1 «Sa bi ààpɛ́ɛ bot, deenek Zɛɛb aanàkwaapɛ́ɛ bin. 2 Etɛɛ náá, Zɛɛb aapɛ́ɛ bin ɛ dáa bi di epɛ́ɛ bɛsɔ bin ɛ. Nyɛ aalwoodal bhwaŋ'en ɛ dáa bi di elwoodal bhwaa bɛsɔ bin ɛ. 3 Étɛp yé wɔ gwyák kwyɛɛzyoŋ di tɔ dis ɛ mɔn-nyoog, wɔ kadi ɛ́ ààbee pɛk le di tɔ dis ɛ lɔ ɛ? 4 Wɔ aanàkwaake nɛ sɔ'ɔ mot náá: "Mɔn-nyaagam, beta mɛ dis mɔɔ kwyɛɛzyoŋ tɔ dis ɛ lɔ," dhi wɔy ààbɛ ebee pɛk le di tɔ yɔ dis ɛ. 5 Wɔy mot mɛdjhaaz pɛ ɛko, bhimis pɛ si, pookodis sok pɛk le tɔ dis ɛ lɔ! Bhii tak ɛ wɔ waanyaasok, étɛp wɔ needis kwyɛɛzyoŋ di tɔ dis ɛ mɔn-nyoog ɛ.

6 Nàdjɛka esa ee di dɛɛ ɛ nɛ bɛbhyɛ, ekaab náá, bɛ ɛ́ zɛkɛbula zɛduma wɔ é nyel nɛ mɛkwaala. Nàmwaska mɛvunga sok bhwoob bɛghwyee, ekaab náá, bɛ ɛ́ zɛkɛnyal yɛ.»

7 «Waabka, bi ɛ́ waadjɛaa, saaka, bi ɛ́ waabela, diigka ɛbɛ ɛ ndjaa, bɛ waadii bin yɛ ɛ. 8 Yɛ ɛ́ deenek, mot ɛ waab sonok ɔɔ, nyɛ waadjɛaa. Mot ɛ saa sonok ɔɔ, nyɛ waabela. Mot ɛ diig ɛbɛ ɛ ndjaŋ ɔɔ, bɛ waadii nyɛ yɛ ɛ. 9 Yɛ ɛ́ nɛ mot ngɔt pak'en di nɛ ghwyil ɛdjɛ mɔn'ɛ ɛkok bela náá, mɔn waab nyɛ ɛ́ mapa? 10 Nɛghu ɛzɛ di nɛ ghwyil ɛdjɛ mɔn nyɔ*, yɛ bɛ náá, mɔn waab ɛ́ su ɔɔ? 11 Kwyii biyɔ, bɛmbee ɛ bot bi di ɛ, bi nɛ gu ɛdjɛ embɛɛ esonok nɛ bɔn bin, gwyata nɛ Sɛɛg'en di tɔ gwoo ɔ, nyɛ aanàdjɛ embɛɛ esonok nɛ mot aawaab ɔ!

12 Kanka ɛsa sok nɛ bɛsɔ bin esesɛɛ bi di ekwyɛl náá, bot sa bin yɛ ɛ. Yɛ ɛ́ deenek ɛ́ mɛkana mɛ etsi e Moiiz nɛ yii bɛngoolel ɛ Mɛkpa ɛ Zɛɛb di elyo.»

13 «Nika tɔ ɛbɛ ɛ ndjaa na maad-maad. Etɛɛ náá, ze di eniigal bot pɛ dɛl ɛ bot ɛ zewo ze ɔ, yɛ ààkɔɔla, ɛbɛ ɛ tak nɛ bɔk. Bɛtɛ nɛ bot dyeebakwyɛl ɛdhaŋ ɛ́ penek. 14 Tin, guka náá, ɛbɛ ɛ ndjaa tak nɛ maad, bela náá, ze di edul bot pɛ ze tsik ɛ, ye nɛ pata. Yɛ ɛ étɛp tak ɛ bot ɛbuɛpe di ààdyeebadu yɛ.»

15 «Dika nɛ etsoŋ nɛ bɛngoolel ɛ Mɛkpa ɛ Zɛɛb yii mɛkɔŋ. Bɛ zyɛ pɛ daa len ɛ́, nɛ ɛzaaba dáa mɔn bhata, ghuna bɛ ɛ́ eben, bɛ zosyel ɛ mya mɔɔ. 16 Bi aagu bɛngoolel ɛ Mɛkpa ɛ Zɛɛb yii mɛkɔŋ tak ɛ́ nɛ mɛfulu mɔɔ. Etɛɛ náá, bum le vin ààbɔ́kaa tɔ mɛkpak mɛ mɛgɔk nɛghu bum fiigh kɔ le mɛgɔk. 17 Etɛɛ náá, mbɛɛ le zodjɛ ɛ́ mbɛɛ bhum. Mbee le kadjɛ ɛ́ mbee bhum. 18 Mbɛɛ le tok nɛ ghwyil ɛdjɛ mbee bhum. Tyee wat nɛ mbee le, ye tok nɛ ghwyil djɛ mbɛɛ bhum. 19 Ele djas di ààdjɛ bhum ɛ, ye goka ɛ́ nɛ ɛkwyalaa, bhii tak da yɛ ɛ́ mwasaa tɔ du. 20 Deenek, bi aagu bɛngoolel ɛ Mɛkpa ɛ Zɛɛb yii mɛkɔŋ ɛ́ nɛ embee mɛfulu mɔɔ.»

21 «Ye tok bot djas di djóo mɛ: "Ghɛŋ, Ghɛŋ!" ɔ, paani tɔ Ɛyoŋ ɛ di tɔ gwoo ɔ. Bot aani ɔ, yɛ ɛ́ bot ɛ di esa ɛkwosak ɛ Saagam di tɔ gwoo ɔ. 22 É dwoo epɛ́ɛ, bot ɛbuɛpe ɛ́ waake nɛ nam náá: "Ghɛŋ, Ghɛŋ", yɛ ɛ́ nɛ din ɛ lɔ ɛ bis nadi bɛngoolel ɛ Mɛkpa ɛ Zɛɛb! Etsal é? Yɛ ɛ́ nɛ din ɛ lɔ ɛ bis nadi esesɔ embee esisim! Etsal é? Yɛ ɛ́ nɛ din ɛ lɔ ɛ bis nasa bɛtɛ nɛ endem e mɛbwala! Etsal é? 23 Tin, mɛ waalɛɛ nɛ nɔɔ é mis mɛ bot náá: "Mɛ nabɛ ɛ́ ààgu bin. Duska é mis mam, tɔ́ka ɛtsetaɛpe nɛ nam, biyɔ, bot ɛ di esa embee esesɛɛ ɔ!"»

24 «Deenek, mot ɛ gwak etɛp ee mɛ di elii wak, da nyɛ ɛ́ kɛ tyee tak ɔɔ, nyɛ ɛ́ mot etsoŋ di esum ndjaŋ'ɛ kɔ ɛkok ɔ. 25 Bhi ɛ zɛnee ɛbuɛpe, tyee bhyoŋ natuula nɛ ghuu na lyel-lyel ɔ, yɛ nyuŋa é ndjaŋ'enek ɔɔ, yɛ aanàbik, etɛɛ náá, ndjaa tak nasumel ɛ́, ɛnyɔɛpe kɔ ɛkok. 26 Tin, mot di egwak mɛkpa mam, da nyɛ kadi ɛ́, ààkɛ tyee mɛkpa mɛ tak di elɛɛ ɔɔ, nyɛ ɛ́ dáa ndjemet mot di esum ndjaa kɔ bɔs bɛsyɛ, ààwyɛl epap kɔ ɛkok ɔ. 27 Tin, bhi ɛ kanee ɛbuɛpe ɔɔ, da bhyoŋ ɛ desal mɛdhii ɔɔ, ghuu na lyel-lyel ɛ zɛnyuŋa é epap e ndjaŋ'enek ɔ, epap e tak ɛ waabik syɛɛɛ é di tak wat.»

28 Dáa Yezu nasilal ɛlyo bɛmɛlyo mɛ ɛ, mɛdhuu mɛ bot naadyeebadjoka dáa nyɛ nadi elelyo bot ɛ. 29 Etɛɛ náá, nyɛ nabɛ ɛ́ ààlelyo bot dáa bɛghaŋ ɛ mɛkana mɛ etsi nalelyo ɛ, nyɛ nalelyo ɛ́, nɛ eghɛŋ e Zɛɛb.