1 «Bi ɛ́ kotiibal dum nɛ dáa bi di esa enɛm esa nɛ bot étɛp ɛduwal ɛ Zɛɛb ɛ. Bi ɛ́ sa deenek é mis mɛ bot, étɛp bot djas neeke náá: "Biyɔ ɛ́ di bɛmbɛɛ ɛ bot" ɔɔ, bi aanàkwaabela efute yii Sɛɛg'en di tɔ gwoo aadjɛ ɛ. 2 Wɔ kwyɛl ɛdjɛ djel mot sonok ɔɔ, wɔ goka ɛ́ nɛ ɛsa yɛ tɔ sɔ, sa mot ààgu. Nàsa dáa bot ɛ lualɛŋ di esa tɔ mendjaa mɛ mendjaala mɛ eYuda nɛ é egba ɛ. Bɛ sa deenek ɛ étɛp bot needuwal bɛ. Tsɛɛtsɛ nɛ tsɛɛtsɛ, mɛ lɛɛ bin ɛ́ náá: Mbi bot binɔk eezebela yɔbɔ efute. 3 Yɛ bɛ náá, mbɔ eghɛŋ bɔ ɛpedjɛ djel mot sonok ɔɔ, yɛ àànyɔ náá, mbɔ ɛmyɛl ɛ lɔ gu. 4 Etɛɛ náá, ye goka ɛ́ náá, sa wɔ djɛ mot ɛ, ye di sɔ. Tin, Sɛɛg'en, mot di egu dáa wɔ di ekwyee bot tɔ sɔ ɛ, nyɛ waadjɛ wɔ yɔ efute.»

5 Yezu eezɛke nɛ nɔɔ náá: «Bi ɛ́ di edjaala ɔɔ, nàdika dáa bot ɛ mɛdjhaaz pɛ ɛko, bhimis pɛ si, bɛ dyeebakwyɛl ɛdjaala ɛ metetel tɔ mendjaa mɛ mendjaala mɛ eYuda nɛ é bɛman, étɛp bot neebee bɛ. Tsɛɛtsɛ nɛ tsɛɛtsɛ, mɛ lɛɛ bin ɛ́ náá: bot binɔk eezebela yɔbɔ efute. 6 Yɛ kabɛ wɔy ɔɔ, wɔ kwyɛl ɛdjaala Zɛɛb ɔɔ, nia tɔ dhɛŋ'ɔ, da wɔ ɛ́ diyal ɛbɛ. Bhii tak, da wɔ ɛ́ djaala nɛ Soog di tɔ di sɔ ɔ. Tin, Soog, mot di ebee esesɛɛ wɔ di esa tɔ sɔ ɛ, nyɛ waadjɛ wɔ efute.

7 É sok bi di edjaala ɛ, sa mot ààbasal ɛkpa ɛ wat esok nɛ esok gwyes dáa bot ɛ di ààbɛ bot ɛ mbyak eYuda ɔ. Bɔɔ gek ɛ́ náá, Zɛɛb ɛ́ waagwak bɛ, etɛɛ náá, bɛ nɛ bil mɛkpa ɛbuɛpe tɔ mendjaala mɔɔ. 8 Sa mot ààbaŋa bɛ, etɛɛ náá, Sɛɛg'en nɛ gu sa elyem bin di ekwos ɛ, ɛsok nɛ bi nɛ waab nɛ nɛ. 9 Deenek, Gwakeka dáa bi di egoka nɛ ɛdjaala ɛ. Keka náá:

"Zɛɛb Sɛɛg'es di tɔ gwoo ɔ,

ye goka ɛ́ náá,

din ɛ lɔ di Dɛɛ, ye guaa.

10 Ye goka ɛ Ɛyoŋ ɛ lɔ zyɛ.

Beta náá, ɛkwosak ɛ lɔ sael kɔ bɔs,

dáa ye di esael pɛ tɔ gwoo ɛ.

11 Djɛa bis mos edee di egoka nɛ nes ɛ.

12 Pela ɛbiyo ɛ bis zesa ɛ,

etɛɛ náá, bisɔ pe, bis ɛpepel bot ɛ nazesa bis ɛbiyo ɔ.

13 Sa náá, bis nàkwyekwyɛ tɔ mɛbhowal,

é di'enek, pɛka bis é mɛmbɔ mɛ Mbee mot.

[Etɛɛ náá, yɛ ɛ́ wɔy ɛ di nɛ Mɛkoozi, nɛ mɛbwala, nɛ duma na kɔm-kɔm. Amɛn.]"

14 Guka náá: Bi ɛ́ pel ɛbiyo ɛ bot ɛ di etɔ́ nɛ ɛsa bin ɔ, Sɛɛg'en di pɛ tɔ gwoo ɔ, waabaapel yebɔ pe. 15 Tin, yɛ kabela náá, bi ààpel bɛsɔ bin ɔɔ, Sɛɛg'en di tɔ gwoo ɔ, aanàkwaabaapel ɛbiyo ɛ bi di esa ɛ.»

16 «Yɛ bɛ náá, bi ɛpetsi edee étɛp mendjaala ɔɔ, sa mot ààdi nɛ bhwoob ghoŋ dáa bot ɛ di nɛ lualɛŋ ɔ. Bɛ lyaal bhwoob ghoŋ deenek ɛ, étɛp bot djas neegu náá, bɛ ɛpetsi edee. Tsɛɛtsɛ nɛ tsɛɛtsɛ, mɛ lɛɛ bin ɛ náá: bot binɔk eezebela yɔbɔ efute. 17 Yɛ kabɛ wɔy ɔɔ, wɔ tsi edee ɔɔ, gwyiia bhwoob, da wɔ ɛ́ lɔɔb mul é lo, 18 etɛɛ náá, bot needi ààgu náá, wɔ ɛpetsi edee. Tin, yɛ ɛ́ Soog mot di tɔ sɔ ɔ di egu, deenek Soog, mot di ebee esesɛɛ djas wɔ di esa tɔ sɔ ɛ, nyɛ waadjɛ wɔ efute.»

19 «Nàsaaka ɛdi ɛ́ nɛ bɛtɛ nɛ ekum é bɔs'ak. Ekum ee di náá, bɛsɛs nɛ emaa ɛ́ waapul ɛ. Ekum ee di náá, bot ɛ djii ɛ́ waakwak ɛbo ɛ ndjaa, da djii, nɔɔ, tɔ́ nɛ yɛ ɛ. 20 Kwomka ekum bin pɛ daa Zɛɛb. Penek, bot ɛ djii aanàkwaani kɛdjii yɛ, bɛsɛs nɛ emaa aanàkwaapul yɛ. 21 Etɛɛ náá, é di mot di ekwom esa bɛ ɔ, lyem'ɛ di ɛ́ tin.»

22 «Mis ɛ́ dáa lama nyel. Yɛ bɛ náá, mis mɔ ɛpenyaasok ɛnyɔɛpe ɔɔ, gua náá, nyel'ɔ djas ɛ́ tɔ selele. 23 Yɛ kabɛ náá, mis mɔ ɛpekpaŋ ɔɔ, nyel'ɔ djas ɛ́ tɔ ghooghom. Yɛ kabɛ náá, ngel di tɔ lɔ eezedim ɔɔ, tin, kwaa yenek mɛghomela aanɔŋel nɛ yé?»

24 «Ye tok nɛ mot ngɔt aadi nɛ ghwyil ɛsa mɛsa mɛ ekukuma ebá. Yɛ bɛ deenek ɔɔ, nyɛ waabhina ngɔt, da nyɛ ɛ́ kwyɛl nwyak ngɔt, nɛghu nyɛ kaseya nɛ ngɔt ɔɔ, nyɛ waabyasal nwyak ngɔt. Bi tok nɛ ghwyil ɛsa mɛsa mɛ Zɛɛb nɛ mɛsa mɛ epata é di wat.»

25 «Yɛ ɛ́ étɛp tak ɛ mɛ di elɛɛ nɛ nen náá: Nàbemka ba kɔ ɛsu ɛ tsik'en dum nɛ tɛp edee bi aadɛ ɛ, ààkoobɛ-bɛaak mɛnyel men dum nɛ ekaad bi aabɔt ɛ. Etɛɛ náá, tsik eedhaa edee, nyel eedhaa ekaad nɛ mɛtaŋ. Etsal é? 26 Beeka enen pɛ ɛko, bɛ ààbɛ epyeeb, ààbɔ́k edee di ewum tɔ epyeeb ɛ. Bɛ ààkwom edee tɔ mɛbhwaa nɛ kɔ etaa. Tin, dhi Sɛɛg'en di tɔ gwoo ɔ, di djɛ bɛ edee! Bi ààpadhaa enen nɛ boo mɛtaŋ é mis ɛ Zɛɛb é? 27 Yɛ bɛ náá, bi ɛpebem ba ɔɔ, ɛzɛ pak'en di nɛ ghwyil ɛbil ba ɛlu ɛ wat kɔ mɛlu mɛ tsik'ɛ?

28 Étɛp yé bi di ebem ba kɔ ɛsu ɛ ekaad? Beeka dáa mɛzɛm di ekwyil nɛ ɛwyee tɔ pyeeb ɛ. Mɛzɛm mɛ tak ààsa mɛsa, ààlat ekaad. 29 Tin, betka mɛ lɛɛ bin náá, dɔɔ nɛ mɛkoozi Salomɔŋ, nɛ boo duu yɛ, nyɛ nabɛ ɛ́ ààbɛ nɛ mbɛɛ kaad nadi enyɔ dhaa zɛm wat tɔ kɔkɔ mɛzɛm menek ɛ. 30 Yɛ bɛ náá, Zɛɛb ɛpebét eka ee di tɔ dik mos, da djɛmɛn yɛ ɛ́ nɔŋaa, dikaa tɔ du ɔɔ, haaa gwyata nɛ biyɔ! Zɛɛb tok nɛ ghwyil ɛsa deenek nɛ lyem'ɛ met étɛp'en é? Ye nakoozodi náá, bi tok nɛ boo ɛmyaal nɛ nɛ!

31 Nàbemka ba é ɛkeke náá: "Mena aadɛka yé? Mena aadɛka yaa mɛdii? Mena aabɔtka yé?" 32 Yenek djas, yɛ ɛ́ bot ɛ membyak mɛ sis ɛ́ di ebwos esa binek mɛlu djas. Tin, Sɛɛg'en mot di tɔ gwoo ɔ nɛ gu náá, bi ɛ́ nɛ gwyes tak. 33 Pookosaaka sok Ɛyoŋ ɛ Zɛɛb nɛ tsik tɔ epiki nyɛ di ewaab ɛ. Tin, Zɛɛb ɛ́ waadjɛ bin esa djas bi di nɛ gwyes tak ɛ. 34 Nàbemka ba nɛ etɛp aasael djɛmɛn ɛ, etɛɛ náá, etɛp e djɛmɛn aagwyɛ lo ɛ́ nyɛ ɛmet, dwoo nɛ dwoo ɛ́ nɛ yɛ ɛkwosak.»