1 Lumka koŋ nɛ esa ɛbiyo djas, nɛ mɛkɔŋ, sa bi ààdi nɛ mɛdjhaaz pɛ ɛko bhimis pɛ si, sa bi ààsa zok nɛghu ɛbyak ɛ bɛsɔ bin bot. 2 Deenek, dáa bɔɔ etɔlɔɔ e bɔn, dika nɛ gwyes mɛdii mɛ mɛbel yii Mɛkpa ɛ Zɛɛb. Etɛɛ náá, yɛ ɛ́ mbɛɛ mɛdii mɛ mɛbel di ààpuuzaa nɛ dhiiti sonok ɛ. Deenek, é ghɛŋ bi aadɛ yɛ ɛ, yɛ waasa náá, bi wyee ɛnyɔɛpe, nɛ ɛbela tsik. 3 É di’enek, Ekwyala na Dɛɛ lɛɛ ɛ́ náá: «Bi eebowal, bi eebee dáa Ghɛŋ di ɛnyɔ ɛ✝.»

4 Tin, tiilaka pɛ daa Ghɛŋ, etɛɛ náá, yɛ ɛ́ nyɛy ɛ di ɛkok ɛ di nɛ tsik ɛ, ɛkok ɛ bɛsumel ɛ mendjaa namwas ɛ. Bela náá, Zɛɛb ɛ́ natɔ nyɛ, nyɛ naabee náá, nyɛ ɛ́ sa ghoŋ é mis mɛ. 5 Biyɔ pe ɛ́ dáa mɛkok mɛ di nɛ tsik ɛ, beegelka kɔ bɛsɔ bin ngɔt kɔ yii, ngɔt kɔ yii, deenek bi neesum ndjaa-Zɛɛb. Bi aadi ɛ́ zɛɛga bɛghaa-Zɛɛb na dɛɛ nasɛ́ɛaa étɛp mɛsa ɛ Zɛɛb ɔ. Tin, bi neekɛka ebuwa ee Sisim aamyaala nɛ yɛ, kɔ ɛsu ɛ Yezu Klisto ɛ. 6 Gwakeka sa Ekwyala di elɛɛ ɛ:

«Mɛ eetɔ ɛkok ɛ di eval ɛ,

tin, mɛ eenɛɛg yɛ tɔ ghaada Siyɔŋ dáa ɛkok ɛ dyeebadi etuma é sok bɛ di esum ndjaŋ ɛ,

deenek, mot aadum koŋ nɛ yɛ ɔ, nyɛ aanàdi nɛ sen✝.»

7 Tin, biyɔ bot ɛ di edum koŋ ɔ, ɛkok ɛlenek djɛ bin ɛ́ duu. Yɛ kabɛ bot ɛ di ààdum koŋ nɛ Zɛɛb ɔɔ:

«Ɛkok ɛ bɛzumel mwas ɛ,

ye moo ɛ́ ɛkok ɛ di epyet ndjaŋ* ɛ.»

8 Deenek, é bɛdhiiti edi, bɛ lɛɛ ɛ́ náá:

«Yɛ ɛ́ ɛkok ɛ di esa náá, bot bema ɛbɛk ɛ,

yɛ ɛ́ ɛkok di ekwyesal bot ɛ✝.»

É di’enek, bot ɛpekɔwa é tak, etɛɛ náá, bɛ ɛpebyen ɛmyaal Mɛkpa ɛ Zɛɛb. Sa bɛ di egoka nɛ ɛboma nɛ yɛ ɛ, yɛ ɛ́ yenek.

9 Yɛ kabɛ biyo ɔɔ, bi ɛ́ bot ɛ mbyak Zɛɛb natɔ ɔ, zɛɛga bɛghaa-Zɛɛb ɛ Mɛkoozi, mbyak na dɛɛ. Deenek, bi ɛ́ mbyak Zɛɛb naazesɛ́ɛ étɛp ɛlɛɛ eboo esa ee nyɛ nasa ɛ. Tin, nyɛ nawyisal bin tɔ ghooghom ɛ́, étɛp ɛdjɛɛd ɛ́ bin pɛ gwyɛ yɛ di ɛ. 10 Deenek, é ghɛŋ na mwa, bi nabɛ ɛ́ ààdi bot bɛ. Nenak yak, bi moo ɛ́ bot ɛ mbyak’ɛ. É ghɛŋ na mwa, Zɛɛb nabɛ ɛ́ ààgek bin ghoŋ. Nenak yak, nyɛ eegek bin ghoŋ.

11 Bɛwɛn bam, betka mɛ lɛɛ bin náá, bi ɛ́ bɛdjoŋ, ekpaagoŋ kɔ ɛko ɛ bɔs. Dum nɛ tɛp tak ɛ, mɛ di ewaab nɛ nen náá, sa biyɔ ààbet náá, embee mɛkwosak mɛ mɛnyel men, bela ghwyil kɔ esisim bin. 12 Tin, dika nɛ embɛɛ mɛfulu pak bot ɛ di ààgu Zɛɛb ɔ. Deenek, bɛ til bin ebhete náá, bi ɛpesa ɛbiyo ɔ. Tin, bɛ waabee enɛm esa bi di esa ɛ, da bɛ ɛ́ djɛ Zɛɛb duu, dwoo nyɛ aazyɛ ɛ.

13 Loobaka nɛ bot djas di é di ekukuma kɔ bɔs ɔ, kɔ ɛsu ɛ Ghɛŋ. Loobaka nɛ boo mɛkoozi etɛɛ náá, yɛ ɛ́ nyɛy ɛ di kukuma bot djas kɔ ɛko ɛ bɔs. 14 Loobaka dɔɔ nɛ ekukuma ekyee e mɛdhik, bot ɛ mɛkoozi nalwom bɛ, étɛp ɛkɛwa bot ɛ di esa ɛbiyo ɔ é feŋ ɔ, étɛp ɛdjɛ bot ɛ di esa enɛm esa ɔ duu. 15 Etɛɛ náá, Zɛɛb kwyɛl ɛ́ náá, bi sa enɛm esa, étɛp bi neediyal enuub e endjemet e bot di elii mbɛs ɔ. 16 Kɛka dáa bot ɛ di náá, bɛ pɛka ɔ. Tin, sa mɛpɛka mɛ tak ààdi nɛ nen tyee mɛfulu mɛ ɛsyel embee etɛp bin. Bi goka ɛ́ nɛ ɛkɛ dáa bot ɛ mɛsa ɛ Zɛɛb. 17 Duwalka bot djas kɔ ɛko ɛ bɔs. Kwyɛlka bɔn-nyɛɛg bin, bi nɛ bɛnɔɔ di tɔ ɛdum ɛ koŋ nɛ Zɛɛb ɔ. Djɛka duu nɛ Zɛɛb, kaabka boo mɛkoozi.

18 Deenek, biyɔ bot ɛ mɛsa, loobaka nɛ ekukuma bin, ààbɛ náá, ye zosik nɛ bot ɛ di ɛnyɔɛpe ɔ, nɛ bot ɛ ɛtela lyem, tin, loobaka dɔɔ nɛ bot ɛ di náá, bɛ ɛ́ nɛ embee mɛfulu ɔ. 19 Tin, yɛ ɛ́ ɛnyɔɛpe náá, mot maad mezuk mɛ nyɛ di ezukaa kɔ ɛsu ɛ etɛp ee nyɛ di ààsa ɛ. Etɛɛ náá, nyɛ ɛpekwyɛl ɛdi sosoob nɛ Zɛɛb. 20 É di’enek, yɛ ɛ́ yaa mbi efute bi aabela, yɛ bɛ náá, bi zukaa ɛ́, kɔ ɛsu ɛ mesyem ee bi di esa ɔɔ? Yɛ bɛ náá, bi maad mezuk ɛ, etɛɛ náá, bi eesa tɛtɛ mɛsa ɔɔ, yɛ ɛ́ sa di ɛnyɔɛpe é mis ɛ Zɛɛb ɛ. 21 Yɛ ɛ́ étɛp mezuk ɛ, Zɛɛb nasɛ́ɛ bin, etɛɛ náá, Klisto nyɛy ɛmet nazuk ɛ́ étɛp’en. Nyɛ naalik bin geka étɛp bi needu yɛ:

22 Nyɛ nabɛ ɛ́ ààsa mesyem,

bɛ nabɛ ɛ́ ààgwak mɛkpa mɛ mɛkɔŋ tɔ nuub’ɛ.

23 É ghɛŋ bɛ nalee nyɛ ɛ,

nyɛ nabɛ ɛ́ ààbulal mɛlee.

É ghɛŋ bɛ nadi ezuk nyɛ ɛ,

nyɛ nabɛ ɛ́ ààwun ɛsa mot ɛbiyo,

tin, nyɛ nawa ɛbwaalel ɛ́ nɛ Zɛɛb, mot di epɛ́ɛ bot tɛtɛ epɛ́ɛ ɔ.

24 É nyel’ɛ met, nyɛ naabɛp mesyem menaka kɔ mɛlaaba, etɛɛ náá, dum nɛ mesyem, mena eezegwyɛka, étɛp mena needika nɛ tsik tɔ epiki. Yɛ ɛ́ dum nɛ mɛpyoŋ mɛ ɛ, mena nabelaka tsik. 25 Deenek, bi nabɛ ɛ́ dáa ebhata nazewo ze ɛ. Tin, nenak yak, bi eezebula pɛ daa mot di náá, nyɛ ɛ́ Mbaalel mɛsaa di ebaal esisim bin ɔ.