1 Bɔn-nyɛɛg, djhooliika nenak dum nɛ mɛkɛɛ mɛ Sisim na Dɛɛ. Mɛ kwyɛl ɛ́ náá, bi gu etsɛɛtsɛ dum nɛ mɛkɛɛ mɛ tak. 2 Bi nɛ gu náá, é ghɛŋ bi nadi bi dinaa ààdum koŋ nɛ Zɛɛb ɛ, bi nadi ebet náá, bɛ dul bin, bi duwal bɛnaghisɛ, esa ee di ààbɛ nɛ nuub ɛlii ɛ. 3 Dum nɛ tɛp tak ɛ, mɛ di ekwyɛl ɛlɛɛ bin náá, mot ɛ ke náá: «Mɛ eekal Yezu» ɔɔ, ye tok Sisim Zɛɛb lwom nyɛ náá, nyɛ ke deenek. Tin, ye tok nɛ mot di nɛ ghwyil ɛben gwood ke náá: «Yezu ɛ́ Ghɛŋ», yɛ di ààbɛ náá, Sisim na Dɛɛ ɛ di edjɛɛd nyɛ ɔɔ.

4 Mɛkɛɛ mɛ Sisim di edjɛ ɛ, nɛ bu membi, Sisim ɛ́ wat. 5 Mɛsa mɛ Zɛɛb nɛ bu membi. Mɛsa mɛ mena di esaka ɛ, yɛ ɛ́ yii Ghɛŋ ngɔt. 6 Yɛ ɛ́ nɛ bɛtɛ nɛ membi mɛ ɛsa mɛsa mɛ Zɛɛb. Yɛ ɛ́ Zɛɛb yenɔk ngɔt ɛ di esa mɛsa menek djas tɔ lenaka. 7 Tɔ tsik mot nɛ mot, Sisim ɛpelyaal ɛkɛɛ ɛ mot nɛ mot bela, étɛp ɛkwyee bot djas ɛ. 8 Sisim djɛ bɛdhiiti bot ɛ́, ɛkɛɛ ɛlii nɛ etsoŋ. Sisim tak wat kadjɛ bak bot ɛ́, ɛkɛɛ ɛlii nɛ mɛtselal. 9 Sisim tak wat ɛpedjɛ bɛdhiiti bot tɛtɛ ɛdum ɛ koŋ nɛ Zɛɛb. Ye kadjɛ bak bot ɛ́, ɛkɛɛ ɛ ɛgwom ɛ bot. 10 Sisim eedjɛ bɛdhiiti bot ɛkɛɛ ɛsa endem e mɛbwala, nɛ bak bot nyɛ eedjɛ bɛ ɛkɛɛ ɛgoola sa Zɛɛb di elɛɛ bɛ ɛ. Deenek, nɛ bɛdhiiti bak tak, nyɛ eedjɛ bɛ ghwyil ɛwa mbɛk pak embee esisim nɛ Sisim na Dɛɛ. Tin, nɛ bɛdhiiti, nyɛ eedjɛ bɛ ɛkɛɛ ɛlii tɔ elii e bot djas di ààgwak ɛ. Nyɛ kadjɛ nɛ bak bot ɛ́ ghwyil ɛgoola elii binek. 11 Yɛ ɛ́ Sisim tak wat ɛ di esa mɛsa menek. Nyɛ nɛ djɛ mot nɛ mot ɛkɛɛ nyɛ di ekwyɛl ɛ.

12 Nyel ɛ́ wat, tin, yɛ ɛ́ nɛ bɛtɛ nɛ ekyes. Tin, ekyes e tak nakoozobu, ekyes binek djas sa ɛ́ nyel wat. Yɛ ɛ́ tyee wat nɛ zɛɛga bot ɛ mendjaala, ye lyaal ɛ́ nyel ɛ Klisto. 13 Tin, menabɛlka djas, bot ɛ mbyak eYuda nɛghu bot ɛ mbyak eGhɛlɛk, kwom mot nɛghu seŋɛlɛ mot, mena naaduwaka Zɛɛb tɔ Sisim wat. Ye nabɛ ɛ́ étɛp mena needika nyel ngɔt. Tin, yɛ ɛ́ Sisim tak wat ɛ di tyee mɛdii mɛ mena di edɛka menabɛlka djas ɛ.

14 Tin nyel mot aanàkwaazodi nɛ kyes wat. Nyel mot nɛ bu ekyes. 15 Ko ɛ ke náá: «Dáa ye di náá mɛ tok mbɔ ɛ, mam tok kyes nyel» ɔɔ, yɛ waadus náá, nyɛ ɛ́ kyes nyel étɛp tak é? 16 Ɛlɔ ɛ kake yɛ sok náá: «Dáa di náá, mɛ tok dis ɛ, mam tok kyes nyel» ɔɔ, yɛ waadus náá, ye tok kyes nyel étɛp tak é? 17 Yɛ ɛpedi náá, nyel mot djas ɛ́ bum dis nɛ bum dis ɔɔ, haaa mot aakagwak tin dáa? É di'enek, yɛ ɛpedi náá, nyel djas ɛ́ ɛlɔ nɛ ɛlɔ ɔɔ, é di'enek, mot aakagwak mɛnuub tin dáa? 18 Nɛ tsɛɛtsɛ, Zɛɛb nasa nyel mot ɛ́ ekyes nɛ ekyes, kyes nɛ kyes nɛ mɛsa mɛ, dáa Zɛɛb nyɛ ɛmet nadi ekwyɛl ɛ. 19 Deenek, yɛ ɛpedi náá, nyel mot nazosael ɛ́ nɛ kyes wat ɔɔ, pe nyel mot tok. 20 Deenek, nyel mot nɛ bu ekyes, tin, nyel ɛ́ wat.

21 Dis tok nɛ ghwyil ɛke nɛ mbɔ náá: «Mɛ tok nɛ gwyes nɛ nɔ!» Deenek, lo tok nɛ ghwyil ɛke nɛ mɛko náá: «Mɛ tok nɛ gwyes nɛ nɔ!» 22 Edhiiti ekyes e nyel ee bot di ebee náá yɛ ààval ɛ, ye nɛ val ɛnyɔɛpe. 23 Ekyes e nyel ee bot di ebee náá, yɛ ɛ́ ààdyeebaval ɛ, yɛ ɛ́ yii bot dyeebakwyɛɛg dhaa nyel ɛ. Tin, ekyes e nyel ee bot dyeebabee náá, yɛ ààgoka náá, ye nyen é mis mɛ bot ɛ, yɛ ɛ́ yii bot di ekwyɛɛg ɛbuɛpe ɛ. 24 Tin, ekyes e nyel ee bot dyeebabee náá, ɛnyɔ nɛ ɛbee ɛ, yɛ ààkwyɛɛgaa ɛbuɛpe. Deenek, é ghɛŋ Zɛɛb nasa nyel mot ɛ, nyɛ naadyeebadjɛ duu nɛ ekyes e nyel ee bot di ààdyeebaduwal ɛ. 25 Bela náá, mbɛk tok tɔ nyel mot. Deenek, ekyes djas ɛpekwyeel pak'ɔɔ. 26 Yɛ di náá, kyes nyel mot wat ɛpekpaŋ ɔɔ, ekyes nyel djas nɛ gwak mɛkpaa menek. Tin, kyes nyel wat ɛdjɛaa duu ɔɔ, ekyes nyel djas nɛ di tɔ mɛmyaala.

27 Guka náá, bi ɛ́ nyel ɛ Klisto. Mot nɛ mot pak'en ɛ́ kyes wat é nyel tak. 28 Étɛp tak ɛ, ye di náá, tɔ ndjaa mendjaala, Zɛɛb nakan ɛdil sok ɛ́ bot ɛ lwoma, bhɔɔba yɔɔ bɛngoolel ɛ Mɛkpa ɛ Zɛɛb, yii elɛl ɛ́ bɛlyoel. Bhii binɔk, nyɛ naabaadil bot ɛ di esa endem mɛbwala ɔ, nɛ bot ɛ di nɛ ghwyil ɛtsik bot ɛ mɛbɛ́ ɔ. Bhii tak, nyɛ naabaazɛdil bot ɛ di nɛ ɛkɛɛ ɛkwyee nɛghu ɛdjɛɛd bɔɔ bɛsɔ bɔ ɔ, nɛghu ɛlii ɛ́ tɔ bɛtɛ nɛ elii e sis ɔ. 29 Bot djas tok bot ɛ lwoma, nɛghu bɛngoolel ɛ Mɛkpa ɛ Zɛɛb, zɛnɔɔ bɛlyoel. Bela náá, bot djas tok nɛ ɛkɛɛ ɛsa endem e mɛbwala, 30 nɛghu bot ɛ di etsik bot ɛ mɛbɛ́ ɔ. Bot djas tok bot ɛ di elii tɔ elii bot di ààgwak ɛ, nɛghu bot ɛ di egoola elii binek ɔ. 31 Deenek, saaka náá, Sisim na Dɛɛ djɛ bin ɛkɛɛ di eval dhaa tyɛ ɛ.

Tin, mɛ ɛpelyaal bin nenak ze di edhaa mɛze menek djas ɛ.