1 Koolɛt 8

Bɛtit ɛ di ekaaa bɛnaghisɛ buwa ɛ

1 Djhooliika dum nɛ etɛp bɛtit ɛ bot di eka bɛnaghisɛ buwa ɛ. Nɛ tsɛɛtsɛ, mena dyeebakeka ɛ́ náá: «Menaka ɛ́ bot ɛ mɛtselal.» Tin, mɛtselal mɛ tak ɛ́ nɛ ghwyil ɛsa náá, mena dika nɛ ɛghɛɛa nyel. Tin, tɛtɛ kwyɛl saŋ ɛ́ náá, mena dika nɛ ɛgwakel tɔ zɛɛga. 2 Mot di egek náá, nyɛ nɛ gu sonok ɔ, mot’enɔk goka ɛ́ nyɛ gu náá, nyɛ dinaa kuku ɛdjek. 3 Tin, mot di ekwyɛl Zɛɛb ɔ, Zɛɛb nɛ gu nyɛ.

4 Deenek, mena ɛ́ nɛ ghwyil ɛdɛka bɛtit ɛ di ekaaa bɛnaghisɛ buwa ɛ? Mena nɛ guka náá, naghisɛ tok dhiiti sonok kɔ ɛko ɛ bɔs, mena nɛ baaguka náá, Zɛɛb ɛ́ ngɔt. 5 Nɛ tsɛɛtsɛ, yɛ ɛ́ nɛ edhiiti esisim di tɔ gwoo nɛghu kɔ ɛko ɛ bɔs di edjóoaa bɛzɛɛb ɛ. Deenek, ye kwyɛl ɛlɛɛ ɛ́ náá, yɛ ɛ́ bɛtɛ nɛ «bɛzɛɛb» nɛ bɛtɛ nɛ «bɛghɛŋ». 6 Yɛ kabɛ menabɛlka ɔɔ, mena nɛ guka náá, Zɛɛb ɛ́ ngɔt, nyɛy ɛ́ di Sɛɛg’enaka, mot nakus esonok djas ɔ, kɔ ɛsu ɛ lɛ ɛ bot di nɛ tsik. Ghɛŋ ɛ́ ngɔt, yɛ ɛ́ Yezu Klisto, nyɛy mot di náá, esonok djas nakusaa ɛ́ é ze yɛ ɔ, nyɛ ɛ́ di esa náá, mena dika nɛ tsik.

7 Tin, ye tok bot djas di egu etsɛɛtsɛ bak. Etɛɛ náá, bɛdhiiti bot ɛ nadi eduwal bɛnaghisɛ ɔ, é ghɛŋ bɛ di edɛ bɛtit ɛ di ekaaa bɛnaghisɛ buwa ɔ, egeka bɔɔ ɛ́ náá, bɛ ɛpeduwal bɛnaghisɛ. Bɛ ààpyet tɔ ɛdum ɛ koŋ nɛ Zɛɛb, é ghɛŋ bɛ di edɛ bɛtit ɛ di ekaaa bɛnaghisɛ buwa ɛ, bɛ nɛ gu náá, bɛ moo ɛ́ nɛ edhuud é mis ɛ Zɛɛb. 8 Tin, ye tok edee mena di edɛka ɛ di esa náá, mena kunaaka nɛ Zɛɛb. Ɛdɛ edee nɛghu ɛdi ààdɛ edee, yɛ aanàsa náá, mena dika bɛtɛtɛ ɛ bot nɛghu bɛmbee ɛ bot.

9 Bi ɛ́ nɛ ghwyil ɛsa sa elyem bin di ekwyɛl ɛ. Tin, bi ɛ́ kobaka nɛ sa bi di esa ɛ. Sa bi di esa ɛ, sa yɛ ààkadi ɛbɛk ɛ di esa náá, bot ɛ di ààpyet tɔ ɛdum ɛ koŋ nɛ Zɛɛb ɔ, ni tɔ mesyem. 10 Etɛɛ náá, mot di náá, nyɛ dinaa ààpapyet tɔ ɛdum ɛ koŋ nɛ Zɛɛb ɔ, nyɛ bee wɔy, mot mɛtselal edɛ tɔ ndjaa mendjaala mɛ bɛnaghisɛ ɔɔ, tin, wɔ ààbee náá, wɔ ɛpebesal nyɛ besela sis náá, nyɛ dɛ bɛtit ɛ di ekaaa bɛnaghisɛ buwa ɔ? 11 É di’enek, mɔn-nyoog mot di náá, nyɛ dinaa ààpanyɔ ɛpyet tɔ ɛdum ɛ koŋ nɛ Zɛɛb ɔ, mot Klisto nagwyɛ étɛp’ɛ ɔ, nyɛ waawo ze etsɛɛtsɛ kɔ ɛsu ɛ lɔ. 12 Bi ɛ syem deenek nɛ bɔn-nyɛɛg bin ɔɔ, da bi ɛ́ pul ɛdum ɛ koŋ ɛ lɔɔ nɛ Zɛɛb, bɔɔ bot ɛ di náá, bɛ dinaa ààpapyet ɔɔ, bi syem deenek ɛ́ nɛ Klisto nyɛy ɛmet. 13 Dum nɛ tɛp tak, yɛ bɛ náá, sa mɛ di edɛ ɛ, yɛ ɛpekwyital ɛdum ɛ koŋ ɛ mɔn-nyaagam ɔɔ, mɛ aanàkabaadɛ yɛ, ekaab náá, mɛ ɛzɛkɛkwyesal nyɛ tɔ mesyem.