1 «Beeka dhiiti sa di enɔŋel nɛ Ɛyoŋ ɛ di tɔ gwoo ɛ: Dhiiti kukuma naazɛwyis tɔ ghooghom mɛlem kɛsaa bot étɛp bɛ neekɛsa mɛsa tɔ pyeeb vin’ɛ. 2 Bɛ nɛ bɛnɔɔ zokagwakel náá, efute bɔɔ aadi ɛ́, dáa bot di ezyɛ nɛ ɛfutaa sok ɛ, nɛghu dhenye wat tɔ ɛlu ɛ wat. Tin, nyɛ eezɛlwom bɛ, bɛ kɛsa mɛsa tɔ pyeeb vin’ɛ.

3 Nyɛ eebaazɛwyis é ɛwala etɛn nɛ ená yii mɛlem, wɔ gwaa nyɛ baazɛboma nɛ bɛdhiiti bot metetel kɔ ɛbɛsɛɛ ɛ dɛl, bɔɔ tin, ààbɛ nɛ mɛsa. 4 Nyɛ ɛ́ boozɛke nɛ nɔɔ náá: "Biyɔ pe, tɔ́ka, kɛsaka mɛsa tɔ pyeeb vin’am, mɛ aadjɛ bin efute dáa ye di egoka ɛ." 5 Tin, bot binɔk ɛ́ boozɛnɔɔ mɛnyel, tɔ́.

Bhii tak, kukuma yenɔk naabaazyɛ kuku mwos dwoo dɔɔ nɛ é ɛwala elɛl yii bikoko. Nyɛ nabaazolii ɛ́ dáa nyɛ nazolii nɛ bot ɛsok ɛ. 6 Nyɛ eebaazɛwyis bikoko, dwoo eezesila. Tin, nyɛ ɛ́ boo baazɛboma nɛ yak ɛdhuu ɛ bot. Nyɛ eezɛdji bɛ náá: "Étɛp yé bi di wak, kana mɛlem, kɛyaka nɛ yak ɛwala, ààsa sonok?" 7 Bot binɔk zokazɛbɔɔza nɛ nɛ: "Yɛ ɛ́ etɛɛ náá, bis tok nɛ mɛsa mɛ ɛsa." Bhii tak, nyɛ ɛ́ booke nɛ nɔɔ náá: "Dɔɔ nɛ biyɔ pe, tɔ́ka, kɛsaka mɛsa tɔ pyeeb vin’am."

8 Dáa dwoo nakabɛ, ye moo bikoko ɛ, kukuma pyeeb vin ɛ́ booke nɛ mot nadi kɔ elo e bot ɛ mɛsa mɛ djas ɔ náá: "Djóoa bot ɛ mɛsa, da wɔ ɛ́ djɛ mot nɛ mot efute bɛ. Wɔ kan ɛ́ nɛ bot ɛ nadjóoaa ɛbhis ɔ, da wɔ ɛ́ kɛsilal nɛ bot ɛ́ nakanaa ɛdjóoaa sok ɔ."

9 Tin, bot ɛ nakan mɛsa bikoko ɔ, zokazyɛ, zɛbela yɔbɔ efute e dhenye wat. 10 Dáa bot ɛsok nakazyɛ yɔbɔ ɛ, bɛ nagek tɔ elyem bɔɔ ɛ náá, bɛ waabela efute dhaa bot ɛ nakan bikoko ɔ. Tin, bɛ nazobaadjɛ bɛ ɛ́ efute e dhenye wat. 11 Beea bɛ nabee deenek ɛ́, bɛ ɛ́ boozɛni é byak kukuma pyeeb. 12 Bɔɔ náá: "Bot ɛ kan mɛsa nenak bikoko ɔ, bɛ zosa ɛ́ mɛsa é di ɛwala wat. Tin, wɔ kadjɛ bɛ efute ɛ́ tyee wat nɛ dáa wɔ djɛ bisɔ, bot ɛ kan mɛsa tɔ mɛlem ɔ, si kas-kas gwyes nɛ etuŋ, zɛnɔɔ mɛnyel na wɔyɔŋ ghwyil djas eezesi."

13 Tin, kukuma ɛ́ boobɔɔza nɛ ngɔt pak’ɔɔ náá: "Mɔn-nyaagam, ye tok nɛ ɛbiyo mɛ sa. Tin, mena bɛ ààgwakel náá, wɔ sa mɛsa ɛ étɛp wɔ neebela etuud e dhenye wat, di egoka náá, ye djɛaa nɛ mot sa mɛsa mɛ dwoo wat ɔ, etsal é? 14 Nɔŋa pata yɔ, da wɔ ɛ́ tɔ́ yɔ, etɛɛ náá, mɛ neebaadjɛ nwyak mot kalik’aak dáa mɛ djɛ wɔy ɛ. 15 Mɛ tok nɛ ghwyil ɛbe esa bam dáa lyem’am di ekwyɛl ɛ? Étɛp yé wɔ di ebyen náá, mɛ sa enɛm esa?"»

16 É di’enek, Yezu ɛ́ bookabaazɛpesal náá: «Yɛ aadi ɛ́ deenek, bɛtɛ nɛ bot ɛ́ di bot ɛ ɛbhis ɛ lɔɔg ɔ, bɛ kaswaalaa ɛ́, bot ɛ pɛ sok lɔɔg. Bot ɛ pɛ sok’aak aaswaalaa ɛ́ bot ɛ pɛ bhis lɔɔg.»

17 Dáa Yezu nadi etɔ́ pɛ Yeluzalɛm ɛ, nyɛ naazɛnɔɔ bɛdjekel kam nɛ bɛbá bɔɔ bɛmet. Tin, dáa bɛ nadi ekɛ ze ɛ ze ɛ, nyɛ ɛ́ boozɛlɛɛ bɛdjekel náá: 18 «Gwakeka! Mena ɛpetɔ́ka pɛ Yeluzalɛm pɛ Sɛɛŋɛlɛ Mɔn Mot aakaaa é mɛmbɔ mɛ eboo bɛghaa-Zɛɛb nɛ bɛghaŋ ɛ mɛkana mɛ etsi ɛ, étɛp bɛ needjɛ nyɛ epɛ́ɛ e ɛsyee ɛ. 19 Bhii tak, bɛ waaka nyɛ é mɛmbɔ mɛ bot ɛ di ààbɛ bot ɛ mbyak eYuda ɔ. Bot binɔk ɛ́ waaduk nyɛ, bɛ waabem nyɛ é mɛlaaba, nyuu nyɛ nɛ eghwyɛs, gó nyɛ. Mɛlu mɛlɛl bhis ɛsyee ɛ lɛ, nyɛ waagom.»

20 Wɔ gwaa, mwaa Zɛbɛdɛ zokazyɛ nɛ bɔn bɛ bɛbá zɛbee Yezu. Dáa bɛ nakum é di Yezu nadi ɛ, nyɛ eezɛkwyit mɛboŋ sok bhwoob’ɛ étɛp nyɛ neewaab sonok pɛ daa lɛ. 21 Yezu ɛ́ booke nɛ nɛ náá: «Wɔ saa yé?» Moma tak ɛ́ boozɛbɔɔza nɛ Yezu náá: «Beea bɔn bam bɛbá bak. Mɛ kwyɛl ɛ́, wɔ kɛk mɛ náá, bɛ bela duma di náá, ngɔt di pɛ mbɔ eghɛŋ bɔ, nwyak ngɔt pɛ mbɔ ɛmyɛl ɛ lɔ, é sok waadi tɔ mɛkoozi mɔ ɛ.» 22 Tin, Yezu ɛ́ boozɛbɔɔza náá: «Bi ààgu sa bi di ewaab ɛ. Bi ɛ́ nɛ ghwyil ɛkwak ɛdɛ tɔ bɛɛlɛ mezuk mɛ mɛ aadɛ ɛ?» Bɛ eezɛbɔɔza náá: «Hɛɛɛ! Bis ɛ́ nɛ ghwyil ɛdɛ.» 23 Yezu eezɛke nɛ bɔn bɛ bɛbá náá: «Yɛ ɛ́ tsɛɛtsɛ! Bi ɛ́ waadɛ tɔ bɛɛlɛ mezuk mam. Yɛ kabɛ dum nɛ tɛp ɛdi pɛ mbɔ eghɛŋ bam nɛghu pɛ mbɔ ɛmyɛl ɛ lam ɔɔ, mam tok nɛ ghwyil ɛdjɛ bin edi tak. Etɛɛ náá, Saagam ɛ di egu bot ɛ nyɛ aadjɛ edi binek ɔ.»

24 Dáa bak bɛdjekel kam nalik ɛ, nagwak deenek ɛ́, ye nabɛ ɛ́, ye naakpaa bɛ elyem nɛ sa Zak bɛ nɛ Zaŋ nasa ɛ. 25 Bhii tak, Yezu ɛ́ bookazɛdjóo bɔɔ djas, nyɛ ɛ́ boozɛke nɛ nɔɔ náá: «Bi kabɛ edjak náá, mɛsa mɛ ekukuma e membyak mɛ sis ɛ́ ɛzuk ɛ bot bɔɔ. Mɛsa mɛ bot ɛ di djóoaa eboo bot ɛ bɔs ɔ, yɛ ɛ́ ɛnyal bot ɛ di eduwal bɛ ɔ. 26 Ghuna, yɛ ààgoka nɛ ɛsael deenek pak’en. Ye goka ɛ́ náá, ngɔt pak’en ɛ kwyɛl ɛdi boo-mot ɔɔ, nyɛ di mot-mɛsa mɛ bɛsɔ. 27 É di’enek, mot ɛ kwyɛl ɛdi pɛ sok bɛsɔ ɔɔ, nyɛ di kwom’en. 28 Étɛp tak ɛ di náá, ɛzyɛ ɛ́ Sɛɛŋɛlɛ Mɔn Mot nabɛ ɛ́ ààbɛ, etɛɛ náá, bot neesa nyɛ mɛsa. Nyɛ nazyɛ ɛ, étɛp ɛzɛdi mot-mɛsa mɛ bot, nɛ ɛzɛdjɛ bot tsik’ɛ nyɛ ɛmet tyee etuud étɛp ɛpɛk bɛtɛ nɛ bot.»

29 Bhii bɛ nawyis kɔ dɛl ɛ Yeliko ɛ, zukamwaa nɛ mot naazɛdu Yezu. 30 Tin, bot ɛ edhim bɛbá nadidi é ngwoob gba ɔ, zokagwak menduk náá, Yezu ɛpedhaa tin. Wɔ gwaa, bɛ zɛbo etsim náá: «Ghɛŋ, Mɔn ɛ Dhavid! Geka bis ghoŋ!» 31 Ɛdhuu ɛ bot ɛ nadi edu Yezu ɔ, moo tin ebhɛm bɛ, étɛp bɛ needi gwyem. Wɔ gwaa bɛ zokabaaben ebhyeed bɔɔ ɛlyelɛpe náá: «Ghɛŋ, Mɔn ɛ Dhavid! Geka bis ghoŋ!» 32 É sok’enek, Yezu eezɛtyaa. Wɔ gwaa nyɛ zokadjóo bɛ. Nyɛ eezɛdji bɔɔ bɛbá náá: «Bi kwyɛl náá, mɛ sa bin yé?» 33 Bot binɔk ɛ́ boopesal náá: «Ghɛŋ, bis kwyɛl ɛ́ náá, bis nyaasok.» 34 Tin, Yezu zokazɛgek bɛ ghoŋ. Bhii tak, nyɛ eezɛkɛl bɛ mɛmbɔ kɔ mis. É di tak wat, mis mɔɔ eezɛbɛŋel, tin, bɛ eezɛdu nyɛ.