1 Nenak, mɛ moo bɔɔza bin dum nɛ mɛdjin mɛ bi nadji mɛ tɔ mɛkana mɛ bi nadhis mɛ yɛ ɛ. Mɛ lɛɛ bin ɛ́ náá, ɛnyɔ náá, motom di kɔ ààbɛ nɛ moma. 2 Tin, étɛp ɛkaab ɛ mɛzɔ, ye goka ɛ́ náá, motom djas di nɛ ngbɛ moma, da moma djas pe ɛ́ di nɛ ngbɛ motom. 3 Motom goka ɛ́ nɛ ɛsa mɛsa djas motom di egoka nɛ ɛsa nɛ myɛl tɔ ndjaa ɛba ɛ. Yɛ ɛ́ tyee wat nɛ moma, nyɛy pe baagoka ɛ́ nɛ ɛsa nɛ ngom mɛsa djas moma di egoka nɛ ɛsa nɛ ngom tɔ djaa ɛba ɛ. 4 Tin, moma tok nɛ ghwyil ɛdjɛɛd nyel'ɛ dáa nyɛ di ekwos ɛ, etɛɛ náá, nyel'ɛ ɛ́ yii ngom. Yɛ ɛ́ tyee wat nɛ motom, nyɛ tok nɛ ghwyil ɛdjɛɛd nyel'ɛ dáa nyɛ di ekwos ɛ, etɛɛ náá, nyel'ɛ ɛ́ yii myɛl. 5 Sa mot àànyim sɔ nyel, yɛ di ààbɛ náá, bi gwakel ɛ́ étɛp ba mɔɔ ɛwala batsa kɔ ɛsu ɛ mendjaala ɔɔ. Da bhii tak bi ɛ́ bula ɛnyɔɛpe tɔ ɛba ɛ len. Yɛ di ààsael deenek ɔɔ, bi aanàbaabela ghwyil ɛmaad egwyes epuud. Deenek, Satan ɛ́ nɛ ghwyil ɛkwyesal bin tɔ mɛbhowal. 6 Sa mɛ di elɛɛ bin'aak, ye tok náá, mɛ besal bin ɛ́ beselak. Mɛ lɛɛ bin ɛ́ náá, bi ɛ sa deenek ɔɔ, yɛ aadi ɛ́ ɛnyɔɛpe. 7 Yɛ ɛpedi ɛ́ yam ɛkwosak ɔɔ, pe bot djas ɛ́ bɛkɔ dáa mam. Tin, Zɛɛb naadjɛ mot nɛ mot yɛ ɛkɛɛ, bak bot nɛ yak ɛkɛɛ, bɛdhiiti bot nɛ dhiiti ɛkɛɛ.

8 Gwakeka sa mɛ di elɛɛ nɛ bɛkɔ ɛ bot, dɔɔ nɛ bɛkus ɛ boa ɛ: mɛ lɛɛ bin ɛ́ náá, ɛnyɔ náá, mot di kɔ dáa mam. 9 Tin, bi ɛ di ààmaad ɛdi bɛkɔ ɛ bot ɔɔ, bi goka ɛ́ nɛ ɛba. Ɛnyɔ nɛ mot náá, nyɛ ba, ààkabɛ náá, nyɛ zuk nɛ egwyes e nyel.

10 Yɛ kabɛ bot ɛ zebaa ɔ, mɛ ɛpedjɛ ɛtiŋ ɛlak, ɛtiŋ ɛ tak tok yam, yɛ ɛ́ yii Ghɛŋ: yɛ ɛ́ náá, sa moma ààbo ɛba pak bɛ nɛ ngom. 11 Tin, yɛ bɛ náá, moma eebo ɛba pak bɛ nɛ ngom ɔɔ, sa nyɛ ààbaani dhiiti ɛba sis. Yɛ di ààbɛ deenek ɔɔ, nyɛ koobal ɛba pak bɛ nɛ ngom. Tin, sa motom ààbo ɛba pak bɛ nɛ myɛl.

12 Gwakeka sa mɛ di elɛɛ nɛ bɛdhiiti bot ɛ, ye tok Ghɛŋ di elii, yɛ ɛ́ mam. Mɛ lɛɛ ɛ́ náá, yɛ bɛ náá, keletyɛ eeba moma di ààdi keletyɛ ɔɔ, da moma ɛ́ kwyɛl náá, bɛ di nɛ ɛba ɔɔ, sa motom ààbo ɛba pak bɛ nɛ nɛ. 13 Yɛ ɛ́ tyee wat nɛ moma di keletyɛ ɔ. Nyɛ di nɛ motom di náá, nyɛ tok keletyɛ ɔɔ, da motom ɛ́ kwyɛl náá, bɛ di nɛ ɛba ɔɔ, sa moma ààbo ɛba pak bɛ nɛ nɛ. 14 Etɛɛ náá, motom di ààdi keletyɛ ɔ, nyɛ ɛ́ nɛ ghwyil ɛdi dɛɛ, kɔ ɛsu ɛ ɛgwakel ɛ nyɛ di nɛ yɛ bɛ nɛ myɛl mot di keletyɛ ɔ. Yɛ ɛ́ tyee wat nɛ moma di ààdi keletyɛ ɔ, nyɛ ɛ́ nɛ ghwyil ɛdi mot edɛɛ, kɔ ɛsu ɛ ɛgwakel ɛ nyɛ di nɛ yɛ bɛ nɛ ngom mot di keletyɛ ɔ. Yɛ di ààdi deenek ɔɔ, bɔn bɔɔ aadi ɛ́ tyee bot ɛ di nɛ edhuud ɔ, ghuna, bɛ ɛ́ bot ɛ edɛɛ é mis ɛ Zɛɛb nɛ tsɛɛtsɛ. 15 É di'enek, yɛ bɛ náá, moma nɛghu motom di ààdi keletyɛ ɔ ɛpekwyɛl ɛbo ɛba ɔɔ, nyɛ ɛ́ nɛ ghwyil ɛbo ɛba. É di'enek, moma nɛghu motom di keletyɛ ɔ tok si bhel tsi ɛba, etɛɛ náá, Zɛɛb nadjóo bin ɛ́ étɛp bi needi tɔ egwyem. 16 Tin, wɔy moma di keletyɛ ɔ, wɔ nɛ gu nɛghu wɔ ɛ́ kwaatsik ngom'ɔ ɔ? Tin wɔy motom di keletyɛ ɔ, wɔ nɛ gu, nɛghu wɔ ɛ́ kwaatsik mwalɔ ɔ?

17 É dhiiti edi, ye goka ɛ́ mot nɛ mot kɛ dáa Ghɛŋ nadjɛ nyɛ ɛkɛɛ ɛ. Mot nɛ mot goka nɛ ɛkɛ ɛ́, dáa nyɛ nadi é sok Zɛɛb nadjóo nyɛ ɛ. Yenek ɛ́ ɛtiŋ ɛ mɛ di edjɛ tɔ ezɛɛga mendjaala djas ɛ. 18 Tin, yɛ bɛ náá, mot naani beka é ghɛŋ Zɛɛb nadjóo nyɛ ɔɔ, nyɛ di deenek. Yɛ kabɛ náá, é ghɛŋ Zɛɛb nadjóo nyɛ ɛ, nyɛ nabɛ ɛ́ ààni beka ɔɔ, nyɛ di deenek ààni beka. 19 Ɛni beka nɛghu ɛdi ààni beka ààval dhiiti sonok é mis ɛ Zɛɛb. Sa di eval ɛ, yɛ ɛ́ ɛlooba nɛ etsi e Zɛɛb. 20 Beta náá, mot nɛ mot zodi dáa Zɛɛb nadjóo nyɛ ɛ. 21 É sok Zɛɛb nadjóo wɔ ɛ, wɔ nabɛ ɛ́, wɔ dinaa kwom, ààbɛ deenek é? Nàbem ba, wɔ bela ze di esa náá, wɔ di pɛka ɔɔ, wɔ goka ɛ́ nɛ ɛdu yɛ. 22 Etɛɛ náá, kwom mot Ghɛŋ nazedjóo ɔ, nyɛ moo ɛ́ pɛka étɛp ɛsa mɛsa mɛ Ghɛŋ. Tin, mot nadi pɛka ɔ, moo ɛ́ kwom ɛ Klisto. 23 Zɛɛb nabɔm bin ɛ́ nɛ boo mɛtaŋ, étɛp bi needi bot bɛ. É di'enek, nàsaaka náá, bi di ekwom e bot ɛ bɔs. 24 Beta náá, mot nɛ mot di sok bhwoob ɛ Zɛɛb, dáa nyɛ nadi é ghɛŋ Zɛɛb nadjóo nyɛ ɛ.

25 Dum nɛ bot ɛ di náá, bɛ ɛ́ bɛkɔ ɔ, mɛ tok nɛ ɛtiŋ ɛ Ghɛŋ wat yii mɛ aadjɛ bɛ ɛ. Tin, sa mɛ di elii wak ɛ, yɛ ɛ́ ɛkwosak ɛ lam, mam mot di náá, Ghɛŋ eegek mɛ ghoŋ ɔ, da sa náá, mɛ di mot bot di ewa ɛbwaalel nɛ nɛ ɔ.

26 Gwakeka sa mɛ di egek kɔ ɛsu ɛ mezuk mɛ bot di ebee'aak: Mot nɛ mot goka ɛ́ nɛ ɛdi dáa nyɛ di ɛ. 27 Wɔ ɛ́ nɛ moma? Nàsaa náá, wɔ bo ɛba bi nɛ nɛ. Wɔ di ààdi nɛ moma ɔɔ, sa wɔ ààsaa náá, wɔ di nɛ moma. 28 Tin, yɛ bɛ náá wɔ eeba ɔɔ, wɔ ààpasyem. Yɛ bɛ náá, ɛsyes ɛ moma eeba ɔɔ, nyɛ ààpasyem. Deenek, bot ɛ di eba ɔ, bɛ waaboma nɛ mezuk tɔ etsik bɔɔ. Tin, mɛ kwyɛl ɛ́ ɛdis bin tɔ mezuk menek.

29 Gwakeka sa mɛ di ekwyɛl ɛlɛɛ bin ɛ, bɔn-nyɛɛg: Bot kalikeka ɛ́ nɛ ba mɔɔ ɛwala. Kana nenak, bot ɛ di náá, bɛ eezeba ɔ, bɛ goka ɛ́ nɛ ɛwa zii tɔ ɛsa mɛsa mɛ Zɛɛb dáa bɛkɔ ɛ bot. 30 Bot ɛ di edje ɔ, bɛ sa ɛkɛɛ náá, bɛ ààdje. Bot ɛ di emyaala ɔ, bɛ sa ɛkɛɛ náá, bɛ ààmyaala. Bot ɛ di ebɔm esonok ɔ, bɛ sa ɛkɛɛ náá, bɛ ààpabɔm sonok. 31 Bot ɛ di emyaala nɛ mɛvu mɛ bɔs ɔ, bɛ sa ɛkɛɛ náá, bɛ ààmyaala nɛ yɛ. Etɛɛ náá, bɔs'ak, dáa ye di'aak, yɛ aanàbaabɔya kɛdhaa.

32 Dum nɛ tɛp tak ɛ mɛ di ekwyɛl náá, bi di pɛka tɔ etɛp bin djas. Mot di náá, nyɛ ààpaba ɔ, nyɛ ɛ́ nɛ ghwyil ɛwa lyem'ɛ djas tɔ mɛsa ɛ Ghɛŋ. Nyɛ saŋ ɛ náá, Ghɛŋ myaala nɛ nɛ. 33 É di'enek, mot di náá, nyɛ eezeba ɔ, lyem'ɛ ɛ́ tɔɔɔ tɔ esa ee di kɔ ɛko ɛ bɔs ɛ. Mɛsa mɛ aadi ɛ́ ɛsaa náá, myɛl di tɔ mɛmyaala, 34 deenek, lyem'ɛ ɛ́ pak etɛp ebá. Tin, Kɔ moma nɛghu ɛsyes ɛ moma di náá, nyɛ dinaa ààpaba ɔ, nyɛ wa nyel'ɛ nɛ sisim'ɛ djas tɔ mɛsa mɛ Ghɛŋ. Deenek, nyɛ kwyɛl ɛ́ náá, nyɛ di nɛɛga é ngwoob étɛp nyɛ neesa mɛsa ɛ Ghɛŋ. Tin moma di é ɛba ɔ nyɛ dyeebawa lyem ɛ́ tɔ etɛp e bɔs, nyɛ saŋ ɛ́ náá, ngom di tɔ mɛmyaala. 35 Mɛ lii deenek ɛ́, étɛp mɛnyɔ men, ye tok étɛp ɛwa bin tɔ laab. Tin, mɛ kwyɛl ɛ́ náá, bi sa sa di ɛnyɔɛpe étɛp'en ɛ, da bi ɛ́ di tɔ ɛgwakel nɛ Ghɛŋ nɛ lyem wat.

36 Yɛ bɛ náá, mɔɔ ngbaaz ɛpebee náá, nyɛ tokapɛ nɛ ghwyil ɛmaad ɛ egwyes bɛ pak bɛ nɛ ghɔɔd ɔ, nyɛ bee náá, nyɛ ɛ́ nɛ ghwyil ɛsa sa di ààgoka nɛ ɛsael bɛ nɛ ghɔɔd'ɛ bɛ di náá ààbael ɔ, yɛ bɛ náá, bɛ waabael ɔɔ, bɛ ɛ́ nɛ ghwyil ɛsa dáa bɛ di ekwos ɛ. Deenek, nyɛ ààpasyem. 37 Yɛ bɛ náá mɔɔ ngbaaz tak eebee náá, nyɛ ɛ́ nɛ ghwyil ɛmaad egwyes e nyel étɛp ɛdi ɛ́ kɔ, ààbɛ náá mot ɛ besal nyɛ ɔɔ, nyɛ eesa ɛnyɔɛpe. 38 Tin, mot ɛ ba ghɔɔd'ɛ ɔɔ, nyɛ eesa ɛnyɔɛpe. Mot ɛ di ààba ghɔɔd'ɛ ɔɔ, nyɛ eebaasa ɛnyɔɛpe dhaa tyɛ.

39 Moma ɛba goka ɛ́ nɛ ɛdi si bhel etsi ɛba ɛ́, é ghɛŋ ngom dinaa nɛ tsik ɛ. Tin, yɛ bɛ náá, ngom eegwyɛ ɔɔ, nyɛ ɛ́ nɛ ghwyil ɛ kaba mot lyem'ɛ di ekwyɛl ɔ. Deenek, ye goka ɛ́ náá, motom tak di mot di edum koŋ nɛ Ghɛŋ ɔ. 40 É yam beea, mɛ bee ɛ́ náá, nyɛ baal di ekus bɛ ɔɔ, yɛ ɛ́ ɛnyɔɛpe dhaa tyɛ. Deenek, mam pe ɛ́ nɛ Sisim Zɛɛb.