1 Ye goka ɛ́ mɛ di nɛ ɛghɛɛa nyel, ye nakoozodi náá, ɛghɛɛa nyel tok ɛnyɔɛpe. Tin, mɛ kalii nenak ɛ, kɔ ɛsu ɛ esa ee mɛ nabee dáa dhyam ɛ, nɛ esa ee Ghɛŋ natel mɛ ɛ. 2 Mɛ nɛ gu dhiiti keletyɛ nabyet tɔ́ pɛ tɔ gwoo ɔ, ye moo mos ɛ́ membu kam nɛ ená (14). Deenek, mɛ ààgu nɛghu, ye nabɛ ɛ́ dhyam, nɛghu yɛ ɛ́ tsɛɛtsɛ náá, nyɛ naabyet tɔ́ pɛ tɔ gwoo, tin, yɛ ɛ́ Zɛɛb nyɛ ɛmet ɛ di egu. 3,4 Tsɛɛtsɛ, mɛ nɛ gu náá, mot tak naabyet kɛkum pɛ tɔ Paladi*. Deenek, mɛ ààgu nɛkoo, ye nabɛ ɛ́ dhyam, nɛghu yɛ ɛ́ tsɛɛtsɛ, tin, yɛ ɛ́ Zɛɛb nyɛ ɛmet ɛ di egu. Penek pɛ tɔ gwoo, nyɛ naagwak mɛkpa wat di náá, dhiiti mot tok nɛ ghwyil ɛgoola yɛ ɛ, mot aanàkobaŋa-baŋak yɛ ɛ. 5 Mɛ waadi nɛ ɛghɛɛa nyel dum nɛ mot yenɔk. Tin, yɛ kabɛ mam ɔɔ, mɛ aazodi nɛ ɛghɛɛa nyel ɛ, kɔ ɛsu ɛ elɛtɛ bam. 6 Yɛ ɛpedi náá, mɛ ɛpekwyɛl ɛghɛɛ nyel ɔɔ, pe mɛ aanàdi tyee mot mɛlyet, etɛɛ náá, mɛ aazolɛɛ ɛ́ etsɛɛtsɛ. Tin, mɛ eepɛɛ ɛdi nɛ ɛghɛɛa nyel, etɛɛ náá, mɛ ààkwyɛl náá, bot bee mɛ dáa boo-mot duu. Mɛ kwyɛl ɛ́ náá, bot pɛ́ɛ mɛ dum nɛ mɛsa mɛ mɛ di esa ɛ, nɛ yii bɛ di egwak mɛ elii ɛ.

7 Deenek, mɛ needi ààdi nɛ ɛbet kɔ ɛsu ɛ eboo esa e mɛbwala Zɛɛb zetel mɛ ɛ. Mɛ ɛ́ nɛ dhiiti boo pel tɔ nyel dáa ɛgɔk. Yɛ ɛ́ dhatyee náá, Satan ɛ nalwom fofop'ɛ, étɛp nyɛ neezɛwa mɛ tɔ tsik mezuk. Yɛ bɛ náá, Zɛɛb naabet náá, ye sael deenek ɔɔ, yɛ ɛ́ etɛɛ náá, mɛ needi ààsa ɛbet. 8 Mɛ eedjaala nɛ Ghɛŋ esok elɛl, étɛp nyɛ neepɛk mɛ tɔ tsik mezuk mak. 9 Nyɛ nabɔɔza nɛ nam ɛ náá: «Enɛm nɛ embɛɛ bam eedjala nɛ nɔ. Mɛbwala mam dyeebanyen ɛ́, é sok wɔ di ààdi nɛ ghwyil ɛsa dhiiti sonok ɛ.» Mɛ kwyɛl ɛ́ náá, mɛ di nɛ ɛghɛɛa nyel dum nɛ sa mɛ di ààdi nɛ ghwyil ɛsa ɛ, etɛɛ náá, mɛbwala ɛ Klisto needi kɔ lam. 10 Dum nɛ tɛp tak ɛ, mɛ di emyaala tɔ elɛtɛ bam, tɔ mɛlee, tɔ mezuk, tɔ mɛtiiga, etɛp ee di kpaa mɛ lyem kɔ ɛsu ɛ Klisto ɛ. Etɛɛ náá, é sok mɛ di tɔ elɛtɛ ɛ, yɛ ɛ́ é di'enek ɛ mɛ di nɛ ghwyil.

11 Yɛ ɛ́ biyɔ ɛ di ebesal mɛ náá, mɛ lii tyee mot mɛlyet, yɛ ɛ́ biyɔ ɛ nawaakotaŋal é di yam, ye nakoozodi náá, mɛ tok vaŋ mot. Tin, ye tok nɛ sa wat yii bot ɛ bi di edjóo «eboo ewolo bot ɛ lwoma» di edhaa mɛ nɛ yɛ ɛ. 12 Endem di elyaal náá, mɛ ɛ́ tɛtɛ mot-lwoma ɔ, bi naazebee yɛ nɛ mis men met. Ye naanyen tɔ zii, tɔ membi mɛ endem e mɛbwala, tɔ bɛmɛvyɛkɛlɛ. 13 Yaa mbi sonok mɛ nasa nɛ edhiiti ezɛɛga mendjaala, ààsa nɛ biyɔ? Yɛ di ààbɛ náá, mɛ naabyen náá mɛ di ɛbɛp kɔ elo bin ɔ. Yɛ di étɛp tak ɔɔ, pelka mɛ.

14 Mɛ moo kɔ nɛ ɛzyɛ pɛ yebɔ, tyee zya esok elɛl, ye tok náá, etɛp bam djas aazii ɛ́ kɔ elo bin. Yɛ ɛ́ biyɔ ɛ mɛ di ekwyɛl ɛbee, ààbɛ epata bin. Deenek, ye tok bɔn di esɛɛg epata étɛp bɛbyael bɔɔ. Tin, yɛ ɛ́ bɛbyael ɛ di esa deenek étɛp bɔn bɔɔ. 15 Yɛ kabɛ mam ɔɔ, mɛ aadi ɛ́ nɛ mɛmyaala é ɛsilal epata bam djas, nɛ ɛka nyel'am met étɛp'en. Mɛ di ekwyɛl bin dhaa tyɛ ɔɔ, biyɔ pe tok nɛ ghwyil kwyɛl mɛ dhaa tyɛ?

16 Bi nɛ gu ɛnyɔɛpe náá, mɛ nabɛ ɛ́ ààdi boo ɛbɛp kɔ elo bin. Tin, bɛdhiiti bot ɛ́ waake náá, «Pɔl ɛ́ mot mɛkɔŋ, nyɛ eekɔɔ bis.» Ààbɛ, ye tok deenek. 17 Tɔ sama bot ɛ mɛ nadhis pɛ yebɔ ɔ, ye nakabɛ ɛ́ nɛ dhiiti mot pak'ɔɔ nanɔɔ esa bin tyee nɔŋa mɛkɔŋ, étɛp ɛzɛdjɛ mɛ? 18 Mɛ naadjaala nɛ Tit náá, nyɛ zyɛ pɛ daa len, bɛ nɛ mɔn-nyɛɛg'es yii bi di egu yenɔk. É di'enek, Tit nakanɔɔ esa bin ɛ tyee nɔŋa mɛkɔŋ é? Ààbɛ, bi nɛ gu ɛnyɔɛpe náá, ye tok deenek. Sa Tit nasa ɛ, nɛ sa mam nasa ɛ, ye tok sa wat é? Bis tok nɛ esiiza wat é?

19 Bi gek tɔ elyem bin ɛ́ náá, bis lii ɛ́ étɛp bis neebela gham é mis men é? Ààbɛ, bis lii ɛ́ tɔ ɛgwakel nɛ Klisto, é mis ɛ Zɛɛb. Bɔn-nyɛɛg bam mɛ di ekwyɛl ɔ, bis lii nɛ nen etɛp binek djas ɛ́ étɛp ɛdum ɛ koŋ ɛ len nɛ Zɛɛb neetɔ́ sok. 20 Deenek, é sok mɛ aakum pɛ yebɔ ɛ, mɛ ɛ́ nɛ kɛŋ náá, mɛ ɛzɛkɛdi ààbela bin dáa mɛ nadi egek náá, mɛ aabela bin ɛ. Da biyɔ pe ɛ́ zɛbela mɛ ààbɛ dáa bi di ekwyɛl ɛ. Sa mɛ di ekaab ɛ, yɛ ɛ́ náá, ye nàdi nɛ mɛwɔ, nɛ mbee lyem, nɛ mɛbuk, ezyaala, mɛlee, ɛbyak ɛ bot, ɛghɛɛ nyel nɛghu ɛzɛm pak'en. 21 Mɛ ɛpekaab náá, é mɛdjoŋ mam di ezyɛ yenek, Zɛɛb'am ɛzɛkɛwa mɛ tɔ sen é mis men. Deenek, mɛ ɛ́ nɛ bwoo náá, mɛ zɛbela bɛtɛ nɛ bot ɛ di náá, bɛ dinaa ààpaswoola tsik, ààkat mesyem, ààkat ɛsa mɛzɔ, ààkat ɛsa embee esesɛɛ ee bɛ di zezyɛ nɛ ɛsa sok ɛ.