1 Deenek, dáa bis di esa mɛsa sama nɛ Zɛɛb ɛ, bis ɛpedjaala nɛ nen: «Nàsaka náá, enɛm nɛ embɛɛ e Zɛɛb djɛ bin ɛ, ye gwyɛ toto.» 2 É di’enek, Zɛɛb ke ɛ́ náá:

«É ghɛŋ mbɛɛ ɛwala nakum ɛ,

mɛ naagwak mendjaala mɔ,

é dwoo tsik, mɛ naazyɛ zɛtsik wɔ✝.»

Nenak, myaalka náá, ɛwala tak eezekum, yɛ ɛ́ dwoo di náá, Zɛɛb aatsik bot ɛ.

3 Bis ààkwyɛl náá, mot lii ɛbiyoɛpe dum nɛ mɛsa mes. Yɛ ɛ́ étɛp tak ɛ, ye di náá, bis ààpakwyɛl ɛdi ɛbɛk étɛp mot, ye nakoozodi dáa. 4 Bela náá, bis ɛpesa etɛp djas di egoka ɛ, étɛp bi neemyaal náá, bis ɛ́ bɛtɛtɛ ɛ bot ɛ mɛsa ɛ Zɛɛb. Yɛ ɛ́ étɛp tak ɛ, bis di emaad mezuk, nɛ mɛtiiga zɛnɔɔ bɛbebwol. 5 Bɛ naabi bis, wa bis é membok, bɛ naaful mɛdhuu mɛ bot elo kɔ ɛsu ɛ les. Bis naasa mɛsa mɛ na lyel-lyel. Bis naapaal pum, bis naamaad za. 6 Bis ɛpelyaal náá, bis ɛ́ bot ɛ mɛsa ɛ Zɛɛb: tɔ epiki, tɔ ɛgu, tɔ ɛdil ɛ lyem, tɔ enɛm esa, tɔ ghwyil Sisim na Dɛɛ, tɔ tɛtɛ kwyɛl, 7 tɔ ɛgoola mɛkpa mɛ etsɛɛtsɛ, tɔ mɛbwala ɛ Zɛɛb. Bɛghɛl ɛ bis di ekɛduu tuub nɛ yɛ ɛ, nɛ yii bis di ebaal mɛnyel mes nɛ yɛ ɛ, yɛ ɛ́ ɛkɛ tɔ epiki. 8 Bɛdhiiti bot ɛpedjɛ bis duu, bak bot kabee bis é mis ɛ́ toto. Bɛdhiiti bot ɛpeduwal bis, bak bɛdhiiti ɛpelee bis. Bɛ ke ɛ́ náá, bis ɛ́ bot ɛ etsal, ghuna bis lɛɛ ɛ́ etɛp etsɛɛtsɛ. 9 Bɛdhiiti bot bee bis ɛ́ ɛkɛɛ bɛ ààgu bis, bela náá, bɛ nɛ gu bis ɛnyɔɛpe. Bɛ bee bis ɛ́, dáa bot ɛ di náá, bɛ eezegwyɛ ɛ, ghuna bis ɛ́ nɛ tsik. Bɛ ɛpewa bis tɔ tsik mezuk, tin, bis ààgwyɛ. 10 Bɛ ɛpesa náá, elyem bis kpaa, ghuna bis ɛ́ tɔ mɛmyaala. Bis ɛ́ bɛdjel ɛ bot, bela náá, bis ɛpedjɛ mɛvu nɛ bɛtɛ nɛ bot. Ye di ɛ́ ɛkɛɛ bis ɛ́ toto, ghuna nɛ tsɛɛtsɛ, bis ɛ́ nɛ esonok djas.

11 Biyɔ, bɔɔ bɛsɔ bis bot ɛ Koolɛt, bis lii nɛ nen wak ɛ́ nɛ etsɛɛtsɛ, nɛ lyem wat. 12 Bis ààpabyen ɛkwyɛl bin, yɛ ɛ́ biyɔ ɛ di elyel elyem. 13 Tin, mɛ lii nɛ nen wak ɛ́, dáa mɛ di elii nɛ bɔn bam ɛ: Lɛɛka bis sa di tɔ elyem bin ɛ, kwyɛlka bis nɛ lyem wat, dáa bis di ekwyɛl bin ɛ.

14 Sa bi ààkɛ lɔɔg nɛ bot ɛ di ààdum koŋ nɛ Zɛɛb ɔ. Tin, sa di tɔ epiki ɛ, yɛ ɛ́ nɛ ghwyil ɛkɛ sama nɛ sa di ààdi tɔ epiki ɛ? Ghooghom nɛ mɛkas ɛ́ nɛ ghwyil ɛkɛ lɔɔg é? 15 Klisto ɛ́ nɛ ghwyil gwakel bɛ nɛ Satan é? Mot di edum koŋ nɛ Zɛɛb ɔ, nyɛ ɛ́ nɛ ghwyil ɛdi nɛ esiiza wat bɛ nɛ mot di ààdum koŋ nɛ Zɛɛb ɔ? 16 Yak mbi ɛgwakel aadi pak ndjaa-Zɛɛb nɛ mendjaa mɛ bɛnaghisɛ, bot ɛ di ààdum koŋ nɛ Zɛɛb ɔ? Tin, menaka ɛ́ ndjaa-Zɛɛb di nɛ tsik ɛ! Gwakeka sa Zɛɛb nyɛy nyɛ ɛmet nalɛɛ ɛ:

«Mɛ aadidi ɛ́ bis nɛ bɛnɔɔ,

mɛ aagegyee ɛ́ bis nɛ bɛnɔɔ,

mɛ aadi ɛ́ Zɛɛb’ɔɔ,

bɔɔ aakadi ɛ́ bot bam.»

17 Étɛp tak ɛ, Ghɛŋ di eke nɛ bot bɛ náá:

«Duska tɔ ɛdhuu ɛ bot ɛ di ààdum koŋ nɛ Zɛɛb ɔ,

bɛkaka nɛ nɔɔ.

Sa bi ààmɛt sa di nɛ edhuud ɛ,

tin ɛ, mɛ aamyaal bin.

18 Mɛ aadi ɛ́ Sɛɛg’en,

da bi ɛ́ di esɛŋɛlɛ bɔn bam.

Ghɛŋ mɛbwala ɛ di elii*v. 17: Eza 52.11; Ɛze 20.34v. 18: Sm2 7.14; Eza 43.6.»