1 Mam Pyɛɛd, mot-lwoma ɛ Yezu Klisto, mɛ kwyal mɛkana mak ɛ́ étɛp bot ɛ Zɛɛb nazesɛ́ɛ ɔ, bot ɛ nazewyɛɛza pɛ ekyee e mɛdhik mɛ sis dáa pɛ kyee dik Pɔŋ, pɛ kyee dik Ghalasi, pɛ Kapadɔs, pɛ Azi nɛ pɛ kyee dik Bhitini ɛ. 2 Tin, Zɛɛb Sɛɛg'ena naaloosɛ́ɛ bin dáa nyɛ naaloolɛɛ ɛ. Yɛ bɛ náá, Zɛɛb Sɛɛg'en ɛ nasɛ́ɛ bin ɔɔ, nyɛ nasɛ́ɛ bin ɛ́ dum nɛ mɛsa mɛ Sisim na Dɛɛ, etɛɛ náá, bi neelooba nɛ Yezu Klisto, nɛ náá, ghiya Yezu nasee ɛ, yɛ waasa náá bi di dɛɛ. Beta náá, Zɛɛb sa bin enɛm nɛ embɛɛ, nɛ náá egwyem di tɔɔɔ tɔ len.

3 Bhɔɔ nɛ Zɛɛb, Sɛɛg ɛ Ghɛŋ'enaka Yezu Klisto! Tin, tɔ lyem ghoŋ nyɛ di nɛ yɛ nɛ nena ɛ, nyɛ eesa náá, mena byel-byelak na bes dum nɛ ɛgom ɛ Yezu Klisto tɔ ɛsyee. Deenek, menaka ɛ́ bot ɛ di nɛ ɛbwaalel ɛ di nɛ tsik na kɔm-kɔm ɔ. 4 É di'enek, menaka ɛ́ bot ɛ di egwaal tɔ mɛmyaala embɛɛ esa ee Zɛɛb kwom étɛp'enaka ɛ. Nyɛy nyɛ ɛmet ɛ di ebaal bin yɛ ɛ pɛ tɔ gwoo. Tin, esa binek, tok nɛ ghwyil ɛ́ saabel, ààpulel, ààsyee. 5 Tin, bi ɛ́ bot ɛ di edum koŋ nɛ Zɛɛb ɔ, Zɛɛb mot mɛbwala ɛ́ waabaal bin nɛ ghwyil'ɛ, étɛp nyɛ needjɛ bin tsik. Tsik tak zekunaa nɛ ɛnyen ɛ.

6 Yɛ ɛ́ étɛp tak ɛ bi di nɛ mɛmyaala ɛbuɛpe, ye nakoozodi náá, bi ɛ́ tɔ ghoŋ tɔ bim mɛlu mak, etɛɛ náá, bi ɛ́ ɛpeboma nɛ membi mɛ mɛbhowal djas. 7 Mɛbhowal menek ɛ́ étɛp ɛlyaal mbi ɛdum ɛ koŋ ɛ len nɛ Zɛɛb. Tin, ɛkok ɛ lɔɔd ɛ́ nɛ ghwyil ɛpulel, étɛp tak ɛ, ye di ewaaa tɔ du étɛp ɛbee enɛm e tak. Yɛ ɛ́ dhatyee ɛdum ɛ koŋ ɛ len nɛ Zɛɛb, ye nɛ val dhaa ɛkok ɛ lɔɔd, ye goka ɛ́ ye ni tɔ mɛbhowal étɛp ɛlyaal mɛtaŋ mɛ. Tin, é ghɛŋ Yezu Klisto aatuula ɛ, nyɛ waaval bin, bi waabela duu nɛ duma. 8 É di'enek, ye nakoozobɛ náá, bi dinaa ààpabee Yezu, bi ɛpekwyɛl nyɛ. Nenak yak, bi ààbee nyɛ, bela náá, bi nɛ dum koŋ nɛ nɛ. Dáa di náá, bi ɛpedum koŋ nɛ nɛ ɛ, bi ɛ́ tɔ boo mɛmyaala, nɛ duu di náá, bot tok nɛ ghwyil ɛgek ɛ. 9 Deenek, bi bela mɛmyaala menek ɛ́, etɛɛ náá, bi moo ɛ́ nɛ tsik. Tsik mɛnyel men ɛ́ efute ee bi aabela tɔ ɛdum ɛ koŋ nɛ Yezu ɛ.

10 Deenek, bɛngoolel ɛ Mɛkpa ɛ Zɛɛb naani tɔ ɛsɛɛga dum nɛ ɛsuk ɛ tsik tak. Bɛ naazeloolɛɛ mɛkpa dum nɛ enɛm nɛ embɛɛ Zɛɛb nakoobal bin yɛ ɛ. 11 É di'enek, Sisim ɛ Klisto nabɛ ɛ́ sama nɛ nɔɔ. Ye nadi elyaal bɛ mezuk mɛ Klisto nawaagoka nɛ ɛbee ɛ, dɔɔ nɛ duma aabɔɔba yɛ ɛ́. Tin, bɛngoolel ɛ Mɛkpa ɛ Zɛɛb naadyeebani tɔ ɛsɛɛga, étɛp ɛgu ɛ́ ɛwala tak nɛ dáa esonok binek aasael ɛ. 12 Zɛɛb naalyaal bɛ náá, mɛkpa mɛ nyɛ nalɛɛ bɛ ɛ, nabɛ ɛ́ ààbɛ étɛp'ɔɔ, ye nabɛ ɛ́ étɛp'en. Nenak, bot ɛ di egoola bin Mbɛɛ Bhaadal ɔ, bɛ lɛɛ bin mɛkpa mak ɛ́ nɛ ghwyil mɛbwala mɛ Sisim na Dɛɛ zedus tɔ gwoo ɛ. Tin, efofop ɛpebaasaa náá, bɛ gu mɛkpa mak ɛnyɔɛpe.

13 Tin, dum nɛ tɛp tak, dika ghwyɛ étɛp mɛsa, bi goka ɛ́ nɛ ɛdi ndjem. Deenek, waka ɛbwaalel ɛ len djas tɔ enɛm nɛ embɛɛ ee bi aabela é ghɛŋ Yezu Klisto aatuula ɛ. 14 Dika dáa bɔɔ dhyeeb ɛ di elooba ɔ. Tin, sa bi ààdu ɛkwosak ɛ bi nadi nɛ yɛ sok, é sok bi nadi ààgu Klisto ɛ. 15 Zɛɛb mot djóo bin ɔ, nyɛ ɛ́ dɛɛ. Deenek, bi goka ɛ́ nɛ ɛbaadi dɛɛ tɔ mɛfulu men. 16 É di'enek, Ekwyala e Zɛɛb lɛɛ ɛ́ náá: «Dika dɛɛ, etɛɛ náá, mam ɛ́ dɛɛ✝.»

17 Yɛ bɛ náá, tɔ mendjaala men, bi nɛ djóo Zɛɛb «Sɛɛg», mot di epɛ́ɛ etɛp ee mot nɛ mot naadi esa ɛ, ààwa mbɛk ɔɔ, tin, ye goka ɛ́ bi di nɛ ɛbwaalel tɔ ɛkaab ɛ Zɛɛb, é sok bi dinaa kɔ ɛko ɛ bɔs ɛ. 18 Deenek, embee mɛfulu mɛ di ààval sonok bi nanɔɔ nɛ bɛbhaab bin ɛ, mɛfulu mɛ tak ɛ́ aanàdul bin é dhiiti di. Tin, bi nɛ gu náá, Zɛɛb naatuud boo mɛtaŋ étɛp ɛpɛk bin tɔ embee mɛfulu menek. É di'enek, Zɛɛb nabɛ ɛ́ ààtuud mɛtaŋ mɛ tak nɛ sa di ààbɔya, dáa pata nɛ ɛkok ɛ lɔɔd. 19 Tin, mɛtaŋ mɛ tsik'en nabɛ ɛ́ ghiya ɛ Klisto di eval ɛ, nyɛy mot nadi dáa Mɔn bhata nakaaa é buwa ɛ. Mɔn bhata tak nabaagoka nɛ ɛdi ɛ́ ààbɛ nɛ djam, ààbɛ nɛ edhuud.Klisto ɛ́ mɔɔ bhata ɛ Zɛɛb nakaa buwa ɔ

20 Dáa ye di náá Zɛɛb naatɔ nyɛ ɛsok nɛ bhwak nakusel ɛ, nyɛ nakazyɛ é mɛwala mɛ mɛsik mak ɛ́, étɛp mɛnyɔ men. 21 Deenek, yɛ ɛ́ dum nɛ Klisto ɛ bi di edum koŋ nɛ Zɛɛb, mot nagomal nyɛ pak bɛmyoŋ ɔ, nyɛ naadjɛ nyɛ duu. Etɛp tak ɛ, bi di edum koŋ nɛ Zɛɛb, nɛ ɛwa ɛbwaalel ɛ len nɛ nɛ.

22 Tin, bi moo ɛ́ dɛɛ, etɛɛ náá, bi namyaal etsɛɛtsɛ. Kɔ ɛsu ɛ tak ɛ, bi di ekwyɛl bɔn-nyɛɛg, bot ɛ di edum koŋ nɛ Zɛɛb ɔ. Kwyɛlelka pak'en nɛ lyem wat. 23 Deenek, Mbɛɛ Bhaadal eesa náá, bi baabyel-byelak na bes. Ààkabɛ byela nyel nɛ epuud, yɛ ɛ́ byela Mɛkpa ɛ Zɛɛb di ààgwyɛ ɛ, nyɛ nasa deenek ɛ́ nɛ mɛkpa mɛ di nɛ tsik na kɔm-kɔm ɛ. 24 Tin, Ekwyala na Dɛɛ lɛɛ ɛ́ náá:

«Bot djas ɛ́ dáa eka,

tin, duu bot di nɛ yɛ ɛ́, yɛ ɛ́ dáa mɛzɛm.

Eka nɛ sɔs,

wɔ gwaa, mɛzɛm kwyit,

25 tin, mɛkpa ɛ Ghɛŋ nɛ bɔya kɔm-kɔm✝.»

Mɛkpa menek ɛ́ Mbɛɛ Bhaadal, yii bɛ nagoola bin ɛ.