1 Dáa ye di náá, Klisto naazuk tɔ epuud ɛ, ye nyɔ ɛ́ bi ɛmaad elyem, etɛɛ náá, biyɔ pe, bi ɛ́ waaboma nɛ mezuk. Etɛɛ náá, mot di náá, nyɛ naazebee mezuk tɔ epuud ɔ, nyɛ eezekat ɛsa esyem. 2 Tin, tɔ ba bim mɛlu mɛ bi kalik nɛ yɛ kɔ ɛko bɔs ɛ, bi goka ɛ́ nɛ ɛkɛ ɛ́ tɔ ɛkwosak ɛ Zɛɛb, ààkabɛ tɔ ɛkwosak ɛ mɛnyel men. 3 Tin, é membu mɛ nadhaa'enek, bi nadi esesa esonok ee bot ɛ di ààdum koŋ nɛ Zɛɛb ɔ di ekwyɛl ɛ. Bi nadi ɛ́ tɔ mɛzɔ, embee egwyes e epuud, tɔ elangi, bot ɛ ɛdheka elyem, bot ɛ di ekwyɛl mɛnyok nɛ ɛduwal ɛ bɛnaghisɛ ɔ. 4 Nenak, bot binɔk ɛpedjoka dáa di náá, bi ààkasa embee mɛsa bi nɛ bɛnɔɔ. Bi tokapɛ tɔ mbee tsik etɛp e sen bɔɔ. Tin, mɛsa mɔɔ moo ɛ́ ɛlee ɛ bin. 5 Deenek, bɛ waakɛtaŋal étɛp mɛfulu mɔɔ pɛ daa Zɛɛb, mot di náá, nyɛ eezekɔ nɛ ɛpɛ́ɛ bot ɛ di nɛ tsik ɔ nɛ bot ɛ nazegwyɛ ɔ. 6 Dum nɛ tɛp tak ɛ di náá, Mbɛɛ Bhaadal naakɛgoolaaa dɔɔ nɛ pɛ daa bot di mos bɛ eezegwyɛ ɔ. Tin, bɛ napɛ́ɛaa ɛ́ kɔ ɛsu ɛ mɛfulu mɔɔ kɔ bɔs. Epɛ́ɛ e tak, yɛ ɛ́ dáa bɛ aapɛ́ɛ bot djas di nɛ tsik ɔ. Deenek, kɔ ɛsu ɛ Sisim na Dɛɛ ɛ, bɛ ɛ́ nɛ ghwyil ɛkadi tɔ tsik Zɛɛb.

7 Deenek, bot moo aakum é mɛsik mɛ bhwak. Tin, bi goka ɛ́ nɛ ɛdi bot ɛ etsoŋ. Dika ndjem étɛp ɛdjaala Zɛɛb. 8 É di'enek, sa di ɛnyɔɛpe dhaa tyɛ ɛ, yɛ ɛ́ ɛkwyɛlel pak'en, etɛɛ náá, kwyɛl nɛ diyal mbula mesyem. 9 Myaalka náá ndjoŋ sulal pɛ yebɔ, sa bi ààdi nɛ mbee lii nɛ nɛ. 10 Tin, saka enɛm esa nɛ bɔɔ bɛsɔ bin nɛ ɛkɛɛ mot nɛ mot nabela ɛ. Dika dáa bɛtɛtɛ bot ɛ mɛsa di ebaal ɛnyɔɛpe membi mɛ mɛkɛɛ mɛ Zɛɛb ɔ. 11 É di'enek, mot di ekwyɛl ɛgoola Mɛkpa ɛ Zɛɛb ɔ, nyɛ goola yɛ dáa mot di nɛ ɛkɛɛ ɛgoola Mɛkpa ɛ Zɛɛb ɛ. Deenek, mot di nɛ ɛkɛɛ ɛkwyee bot ɔ, nyɛ sa yɛ nɛ tɛtɛ esiiza e Zɛɛb, etɛɛ náá, tɔ mɛsa djas Zɛɛb neebela duu kɔ lo ɛ Yezu Klisto, mot di egoka nɛ duu nɛ mɛbwala kɔm-kɔm sii nɛ kɔm ɔ. Amɛn!

12 Bɛwɛn bam, sa biyɔ ààdjoka nɛ du mɛbhowal mɛ bi di tɔ tak ɛ, ɛkɛɛ sa di esa bin ɛ, yɛ ɛ́ sa di ààgoka nɛ ɛsael ɛ. 13 É di'enek, bi goka ɛ́, nɛ ɛmyaala etɛɛ náá, bi ɛ́ tɔ mezuk kɔ ɛsu ɛ Klisto. Etɛɛ náá, é sok bi aabee duma yɛ ezyɛ ɛ, bi aadi ɛ́ tɔ boo mɛmyaala. 14 Deenek, bɛ di elee bin etɛɛ náá bi ɛ́ bɛdjekel ɛ Klisto ɔɔ, yɛ ɛ́ mɛmyaala étɛp'en, etɛɛ náá, Sisim duma ɛ Zɛɛb ɛ́ kɔ len. 15 Tin, mot ngɔt pak'en ɛdi ezuk ɔɔ, sa yɛ ààdi etɛɛ náá, nyɛ naagó mot, nɛghu nyɛ naadjii sa mot, ààbɛ etɛɛ náá, nyɛ naasa ɛbiyo nɛghu nyɛ naawa nuub tɔ tɛp di ààgwyák nyɛ ɛ. 16 É di'enek, nyɛ di tɔ mezuk etɛɛ náá, nyɛ ɛ́ keletyɛ ɔɔ, sa nyɛ ààdi nɛ sen. Tin, nyɛ goka ɛ́ nɛ ɛghaapɛɛ ɛ Zɛɛb kɔ ɛsu ɛ din ɛ Klisto nyɛ di nɛ yɛ ɛ.

17 Deenek, mena mooka ɛ́ é ɛwala di náá taŋal moo zɛkan ɛ. Taŋal aakan sok ɛ́ nɛ bɔn ɛ Zɛɛb. Tin, yɛ kan nɛ menabɛlka ɔɔ, yɛ aakaswaala dáa nɛ bot ɛ di ààlooba nɛ Mbɛɛ Bhaadal ɛ Zɛɛb ɔ? 18 Ekwyala na Dɛɛ lɛɛ ɛ́ náá:

«Yɛ bɛ náá, ɛlyel nɛ mot di tɔ epiki ɔ, náá nyɛ bela tsik ɔɔ,

haaa, yɛ aakadi dáa dum nɛ mot di esa ɛbiyo ɔ nɛ mot esyem✝?»

19 É di'enek, bot ɛ di ezuk étɛp ɛsa enɛm esa ee Zɛɛb di ekwyɛl ɔ, bɛ goka ɛ́ nɛ ɛdi nɛ ɛbwaalel nɛ Mɛkus-bot, mot di sosoob ɔ. Tin, bɛ goka ɛ́ nɛ ɛsesa enɛm esa.