1 Dhiiti dwoo saba, Yezu nadi edhaa tɔ pyeeb kɔkɔ mbi bhek bhisa di edjóoaa ble ɛ. Tin, wɔ gwaa za zɛbe bɛdjekel bɛ, bɛ moo tin ebɔ́k mɛbhisa mɛ tak étɛp ɛdɛ. 2 Dáa eFalizyɛ nabee deenek ɛ́, bɛ eezɛke nɛ Yezu náá: «Beea, bɛdjekel bɔ ɛpesa esesɛɛ di náá, yɛ ààpadjɛaa bɛ ze dwoo saba ɛ!» 3 Yezu zokazɛbɔɔza nɛ nɔɔ náá: «Bi nabɛ ɛ́ ààlaa sa Dhavid nasa, é sok bɛ nɛ bot ɛ nadi egyee bɛ nɛ bɛnɔɔ nagwak za ɛ? 4 Ye nabɛ ɛ́, bɛ nɛ bot ɛ lɔɔg'ɛ naani tɔ pɛt ɛbhɛŋ ɛ Zɛɛb, bɔɔ zokakɛdɛ emapa ee nakaŋaa Zɛɛb yɛ ɛ. Dhi ye di náá, bɛ nabɛ ɛ́ ààgoka nɛ ɛdɛ emapa é tak. Etɛɛ náá, etsi bina lɛɛ ɛ́ náá, bot ɛ di egoka nɛ ɛdɛ emapa é tak ɔ, yɛ ɛ́ bɛghaa-Zɛɛb bɔɔ bɛmet. 5 Nɛghu bi nabɛ ɛ́ ààlaa tɔ etsi ɛ Moiiz náá, bɛghaa-Zɛɛb di esa mɛsa tɔ Ndjaa-ebuwa dwoo saba ɔ, bɛ ààduwal etsi e saba, bela náá, bɛ tok nɛ ndjɛ kɔ ɛsu ɛ tak. 6 Tin, betka mɛ lɛɛ bin náá, wak, yɛ ɛ́ nɛ sonok wat di edhaa Ndjaa-ebuwa nɛ mɛtaŋ! 7 Bi ɛpedi egu ɛnyɔɛpe ɛsuk ɛ Mɛkpa ɛ Zɛɛb di eke náá: "Mɛ kwyɛl ɛ́ enɛm esa, ààkabɛ ebuwa e bɛtit*" di ekwyɛl ɛlɛɛ ɔɔ, pe bi ààpazyɛ zɛpit bot ɛ di ààgu tɛp ɔ gwyes. 8 Etɛɛ náá, Sɛɛŋɛlɛ Mɔn Mot ɛ́ di kukuma dwoo saba.»

9 Bhii tak, Yezu eezɛdus tin, nyɛ eezɛtɔ́ pɛ ndjaa mendjaala mɛ eYuda. 10 Tɔ ndjaa mendjaala mɛ eYuda tak, ye nabɛ ɛ́ nɛ dhiiti mot ngɔt nadi nɛ sɔɔbela mbɔ ɔ. Ɛkwosak ɛ eFalizyɛ nabɛ ɛ́, Yezu bela ndjɛ é mis mɔɔ. Yɛ ɛ́ étɛp tak ɛ bɛ nadji nyɛ náá: «Etsi bina ɛpemyaal náá, mot tsikaa dwoo saba?» 11 Yezu ɛ́ boozɛbɔɔza nɛ nɔɔ náá: «Yɛ bɛ náá, mot ngɔt pak'en ɛ nɛ sim bhata ngɔt, nyɛ gwak náá, dwoo saba, sim bhata tak eekwyit tɔ guk na dim-dim ɔɔ, nyɛ aanàkwaatɔ́ kɛwyisal nyɛ tɔ guk tak é? 12 Dáa ye di náá, mot eedhaa bhata nɛ mɛtaŋ ɛ, tin, etsi lɛɛ ɛ́ náá, mena saka bot enɛm esa dwoo saba.» 13 Yezu ɛ́ boozɛke nɛ mot nadi nɛ sɔɔbela mbɔ ɔ náá: «Sɛɛba mbɔ'ɔ.» É di tak wat, mbɔ mot'enɔk eezɛbula ɛnyɔɛpe, dáa yak dhiiti mbɔ. 14 Bhii tak, eFalizyɛ ɛ́ boozɛdus tin, tɔ́ yɔbɔ. Wɔ gwaa bɛ kɛsɛɛga é kwan, étɛp ɛdjek dáa bɛ aadjɛ nyɛ epɛ́ɛ e ɛsyee ɛ.

15 Dáa Yezu nagwak deenek ɛ́, nyɛ eezɛdus tin, wɔ gwaa zukamwaa nɛ mot zokadu nyɛ. Wɔ gwaa, nyɛ zokazɛtsik membel djas. 16 Tin, nyɛ eezɛlyak bɛ ɛlyelɛpe náá, bɛ nàsa náá, bot gu mbi mot nyɛ nadi ɛ. 17 Nyɛ nasa deenek ɛ́, etɛɛ náá, etɛp ee ngoolel-Mɛkpa ɛ Zɛɛb Ezayi nalɛɛ ɛ, ye neebela ɛsuk. Ngoolel-Mɛkpa ɛ Zɛɛb Ezayi nalɛɛ ɛ́ náá:

18 «Zɛɛb lɛɛ ɛ́ náá:

"Beea mot-mɛsa mam mɛ nasɛ́ɛ ɔ,

mot mɛ di ekwyɛl ɔ.

Lyem'am ɛ́ tɔ mɛmyaala kɔ ɛsu ɛ lɛ.

Mɛ waawa Sisim'am tɔ lɛ.

Tin, nyɛy ɛ́ aapagoola nɛ bot ɛ membyak djas,

epiki bam mɛ aadhis ɛ.

19 Nyɛ aanàkwaawaya nɛ bot.

Nyɛ aanàkwaabiyo nɛ mot.

Bi aanàkwaagwak gwood'ɛ é gba.

20 Nyɛ aanàkwaabwak-bwakak mɔɔ le ghwaazok

di náá yɛ eezenyaabel ɛ.

Nyɛ aanàkwaadimal mɔɔ ngel lama di esa náá,

ye dim ɛ.

Nyɛ aasa deenek,

kɛkum dwoo epiki bɛ aanyen é mis mɛ bot ɛ.

21 Tin, bot djas di ààbɛ bot ɛ mbyak eYuda ɔ,

bɛ waawa ɛbwaalel ɛ lɔɔ kɔ lɛ*."»

22 Wɔ gwaa, bɛ zokazyɛ Yezu nɛ dhiiti mot, mot tak nadi ɛ́ bubu nɛ ɛbɛ́ ɛ edhim. Yɛ ɛ́ embee esisim ɛ nasa mot tak deenek. Tin, Yezu eezɛtsik mot tak, nyɛ moo tin elii nɛ ɛnyaasok. 23 Mɛdhuu mɛ bot ɛ nadi tin ɔ, naadyeebadjoka. Bɛ moo tin eke náá: «Wɔ ke ɛ́, nwyak tok Mɔn ɛ Dhavid é?» 24 Dáa eFalizyɛ nagwak bot binɔk elii ɛ, bɛ boozɛke náá: «Mot tak sɔ embee esisim ɛ́ etɛɛ náá, Bɛlzebul kukuma embee esisim ɛ di edjɛ nyɛ kɔkɔ yak mbi mɛbwala mɛ nyɛ di esɔ embee esisim nɛ yɛ ɛ.» 25 É di'enek, Yezu nadi egu egeka e elyem bɔɔ, nyɛ boozɛlɛɛ nɛ nɔɔ náá: «Ɛyoŋ ɛ di náá, mɛsa mɛ bot ɛ tak ɛ mɛwɔ nɛ edho pak'ɔɔ ɔ, ɛsik ɛyoŋ ɛ tak ɛ́ ɛbel nɛ ɛwaazel. Bot tɔ ghaada wat nɛghu bot ɛ mɛbyel mɛ wat ɛ di nɛ mɛwɔ nɛ etuub pak'ɔɔ ɔ, yenek mɛbyel nɛ yenek ghaada aanàkwaapyet ɛnyɔɛpe. 26 Yɛ bɛ náá, Satan moo sɔ sa di náá, yɛ ɛ́ yɛ Satan ɔɔ, bi ààbee náá, Satan kaduu tuub ɛ, bɛ nɛ nyel'ɛ met é? Tin, ɛyoŋ ɛ lɛ aakapyet dáa?

27 Yɛ bɛ náá, mɛ sɔ embee esisim ɛ́ nɛ ghwyil ɛ Bɛlzebul ɔɔ, ɛzɛ di edjɛ bot bin ghwyil bɛ di esɔ embee esisim nɛ yɛ ɛ? Mɛ bee ɛ́ náá, yɛ ɛ́ bɔɔ bɛnakuma tak ɛ paalyaal bin náá, bi tok nɛ gham. 28 Sa di tsɛɛtsɛ ɛ́ náá, mɛ sɔ embee esisim ɛ́ nɛ ghwyil ɛ Zɛɛb. Yenek djas kwyɛl ɛlɛɛ ɛ́ náá, Ɛyoŋ ɛ Zɛɛb moo ɛ́ wak nɛ nen é di wat.

29 Ye tok nɛ mot di nɛ ghwyil ɛni tɔ ndjaa mot mɛnyan, da nyɛ ɛ́ nɔɔ esa e ndjaa mot tak, nyɛ di ààkɔl nyɛ mɛmbɔ nɛ mɛko ɔɔ. Yɛ ɛ́ bhis ɛkɔl nyɛ ɛ, nyɛ aakabela ghwyil ɛnɔɔ esa e ndjaŋ'ɛ djas, da nyɛ ɛ́ wyis, tɔ́ nɛ yɛ. 30 Mot di ààdi pɛ yam kyee ɔ, ye lɛɛ ɛ́ náá, mot tak ɛ́ mot di ebhina mɛ ɔ. Tin, mot di ààkwyee mɛ é ɛsɛɛg ɛ́ bot ɔ, nyɛ waaz ɛ́ waazak. 31 Yɛ ɛ́ étɛp tak ɛ mɛ di elɛɛ bin náá, mɛ ɛ́ nɛ ghwyil ɛpel mesyem mɛ bot djas, ye nakoozodi ebyas nɛ embee esesɛɛ bɛ nasa Zɛɛb ɛ. Yɛ kabɛ náá, mot eebyasal Sisim na Dɛɛ ɔɔ, nyɛ aanàkwaapelaa. 32 Mot ɛ lii ɛbiyoɛpe nɛ Sɛɛŋɛlɛ Mɔn Mot ɔɔ, mesyem mɛ ɛ́ nɛ ghwyil ɛpelaa. Tin, mot ɛ lii ɛbiyoɛpe nɛ Sisim na Dɛɛ ɔɔ, mesyem mɛ aanàkwaapelaa tɔ tsik mena dika mos'aak nɛghu tsik ɛbhis.»

33 «Étɛp wɔ neebela mbɛɛ bhum, ye goka ɛ́, le pookokan ɛdi sok mbɛɛ le. Etɛɛ náá, le ɛ di nɛ ɛbɛ́ ɔɔ, bhum tak aabaazodi ɛ́ mɛbɛ́ nɛ mɛbɛ́, etɛɛ náá, le gwyakaa ɛ́ nɛ bhum di ekwyil é tak ɛ. 34 Mbyak mɛgel! Bi aakwak ɛlii embɛɛ etɛp dáa, bela náá bi ɛ́ bɛmbee ɛ bot? Etɛɛ náá, nuub dyeebawyisal ɛ́ etɛp ee zelwood tɔ lyem ɛ. 35 Mbɛɛ mot nɔɔ etɛtɛ etɛp ee nyɛ di elii ɛ́ tɔ ɛkwom ɛ embɛɛ esesɛɛ bɛ. Tyee wat nɛ mbee mot, nyɛ nɔɔ embee etɛp ee nyɛ di elii ɛ, tɔ ɛkwom ɛ embee esesɛɛ bɛ. 36 Betka mɛ lɛɛ bin, sa di tsɛɛtsɛ ɛ́ náá, dwoo Zɛɛb aazɛpɛ́ɛ bot ɛ, bot ɛ́ waatyaa sok bhwoob bɛtetɛp étɛp mɛlee mɛ bɛ nadi elee bot ɛ. 37 Etɛɛ náá, yɛ ɛ́ kɔ mɛkpa mɔ met ɛ wɔ aabela gham nɛghu ɛkwyɛ ndjɛ sɔs é mis ɛ Zɛɛb.»

38 É di'enek, bɛdhiiti bɛghaŋ ɛ mɛkana mɛ etsi nɛ eFalizyɛ zokazɛdji Yezu náá: «Lyoel! Bis kwyɛl ɛ́ náá, wɔ lyaal bis dhiiti ndem mɛbwala.» 39 Yezu ɛ́ boozɛbɔɔza nɛ nɔɔ náá: «Étɛp yé di náá, bot ɛ di ewaab mos dhiiti ndem mɛbwala pɛ daa Zɛɛb ɔ, yɛ ɛ́ bɛmbee ɛ bot, bot ɛ di ààbɛ sosoob é mis ɛ Zɛɛb ɔ? Tin, Zɛɛb aazolyaal bɛ ɛ́ ndem wat. Yɛ aadi ɛ́ kɔkɔ mbi ndem ngoolel-Mɛkpa ɛ Zɛɛb Zonas nabee ɛ. 40 Yɛ ɛ́ tyee wat nɛ dáa ngoolel-Mɛkpa ɛ Zɛɛb Zonas nakpaa emwos elɛl nɛ epum elɛl tɔ mɔ boo su ɛ. Sɛɛŋɛlɛ Mɔn Mot aabaasa ɛ́ emwos elɛl nɛ epum elɛl tɔ bɔs. 41 Dwoo Zɛɛb aazɛpɛ́ɛ bot ɛ, bot ɛ ghaada Niniv ɛ́ waazyɛ, zɛtyaa sok bhwoob bot ɛ kɔkɔ mɛbyel mɛ di kɔ bɔs mos'aak étɛp ɛpit bɛ. Deenek, nyɛ waazɛkwyesal bɛ ndjɛ sɔs. Etɛɛ náá, bot ɛ ghaada Niniv naaliig elyem bɔɔ, bhii bɛ nazegwak mɛlyo ɛ Zonas ɛ. Ghuna yii di wak ɛ yɛ eedhaa-dhaŋak yɛ Zonas. 42 Dwoo Zɛɛb aazɛpɛ́ɛ bot ɛ, mɛkoozi mɛ moma mɛl mɛ di pɛ kyɛ bɔs ɛ́ waazyɛ, zɛtyaa sok bhwoob bot ɛ kɔkɔ mɛbyel mɛ di kɔ bɔs mos'aak étɛp ɛpit bɛ, deenek, nyɛ neekwyesal bɛ ndjɛ sɔs. Etɛɛ náá, nyɛ nadus ɛ́ pɛ edum e bɔs, étɛp ɛzɛgwak mbɛɛ mɛlyo mɛ etsoŋ e mɛkoozi Salomɔŋ. Ye nyɔ ɛ́, bi gu náá, mot di nenak wak'aak, nyɛ eedhaa Salomɔŋ!»

43 «É sok mbee sisim di ewyis tɔ nyel mot ɛ, nyɛ katɔ́ ɛ́ pɛ kyee dik bɛsyɛ di ààbɛ nɛ mɛdii ɛ, kɛsaa di nyɛ aakɛdi ɛ. É di nyɛ aakadi ààbela di nyɛ aadi ɔ, 44 nyɛ kake ɛ́ náá: "Mɛ pookosik pɛ ndjaŋ'am, ndjaa mɛ nawyis tɔ tak sok ɛ." Tin, sika nyɛ aakasik ɛ, nyɛ aabela ndjaa tak ɛ́ toto, bɛ eezewaabal nɛ ɛkoobal yɛ. 45 Tin, nyɛ katɔ́ ɛ́ kɛnɔɔ edhiiti embee esisim bɛ na nyan-nyan bɛtɛn nɛ bɛbá di edhaa nyɛ nɛ embee mɛsa ɔ. Tin, bɔɔ djas kabula ɛ́ tɔ ndjaa tak, da be di tin. Deenek, tsik yenɔk mot eezɛpulel dhaa-dhaŋak yii nabɛ sok ɛ. Yɛ aadi ɛ́ deenek étɛp bɛmbee ɛ bot di mos'aak.»

46 Yezu dinaa kuku ɛlii nɛ mɛdhuu mɛ bot, wɔ gwaa bɔn-nyɛɛg nɛ nyɛɛg zɛkum é di nyɛ nadi ɔ. Bɛ eezɛtyaa pɛ kel. Tin, bɛ nadi ekwyɛl ɛlii nɛ nɛ. 47 Dhiiti mot ɛ́ boozɛlɛɛ Yezu náá: «Beea, nyoog nɛ bɔn-nyoog ɛ́ pɛ kel, bɛ ɛpekwyɛl ɛlii nɛ nɔ.» 48 Yezu ɛ́ boozɛbɔɔza nɛ mot'enɔk náá: «Nyaagam ɛ́ zɛ, bɔn-nyaagam kadi bɛzɛ?» 49 Bhii tak, nyɛ eezɛlyo bɛdjekel bɛ nɛ djin. Nyɛy náá: «Beeka nyaagam, nɛ bɔn-nyaagam di wak é! 50 Etɛɛ náá, yɛ ɛ́ mot di esa ɛkwosak ɛ Saagam di tɔ gwoo ɔ, di mɔn-nyaagam, kɛl'am nɛ nyaagam.»