1 Djhoopookonɔɔka geka náá, mɛ ɛpelii elii e bot ɛ bɔs nɛghu yii efofop, yɛ bɛ náá, kwyɛl tok tɔ lam ɔɔ, tin mɛ ɛ́ dhatyee ghom nɛghu boo ɛdjhaŋal ɛ gwooz yii bot di enyuu étɛp ɛsa ɛtap ɛ. 2 Mɛ ɛ́ nɛ ghwyil ɛgoola Mɛkpa ɛ Zɛɛb nadjɛ mɛ ɛ, mɛ ɛ́ nɛ ghwyil ɛdi náá, mɛ nɛ bu ɛgu, mɛ ɛ́ nɛ ghwyil ɛpiibal etɛp e Zɛɛb djas di tɔ sɔ ɛ, nɛghu ɛdi nɛ ɛdum ɛ koŋ nɛ Zɛɛb di nɛ ghwyil ɛdis mɛtsok di ye di ɔ. Yɛ ɛ́ tsɛɛtsɛ náá, mɛ ɛ́ nɛ ghwyil ɛsa etɛp binek djas, tin, mɛ di ààdi nɛ kwyɛl nɛ bot ɔ, etɛp binek djas ɛ́ toto. 3 Deenek, mɛ ɛ́ nɛ ghwyil ɛnɔɔ ekum bam djas, djɛ nɛ bɛdjel ɛ bot, nɛghu ɛnɔɔ nyel'am, ka yɛ buwa étɛp ye needikaa. Tin, mɛ di ààbɛ nɛ kwyɛl nɛ bot ɔɔ, etɛp binek djas ɛ́ toto.

4 Kwyɛl ɛ́ ɛmaad, kwyɛl ɛ́ ɛsa enɛm esa, kwyɛl tok nɛ zok, kwyɛl tok nɛ ɛbet, nɛghu ɛghɛa nyel. 5 Kwyɛl ààsa etɛp e sen, kwyɛl ààsa ekaa, kwyɛl ààbiyo, kwyɛl tok nɛ ɛbuk tɔ lyem nɛ mot. 6 Kwyɛl ààmyaala nɛ embee etɛp. Tin, nyɛ myaala ɛ́ nɛ etsɛɛtsɛ. 7 Kwyɛl nɛ pel etɛp djas, kwyɛl nɛ myaal etɛp djas, nyɛ ɛ́ nɛ ɛbwaalel nɛ etɛp djas, nyɛ ɛ́ nɛ mɛghaaz tɔ etɛp djas.

8 É di'enek, kwyɛl ɛ́ kɔm-kɔm. Tin, mɛkpa di egoolaaa bot dum nɛ Zɛɛb ɛ, yɛ aanàbaagoolaaa dhiiti dwoo. Elii ee bot di elii ɛ, yɛ aadi ɛ́ si. Ɛgu ɛ bot ɛ bɔs ɛ waasi. 9 Deenek, bis goola Mɛkpa ɛ Zɛɛb ɛ́ ba bim, etɛɛ náá, ba mɔɔ ɛgu ɛ les ɛ́ pes. 10 Tin, dwoo etɛp djas aadjala ɛ, sa nadi ààdjala ɛ́ waadiib.

11 É sok mɛ nadi mɔɔ dhyeeb ɛ, mɛ nadi elii nɛghu esiiza dáa mɔɔ dhyeeb. Mɛ nadi ɛ́ nɛ etsoŋ e bɔɔ dhyeeb. Tin, é sok mɛ nakadi mɛ moo boo-mot ɛ, mɛ naakat ɛsa etɛp djas nadi yii bɔɔ dhyeeb ɛ. 12 Nenak, mena kabeeka esonok ɛ́ dhatyee tɔ ɛnyen ɛ di àànyɔ ɛnyen ɛ, tin é ɛwala ɛ di ezyɛ yenek, mena aabeeka esonok popoopwon. Nenak, mɛ ààgu esonok djas ɛnyɔɛpe. Tin, é ɛwala ɛ di ezyɛ yenek, mɛ waagu Zɛɛb ɛnyɔɛpe dáa Zɛɛb nyɛy ɛmet di egu mɛ ɛ.

13 É di'enek, esa elɛl bak ɛ́ tɔ lam: ɛdum ɛ koŋ nɛ Zɛɛb, nɛ ɛbwaalel, zɛnɔɔ kwyɛl. Tin, tɔ esa binek bɛlɛl, kwyɛl eedhaa tyɛ.