1 Dáa bɛ nadi, bɛ moo ekunaa nɛ Yeluzalɛm ɛ, bɛ moo é ngwoob dɛl ɛ bɛ di edjóo Bhɛtfaze, pɛ ɛtsok ɛ pyeeb oliv ɛ, Yezu eezɛlwom bɛdjekel bɛ bɛbá: 2 Nyɛy nɛ nɔɔ náá: «Tɔ́ka kɔ dɛl ɛ di pɛ sok'enek. Tuula bi aatuula kɔ dɛl ɛ tak ɛ, bi ɛ́ waabela myɛl mɔɔ yaaga di edjóoaa an ɛ nɛ mɔɔ swooz tak kɔla é di wat. Tiika bɛ, da bi ɛ́ zyɛ mɛ nɛ nɔɔ wak.

3 Mot ɛ dji bin náá: "Bi tɔ́ nɛ nɔɔ wo" ɔɔ, lɛɛka nyɛ náá: "Yɛ ɛ́ Ghɛŋ ɛ di nɛ gwyes nɛ nɔɔ." Tin, bɛ waaleedjɛ bin bak.»

4 Esesɛɛ binek goka nɛ ɛsael, etɛɛ náá, etɛp ee di kwyala tɔ mɛkana mɛ ngoolel-Mɛkpa ɛ Zɛɛb ɛ neebela ɛsuk:

5 «Lɛɛka nɛ ɛsyes ɛ ghaada Siyɔŋ náá:

"Beea, mɛkoozi mɔ ɛpezyɛ pɛ daa lɔ.

Nyɛ zyɛ ɛ́ nɛ enɛm esa,

nyɛ ɛ́ ndiindel kɔ myɛl an.

Nyɛ zyɛ ɛ́ ààbɛ nɛ ɛbet,

nyɛ ɛ́ ndiindel kɔ swooz an,

nyɛ ɛ́ ndiindel kɔ mɔɔ myɛl an*."»

6 Bhii tak, bɛdjekel eezɛtɔ́. Dáa bɛ nakakum é di tak ɛ, bɛ ɛ́ boozɛsa tyee Yezu nalɛɛ bɛ ɛ. 7 Wɔ gwaa, bɛ zɛsik nɛ myɛl an, nɛ swooz an tak Yezu nawaab ɛ. Bɛ moo tin ezɛkɛl bɛ endjookuwa bɔɔ kɔ ekoŋ. Bhii tak, Yezu eezɛdisi kɔ lɔɔ.Myɛl an nɛ mɔɔ swooz an 8 É di tak wat, bot ɛbuɛpe naabaazɛdja yɔbɔ endjookuwa gba-gba, bɛdhiiti nadi etsaal yɔbɔ ɛ́, ebhuuz e le étɛp ɛdja é gba. 9 Ngoŋ bot ɛ nadi ekɛ pɛ sok ɔ, nɛ bot ɛ nakabɛ pɛ bhis ɔ, moo tin ekyeeb: «Hozana nɛ Mɔn Dhavid! Duu nɛ Zɛɛb! Zɛɛb goka ɛ́ nɛ ɛsɛɛ mot di ezyɛ nɛ din ɛ Ghɛŋ ɔ mbɛɛ mɛtel! Hozana nɛ Zɛɛb pɛ tɔ gwoo!»

10 Dáa Yezu nakani tɔ Yeluzalɛm ɛ, bot djas kɔ dɛl nabɛ ɛ́, bɛ moo nyaa-nyaa, bɛ ɛ́ boozɛdji: «Yenɔk ɛ́ nwyaa mot?» 11 Mɛdhuu mɛ bot nadi ebɔɔza náá: «Yɛ ɛ́ ngoolel-Mɛkpa ɛ Zɛɛb, Yezu mot dɛl Nazalɛt pɛ kyee dik Ghalile.»

12 Bhii tak, Yezu naazɛni tɔ kok Ndjaa-ebuwa. Deenek, nyɛ moo tin é sɔ bot ɛ nadi ebɔmsa esesɛɛ bɔɔ ɔ, nɛ bot ɛ nadi ebaabɔm-bɔmak nadi tin ɔ. Nyɛ naawaaz emesa ee bɛ nadi eswoola epata kɔ tak ɛ, nɛ mɛbhóó mɛ bot ɛ nadi ebɔmsa mɛghum ɔ. 13 Bhii tak, Yezu eezɛbaakaada bɛ náá: «Yɛ ɛ́ kwyala tɔ Mɛkpa ɛ Zɛɛb náá: "Ndjaŋ'am aadjóoaa ɛ́, ndjaa mendjaala" Mɛ bee ɛ́ ɛkɛɛ, biyɔ, bi eezeliig yɛ, ye moo ɛ́ zɛɛga bot ɛ djii*.»

14 É di tak wat, bot ɛ nadi nɛ edhim ɔ, nɛ bot ɛ edjam, naazyɛ pɛ daa Yezu tɔ kok Ndjaa-ebuwa, nyɛy zokatsik bɛ. 15 Tin, bɛghaŋ ɛ mɛkana mɛ etsi nɛ eboo bɛghaa-Zɛɛb naazɛkpaa elyem, é ghɛŋ bɛ nabee esesɛɛ binek djas Yezu nasa ɛ. Nɛ dáa bɔɔ dhyeeb nadi etsim tɔ Ndjaa-ebuwa náá: «Duu nɛ Mɔn Dhavid» ɛ! 16 Bot binɔk ɛ́ boozɛdji Yezu náá: «Wɔ ɛpegwak dáa bɔɔ dhyeeb di eke'enek é?» Yezu eezɛbɔɔza nɛ nɔɔ náá: «Iyooo! Mɛ ɛpegwak. Bi nabɛ ɛ́ ààlaa tɔ Mɛkana ɛ Zɛɛb é di nakwyalaa náá: "Tɔ enuub e bɔɔ dhyeeb nɛ bɔɔ etɔlɔɔ, wɔ eelyaal dáa bis di egoka nɛ ɛduwal wɔ ɛ*"?» 17 Bhii tak, nyɛ eezɛwyis, tɔ́ pɛ dɛl ɛ Bhetani, pɛ bɛ nakɛdjaasi ɛ.

18 Yak mɛlem, é ghɛŋ bɛ nadi esik pɛ boo dɛl ɛ, wɔ gwaa za zɛmɛt Yezu. 19 Nyɛ eezɛbee le fiigh é ngwoob gba. Tin, Yezu eezɛtiila si le tak étɛp nyɛ neebɔ́k bhum. Dáa nyɛ nakakum si le ɛ, nyɛ kabela ɛ́ eka nɛ eka, ààbɛ nɛ bhum. É di'enek, Yezu ɛ́ booke nɛ le tak náá: «Kana dwoo pan mos'ak, wɔ aanàkwaakabaawum!» É di tak wat, wɔ gwaa le syee. 20 Dáa bɛdjekel nabee deenek ɛ, ye nabɛ ɛ́, bɛ naadyeebadjoka, bɛ ɛ́ boozɛdji Yezu náá: «Étɛp yé le fiigh zosyee é di wat deenek?» 21 Yezu eezɛbɔɔza nɛ bɛdjekel bɛ náá: «Mɛ lɛɛ bin ɛ́ etɛp e tsɛɛtsɛ náá: Bi ɛ di edum koŋ nɛ Zɛɛb ɔɔ, bi di ààsa mɛso ɔɔ, bi ɛ́ nɛ ghwyil ɛsa esa e mɛbwala dhaa yii mɛ sa nɛ le fiigh'aak. Mɛ lɛɛ bin ɛ́ náá, mot ɛ ke nɛ ɛtsok ɛlak: "Ghɛɛa nyel tin, dusa, kɛghaaga tɔ dii mɛsɔn" ɔɔ, yɛ ɛpesael. 22 Bi ɛ dum koŋ nɛ Zɛɛb ɔɔ, esesɛɛ djas bi aawaab tɔ mendjaala ɛ, Zɛɛb ɛ́ waadjɛ bin.»

23 Bhii tak, Yezu eezɛni tɔ kok Ndjaa-ebuwa, nyɛ moo tin elyo bot Mɛkpa ɛ Zɛɛb. Eboo bɛghaa-Zɛɛb, nɛ bɛpaa ɛ eYuda zokazyɛ pɛ daa lɛ, zɛdji nyɛ náá: «Kɔ eghɛŋ e zɛ wɔ di esa esesɛɛ binek? Ɛzɛ nadjɛ wɔ eghɛŋ e ɛsa deenek?» 24 Yezu eezɛbɔɔza nɛ nɔɔ náá: «Bwoodka, mɛ pookodji bin kiya wat. Bi ɛ bɔɔza mɛ ɔɔ, yɛ ɛ́ mɛ aakalɛɛ bin kɔ eghɛŋ e zɛ mɛ di esa esesɛɛ bak. 25 Yɛ ɛ́ ɛzɛ nadhis Zaŋ, nyɛ zɛduu bot Zɛɛb? Ye nabɛ ɛ́ Zɛɛb ohoo, ye nabɛ ɛ́ mot?» É di'enek, bɛ moo tin esɔs pak'ɔɔ. Bɔɔ náá: «Mena ɛ keka nenak náá: "Yɛ ɛ́ Zɛɛb" ɔɔ, nyɛ waadji mena náá: "Étɛp yé bi nadi ààmyaal Zaŋ?" 26 Mena ɛ kakeka nenak náá: "Yɛ ɛ́ bot ɛ nadhis nyɛ" ɔɔ, ye goka ɛ́ náá, mena kaab ɛdhuu ɛ bot, etɛɛ náá, bɛ dyeebake ɛ́ náá, Zaŋ nabɛ ɛ́ ngoolel-Mɛkpa ɛ Zɛɛb.» 27 Bɛ ɛ́ boozɛbɔɔza nɛ Yezu náá: «Bis ààgu.» Tin, Yezu ɛ́ boozɛbɔɔza nɛ nɔɔ náá: «Dɔɔ nɛ mam pe, mɛ aanàkwaalɛɛ bin kɔ eghɛŋ e zɛ mɛ di esa esesɛɛ bak.»

28 Yezu eebaazɛke nɛ nɔɔ náá: «Kana yak kwyɛl ɛlɛɛ bin yé? Motom ngɔt nabɛ ɛ́ nɛ bɔn bɛbá. Nyɛ eezɛke nɛ yii mɛgwyak náá: "Mɔn'am, é dwoo lak mos, tɔ́ kɛsa mɛsa tɔ pyeeb vin'am." 29 Nyɛ eezɛbɔɔza nɛ sɛɛg: "Hooo, mɛ aanàkwaatɔ́." Ba ɛwala eezɛdhaa bhii tak, mɔn'enɔk eezɛdjɛ lyem mɛbɛ, tin, nyɛ eezɛnɔɔ nyel, tɔ́ pɛ pyeeb vin sɛɛg nalwom nyɛ ɛ. 30 Wɔ gwaa, sɛɛg'ɔɔ baazɛlwom nwyak dhiiti mɔn. Mɔn tak eezɛmyaal: "Iyooo, ghɛŋ mɛ waatɔ́." Bhii tak, nyɛ kadi ɛ́, ààtɔ́. 31 Tin, tɔ bɔn binɔk bɛbá, ɛzɛ looba dum nɛ lwomel sɛɛg'ɔɔ?» Bɛ eezɛbɔɔza nɛ Yezu náá: «Yɛ ɛ́ mɔn mɛgwyak.» Tin, Yezu ɛ́ boozɛke nɛ nɔɔ náá: «Mɛ lɛɛ bin ɛ́ etɛp e tsɛɛtsɛ náá, bɛnɔŋel ɛ epata e lapo nɛ boa ɛ mɛzɔ ɛ́ waaleeni tɔ Ɛyoŋ ɛ Zɛɛb ɛsok nɛ nen. 32 Etɛɛ náá, Zaŋ Nduuel-bot nazyɛ ɛ́ zɛlyaal bin ze epiki, bi nabɛ ɛ́ ààmyaal nyɛ. Tin, bɛnɔŋel ɛ epata e lapo nɛ boa ɛ mɛzɔ naamyaal nyɛ. Bela náá, dáa bi naabee yɛ ɛ, bi nabɛ ɛ́ ààliig elyem bin, bi ààpakomyaal-myaalak nyɛ.»

33 «Gwakeka dhiiti kana. Mot ngɔt naabɛ pyeeb vin. Nyɛ eezɛpeeb pyeeb tak, pu guk tɔ ɛkok é di bɛ aadi esyal mɛdii mɛ bhum tak ɔ, baasum ndjaa, étɛp bot aadi ebaal pyeeb ɔ. É di tak, nyɛ eezɛdjɛ bot ɛ di egu mɛsa mɛ vin ɔ étɛp bɛ neesa mɛsa tɔ tak. Nyɛ eezɛnɔɔ nyel, tɔ́ mɛdjoŋ. 34 Tin, mbu epyeeb e tak di ewum ɛ, yɛ eezɛkum. Wɔ gwaa, nakuma pyeeb zokazɛlwom bot ɛ mɛsa mɛ pɛ daa bot ɛ nyɛ nalik bɛ nɛ pyeeb ɔ, étɛp bɛ needjɛ nyɛ yɛ pak vin bɛ bela ɛ. 35 Wɔ gwaa, bot ɛ nalik nɛ pyeeb ɔ, zokazɛmɛt bɛ, bɛ eezɛduma ngɔt é nyel nɛ mɛbin, bɛ eenɔɔ nwyak gó nyɛ, zɛnɔɔ nwyak tak, bɛ eezɛwus nyɛ nɛ mɛkok, gó nyɛ. 36 Bhii tak, nakuma pyeeb ɛ́ boozɛkyeed bot-mɛsa ɛbuɛpe dhaa bot ɛ mɛsa mɛ nyɛ nalwom sok ɔ pɛ pyeeb tak, bɛ nabaazosa nɛ nɔɔ ɛ́ deenek. 37 Bhii tak, nyɛ ɛ́ boozɛlwom mɔn'ɛ met. Nyɛ nabɛ ɛ́ nɛ geka náá: "Bot binɔk ɛ́ waamyaal nyɛ nɛ ɛdjɛ nyɛ duu, etɛɛ náá, yɛ ɛ́ mɔn'ɛ met." 38 Dáa bot ɛ di esa mɛsa tɔ pyeeb'ɛ nabee mɔn'enɔk ɛ, bɔɔ náá: "Yaweee! Beeka mot aalik nɛ mɛvu mak djas ɔ! Djhookɛgóka nyɛ. Tin, mɛvu mak aakadi ɛ́, yenabɛlka." 39 Wɔ gwaa, bɛ zɛmɛt nyɛ, mwas nyɛ bhii pyeeb vin, bɛ eezɛgó nyɛ.»

40 Yezu ɛ́ boozɛdji bɛ náá: «É di'enek, é sok nakuma pyeeb vin aakazyɛ ɛ, nyɛ goka nɛ ɛsa bot binɔk dáa?» 41 Yala yɔbɔ kabɛ ɛ́ náá: «Ye goka ɛ́, nakuma pyeeb gó bot ɛ nadi esa mɛsa tɔ pyeeb vin'ɛ ɔ, ààgek bɛ ghoŋ. Bhii tak, da nyɛ ɛ́ nɔɔ pyeeb'ɛ, djɛ nɛ bot ɛ sis, bot aazɛdjɛ nyɛ yɛ pak ɛkɛɛ é ɛwala di egoka nɛ ɛdjɛaa nyɛ ɛ.»

42 É di'enek, Yezu ɛ́ booke nɛ nɔɔ náá: «Bi dinaa ààpalaa mɛkpa mak tɔ Ekwyala e Zɛɛb é?

"Ɛkok ɛ bɛsumel mwas ɛ,

ye moo ɛ́ ɛkok ɛ di epyet ndjaŋ ɛ.

Yɛ ɛ́ nɛ ghwyil ɛ Ghɛŋ ɛ nyɛ moo deenek. Ye tok tin mbyok é mis menaka*!"»

43 Yezu eebaazɛkɛl náá: «Mɛ lɛɛ bin ɛ́ náá, bi ɛ́ waadɛkaa Ɛyoŋ ɛ Zɛɛb, étɛp ye needjɛaa nɛ bot ɛ mbyak aadi edjɛ bhum ɔ. [44 Mot aaduma kɔ ɛkok ɛ tak ɔ, nyɛ waabik ekyes-ekyes. Yɛ kabɛ náá, ɛkok ɛ kakwyit kɔ mot ɔɔ, mot tak aatwaalel ɛ́ twaalela.]»

45 Gwaka bɛ nagwak kana tak ɛ, eboo bɛghaa-Zɛɛb, nɛ eFalizyɛ nabɛ ɛ́, bɛ eegu náá, Yezu nalii ɛ́ nɛ nɔɔ. 46 Bɛ ɛ́ boozɛkan ɛsaa mɛpek étɛp bɛ neemɛt nyɛ. Bɛ nadi ɛ́ nɛ bwoo ekaab mɛdhuu mɛ bot ɛ nadi tin ɔ. Bot ɛ tak nake ɛ́ náá, Yezu ɛ́ ngoolel-Mɛkpa ɛ Zɛɛb.