1 Bɔn-nyɛɛg, mɛ kwyɛl ɛ́ náá, bi gheetetaala nɛ sa nasael nɛ bɛbhaab'enaka é ghɛŋ ɛ Moiiz ɛ. Ye nadi ɛ́ nɛ eguud nadi edjeed bɛ ɛ. Bhii tak, bɔɔ djas naasɛɛ boo dii mɛsɔn nadi edjóoaa Dii Mɛsɔn na Tɔɔbelaa ɛ. 2 Bɔɔ djas naaduwa Zɛɛb tɔ eguud nɛ tɔ boo dii mɛsɔn. Etɛp binek djas kwyɛl ɛlyaal ɛ́ náá, bɛ naamyaal ɛdu ɛ́ Moiiz. 3 Bɔɔ djas naadɛ edee wat yii sisim, 4 bɔɔ djas naadɛ mɛdii mɛ wat yii sisim. Tin, mɛdii mɛ bɛ nadi edɛ ɛ, nadi ewyis ɛ́ tɔ ɛkok ɛ sisim nadi egyee nɛ nɔɔ ɛ. Bela náá, ɛkok ɛ tak nabɛ ɛ́ Klisto. 5 Tin, Zɛɛb nabɛ ɛ́ ààmyaala nɛ mɛfulu mɛ bɛtɛ nɛ bot pak'ɔɔ. Kɔ ɛsu ɛ tak, bɛ naasi bhɛɛɛ tɔ kyee bɔs bɛsyɛ di ààbɛ nɛ mɛdii ɛ.

6 É di'enek, etɛp binek djas nasael ɛ́, ye needi nɛ nena dhatyee geka, etɛɛ náá, mena needi ààbɛ nɛ embee mɛkwosak dáa bɔɔ nadi nɛ yɛ ɛ. 7 Nàduwalka bɛnaghisɛ dáa bɛdhiiti bot pak bɛbhaab'enaka naduwal ɛ. Tin, Ekwyala lɛɛ ɛ́ náá: «Bot naadisi étɛp ɛdɛ edee nɛ mɛnyok, bhii tak, bɛ naawyɛl kɛbɔl mɛzɛŋ nɛ ɛduwal ɛ bɛnaghisɛ✝.» 8 Sa mena ààduka ze mɛzɔ, dáa bɛdhiiti bot nasa ɛ́. É di'enek, bot bɛmil mɛkam-mɛmbá nɛ bɛmil ɛlɛl (23 000) naakpaa nɛ mɛsyee gwyɛ, dwoo wat kɔ ɛsu ɛ tak. 9 Sa mena ààwaka Klisto tɔ mɛbhowal, dáa bɛdhiiti bot pak'ɔɔ nasa ɛ. Étɛp tak, bɛnyɔ naazɛlo bɛ. Wɔ gwaa, bɛtɛ nɛ bot zɛgwyɛ. 10 Sa bi ààdi nɛ mɛnwyaad tɔ elyem, dáa bɛdhiiti bot pak'ɔɔ nadi esa ɛ. Tin, fofop ɛsyee naagó bɛ kɔ ɛsu ɛ tak.

11 Embee etɛp binek djas nasael ɛ́, étɛp ye needi nɛ nena dhatyee geka. Tin, etɛp tak nakwyalaa tɔ bɛmɛkana ɛ́, étɛp ɛdul ɛ́ mena mɛlɔ, etɛɛ náá, mena moo ɛ́ é mɛlu mɛ mɛsik. 12 Mot di ebee náá, nyɛ ɛ́ ndjem ɔ, nyɛ goka ɛ́ nɛ ɛkobaka, étɛp nyɛ ɛ́ zɛkɛkwyɛ tɔ mesyem. 13 Bɛ mɛbhowal mɛ bi naboma nɛ yɛ ɛ, yɛ ɛ́ mɛbhowal mɛ bot djas di eboma nɛ yɛ ɛ. Zɛɛb ɛ́ sosoob tɔ ekɛk bɛ, nyɛ tok nɛ ghwyil ɛbet náá, bi boma nɛ mɛbhowal di náá, ye waadhaa bin ghwyil ɛ. Tin, é sok mɛbhowal aazyɛ ɛ́, Zɛɛb ɛ́ waadjɛ bin ghwyil ɛmaad yɛ, nyɛ Waalyaal bin mɛpek mɛ ɛwyis ɛ́ tɔ mɛbhowal mɛ tak.

14 Dum nɛ tɛp tak, bɔn-nyɛɛg bam mɛ di ekwyɛl ɔ, nàkunaaka nɛ bɛnaghisɛ. 15 Mɛ lii nɛ nen ɛ́ dáa bɛ di elii nɛ bɛtsoŋ ɛ bot ɛ. Biyɔ bɛmet, sɔska sa mɛ di elii ɛ. 16 Taalaka bɛɛlɛ mena di edɛka menabɛlka djas, étɛp ɛghaapɛɛ Zɛɛb ɛ. Eghɛŋ mena di dɛka yɛ ɛ, yɛ ààsa náá, mena dika tɔ ɛgwakel nɛ ghiya ɛ Klisto? Yɛ naasee kɔ ɛsu ɛ lena. Yɛ kabɛ mapa ɔɔ, ye ɛpesa náá, menabɛlka djas di nyel ngɔt nɛ Klisto. 17 Dáa ye di náá mapa ɛ́ wat ɛ, ye nakoozodi náá, mena nɛ buka, menabɛlka djas moo ɛ́ nyel ngɔt. Etɛɛ náá, menabɛlka djas ɛpedɛka mapa tak wat.

18 Nɔɔka geka bɔn ɛ Yisalaɛl. Bot ɛ nadi edɛ bɛtit ɛ nazekaaa é buwa ɔ, bɛ ɛ́ tɔ ɛgwakel nɛ Zɛɛb. 19 Mɛ ààpake náá, bɛtit ɛ nakaaa bɛnaghisɛ ebuwa ɔ nɛ val étɛp'es. Mɛ ààpabaake pe náá, bɛnaghisɛ ɛ́ vaŋ sonok. 20 Tin, mɛ kwyɛl ɛlɛɛ ɛ́ náá, ebuwa bot ɛ membyak mɛ sis di eka ɛ, bɛ ka yɛ ɛ́ nɛ ekuk, bɛ ààdjɛ nɛ Zɛɛb. Tin, mɛ ààpakwyɛl náá, bi di tɔ ɛgwakel nɛ ekuk. 21 Bi tok nɛ ghwyil ɛdɛ tɔ bɛɛlɛ Ghɛŋ, da bi ɛ́ baadɛ tɔ bɛɛlɛ ekuk. Deenek, bi tok nɛ ghwyil ɛdɛ kɔ mesa Ghɛŋ, da baadɛ kɔ mesa ekuk. 22 Tin, mena kakwyɛl ɛ́ náá, Ghɛŋ kpaa lyem nɛ nena? Mena gek ɛ́ náá, mena ɛ́ nɛ ghwyil dhaa nyɛ nɛ ghwyil é?

23 Bot dyeebake ɛ́ náá: «Mena ɛ́ nɛ ghwyil ɛsa esa djas ee elyem binaka di ekwyɛl ɛ.» Yɛ ɛ́ tsɛɛtsɛ, guka náá, djas ààval sonok. Mena ɛ́ nɛ ghwyil ɛsa esa djas ee elyem binaka di ekwyɛl ɛ. Tin, etɛp binek djas ààdjɛ zɛɛga bot mɛghaaz. 24 Yɛ àànyɔ náá, ghwyikwyee mot zosik é nyel'ɛ met. Ye goka ɛ́ náá, nyɛ di nɛ ghwyikwyee nɛ bɛsɔ bot. 25 Bi ɛ́ nɛ ghwyil ɛdɛ yebɔ bɛtit djas di ebɔmsaaa tɔ djando ɛ, sa bi ààtuŋ mɛnyel esaa pɛ pak ye dus ɛ. 26 Etɛɛ náá, Ekwyala lɛɛ ɛ́ náá: «Yɛ ɛ́ Ghɛŋ ɛ di kukuma bɔs, nyɛ ɛ́ kukuma esa djas di kɔ ɛko ɛ bɔs ɛ✝.»

27 Mot di náá, nyɛ dinaa ààpadum koŋ nɛ Zɛɛb ɔ, djóo bin náá, bi kɛdɛ ɔɔ, yɛ bɛ náá, bi eemyaal ɔɔ, dɛka edee djas yii nyɛ aadjɛ bin ɛ, ààtuŋ mɛnyel esaa pɛ pak edee tak dus ɛ. 28 Tin, mot ɛ kalɛɛ bin náá: «Tit'ak dus ɛ́ é buwa bɛnaghisɛ» ɔɔ, deenek, sa bi ààdɛ yɛ, kɔ ɛsu ɛ mot lɛɛ deenek ɔ, étɛp elyem needi tɔ egwyem. 29 Mɛ ààlii wak dum nɛ esiiza e lyem bin, mɛ lii ɛ́ nɛ esiiza e lyem mot'enɔk.

Nɛghu dhiiti mot ɛ́ nɛ ghwyil ɛke náá: «Étɛp yé esiiza e lyem mot aasa náá, mɛ kat ɛsa sa mɛ di ekwyɛl ɛsa ɛ? 30 Yɛ bɛ náá, mɛ nɛ bulal bhɔɔ nɛ Zɛɛb kɔ ɛsu ɛ edee mɛ di edɛ ɔɔ, haaa étɛp yé bɛ aakalii nɛ nam ɛbiyoɛpe dum nɛ edee mɛ dɛ ɛ?»

31 Tin, étɛp edee nɛ mɛnyok mɛ bi di edɛ ɛ, nɛghu sa djas bi di esa ɛ, saka yɛ étɛp duma ɛ Zɛɛb. 32 Sa mɛfulu men ààsa náá, bot ɛ mbyak eYuda, nɛ bot ɛ mbyak eGhɛlɛk, zɛnɔɔ bot ɛ zɛɛga mendjaala Zɛɛb kwyit tɔ mesyem. 33 Duka mɛfulu mam, mɛ nɛ sa mɛghaaz, etɛɛ náá, bot djas neemyaala nɛ mɛsa mam djas. Tin, mɛ ààsaa ɛkwyɛɛg ɛ nyel'am met, mɛ saŋ ɛ́ ɛkwyɛɛg ɛ́ bɛtɛ nɛ bot, étɛp bɛ neebela tsik.