1 Ye ɛpegék é edi djas náá, yɛ ɛ́ nɛ mɛzɔ pak'en. Mbi mɛzɔ mɛ di náá, bot ɛ di ààdum koŋ nɛ Zɛɛb ɔ, ààsa ɛ. Tin, yɛ ɛpegék náá, mot ngɔt pak'en ɛpekɛ emwaaz nɛ mwaa sɛɛg! 2 Tin, bi ɛpekɛl ɛbet kɔ tak! É di waanyɔ náá, bi di nɛ ghoŋ tɔ elyem, da bi ɛ́ sɔ mot sa kwaambi yenek embee esesɛɛ pak'en ɔ. 3 Yɛ kabɛ mam ɔɔ, tɔ epuud, mɛ ɛ́ ɛtsetaɛpe nɛ nen, tɔ sisim, menaka ɛ́ é di wat. Tin, nɛ din ɛ Yezu Klisto, mɛ eezepɛ́ɛ mot sa kwaambi yenek tɛp ɔ, ɛkɛɛ menaka ɛ́ sama. 4 É ghɛŋ bi di esɛɛga nɛ din ɛ Yezu Ghɛŋ'enaka ɛ, da mɛbwala mɛ ɛ́ di tɔ len ɛ, é di'enek, sisim yam aadi ɛ́ sama nɛ nen pe. 5 Ye goka ɛ́ náá, bi seeb mot'enɔk é mɛmbɔ mɛ Satan. Etɛɛ náá, tsik epuud bɛ neegwyɛ, da sisim yɛ ɛ́ bela tsik dwoo Ghɛŋ aabula ɛ.

6 Bi ààgoka nɛ ɛsa ɛbet! Yɛ ɛ́ nɛ dhiiti kana wat di elɛɛ náá: «Ba mɔɔ leviid batsa nɛ sa náá, tsim faalin di esaaa mapa nɛ yɛ ɛ, ghamta*» 7 Tin, diska mendi mɛ pu leviid na mwa yii mesyem men, etɛɛ náá, bi needi bot ɛ na dɛɛ. Deenek, bi kadi ɛ́ dáa tsim faalin na bes di ààbɛ nɛ leviid ɛ. Bi moo ɛ́ bot ɛ na dɛɛ, etɛɛ náá, Klisto nazegwyɛ ɛ́ étɛp'en. Nyɛy ɛ́ di mɔn bhata nakaaa é ɛbyoŋ ɛ Pak ɛ. 8 Deenek, djhoobɔlka ɛbyoŋ ɛ lenaka, ààbɛ nɛ emapa nasael nɛ leviid na mwa yii syem nɛ mbee lyem ɛ. Tin, djhoobɔlka ɛbyoŋ ɛ tak nɛ emapa di ààbɛ nɛ leviid ɛ, emapa ee di ààbɛ nɛ edhuud ɛ, emapa e etsɛɛtsɛ.

9 Tɔ dhiiti mɛkana mɛ mɛ nakwyal bin ɛ, ye nabɛ ɛ́, mɛ eelɛɛ nɛ nen náá, sa mot ààdi sama nɛ bot ɛ mɛzɔ. 10 Deenek, yɛ ààkwyɛl ɛlyaal náá, mɛ nalii ɛ́ nɛ bot djas di tɔ embee esesɛɛ ɔ, bot ɛ mɛzɔ, bot ɛ ndɔɔzɔ, bot ɛ djii, bot ɛ di eduwal bɛnaghisɛ ɔ. Yɛ ɛ́ pe bɛ deenek ɔɔ, pe ye goka ɛ́ bi dus kɔ bɔs. 11 Mɛ kwyɛl ɛ́ ɛlɛɛ bin náá, yɛ bɛ náá, mot ɛ di edjóoaa keletyɛ, da nyɛ ɛ́ baadi mot mbee tsik ɔɔ, sa bi ààdi sama nɛ nɛ. Mot tak ɛ́ nɛ ghwyil ɛdi: Mot mɛzɔ, mot ndɔɔzɔ, mot di eduwal bɛnaghisɛ ɔ, mot mɛbhekel, mot elangi nɛghu mot djii. Sa bi ààdɛ edee é di wat nɛ mbi yenɔk mot.

12,13 Ye kabɛ ɛ́ náá, mam ɛ́ di epɛ́ɛ bot ɛ di ààdum koŋ nɛ Klisto ɔ? Ohoo, yɛ ɛ́ Zɛɛb ɛ kwaapɛ́ɛ bɛ. Biyɔ ɛ́ di egoka nɛ ɛpɛ́ɛ bot ɛ bi nɛ bɛnɔɔ di tɔ ndjaa mendjaala mɛ wat ɔ. Yɛ ɛ́ dáa Ekwyala lɛɛ ɛ́ náá: «Sɔka bɛmbee ɛ bot pak'en✝.»