1 Duka mɛfulu mam, dáa mɛ di edu mɛfulu ɛ Klisto ɛ.

2 Mɛ ɛpeso bin mɛsii, etɛɛ náá, bi nɛ taala mɛ é mɛwala djas. Bi nɛ du mɛtiŋ mɛ mɛ di edjɛ bin ɛ. 3 Deenek, mɛ kwyɛl ɛ́ bi gu náá, Klisto ɛ́ kukuma motom djas, motom ɛ́ kukuma myɛl, Zɛɛb ɛ́ kukuma ɛ Klisto. 4 Tɔ zɛɛga mendjaala, é ghɛŋ motom di edjaala Zɛɛb nɛghu ɛgoola Mɛkpa ɛ Zɛɛb ɛ, nyɛ di nɛ lo ndjɛla ɔɔ, nyɛ ààpaduwal kukuma yɛ, Klisto. 5 Tin, moma di edjaala Zɛɛb nɛghu ɛgoola Mɛkpa ɛ Zɛɛb ɔ, nyɛ di ààdjɛl lo ɔɔ, nyɛ ààpaduwal ngom. Nyɛ ɛ́ dáa moma di nɛ bhoo tsika ɔ. 6 Yɛ bɛ náá, moma ààpadjɛl lo'ɛ ɔɔ, ye goka ɛ́ náá, nyɛ tsik bhoo lo'ɛ. Tin, yɛ bɛ náá, ye nɛ sa sen náá moma di nɛ bhoo tsika ɔɔ, nyɛ goka ɛ́ nɛ ɛdjɛl ɛ́ lo'ɛ nɛ bhɛɛ.

7 Motom ààgoka nɛ ɛdjɛl lo'ɛ, etɛɛ náá, nyɛ ɛ́ mbaŋa-mbaŋa duma ɛ Zɛɛb. Tin, moma ɛ́ di mbaŋa-mbaŋa duma ngom. 8 Etɛɛ náá, motom nabɛ ɛ́ ààkusaa nɛ kyes nyel moma, yɛ ɛ́ moma ɛ́ nakusaa nɛ kyes nyel motom. 9 Motom nabɛ ɛ́ ààkusaa kɔ ɛsu ɛ moma, yɛ ɛ́ moma ɛ́ nakusaa kɔ ɛsu ɛ motom. 10 Dum nɛ tɛp tak, kɔ ɛsu ɛ efofop, moma goka ɛ́ nɛ ɛdi nɛ lo ndjɛla nɛ bhɛɛ, etɛɛ náá, yɛ ɛ́ tseŋa ekukuma. 11 É di'enek, tɔ tsik'enaka nɛ Ghɛŋ, ye tok nɛ motom di ààbɛ nɛ moma, ye tok pe nɛ moma di ààbɛ nɛ motom. 12 Etɛɛ náá, dáa moma nakusaa nɛ kyes nyel motom ɛ, motom pe byel ɛ́ tɔ mɔ moma. Tin, djas yenek dus ɛ́ pɛ daa Zɛɛb.

13 Pookobeeka biyɔ bɛmet! Yɛ ɛ́ ɛnyɔɛpe náá, moma di nɛ lo mbek, ààdjɛl bhɛɛ, é sok nyɛ di edjaala Zɛɛb ɛ? 14 Mena beeka dáa bɔs di egoka nɛ ɛkɛ ɔɔ, yɛ ɛ́ etɛp e sen náá, motom di nɛ bhoo ɛdjaŋɛpe é lo. 15 É di'enek, moma di nɛ bhoo ɛdjaŋɛpe ɔ, yɛ ɛ́ duma. Deenek, bhoo ɛdjaŋɛpe nadjɛaa nɛ moma ɛ́ etɛɛ náá, ye needi nɛ nɛ dáa bhɛɛ. 16 Tin, mot ɛ di nɛ gwyes ɛsuu mɛso dum nɛ tɛp'ak ɔɔ, ye nyɔ ɛ́ bi gu náá, yɛ ɛ́ bɛmɛfulu mɛ mena dika nɛ yɛ tɔ ezɛɛga mendjaala mɛ Zɛɛb ɛ.

17 Yii mɛ kalii wak nen'aak, ye tok étɛp ɛso bin mɛsii. Etɛɛ náá, é sok bi di esɛɛga ɛ, ye dyeebakɛswaala nɛ nen ɛ́ ɛbiyoɛpe, yɛ ààswaala nɛ nen ɛnyɔɛpe. 18 Sa mɛkɛn bɛ nalɛɛ mɛ ɛ, yɛ ɛ́ náá, é sok bi di esɛɛga étɛp ɛdjaala Zɛɛb ɛ, bi ɛ́ nɛ zyaala pak'en. Deenek, mɛ dinaa ààpamyaal yɛ ɛnyɔɛpe. 19 Ye goka ɛ́ náá, ye di nɛ zyaala pak'en, etɛɛ náá, bot neegwyak bot ɛ di sosoob nɛ Zɛɛb ɔ. 20 É ghɛŋ bi di esɛɛga ɛ, ye tok étɛp ɛdɛ kɔminyɔŋ. Bi dyeebasɛɛga ɛ́, étɛp ɛsa etɛp e sis. 21 Etɛɛ náá, é sok bi di ekan ɛdɛ ɛ, mot nɛ mot suu ɛ́ ɛdɛ edee bɛmet, bɛdhiiti bot ɛ́ lik nɛ za, bɛdhiiti bot tɔ elangi. 22 Bi tok nɛ mendjaa étɛp mot nɛ mot needɛ edee nɛ mɛnyok pɛ yiizaag é? Ɛyé, bi byasal ɛ́ zɛɛga mendjaala mɛ Zɛɛb é? Nɛghu bi sa ɛ́, étɛp bot ɛ di ààdi nɛ sonok ɔ neegwak sen é? Bi kwyɛl náá, mɛ ke nɛ nen dáa? Mɛ duwal bin é? Ààbɛ, mɛ tok nɛ ghwyil ɛduwal bin kɔ ɛsu ɛ tak!

23 Tin, gwakeka mɛlyo mɛ mɛ nagwak nɛ Ghɛŋ étɛp mɛ neegoola bin yɛ ɛ. É pum Ghɛŋ Yezu namɛtaa ɛ, nyɛ naanɔɔ mapa, 24 bhii nyɛ naghaapɛɛ Zɛɛb ɛ, nyɛ eezɛpyak yɛ. Bhii tak, nyɛ eezɛke náá: «Yak ɛ́ nyel'am zekaaa kɔ ɛsu ɛ len ɛ. Gheesesaka deenek étɛp bi neetetaala mɛ✝.» 25 Tyee wat, nyɛ naazɛnɔɔ bɛɛlɛ bhii dek, nyɛy nɛ nɔɔ náá: «Bɛɛlɛ yak ɛ́ bɛɛlɛ ɛbhɛŋ ɛ na bes nɛ Zɛɛb, ɛbhɛŋ ɛ kwyalel nɛ ghiya yam ɛ. É sok bi aadi ededɛ yɛ ɛ, sesaka deenek étɛp bi neetetaala mɛ*.» 26 Etɛɛ náá, é esok djas bi di edɛ mapa nɛ mɛnyok menek ɛ, bi goola ɛ́ bhaadal ɛsyee ɛ Ghɛŋ, deenek kɛkum ɛwala nyɛ aabula ɛ.

27 Yɛ ɛ́ étɛp tak ɛ di náá, mot ɛdi edɛ kɔminyɔŋ mapa nɛ mɛnyok ɛ Ghɛŋ dek di ààgoka ɔɔ, nyɛ eesyem, etɛɛ náá, nyɛ ààpaduwal nyel nɛ ghiya ɛ Ghɛŋ. 28 Ɛsok nɛ mot nɛ dɛ kɔminyɔŋ mapa nɛ mɛnyok, ye goka ɛ́, nyɛ pookodja nɛ tsuŋ, djem nɛ byak. 29 Etɛɛ náá, mot ɛ dɛ kɔminyɔŋ ààsiiza ɛgwakel ɛ lɛ nɛ nyel ɛ Ghɛŋ ɔɔ, nyɛ ɛpesaa epɛ́ɛ e Zɛɛb kɔ lɛ. 30 Yɛ ɛ́ kɔ ɛsu ɛ tak ɛ, bɛtɛ nɛ bot tɔ len di nɛ mɛbɛ́, bɛdhiiti ààbɛ nɛ ghwyil, bak bɛdhiiti gwyɛ. 31 Mena ɛ di edjaka nɛ tsuŋ, djem nɛ byak ɔɔ, Ghɛŋ aanàpɛ́ɛ mena. 32 Tin, Ghɛŋ ɛ di epɛ́ɛ mena nɛ ɛbulal mena é ze, etɛɛ náá, Zɛɛb needi ààwa mena é feŋ lɔɔg wat nɛ bot ɛ bɔs'ak.

33 Deenek, bɔn-nyɛɛg bam, é sok bi di esɛɛga étɛp ɛdɛ kɔminyɔŋ ɛ Ghɛŋ ɛ, bwoodka bɔn-nyɛɛg bin. 34 Mot ɛ di nɛ za ɔɔ, nyɛ dɛ pɛ ndjaŋ'ɛ, etɛɛ náá, bi needi ààwa epɛ́ɛ e Zɛɛb tɔ ɛsɛɛga ɛ len. Yɛ kabɛ edhiiti mɛdjin ɔɔ, mɛ aabɔɔza yɛ ɛ́, é sok mɛ aakum penek pɛ yebɔ ɛ.