1 Mɛ tok wak pɛka? Mɛ tok wak mot-lwoma? Mɛ nabɛ ààbee Ghɛŋ'enaka Yezu? Bi tok wak bot ɛ zedum koŋ nɛ Zɛɛb, dum nɛ mɛsa mam kɔ ɛsu ɛ Ghɛŋ é? 2 Ye nakoozodi náá, bɛdhiiti bot ààbee náá, mɛ ɛ́ mot-lwoma, tin, kɔ ɛsu ɛ len mɛ ɛ́ mot-lwoma. Dáa ye di náá, bi ɛ́ tɔ ɛgwakel nɛ Ghɛŋ ɛ, yɛ ɛ́ biyɔ ɛ di elyaal nɛ tsɛɛtsɛ náá, mɛ ɛ́ mot-lwoma ɛ Ghɛŋ.

3 Gwakeka dáa mɛ di ebɔɔza nɛ bot ɛ di elii ɛbiyoɛpe nɛ nam ɔ. 4 Dáa bis di náá, bis ɛ́ bot ɛ lwoma ɛ, bis tok nɛ ghwyil ɛbela edee nɛ mɛnyok kɔ ɛsu ɛ mɛsa mes é? 5 Bis tok nɛ ghwyil ɛtɔ́ mɛdjoŋ nɛ bel bis di ekeletyɛ ɛ? Bɛdhiiti bot ɛ lwoma sa ɛ́ deenek, dɔɔ nɛ bɔn-nyɛɛg ɛ Ghɛŋ, zɛnɔɔ Pyɛɛd. 6 Bi gek ɛ́ náá, yɛ ɛ́ bis nɛ Bhaanabhas ɛ zodi egoka nɛ ɛsa mɛsa, étɛp bis neebela sa dek é? 7 Bi naazegwak sok náá, mot sa mɛsa mɛ esodja, da nyɛ ɛ́ tuud efute bɛ nyɛy ɛmet é? Ɛzɛ di bɛ pyeeb vin, da nyɛ ɛ́ di ààdɛ bhum tak? Yɛ ɛ́ nwyaa mbi mbaalel mɛsaa di ààdɛ mɛdii mɛ mɛbel mɛ mɛsaa mɛ nyɛ di ebaal ɛ?

8 Tin, mɛkpa mam ààbela ghwyil tɔ etɛp ee bot ɛ bɔs di esa ɛ. Etɛɛ náá, etsi ɛ Moiiz baazoke ɛ́ deenek. 9 Yɛ ɛ́ tsɛɛtsɛ, etsi ɛ Moiiz lɛɛ ɛ́ náá: «Sa wɔ ààdiyal nuub ngɔmbɛ é ghɛŋ nyɛ di enyal bhum ble ɛ✝.» Ye kwyɛl ɛlyaal ɛ́ náá, Zɛɛb nɛ gek engɔmbɛ ghoŋ. 10 Nyɛ ààlii deenek tin kɔ ɛsu ɛ lena? Tsɛɛtsɛ, mɛkpa menek nakwyalaa ɛ́ étɛp'ena. Ye goka ɛ́ náá, mot di ebɛ see, nɛ mot di enyuŋal ebhum e ble ɔ, bela efute mɛsa mɔɔ. 11 Bis naabɛ bhek Sisim tɔ len. Tin, bis ɛ kanɔɔ ba bim esa ee bi bela é mɛsa men ɛ, ye kabɛ ɛ́ ɛbiyoɛpe? 12 Yɛ bɛ náá, bɛdhiiti bot ɛ́ nɛ ghwyil ɛdɛ esa bin ɔɔ, Haaa gwyata nɛ bisɔ, bis ɛ́ nɛ gham nɛ ɛdɛ yɛ dhaa-dhaŋak bɔɔ.

Bela náá, bis nabɛ ɛ́ ààkwyɛl ɛsa deenek. Tin, bis naamaad elyem kɔ etɛp djas, étɛp bis ɛzɛkɛlu bɛdhiiti bot ɛgwak Mbɛɛ Bhaadal ɛ Klisto. 13 Bi nɛ gu ɛnyɔɛpe náá, bot ɛ di esa mɛsa tɔ kok Ndjaa-ebuwa ɔ, edee bɔɔ goka nɛ ɛdus ɛ́ tɔ kok Ndjaa-ebuwa bɛ di esa mɛsa ɛ. Yɛ kabɛ bot ɛ di eka ebuwa kɔ mesa-ebuwa ɔɔ, edee bɔɔ zodus ɛ́ tɔ ebuwa binek. 14 Yɛ ɛ́ tyee wat nɛ bot ɛ di egoola Mbɛɛ Bhaadal ɔ, Ghɛŋ naazeloolɛɛ náá, bɔɔ pe aazobela edee ɛ́, nɛ Mbɛɛ Bhaadal bɛ di egoola ɛ.

15 Yɛ kabɛ mam ɔɔ, mɛ ààwaab esa binek, tin, mɛ ààpakwyal bin mɛkana mak étɛp ɛwaab ɛ bin dhiiti sonok. Deenek, mɛ kwyɛl ɛ́ náá, ɛsyee bela mɛ, nɛ náá, mot zɛdis mɛ duu mɛ di nɛ yɛ ɛ. 16 Mɛ tok nɛ ghwyil ɛghɛɛ nyel kɔ ɛsu ɛ ɛgoola Mbɛɛ Bhaadal, etɛɛ náá, yɛ ɛ́ nɛ nam ɛ́ bhel náá, mɛ sa mɛsa mɛ tak. Haaa kpaa-ghoŋ nɛ nam, mɛ di ààgoola Mbɛɛ Bhaadal ɔ. 17 Yɛ ɛpedi náá, yɛ ɛ́ mam ɛmet ɛ nasɛ́ɛ mɛsa mɛ tak ɔɔ, pe mɛ goka ɛ́ nɛ ɛbela efute. Dáa ye di náá, mɛsa mɛ tak nadjɛaa mɛ ɛ́ nɛ bhel ɛ, é di'enek, mɛ zokasa ɛ́ mɛsa mɛ nadjɛaa mɛ ɛ. 18 É di'enek, efute bam aakadi tin yé? Efute bam ɛ́ mɛmyaala mɛ mɛ di nɛ yɛ é ghɛŋ mɛ di egoola Mbɛɛ Bhaadal ààwaab sonok nɛ mot ɛ. Mam àànɔɔ efute ee mot di egoka nɛ ɛbela, bhis ɛgoola Mbɛɛ Bhaadal ɛ.

19 Bot nɛ gu náá, mɛ tok kwom dhiiti mot. Yɛ ɛ́ tsɛɛtsɛ, é di tak wat, mɛ eemyaal ɛdi ɛ́ kwom bot djas, étɛp bɛtɛ nɛ bot needu Klisto. 20 É sok mɛ di sama nɛ bot ɛ mbyak eYuda ɛ, mɛ kɛ ɛ́ dáa bɔɔ, étɛp ɛdul ɛ́ bɛ é ze ɛ Klisto. É sok mɛ di sama nɛ bot ɛ di elooba nɛ mɛtiŋ ɛ Moiiz ɛ, mɛ kɛ ɛ́ dáa bɔɔ. Mɛ dyeebasa deenek ɛ́, étɛp mɛ needul bɛ é ze ɛ Klisto, ye nakoozodi náá, mɛ tok si bhel mɛtiŋ ɛ Moiiz. 21 É ghɛŋ mɛ di sama nɛ bot ɛ di ààbɛ bot ɛ mbyak eYuda ɔ, bot ɛ di ààlooba nɛ etsi ɛ Moiiz ɔ, mɛ kɛ ɛ́ dáa bɔɔ, étɛp mɛ needul bɛ é ze ɛ Klisto. Deenek, yɛ ààkwyɛl ɛlɛɛ náá, mɛ ààlooba nɛ etsi e Zɛɛb. Tin, mɛ ɛ́ si bhel etsi ɛ Klisto. 22 Yɛ kabɛ bot ɛ di ààpyet tɔ ɛdum ɛkoŋ nɛ Zɛɛb ɔɔ, mɛ zobaakɛ ɛ́ dáa bɔɔ, étɛp ɛdul ɛ́ bɛ é ze ɛ Klisto. Deenek, nɛ mbi bot djas, mɛ nɛ sa esa djas di egoka ɛ, étɛp mɛ neetsik bɛdhiiti bot. 23 Mɛ sa etɛp binek djas ɛ́, etɛɛ náá, bot neemyaal Mbɛɛ Bhaadal. Etɛɛ náá, dɔɔ nɛ mam pe, mɛ neebela yam ɛkɛɛ tɔ embɛɛ esa ee Mbɛɛ Bhaadal nakɛk ɛ.

24 Bi nɛ gu náá, bot ɛ di esa mɛboola mɛ ɛwyis ɛ kaab ɔ, bɛ kan kaab ɛ́ bɔɔ djas, é di'enek, mot ngɔt ɛ́ di ekɛkwak ɛbela efute. Yɛ bɛ náá, bi ɛpesa mɛboola mɛ kaab ɔɔ, bi goka ɛ́ nɛ ɛkaab tyee wat di náá, bi neekɛbela efute. 25 Deenek, bot ɛ di esa mɛboola mɛ ɛwyis ɛ kaab ɔ, bɛ goka ɛ́ nɛ ɛmaad ɛ lyem tɔ etɛp djas. Bɛ dyeebasa deenek ɛ́, étɛp bɛ neebela kɔtɔ duu* di ààbɔya nɛ ɛgwyɛ ɛ. Tin, bisɔ dyeebasa zii ɛ́, étɛp ɛbela kɔtɔ duu na kɔm-kɔm. 26 Étɛp tak ɛ́, ye di náá, é ghɛŋ mɛ di esa mɛboola mɛ ɛwyis ɛ kaab ɛ, mis mam gwyák ɛ́ kɔtɔ duu. Mɛ ɛ́ dáa mot mɛboola mɛ tuub, ekuta bɛ ààbyak mbɛs. 27 Mɛ ààduwal nyel'am, mɛ nɛ tiig yɛ ɛlyelɛpe. É kaab náá, bhii mɛ di egoola Mbɛɛ Bhaadal nɛ bɛdhiiti bot ɛ, mam ɛmet ɛzɛkɛdisaa tɔ bot aabela efute ɔ.