1 Wɔ gwaa, Yezu zɛlii nɛ mɛdhuu mɛ bot ɛ nadi tin ɔ, dɔɔ nɛ bɛdjekel bɛ. 2 Nyɛy nɛ nɔɔ náá: «Mɛsa mɛ bɛghaŋ ɛ mɛkana mɛ etsi nɛ eFalizyɛ ɛ́ ɛlyo bot dum nɛ dáa etsi ɛ Moiiz di egoka nɛ ɛkɛ ɛ. 3 Bi goka ɛ́ nɛ ɛlooba nɛ nɔɔ, da bi ɛ́ sa esesɛɛ bɛ aalwom bin ɛ, djas. Yɛ kabɛ mɛfulu mɔɔ ɔɔ, sa mot ààsa dáa bɔɔ. Etɛɛ náá, bɛ ààsa esesɛɛ ee bɛ di elyo bot ɛ. 4 Bɛ ɛpekaŋal mɛkɔm mɛ na dil-dil di ɛlyelɛpe é ɛbɛp ɛ, bɛ kakɛl ɛ́ kɔ mɛbyak mɛ bot. É di'enek, bɛ kadi ɛ́, ààkwyɛl ɛkokee-keeak nɛ djin bɛ neekogek mɛdil mɛ mɛkɔm mɛ tak. 5 Bɛ sa esesɛɛ bɔɔ djas ɛ́, étɛp bɛ neetela mɛnyel. Deenek, yɛ kabɛ Ekwyala ee Mɛkpa ɛ Zɛɛb bɛ di ebɛk é ebhata-bhwoob bɔɔ nɛ é mɛmbɔ mɔɔ ɔɔ, bɛ sa epɛk e tak ɛ́ ɛbɔkɛpe. Yɔbɔ ekel ee di lataa kɔ ekaad nɛ elɔbɔ bɔɔ ɛ nɛ dyeebadjaa dhaa tyɛ. 6 Tɔ mɛbyoŋ, bɛ dyeebakwyɛl ɛdisi ɛ́ kɔ mɛbhóó mɛ koobelaa étɛp bot ɛ duu ɔ. Yɛ kabɛ tɔ́ ndjaa mendjaala mɛ eYuda ɔɔ, 7 bɛ dyeebakwyɛl ɛ́ bot swos bɛ nɛ duu kɔ mɛbɛsɛɛ é edi ee bot di esɛɛga ɛbuɛpe ɔ. Bɛ kwyɛl ɛ́, bot djóo bɛ "Lyoel".

8 Yɛ kabɛ biyɔ ɔɔ, nàkeka náá, bi djóoaa "Lyoel", etɛɛ náá, biyɔ djas ɛ́ bɔn-nyɛɛg ngɔt. Bi ɛ́ nɛ lyoel ngɔt. 9 Sa mot ààdjóo mot kɔ bɔs'ak "Sɛɛg'es" etɛɛ náá, sɛɛg'en ɛ́ ngɔt, mot di pɛ tɔ gwoo ɔ. 10 Nàkwyɛlka náá, bot djóo bin "Kukuma" etɛɛ náá, kukuma yen ɛ́ ngɔt, Mɛsia. 11 Mot di boo-mot lɔɔg ɔ, ye goka ɛ́ nyɛ di tyee mot-mɛsa mɛ bɔn-nyɛɛg. 12 Mot di eghɛɛ nyel tɔ bɛsɔ ɔ, nyɛ waasilaa. Mot di esil nyel tɔ bɛsɔ ɔ, nyɛ waabenaa.»

13 «Haaa kpaa-ghoŋ nɛ nen, biyɔ bɛghaŋ ɛ mɛkana mɛ etsi nɛ eFalizyɛ, bot ɛ mɛdjhaaz pɛ ɛko, bhimis pɛ si! Bi ɛpediyal bot ɛbɛ ɛ Ɛyoŋ ɛ di tɔ gwoo ɔ. Biyɔ bɛmet, bi aanàkwaani. Tin, bi ààkwyɛl náá, bot ɛ di ekwos ɛni ɔ, bɛ ni tɔ Ɛyoŋ ɛ tak.

[14 Haaa kpaa-ghoŋ nɛ nen, biyɔ bɛghaŋ ɛ mɛkana mɛ etsi nɛ eFalizyɛ, bot ɛ mɛdjhaaz pɛ ɛko, bhimis pɛ si! Bi ɛpedɛk bɛkus ɛ boa esa bɔɔ djas. É di tak wat, bi nɛ kwyɛl ɛdul ɛ mendjaala na kpɔkɔlɔm, étɛp ɛtela mɛnyel tɔ bot. Étɛp tak ɛ di náá, bi aapɛ́ɛaa ɛ́ epɛ́ɛ wat di na lyel-lyel, ààbɛ nɛ ghoŋ ɛ!]

15 Haaa kpaa-ghoŋ nɛ nen, biyɔ bɛghaŋ ɛ mɛkana mɛ etsi nɛ eFalizyɛ, bot ɛ mɛdjhaaz pɛ ɛko, bhimis pɛ si! Bi nɛ tɔ́ mɛdjoŋ é edi djas kɔ bɔs nɛ kɔ eboo mɛdhii mɛ mɛsɔn, étɛp ɛsaa náá, mot ngɔt myaal ɛdjaala Zɛɛb eYuda. Tin, bi ɛ bela mot ɛ du bin ɔɔ, bi kaliig yiizaag mot ɛ, nyɛ di mot di egoka nɛ ɛkɛdyak tɔ du na kɔm-kɔm dhaa-dhaŋak biyɔ bɛmet.

16 Haaa kpaa-ghoŋ nɛ biyɔ bot ɛ edhim di edjɛɛd bot ɔ. Bi dyeebalɛɛ ɛ́ náá: "Mot ɛ tuwal myoŋ nɛ mɛsoŋ kɔ Ndjaa-ebuwa ɔɔ, yɛ aanàsa sonok. Nyɛ katuwal myoŋ nɛ mɛsoŋ kɔ lɔɔd di tɔ Ndjaa-ebuwa ɔɔ, nyɛ goka ɛ́ nɛ ɛsa sa nyɛ tuwal myoŋ nɛ mɛsoŋ kɔ ɛsu ɛ tak ɛ." 17 Bi ɛ́ endjemet e bot, bot ɛ edhim! Ɛyé di edhaa mɛtaŋ tin, yɛ ɛ́ lɔɔd ohoo, Ndjaa-ebuwa di edjɛ lɔɔd edɛɛ ɔ?

18 Bi baalɛɛ ɛ́ náá: "Mot ɛ tuwal myoŋ nɛ mɛsoŋ kɔ mesa-ebuwa ɔɔ, yɛ aanàsa sonok. Nyɛ katuwal myoŋ nɛ mɛsoŋ kɔ buwa di kɔ mesa-ebuwa tak ɔɔ, nyɛ goka ɛ́ nɛ ɛsa sa nyɛ tuwal myoŋ nɛ mɛsoŋ kɔ ɛsu ɛ tak ɛ." 19 Biyɔ bot ɛ edhim! Ɛyé di edhaa mɛtaŋ tin, esa e buwa ohoo, nɛghu mesa-ebuwa di esa náá, esa e buwa di tɔ edɛɛ ɛ? 20 Yɛ bɛ náá, mot eetuwal myoŋ nɛ mɛsoŋ kɔ mesa-ebuwa ɔɔ, nyɛ tuwal yɛ ɛ́ kɔ mesa-ebuwa dɔɔ nɛ kɔ esa e buwa di ekaa kɔ mesa ɛ. 21 Mot ɛ di etuwal myoŋ nɛ mɛsoŋ mɛ kɔ Ndjaa-ebuwa ɔɔ, nyɛ tuwal myoŋ nɛ mɛsoŋ mɛ tak ɛ́ dɔɔ nɛ kɔ din ɛ Zɛɛb mot di tɔ ndjaa tak ɔ. 22 Mot di etuwal myoŋ nɛ mɛsoŋ, da nyɛ ɛ́ nɔɔ gwoo dáa tyaasɛs ɔɔ, nyɛ tuwal yɛ ɛ́ kɔ bóó mɛkoozi ɛ Zɛɛb nɛ din ɛ Zɛɛb, mot di kɔ tak ɔ.

23 Haaa kpaa-ghoŋ nɛ nen, biyɔ bɛghaŋ ɛ mɛkana mɛ etsi nɛ eFalizyɛ, bot ɛ mɛdjhaaz pɛ ɛko, bhimis pɛ si! Bi dyeebakwyɛl ɛ́ ɛtuud Zɛɛb nɛ ndyaal wat tɔ endyaal kam e nadjeebe nɛ eka e na mbɛɛ mɛnuub zɛnɔɔ aghomkɔtɔ. Tin, bi kadhuugal ɛ́ etɛtɛ mɛlyo mɛ di nɛ boo mɛsuk tɔ etsi ɛ. Mɛlyo mɛ tak ɛ́: epiki, enɛm esa, nɛ ɛkɛ dáa Zɛɛb di ekwyɛl ɛ. Yenek djas ɛ́ sa di egoka náá, bot du mɛlu djas nɛ zii, ààbet dhiiti sonok ɛ. 24 Biyɔ, bɛdjɛɛdel ɛ na edhim! Bi ɛpesyal mɛnyok men ekaab náá, ba mɔɔ kuŋ ɛ́ zɛkɛdhaa tɔ tak, ghuna bi ɛpemin boo yaaga bal!

25 Haaa kpaa-ghoŋ nɛ nen, biyɔ bɛghaŋ ɛ mɛkana mɛ etsi nɛ eFalizyɛ, bot ɛ mɛdjhaaz pɛ ɛko, bhimis pɛ si! Bi gwyii ɛ́ ekoŋ e ebɛɛlɛ nɛ ekoŋ e esaan. Tin, pɛ tɔ emɔ tak kadi ɛ́ tɔɔɔ nɛ esa e djii nɛ embee mɛkwosak men. 26 Biyɔ eFalizyɛ, bot ɛ edhim! Pookogwyiika sok tɔ mɔ bɛɛlɛ. Tin, pɛ koŋ tak ɛ́ waadi dɛɛ.

27 Haaa kpaa-ghoŋ nɛ nen, biyɔ bɛghaŋ ɛ mɛkana mɛ etsi nɛ eFalizyɛ, bot ɛ mɛdjhaaz pɛ ɛko, bhimis pɛ si! Bi ɛ́ dáa mɛvit mɛ nasumaa ɛnyɔɛpe, da lɔɔbaa ɛpyaab ɛ. Enɛm e tak nyen ɛ́ pɛ kel é mis mɛ bot, ghuna tɔ tak, yɛ ɛ́ ɛbyok ɛ egwyes di ààbɛ nɛ tsik ɛ, nɛ membi mɛ dhiiti esonok di nɛ edhuud ɛ. 28 Yɛ ɛ́ dáa biyɔ, bot ɛ di ebee bin ɔ, bɛ ke ɛ́ náá, bi ɛ́ bot ɛ epiki. Ghuna pɛ tɔ len, yɛ ɛ́ tɔɔɔ nɛ mɛdjhaaz pɛ ɛko, bhimis pɛ si, nɛ embee esesɛɛ.

29 Haaa kpaa-ghoŋ nɛ nen, biyɔ bɛghaŋ ɛ mɛkana mɛ etsi nɛ eFalizyɛ, bot ɛ mɛdjhaaz pɛ ɛko, bhimis pɛ si! Bi ɛpesum embɛɛ mɛvit étɛp bɛngoolel ɛ Mɛkpa ɛ Zɛɛb. Bi ɛpekoobal nɛ ɛsɔn ɛ́ mɛvit mɛ bot ɛ epiki. 30 Bi dyeebake ɛ́ náá: "Mena ɛpedi ɛ́ dika é ghɛŋ bɛbhaab binaka ɔɔ, pe mena nabɛ ɛ́ ààgwakel nɛ nɔɔ étɛp ɛgó ɛ bɛngoolel ɛ Mɛkpa ɛ Zɛɛb." 31 Deenek, bi ɛpemyaal biyɔ bɛmet náá, bot ɛ nadi egó bɛngoolel ɛ Mɛkpa ɛ Zɛɛb ɔ nabɛ ɛ́ bɛbhaab bin. 32 Ɛbɛsɛɛ'enek tsabidibila, belaka, duka ko bɛbhaab bin nalik bin yɛ ɛ. Silalka mɛsa mɛ bɛ nakan ɛ. 33 Biyɔ bɛnyɔ, mbyak mɛgel! Bi aasa dáa étɛp bi needi ààbela feŋ du na kɔm-kɔm?

34 Gwakeka mɛ ɛnyɔɛpe: mɛ waadhis bin bɛngoolel ɛ Mɛkpa ɛ Zɛɛb, bɛtsoŋ ɛ bot, nɛ bɛtɛtɛ bɛghaŋ ɛ mɛkana mɛ etsi. Bi ɛ́ waagó bɛdhiiti, bi ɛ́ waabem bɛdhiiti é mɛlaaba. Bi ɛ́ waanyuu bɛdhiiti nɛ eghwyɛs tɔ mendjaa mɛ mendjaala mɛ eYuda men. Bi ɛ́ waadu bɛ nɛ swaka eghaada nɛ eghaada étɛp bi neegó bɛ. 35 Tinaak, guka náá, ɛbiyo djas bot di esa kɔ bot ɛ epiki kana dwoo ɛsyee ɛ Abhɛl mot epiki, kɛyaka nɛ yɛ Zakaali mɔn ɛ Bhaalaki bi nagó pak Di na Dɛɛ ɛ Ghɛŋ nɛ mesa-ebuwa ɔ, yɛ waabulelaa kɔ len. 36 Mɛ lɛɛ bin ɛ́ etɛp e tsɛɛtsɛ náá, esesɛɛ binek djas kwyɛ kɔ elo e kɔkɔ bot ɛ mɛbyel mɛ bot ɛ dika mos'aak.»

37 «Yeluzalɛm! Yeluzalɛm wɔy mot di egó bɛngoolel ɛ Mɛkpa ɛ Zɛɛb ɔ, wɔy mot di egó bot ɛ Zɛɛb, di edhis wɔ bak nɛ mɛkok ɔ. É sok edhen mɛ di ekwyɛl ɛsɛɛg bot ɛ di kɔ dɛl ɛ lɔ dáa nabwa-kuu di esɛɛg bɔn bɛ si mɛbhap mɛ ɛ, biyɔ ààkwyɛl! 38 Deenek guka náá, ndjaŋ'en ɛ́ waalik wum! 39 Nɛ tsɛɛtsɛ, mɛ lɛɛ bin ɛ́ náá, bi aanàkabaabee mɛ, kana dwoo pan mos'ak, kɛyaka nɛ dwoo bi aake náá: "Mɛnyɔ nɛ mot aazyɛ nɛ din ɛ Ghɛŋ ɔ*!"»