1 É sok mot ngɔt pak'en di nɛ tɛp nɛ mɔn-nyɛɛg ɛ, haaa étɛp yé nyɛ kɛsaa bɛtetɛp di ààgu Zɛɛb ɔ? Yɛ àànyɔ deenek. Ye goka ɛ́ náá, nyɛ kɛlɛɛ tɛp tak pɛ daa bot ɛ zedum koŋ nɛ Zɛɛb ɔ. 2 Bi ààgu náá, yɛ ɛ́ bot ɛ zedum koŋ nɛ Zɛɛb ɛ kwaapɛ́ɛ bot ɛ bɔs é? Yɛ bɛ náá, biyɔ ɛ kwaapɛ́ɛ bot ɛ bɔs ɔɔ, haaa étɛp yé bi di ekat ɛpɛ́ɛ ba bɔɔ etɛp? 3 Bi ààgu náá, mena waaboopɛ́ɛka efofop é? Haaa mena aadi ààkwak ɛpɛ́ɛ bɔɔ etɛp di kɔ ɛko ɛ bɔs ɔ dáa? 4 Tin, é ghɛŋ bi di nɛ mbi bɔɔ mɛtap deenek pak'en ɛ, bi dyeebatɔ́ ɛ́ kɛsaa bɛtetɛp ɛ di ààgu Zɛɛb ɔ. 5 Mɛ ke ɛ́ náá, yɛ ààsa bin sen é? Pak'en, ye tok nɛ tsoŋ mot ngɔt di nɛ ghwyil ɛpɛ́ɛ tɛp di pak bi nɛ mɔn-nyoog ɛ? 6 Haaa étɛp yé mot di kɛpit mɔn-nyɛɛg sok bhwoob bɛtetɛp ɛ di ààgu Zɛɛb ɔ?

7 Deenek, é sok bi di nɛ bɔɔ mɛtap pak'en, da bi ɛ́ kɛsaa bɛtetɛp ɛ, ye lyaal ɛ́ náá, bi ɛ́ nɛ ndjɛ. Tin, mot ɛ sa wɔ ɛbiyo ɔɔ, nɛghu ɛ djii esa bɔ ɔɔ, wɔ goka ɛ́ nɛ ɛmaad. 8 Tin, guka náá, yɛ ɛ́ biyɔ bɛmet ɛ di esa ɛbiyo, biyɔ ɛ di edjii esa e bɔɔ bɛsɔ bin. Tin, yɛ ɛ́ deenek ɛ bi di esa nɛ bɔn-nyɛɛg bin! 9 Bi ààgu náá, bot ɛ di ààdi bot ɛ epiki ɔ, bɛ aanàkwaani tɔ Ɛyoŋ ɛ Zɛɛb é? Nàkɔɔka mɛnyel men, guka náá, bot ɛ mɛpam, bot ɛ di eduwal bɛnaghisɛ ɔ, bot ɛ di esa mɛzɔ ɔ, bot ɛ di edi mɛba nɛ bɛsɔ bɔɔ botom ɔ, 10 bot ɛ djii, bot ɛ ndɔɔzɔ, bot ɛ elangi, bot ɛ mɛbhekel nɛghu bot ɛ mbee mɛpek, bɛ aanàbela di tɔ Ɛyoŋ ɛ Zɛɛb. 11 É ghɛŋ sok, bɛdhiiti bot pak'en nadi esa embee etɛp binek. Tin, bi naazedisaa edhuud, bi naazesɛ́ɛaa, da nɛɛgaa é ngwoob étɛp mɛsa ɛ Zɛɛb. Ye naazesa náá, bi di bot ɛ epiki é mis ɛ Zɛɛb nɛ din ɛ Ghɛŋ Yezu Klisto é ze ɛ Sisim Zɛɛb'enaka.

12 Bɛdhiiti bot pak'en dyeebake ɛ́ náá: «Mɛ ɛ́ nɛ ghwyil ɛsa sa djas lyem'am di ekwyɛl ɛ.» Yɛ ɛ́ tsɛɛtsɛ, tin, esa binek djas ààval bin dhiiti sonok. «Mɛ ɛ́ nɛ ghwyil ɛsa sa djas lyem'am di ekwyɛl ɛ», yɛ ɛ́ tsɛɛtsɛ, tin, mɛ ààpakwyɛl náá, mɛ di kwom dhiiti sonok. 13 Bi nɛ baake náá: «Edee ɛ́ étɛp mɔ, mɔ ɛ́ étɛp edee.» Tsɛɛtsɛ, tin dhiiti dwoo, Zɛɛb aagó esa binek djas ebá. Zɛɛb nabɛ ɛ́ ààsa nyel mot étɛp mɛzɔ, nyel mot nasael ɛ́ étɛp Ghɛŋ, Ghɛŋ ɛ́ di ebaal nyel mot. 14 Dáa Zɛɛb nagomal Ghɛŋ bhis ɛsyee ɛ, nyɛ waagomal mena pe tɔ ɛsyee, nɛ ghwyil mɛbwala mɛ.

15 Bi ààgu náá, mɛnyel men ɛ́ esum e nyel ɛ Klisto? Mɛ ɛ́ nɛ ghwyil ɛnɔɔ sum nyel ɛ Klisto, étɛp kɛsa náá, ye di sum nyel ɛ moma mɛzɔ? Ààbɛ, ye tok deenek! 16 Bi ààgu náá, mot di esɛɛga goŋ nɛ moma mɛzɔ ɔ, bɛ nɛ nɛ moo ɛ́ nyel ngɔt é? Yɛ ɛ́ dáa ye di kwyala tɔ Mɛkana ɛ Zɛɛb ɛ: «Bɔɔ djas bɛbá aakadi ɛ́ mot ngɔt✝.» 17 Tin, mot di tɔ ɛgwakel nɛ Ghɛŋ ɔ, nyɛ moo ɛ́ mot ngɔt bɛ nɛ nɛ tɔ sisim.

18 Deenek, kyeeka mɛzɔ, etɛɛ náá, mot sa syem mɛzɔ ɛ́, nɛ nyel'ɛ met. Yɛ ɛ́ kabɛ edhiiti mesyem ɔɔ, ye sael ɛ́ ɛtsetaɛpe nɛ nyel. 19 Bi ààgu náá, mɛnyel men ɛ́ ndjaa Sisim na Dɛɛ? Sisim di tɔ len ɛ, Zɛɛb nyɛy ɛmet ɛ nadjɛ bin Sisim tak. Tin, mɛnyel men tokapɛ yebɔ met. 20 Zɛɛb naazebɔm bin nɛ boo mɛtaŋ. Tin, bi goka ɛ́ nɛ ɛdjɛ Zɛɛb duu nɛ mɛnyel men dáa ye di egoka ɛ.