1 Pookosaaka sok kwyɛl. Da bi ɛ́ baasaa mɛkɛɛ mɛ Sisim, daŋ-daŋ ɛ́ yii ɛgoola bhaadal di edus pɛ daa Zɛɛb ɛ. 2 Mot di elii tɔ elii ee bot di ààgwak ɔ, nyɛ ààlii nɛ bot, tin, nyɛ lii ɛ́ nɛ Zɛɛb. Etɛɛ náá, ye tok nɛ dhiiti mot di etiibal sa nyɛ di elii ɛ. Tin, nɛ ghwyil Sisim na Dɛɛ, nyɛ wyisal ɛ́ etɛp ee di tɔ sɔ ɛ. 3 Mot di egoola mɛkpa mɛ di edus pɛ daa Zɛɛb ɔ, nyɛ goola yɛ ɛ́ nɛ bɔn-nyɛɛg, étɛp ɛdum ɛ koŋ ɛ lɔɔ nɛ Zɛɛb neeloo. Nyɛ goola yɛ nɛ bɔn-nyɛɛg ɛ́ étɛp ɛdjɛ bɛ mɛghaaz nɛ ɛdjɛ bɛ mɛlyo. 4 Mot di elii tɔ elii ee bot di ààgwak ɔ, nyɛ djɛ mɛghaaz ɛ́ nɛ nyel'ɛ met. Tin, mot di egoola mɛkpa di edus pɛ daa Zɛɛb ɔ, nyɛ djɛ mɛghaaz ɛ́ nɛ bot ɛ zɛɛga mendjaala djas.

5 Mɛ kwyɛl ɛ́ náá, biyɔ djas lii tɔ elii ee bot di ààgwak ɛ. Tin, sa mɛ baadi ekwyɛl ɛbuɛpe ɛ́ náá, bi goola mɛkpa mɛ di edus pɛ daa Zɛɛb ɛ. É di'enek, mot di egoola mɛkpa mɛ di edus pɛ daa Zɛɛb ɛ́ nɛ boo mɛtaŋ dhaa mot di elii tɔ elii ee bot di ààgwak ɛ. Yɛ di náá, dhiiti mot tɔ zɛɛga tak ɛ́ nɛ ghwyil ɛgoola yɛ ɔɔ, yɛ ɛ́ ɛnyɔɛpe, etɛɛ náá, bot djas ɛ́ waatiibal. É di'enek, ɛdum ɛ koŋ ɛ bot ɛ zɛɛga mendjaala ɛ́ waatɔ́ sok. 6 Bɔn-nyɛɛg, mɛ pookodji bin náá: É ghɛŋ mɛ aazyɛ pɛ yebɔ ɛ, mɛ kalii nɛ nen ɛ́ tɔ elii ee bot di ààgwak ɔɔ, mɛ kakwyee bin tin nɛ yé? Ààbɛ nɛ dhiiti sonok. Ye goka deenek ɛ́ mɛ tel bin sa nadi syela ɛ, mɛ goola bin bhaadal Zɛɛb dhis ɛ, mɛ djɛ bin ɛgu nɛghu mɛlyo.

7 Djhoopookonɔɔka geka nɛ esa ee di ebwomaa étɛp ɛbɔl mɛbyoŋ nɛ yɛ ɛ, dáa sandjo nɛ tɔŋ. Yɛ bɛ náá, mbwoma tak ààgék sɛŋ tɔ mɛlɔ ɔɔ, bot aakagu mbɛk pak esa ee di ebwomaa ɛ́ dáa? 8 Yɛ ɛ́ tyee wat nɛ mot di elɔɔ boo tɔŋ esodja ɔ, yɛ di ààlɔɔel ɛnyɔɛpe ɔɔ, ye tok nɛ mot aawyɛl étɛp ɛkɛlumla dɛɛb. 9 Yɛ ɛ́ djala nɛ biyɔ bɛmet. Yɛ bɛ náá, bhaadal bi di egoola ɛ, bi goola yɛ ɛ́ tɔ elii ee bot di ààgwak ɔɔ, tin, bot aakamɛt sa bi di elii ɛ́ dáa? Deenek bi lii ɛ́ yii toto! 10 Deenek, kɔ ɛko ɛ bɔs, yɛ ɛ́ nɛ bɛtɛ nɛ elii, ye tok nɛ lii wat tɔ elii binek di náá, yɛ ɛ́ ààval dhiiti sonok. 11 É di'enek, mot ɛ di elii nɛ nam tɔ lii mɛ di ààgwak ɔɔ, nyɛ ɛ́ ndjoŋ pɛ daa lam, mam pe ɛ́ ndjoŋ pɛ daa lɛ. 12 Dáa ye di náá, bi nɛ dyeebawa lyem tɔ mɛkɛɛ mɛ Sisim ɛ, saaka náá, bi bela ɛbuɛpe mbi mɛkɛɛ mɛ di esa náá, ɛdum ɛ koŋ ɛ bot ɛ zɛɛga mendjaala tɔ́ sok ɛ.

13 Dum nɛ etɛp binek, mot di elii tɔ elii bot di ààgwak ɔ, nyɛ goka ɛ́ nɛ ɛwaab nɛ Zɛɛb náá, nyɛ djɛ nyɛ ɛkɛɛ ɛ ɛgoola etɛp ee nyɛ di elii ɛ, étɛp bot neemɛt yɛ. 14 Mɛ di edjaala tɔ elii ee bot di ààgwak ɔɔ, sisim yam ɛ́ tɔ mendjaala. Tin, mɛtselal mam kadi ɛ́ ààgu sa mɛ di elii ɛ. 15 Mɛ aakasa tin dáa? Mɛ aadjaala Zɛɛb ɛ́ nɛ sisim yam, da mɛ ɛ́ baadjaala nyɛ nɛ mɛtselal mam. Deenek, mɛ aadjeeb nyɛ djeeb ɛ́ nɛ sisim, da mɛ ɛ́ baadjeeb nyɛ djeeb nɛ mɛtselal mam. 16 Yɛ bɛ náá, wɔ zobulal bhɔɔ nɛ Zɛɛb ɛ́ tɔ sisim ɔɔ, haaa mot di ààtiibal etɛp ee wɔ di elii tɔ zɛɛga mendjaala ɛ, aakake «Amɛn» nɛ mendjaala mɛ wɔ bulal bhɔɔ nɛ Zɛɛb ɔ dáa? 17 Ye nakoozodi náá, mendjaala mɔ yii ɛbulal bhɔɔ nɛ Zɛɛb nɛ nyɔ dhaa, yɛ ààsa náá, bɛdhiiti bot pyet tɔ ɛdum ɛ koŋ nɛ Zɛɛb.

18 Mɛ ɛpebulal bhɔɔ nɛ Zɛɛb, etɛɛ náá, mɛ ɛpelii tɔ elii bot di ààgwak ɛ, dhaa biyɔ djas. 19 Tin, é ghɛŋ bot di tɔ zɛɛga mendjaala ɛ, ye goka ɛ́ mɛ loo mɛkpa mɛtɛn yii bot aatiibal ɛ, nɛ náá, mɛ loo mɛkpa bɛdhet nɛ bɛdhet tɔ lii di náá, bot aanàkwaatiibal ɛ. Deenek, mɛ kwyɛl ɛ́ ɛlyo bɛ nɛ mɛkpa mɛ elii bɛ di egwak ɛ.

20 Bɔn-nyɛɛg, katka ɛdi nɛ esiiza e bɔɔ dhyeeb. Dika dhatyee bɔɔ dhyeeb bot ɛ di ààgu sonok ɔ, sok bhwoob embee etɛp. Yɛ kabɛ pɛ kyee ɛtiibal etɛp ɔɔ, dika eboo bot. 21 Gwakeka sa Ekwyala di elɛɛ:

«Ghɛŋ ke ɛ́ náá:

Yɛ ɛ́ tɔ elii e sis,

nɛ tɔ enuub e bot ɛ membyak mɛ sis ɛ,

mɛ aalii nɛ bot ɛ mbyak'ak,

ye nakoozodi deenek, bɛ aanàkwaagwak mɛ✝.»

22 Deenek, ɛkɛɛ ɛlii ɛ́ tɔ elii e bot di ààgwak ɛ, yɛ ɛ́ ndem étɛp bot ɛ di ààdum koŋ nɛ Zɛɛb ɔ, ààkabɛ étɛp bot ɛ di edum koŋ nɛ Zɛɛb ɔ. Ghuna, ɛkɛɛ ɛgoola Mɛkpa ɛ Zɛɛb ɛ́ ndem étɛp bot ɛ di edum koŋ nɛ Zɛɛb ɔ, ààkabɛ étɛp bot ɛ di ààdum koŋ nɛ Zɛɛb ɔ.

23 Djhoopookogekeka náá, bot ɛ zɛɛga mendjaala djas lii tɔ elii bot di ààgwak ɛ. É di'enek, bot ɛ di egwak-gwakak ɔ, nɛghu bot ɛ di ààdum koŋ nɛ Zɛɛb ɔ zɛni tinaak ɔɔ, bɛ aanàkwaake náá, bot binɔk djas ɛpelyet é? 24 Yɛ bɛ náá, bot djas tɔ zɛɛga mendjaala ɛpegoola Mɛkpa ɛ Zɛɛb ɔɔ, dhiiti mot nɛghu mot di ààdum koŋ nɛ Zɛɛb ɔ ɛni tinaak ɔɔ, nyɛ waagwak etɛp binek djas. Bhii tak, nyɛ waagu náá, nyɛ ɛ́ mot mesyem kɔ ɛsu ɛ etɛp ee nyɛ gwak ɛ. Tin, ye waani nyɛ tɔ bum lyem. 25 Deenek, esiiza bɛ nadi syela ɛ, yɛ waawyis tɔ gwyɛ. Tin, nyɛ aapyak mɛboŋ mɛ bhwoob si, étɛp ɛduwal ɛ Zɛɛb, eke náá: «Yɛ ɛ́ tsɛɛtsɛ náá, Zɛɛb ɛ́ pak'en!»

26 Bɔn-nyɛɛg, bot goka ɛ́ nɛ ɛmɛt ɛ yé tin? É sok bi di esɛɛga étɛp mendjaala ɛ, mot ngɔt tɔ len ɛ́ nɛ ghwyil ɛtii mɛdjeeb, dhiiti mot ɛ́ nɛ ghwyil ɛdjɛ mɛlyo, nwyak mot ɛ́ nɛ ghwyil ɛlɛɛ sa Zɛɛb natel nyɛ ɛ, nwyak tak ɛ́ nɛ ghwyil ɛlii tɔ elii bot di ààgwak ɛ, da dhiiti mot ɛ́ goola mɛkpa mɛ tak. Etɛp binek djas ɛ́ étɛp ɛsa náá, zɛɛga mendjaala neetɔ́ sok. 27 Yɛ bɛ náá, bɛdhiiti bot ɛpelii tɔ elii bot di ààgwak ɔɔ, ye nyɔ ɛ́ náá, ye zodi bot ɛbá nɛghu bɛlɛl di elii, mot nɛ mot nɛ yɛ ɛwala nyɛ di elii ɛ, da mot ngɔt ɛ́ di mot ɛgoola sa bɛ di elii ɛ. 28 Yɛ di ààdi nɛ mot di egoola sa bɛ di elii ɔɔ, ye goka ɛ́ náá, mot nɛ mot kat ɛlii ɛlyelɛpe tɔ zɛɛga mendjaala. É di'enek, mot nɛ mot goka ɛ́ nɛ ɛtɔɔla tɔ lyem'ɛ nɛ Zɛɛb.

29 Dum nɛ bot ɛ di egoola Mɛkpa ɛ Zɛɛb, bot ɛbá nɛghu bot ɛlɛl ɛ́ nɛ ghwyil ɛgoola yɛ. Da bɛdhiiti bot ɛ́ sɔs sa bɔn-nyɛɛg bɔɔ di elii ɛ, étɛp ɛgu nɛghu yɛ ɛ́ etsɛɛtsɛ nɛghu yɛ ɛ́ etsal. 30 Yɛ bɛ náá, Zɛɛb eelyaal dhiiti mot tɔ sama bot ɛ di egwak ɔɔ, dhiiti tɛp di tɔ sɔ ɛ, ye goka ɛ́ náá, mot di egoola Mɛkpa ɛ Zɛɛb sok ɔ, kat ɛlii. 31 Biyɔ djas ɛ́ nɛ ghwyil ɛgoola Mɛkpa ɛ Zɛɛb, mot nɛ mot nɛ yɛ ɛwala, etɛɛ náá, bot djas neebela mɛlyo nɛ ɛdjɛaa mɛghaaz. 32 Bot ɛ di nɛ ɛkɛɛ ɛ ɛgoola Mɛkpa ɛ Zɛɛb ɔ, goka ɛ́ nɛ ɛdjɛɛd ɛkɛɛ ɛ Sisim Zɛɛb zedjɛ bɛ ɛ ɛnyɔɛpe. 33 Etɛɛ náá, Zɛɛb tok mot ɛzɛm, nyɛ ɛ́ Zɛɛb egwyem.

Dáa ye di esael tɔ ezɛɛga mɛ mendjaala mɛ bot ɛ zedum koŋ nɛ Zɛɛb ɔ djas, 34 ye goka ɛ́ náá, boa di gwyem tɔ ezɛɛga mendjaala, yɛ ɛ́ ààpadjɛaa bɛ ze náá, bɛ lii. Bɛ goka ɛ́ nɛ ɛlooba dáa etsi e Zɛɛb di elɛɛ ɛ. 35 Yɛ bɛ náá, bɛ ɛpekwyɛl ɛsaa ɛgu dhiiti sonok ɔɔ, bɛ goka ɛ́ nɛ ɛkɛdji botom bɔɔ pɛ mendjaa. Ye tok ɛnyɔɛpe náá, moma dji mɛdjin tɔ zɛɛga mendjaala.

36 Bi gek ɛ́ náá, biyɔ nɛ biyɔ ɛ́ di ɛsuk Mɛkpa ɛ Zɛɛb é? Nɛghu bi gek ɛ́ náá, yɛ ɛ́ biyɔ nɛ biyɔ ɛ́ nagwak mɛkpa menek é? 37 Mot ɛ gek náá, nyɛ ɛ́ ngoolel-Mɛkpa ɛ Zɛɛb ɔɔ, nɛghu náá, nyɛ ɛ́ nɛ ɛkɛɛ Sisim na Dɛɛ ɔɔ, nyɛ waagu náá, sa mɛ kwyal bin ɛ, yɛ ɛ́ mɛtiŋ ɛ Ghɛŋ. 38 Tin, nyɛ di ààgu yɛ ɔɔ, ye kwyɛl ɛlɛɛ ɛ́, Zɛɛb ààgu nyɛ.

39 Bɔn-nyɛɛg bam, daŋ-daŋ ɛ́ náá, saaka ɛgoola Mɛkpa ɛ Zɛɛb. Tin, sa bi ààlu mot náá, bot nàlii tɔ elii bot di ààgwak ɛ. 40 Tin, etɛp djas goka ɛ́ nɛ ɛsael ɛ́ ɛnyɔɛpe, ààbɛ tɔ ɛzɛm.