Zɛɛb aaduwal mot nɛ mot ɛ́, dum nɛ mɛsa mɛ nyɛ nasa ɛ.

6 Bɔn-nyɛɛg, dum tɛp mɛ lɛɛ wak ɛ, mɛ eenɔɔ bis nɛ Apolɔs tyee geka, étɛp bi neetiibal ɛsuk ɛ mɛkpa mak. Dhiiti kana di eke náá: «Mot goka ɛ́ nɛ ɛsa ɛ́, sa Ekwyala di elɛɛ ɛ.» É di'enek, sa dhiiti mot pak'en ààdi nɛ ɛghɛɛa nyel, étɛp ɛkɛm nwyak mot, da bhina nwyak mot. 7 Tin, étɛp yé wɔ di ebun náá, wɔ eedhaa bɔɔ bɛsɔ bɔ? Esa djas wɔ di nɛ yɛ ɛ, ye tok Zɛɛb nadjɛ wɔ? Dáa ye di deenek ɛ́, haaa étɛp yé wɔ di nɛ ɛghɛɛa nyel ɛkɛɛ wɔ nabɛ ɛ́ ààdjɛaa-djɛak?

8 Nenak yak, bi eezebela esa djas elyem bin nadi ekwyɛl ɛ, bi moo ɛ́ bot ɛ mɛvu. Deenek, bi moo ɛ́ edi bɛmɛkoozi, bela náá, bisɔ tok edi bɛmɛkoozi. Tin, nɛ tsɛɛtsɛ mɛ kwyɛl ɛ́ náá, bi di bɛmɛkoozi, etɛɛ náá, bisɔ pe needi bɛmɛkoozi dáa biyɔ. 9 Deenek, mɛ bee ɛ́ ɛkɛɛ náá, Zɛɛb naanɛɛg bisɔ bot ɛ lwoma é di mɛsik. É mis mɛ bot, bis ɛ́ dáa bot ɛ zenɛɛgaa kuku ɛbwak étɛp ɛgóaa ɔ. Mɛ ke deenek ɛ́ etɛɛ náá, bhwak djas moo ɛ́ ghwyɛ nɛ mis kɔ les, étɛp ɛbee sa aasael nɛ nes ɛ. Ye tok bot nɛ bot, yɛ ɛ́ dɔɔ nɛ efofop. 10 Bisɔ ɛ́ bot ɛ mɛlyet kɔ ɛsu ɛ Klisto. Deenek, biyɔ kadi ɛ́ bɛtsoŋ ɛ bot tɔ ɛgwakel nɛ Klisto. Bela náá, bot bee ɛ́ náá, bisɔ ɛ́ bɛtsak-bel. Tin, biyɔ, bi ke ɛ́ náá, bi ɛ́ bot ɛ di nɛ ghwyil ɔ. É di'enek, bisɔ ɛpebhinaa, biyɔ kadi ɛ́ eduwalaa! 11 Kum ɛwala ɛlak nenak, bis ɛpezuk nɛ za, bis ɛpegwyɛ nɛ gwyes mɛdii, nɛ eduuba. Deenek, bis ɛpebiaa, bis ààdi é di wat, bis ɛ́ ghooghoŋ ɛbat-bat. 12 Bis ɛpesa mɛsa mɛ na lyel-lyel, étɛp bis neebela sa dek. É sok bɛ di elee bis ɛ, bis nɛ djaala Zɛɛb náá, nyɛ sa bɛ enɛm esa. É sok bɛ di etiig bis ɛ, bis nɛ maad. 13 Tin, é sok bot di elii ɛbiyoɛpe nɛ nes ɛ, bis yala bɛ ɛ́ nɛ mɛtela djas. Deenek, bɛ kabee bis mos kɔ ɛko ɛ bɔs ɛ, dáa ɛkwyiid, nɛghu dáa bot ɛ mendi.

14 Mɛ ààpakwyal bin mɛkana mak étɛp ɛdjɛ bin sen. Mɛ kwyal bin mɛkana mak ɛ́, étɛp ɛdul ɛ bin mɛlɔ, dáa bɔn bam mɛ di ekwyɛl dhaa tyɛ ɔ. 15 Deenek, bi neegu náá, bi nakoozodi nɛ bɛdjɛɛdel bɛmil-kam (1 0000) tɔ tsik bi di nɛ yɛ nɛ Klisto ɛ, bi aazodi ɛ́ nɛ sɛɛg ngɔt. Etɛɛ náá, é ghɛŋ mɛ nazɛgoola bin Mbɛɛ Bhaadal é sok mɛkɛn ɛ, mam ɛ nakadi sɛɛg'en tɔ tsik bi di nɛ yɛ nɛ Yezu Klisto ɛ. 16 Deenek, mɛ ɛpedjaala nɛ nen, baŋaka mɛsa mɛ mɛ di esa ɛ. 17 É di tak ɛ, mɛ dhis bin Timote mɔn'am mɛ di ekwyɛl ɔ, nyɛy mot di sosoob tɔ ɛdum koŋ nɛ Ghɛŋ ɔ. Nyɛy ɛ́ kwaalɛɛ bin mɛtiŋ mɛ di edjɛɛd mɛ tɔ tsik bis nɛ Yezu Klisto ɛ, nɛ dáa mɛ di elyo é edi djas tɔ mendjaa mɛ mendjaala ɛ.

18 Bɛdhiiti bot pak'en naazɛwa ɛbet náá, mɛ tok nɛ ghwyil ɛbaazyɛ zɛbee bin. 19 Tin, Ghɛŋ ɛ kwyɛl ɔɔ, ye kalik ɛ́ batsa mɛ zyɛ pɛ yebɔ. É ghɛŋ mɛ aazyɛ ɛ, mɛsa mam aanàsik egwak-gwakak sa bot ɛ mɛbet binɔk di elii ɛ. Ye goka ɛ́ mɛ gu dɔɔ nɛ ghwyil mɛbwala mɛ bɛ di esa mɛsa mɔɔ nɛ yɛ ɛ. 20 Etɛɛ náá, Ɛyoŋ ɛ Zɛɛb tok elɛŋ e nuub toto, tin, yɛ ɛ́ etɛp e mɛbwala. 21 Bi kwyɛl dáa? Bi kwyɛl ɛ́ náá, mɛ zyɛ pɛ daa len nɛ ghwyɛs ohoo, nɛghu mɛ zyɛ nɛ mbɛɛ lyem tɔ kwyɛl, nɛ mɛtela djas?