1 Bɔn-nyɛɛg, ɛkwosak ɛ les ɛ́ náá, bi gu dáa Zɛɛb nasa enɛm nɛ embɛɛ nɛ bot ɛ ezɛɛga mendjaala mɛ kyee dik Masedwan ɛ. 2 Bɛ naaboma nɛ bɛtɛ nɛ mɛbhowal nasa náá, bɛ di tɔ bɛtɛ nɛ mezuk ɛ. Tin, bɛ nazodi ɛ́ tɔ mɛmyaala dhaa tyɛ. Ààbee edjel bɛ nadi nɛ yɛ dhaa tyɛ ɛ, boo mɛmyaala mɛ bɛ nadi nɛ yɛ ɛ, naasa náá, bɛ djɛ bɛtɛ nɛ esonok. 3 Nɛ tsɛɛtsɛ, mɛ ɛ́ tyaasɛs, bɛ naadyeebadjɛ esa kɛdhaa-dhaŋak ekum bɔɔ, ààbɛ náá, mot naawaab. 4 Bɛ naadyeebadjaala nɛ nes étɛp bis neemyaal náá, bɛ sɛɛg yɔbɔ ɛtom, étɛp ɛkyeed pɛ daa bot ɛ zedum koŋ nɛ Zɛɛb ɔ, bot ɛ di pɛ dik Yude ɛ. 5 Bɛ naadyeebasa dhaa yii bis nadi ebwaal ɛ. Bɛ naadjɛ elyem bɔɔ nɛ Ghɛŋ. Bhii tak, bɛ naadjɛ elyem bɔɔ nɛ nes, dáa Zɛɛb nakwyɛl ɛ. 6 Dáa ye di náá, Tit ɛ́ nakan mɛsa mɛ ɛsɛɛg esa binek pɛ daa len ɛ, bis eedjaala nɛ nɛ náá, nyɛ sik kɛsilal embɛɛ mɛsa mɛ nyɛ nakan ɛ. 7 Bi ɛ́ bɛkum ɛ bot tɔ etɛp djas: tɔ ɛdum ɛ koŋ nɛ Zɛɛb, tɔ ɛgu ɛlii ɛ etɛp e Zɛɛb, tɔ zii di ààbɛ nɛ ɛsik ɛ, dɔɔ nɛ tɔ kwyɛl bi nakwyɛl bis ɛ. É di'enek, bis kwyɛl ɛ́ náá, bi lyaal ekum bin tɔ embɛɛ mɛsa menek.

8 Sa mɛ di elii nɛ nen ɛ, mɛ ààbe mot bhel. Yɛ bɛ náá, mɛ naalii dum nɛ zii bɔɔ bɛsɔ bin nadi nɛ yɛ ɔɔ, yɛ ɛ́ étɛp bi neelyaal náá, mɛkwyɛla men ɛ́ tsɛɛtsɛ. 9 Tin, bi nɛ gu enɛm nɛ embɛɛ Ghɛŋ'enaka Yezu Klisto. Nyɛy mot nadi mot ekum ɔ, nyɛ eesa náá, nyɛ di tɔ edjel kɔ ɛsu ɛ len, étɛp bi needi bɛkum ɛ bot kɔ ɛsu ɛ edjel bɛ.

10 É mbu nadhaŋ'enek, biyɔ ɛ nadi bot ɛ mɛkɛn nake náá, bi ɛ́ waakwyee bot ɛ zɛɛga mendjaala ghaada Yeluzalɛm ɔ. Bi nazobaadi ɛ́ bot ɛ mɛkɛn é ɛkwyee bɛ. Deenek, mɛ ɛpelóo yam ɛkpa tɔ tɛp'enek, yɛ ɛ́ di ɛnyɔɛpe étɛp'en. 11 Nenak yak, silaleka ɛsa mɛsa mɛ tak. Waka zii tɔ ɛsilal ɛ mɛsa mɛ bi nakan ɛsa sok ɛ. Mot nɛ mot djɛ dáa nyɛ aabela ɛ. 12 Yɛ bɛ náá, mot ɛpekwyɛl ɛgwyena sonok nɛ mbɛɛ lyem ɔɔ, Zɛɛb ɛ́ waamyaal ɛkɛɛ ɛ lɛ. Etɛɛ náá, nyɛ djɛ ɛ́ djala nɛ bim nyɛ bela ɛ, ààbɛ dum nɛ sa nyɛ di ààbela ɛ.

13 Ye tok náá, bɛ saŋ ɛ́ ɛwa bin tɔ edjel, étɛp ɛkwyee bot ɛ sis. Tin, yɛ ɛ́ etɛɛ náá, bot djas needi djala. 14 Nenak yak, bi ɛ́ nɛ bɛtɛ nɛ ekum. Tin, bi ɛ́ nɛ ghwyil ɛkwyee bot ɛ di tɔ edjel ɔ. Deenek, dwoo biyɔ aakadi nɛ gwyes sonok ɛ, da bɔɔ ɛ́ di nɛ ekum ɔ, bɛ ɛ́ nɛ ghwyil ɛkazyɛ zɛkwyee bin. Yɛ ɛ́ deenek ɛ́ bi nɛ bɛnɔɔ aakadi djala. 15 Yɛ ɛ́ dáa Ekwyala di elɛɛ ɛ:

«Mot natek ɛbuɛpe ɔ, nyɛ nabɛ ɛ́ ààdi nɛ yɛ dhaa nyel.

Mot natek batsa ɔ, nyɛ nabɛ ɛ́ ààdi tɔ pwom tak✝.»

16 Duu nɛ Zɛɛb, mot nadjɛ Tit bɛtɛ nɛ zii kɔ ɛsu ɛ len, dáa bis di nɛ yɛ nɛ nen ɛ. 17 Tit eemyaal sa bis nawaab nɛ nɛ nɛ zii djas ɛ. Tin, nyɛy nyɛ ɛmet nɛ lyem'ɛ, nyɛ naamyaal ɛsik pɛ daa len sika sis. 18 Bis eedhis Tit bɛ nɛ dhiiti mɔn-nyɛɛg'ena. Mɔn-nyɛɛg'ena yenɔk ɛ́ mot bot ɛbuɛpe tɔ ezɛɛga mendjaala djas di etaŋal, dum nɛ dáa nyɛ di egu ɛgoola Mbɛɛ Bhaadal ɛnyɔɛpe ɛ. 19 Dhiiti mɛsɔ mɛ bis dhis nyɛ ɛ, yɛ ɛ́ náá, bot ɛ zɛɛga mendjaala djas naazesɛ́ɛ nyɛ náá, nyɛ di mot di egyee nɛ nes tɔ mɛdjoŋ mɛ bis di etɔ́ kɛkyeed epata na sɛɛgaa étɛp bot ɛ Yeluzalɛm ɛ. Yɛ bɛ náá, bis nadi esa mɛsa menek ɔɔ, yɛ ɛ́ étɛp Ghɛŋ nyɛy nyɛ ɛmet neebela duu. Deenek ɛ, bis di elyaal mbɛɛ ɛkwosak.

20 Epata bɛ nadjɛ bis ɛ, ye nadi ɛ́ ɛbuɛpe. Tin, bis ɛpebe yɛ ɛnyɔɛpe ekaab náá, bot ɛzɛkɛlii nɛ nes ɛbiyoɛpe náá, bis ààpanyɔ ɛbe yɛ. 21 Bis ɛpekwyɛl ɛsa enɛm esa é mis ɛ Ghɛŋ, dɔɔ nɛ é mis mɛ bot djas.

22 Bis ɛpedhis dhiiti mɔn-nyɛɛg'es étɛp nyɛ neegyee sama nɛ nɔɔ. Bis naadyeebadjɛ nyɛ mɛsa, nyɛ nadi esesa mɛsa mɛ tak djas ɛ́ nɛ zii. Nenak, nyɛ ɛ́ nɛ zii ɛbuɛpe kɔ ɛsu ɛ ɛbwaalel ɛ nyɛ di nɛ yɛ nɛ nen ɛ. 23 Yɛ kabɛ Tit ɔɔ, nyɛ ɛ́ mot bis nɛ nɛ di egyee ɔ. Nyɛ ɛ́ mot bis nɛ nɛ di esa mɛsa mɛ ɛgoola Mbɛɛ Bhaadal étɛp'en ɔ. Yɛ kabɛ bɔn-nyɛɛg bis, bot ɛ di gyee sama nɛ nɛ ɔɔ, bɛ ɛ́ bot ɛ lwoma yii ezɛɛga mendjaala lwom ɔ. Yɛ bɛ náá, bɛ ɛpesa mɛsa menek ɔɔ, bɛ sa ɛ́ étɛp duma ɛ Klisto. 24 Deenek, lyaalka bɛ náá, bi nɛ kwyɛl bɛ nɛ tsɛɛtsɛ. É di'enek ɛ, bot ɛ ezɛɛga mendjaala aagu náá, bis nabɛ ɛ́ nɛ gham ɛghɛɛ mɛnyel kɔ ɛsu ɛ len, é mis mɔɔ.